लुका 5
5
याॽलिहा टिङ्खुबाचि
(मट्टि ४:४-२२; मारकुस १:१६-२०; युहान्ना १:४०-४२)
1इॽया येसु गानेसरेट लोमॆ टोम्पॽलिॽवामि कॆक्पि येप्ढाङ्पा लॆटा। डिरिक् याॽमिचि निवाँहाङ्मि खानावाँ खेम्सि खो चक्से डाबामि। 2येसुऎ टोम्पॽलिॽवामि कॆक्पि हिच्चि योवाखङ् खाङ्टकु। हाङ् ङा लाप्खुबाचि चाइ योवाखङ् याइमानुङ् खोचिम् जाला होप्ढाङ्पा लॆटामि। 3एक्क योवाखङ् चाइ सिमोनमि लॆटा। येसु आक्कुबि ठाङा हाङ् लोसु “सिमोन योवाखङ् मिःॽम मॆअङ् लाखॆटॆ।” हाङ् आक्कुबि पेन्से खोसॆ याॽमिचि चिन्पकुचि।
4खो यामुसिट्टा हाङ् सिमोन लोसु, “योवाखङ् रुम्रुम्पा ठालबि लाखॆटॆ हाङ् ङा लाॽमाम् लागि जाला कगॆ।” 5सिमोनऎ लोसु, “चिन्खुबो, काङ्कॆ सेन्सेन् याक्टारढारि जाला कगुङ्का हाङ्सङ् एक्क सङ्क ङा मालाप्हिसुङ्का। हाङ्सङ् आनॆ लोमिम्पासॆ कॆ जाला कगुकुङ।” 6हाङ् जाला कग्मारग डिरिक् ङा सिट्टामि, आक्खाचिम् जालान नाग्लॆह्मा परका। 7हाङ् खोचिऎ होइक योवाखङ्बिऎ लाङ्काम्चि ङा लाबक्बाॽमाम् लागि हुगॆ सेःरुचि। आक्खाचि डाबामि हाङ् ङा लाबक्बाक्कुचि। लाबक्मे लाबक्मे हिच्चि योवाखङ्पि डिरिक् ङा लिसा हाङ् योवाखङ्न रुम्ढॆॽमा ठाबका।
8ग खाङ्टकु हाङ् सिमोन पाट्रुसऎ येसु स्यामिस्से लोसु, “ओ पारभु, काङा हिङ्वा याॽमिङा, मसॆ काबाङ् मॆअङ् खाइटॆ।” 9गर लॆःॽलि ङा सिॽमिम्पासॆ सिमोन नुङ् उम् लाङ्काम्चि आक्टिखारामि। 10हाङ् सिमोन नुङ् सोरि टङ्मानुङ् योम्पक् मुखुबा जब्डियामि पासाचि याकुब नुङ् युहान्ना स आक्टिखॆॽमिम्पा लॆटाचि। हाङ् येसुऎ सिमोन लोसु, “आकिसिऎ, मान्ठाभनॆ आइयॆबाङ् आनॆ ङा हॆॽनॆ टर याॽमिचि लाम्फु खाङ्मिसे काबि लाटॆखुबा लिःॽना।” 11हाङ् आक्खाचिऎ योवाखङ् किनाराबि लाटॆटुचि हाङ् चोब्न याइडाआचु हाङ् येसु टिङ्पकाचु।
साखक्मि टुक्मावाऎ लाॽमिम्पा याॽमि नुबक्मिम्पा
(मट्टि ८:१-४; मारकुस १:४०-४५)
12येसु एक्क हाटाबि चुआ। आक्कुबि एक्क साखक्मि टुक्मावाऎ पुम्खॆडुयॆ याॽमि चुआ। आक्कसॆ येसु खाङ्टकु हाङ् लाङ्पि स्यामिस्से लोसु, “चिन्खुबो, आनॆ निवाँ टिसुना भनॆ काङा नुबक्मिक्हिॽङाना।” 13हाङ् येसुऎ टाङ्पाम् हुक् आक्क याॽमि सक्पि युङ्से लोसु, “काङा मिनुॽङा। आना नुबक्खारॆ!” आक्रलॽन खोम् साखक्मि टुक्मावा नुबक्खारा। 14हाङ् येसुऎ खो लोसु, “ग खानावाँ आसास आइटॆचॆ। टर याटाङ्पाबि खारॆ हाङ् खाङ्मिटॆ। हाङ् मोसाऎ लोसिन्टॽन सङ्टिस्से आना सॆङ्सॆङॆ लिमिम्पा खानावाँ चोब्नमि लुम्पि खाङ्मिटॆचॆ।”
15टर याॽलऎबाङ् डिरिक् येसुमि खानावाँ फुबका हाङ् ओइर याॽमिचि खोम् खानावाँ खेम्सि हाङ् नुबक्माम् लागि टाबकामि। 16हाङ्सङ् येसु चाइ आसास माआमिहा ठालाबि निवाँहाङ् नुङ् यामुसि खॆॽयुङ्सा।
लाङ् फॆन्नॆ याॽमि नुबक्मिम्पा
(मट्टि ९:१-८; मारकुस २:१-१२)
17इॽया येसुऎ याॽमिचि चिन्मॆ सिसुचि। आक्कुबि फारिसिचि नुङ् मोसामि यायेॽमा चिन्खुबाचि सङ्क खोम् कॆक्पि पेन्ढाङ्पा लॆटामि। आक्खाचि चोब्न गालिल नुङ् याहुडियाबिऎ गाँवाँ नुङ् यारुसालेम हाटा बाङ्स टामिम्पा लॆटामि। येसु नुङ् टुक्खुबाचि नुबक्मिॽमॆ पारभु निवाँहाङ्मि चॆॽमावा चुआ। 18याॽमिचिऎ लाङ् ऎफॆङ्खुबा एक्क याॽमि लिठाम् नुङ्न खिन्टॆटुचि। खोचिऎ खो खिम् हङ्सि येसुमि कॆक्पि टॆःॽमा यगुचि, 19हाङ्सङ् डिरिक् याॽमिचि लिमिम्पासॆ खोचिऎ येसुबि टॆःॽमाम् लागि लाम्फुन मान्यक्टकुचि। मसॆ आक्खाचिऎ आक्क टुक्खुबा याॽमि खिम्मि वाचेन्टु लाखॆटुचि हाङ् वाचेन् अःगुचि हाङ् आक्कबाङ् लिठाम् नुङ्न टाम्मम येसुमि कॆक्पि हेड्ढिन्टुचि। 20आक्खा याॽमिचिऎ लॆःॽमिम्पा निवाँयुङ् खाङ्टकु हाङ् येसुऎ आक्क टुक्खुबा लोसु, “लाङ्काम्, आनाम् हिङ्वा यङ्राह्रा।”
21येसुऎ यामुमिम्पा ग खानावाँ खेमुचि हाङ् मोसामि यायेॽमा चिन्खुबाचि नुङ् फारिसिचि उम्चि टाङ्पा टाङ्पाबि गर काबकामि, “निवाँहाङ्मि खानावाँ इचाखुबा ग आसार? निवाँहाङ्बाङ् होइक आसॆस हिङ्वा यङ्निमा हेसुचिनि।” 22आक्खाचिम् निवाँबिहा खानावाँ येसुऎ वाबु हाङ् लोसुचि, “मान्ठा आन्ना गर मिङ्कानिहा? 23आक्क लाङ् फॆन्नॆ याॽमि ‘आनाम् हिङ्वा यङ्निडा लोमा काम्नुऎ लिऎ रु यॆप्पकॆ हाङ् लाम्ढुसॆ’ लोमा काम्नुऎ लिऎ? 24टर बाखाटेम्पि काङा याॽमिमि पासा नुङ् हिङ्वा यङ्मिॽमॆ ढुप्पाट्ट चु कामानुङ् आन्ना काङॆ चुमॆक्सङ् पिकानि।” आक्क डॆङ्पि खोसॆ आक्क लाङ् फॆन्नॆ लोसु, “कॆ आना लोक्ना, यॆप्पकॆ हाङ् टाङ्पाम् लिःॽमारा खिम्मानुङ् खिम्पि खारॆ।” 25हाङ् आक्क याॽमि आक्रलॽन आक्खाचिम् ङारिङ्पिॽन पःगा हाङ् टाङ्पाम् लिःॽमारा खिम्मानुङ् निवाँहाङ्मि निङ् ठेस्से खिम्पि खारा। 26आक्खाचि चोब्न आक्खॆटुचि हाङ् किसिआमि! आक्खाचिऎ निवाँहाङ्मि निङ् ठेस्से लोसुचि, “आइ काङ्कॆ मान्टॽमा आक्खॆॽमाहा खानावाँ खाङुङ्का!”
लेबि सेःॽमिम्पा
(मट्टि ९:९-१३; मारकुस २:१४-१७)
27आक्क डॆङ्पि आक्कबाङ् खॆॽमॆ सिसार येसुऎ एक्क लेबि लोमॆ यावॆङ्ग लाखुबा याॽमि यावॆङ्ग खोम्ठाम् ठालबि पेन्ढाङ्पा खाङ्टकु। हाङ् येसुऎ आक्क लोसु, “काङा टिङ्ङॆ।” 28हाङ् लेबिऎ चोब्न ठका याइडउ हाङ् खो टिङ्पकु।
29आक्क डॆङ्पि लेबिऎ येसुमि लागि खोम् खिम्पि ढ्या भोजा टिसु हाङ् खो चामा चासि सेःरु। आक्क चामा चामार यावॆङ्ग लाखुबा ऎॽवाहा याॽमिचि नुङ् होइढा याॽमिचि सङ्क चुआमि। 30फारिसिचि नुङ् खोचिमि लुम्पि मोसामि यायेॽमा चिन्खुबाचिऎ ङेन्से येसु लोसुचि, “मान्ठाल आन्ना यावॆङ्ग लाखुबा हिङ्वा याॽमिचि नुङ् पेन्से चाकानिहा?” 31येसुऎ आक्खाचि लोसुचि, “आटुक्खुबाचिम् लागि सिढा पिक्खुबा याॽमि पाब्नि टर टुक्खुबा याॽमिचि पाबुक्मि। 32आक्रक्न काङा निवाँनेन्चिम् लागि हॆॽनॆ टर हिङ्वा याॽमिचिम् लागि आक्खाचिमि काइसे निवाँबाङ् ऎम्पकानॆ कामानुङ् सेसि टाडिङॆ।”
साक्नेॽमॆ बारेबि सिम्मिम्पा
(मट्टि ९:१४-१७; मारकुस २:१८-२२)
33इॽया आक्खाचिऎ येसु लोसुचि, “युहान्नामि टिङ्खुबाचि हसहस साक्नेरुक्मि हाङ् निवाँहाङ् नुङ् यामुॽमि। हाङ् फारिसिचि टिङ्खुबाचि सङ्क आक्रक्न लॆमि हाङ्स आना टिङ्खुबाचि चाइ चाःक्मि हाङ् डुङुॽमि।” 34येसुऎ आक्खाचि लोसुचि, “माल आन्नॆ डाङ्पा खोचिनुङ् लिरढारि डाङ्पामि लाङ्काम्चि साक्नॆॽमिकाम्निहॆ? 35टर गरहा डिना सङ्क टाः, डाङ्पा आक्खाचिबाङ् फाक्बकुचि हाङ् आक्खाचिऎ साक्नेरुॽमि।”
36येसुऎ होइक काठा सङ्क लोसुचि, “आसॆस उम्चङ् चेः नाग्से याॽलऎ काइसॆ पिक्खॆम्पा चेःबि लेप्टिसुचिनि। एप्टिसा हाङ्स उम्चङ् चेः नासॆलि हाङ् उम्चङ् चेः याॽलऎ काइसॆ पिक्खॆम्पा चेः नुङ् टङ्नि।
37 “आक्रहाङ्न आसॆस याॽलऎ साखक्मि बॆक्खाबि आङ्गुरमि डिबु युङुचिनि। युङ्इट्टा हाङ्स साखक्मि बॆक्खा पॽलिङ्खॆ हाङ् आङ्गुरमि डिबु होढिङ्खॆ हाङ् साखक्मि बॆक्खा स नासॆलि। 38मसॆ आङ्गुरमि उम्चङ् डिबु उम्चङ् साखक्मि बॆक्खाबिॽन युङ्मा लॆ। 39याॽमिचिऎ चिक्खॆम्पा आङ्गुरमि डिबु डुङुकुचि हाङ् उम्चङ् आङ्गुरमि डिबु नेन्चउचिनि मान्ठाभनॆ आक्खाचिऎ चिक्खॆम्पा आङ्गुरमि डिबु डुङुकुचि हाङ् काग्मि, ‘चिक्खॆम्पान चानुऎ लिः’।”
Currently Selected:
लुका 5: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
