लुका 4
4
येसुमि निवाँ ठाःक्मिम्पा
(मट्टि ४:१-११; मारकुस १:१२-१३)
1येसु यारडान हङ्माबाङ् ऎम्पक्मार सॆङ्सॆङॆ लावा खोनुङ् चुआ। हाङ् सॆङ्सॆङॆ लावाऎ खो आसास पेम्मिनिहा ठालबि निवाँ ठाःग्सि लाखॆटु। 2आक्कुबि साइटानऎ खो हिङ्वा लॆमिॽमाम् लागि रिचिपङ् डिनाढारि निवाँ ठागु। येसुऎ रिचिपङ् डिनाढारि माङस माचामिम्पा लॆटा। मसॆ खो एट्टान सागॆ सिमिम्पा लॆटा। 3आक्रलॽन साइटानऎ येसु लोसु, “चाइबान आना निवाँहाङ्मि पासाना हाङ्ग इघा लुङ्कॽवा चारेपा लिर कामानुङ् लोसॆ हाङ् ग चारेपा लिर।” 4येसुऎ गर कामानुङ् खानावाँ ऎम्पिटु, “निवाँनेन् साब्चिराबि गरहाङ् साब्डा, चारेपाऎ टेःॽन याॽमि हिङ्चानि।” 5आक्क डॆङ्पि साइटानऎ येसु एक्क टक्भॆऎ पङ्पङमाबि लाखॆटु हाङ् एच्छक्पिॽन खाबाटेमबिऎ चोब्न हाङ्टेम् खाङ्मिस्से खो लोसु, 6“कॆ आना इघा चोब्न हाङ्टेम्मि हाङ् नुङ् इघा चोब्न चासुम्मि टुङ्घङ्पा मुहिॽना, मान्ठाभनॆ इघा चोब्न काम हुक्पि चु हाङ् कॆ आसा पिॽमा मिकुङ्र खो पिॽहिकुङ। 7काङा स्यामिॽङॆ हाङ् इघा चोब्न आनाम् लि।” 8येसुऎ आक्क लोसु, “निवाँहाङ्मि साब्चिराबि गरहाङ् साब्डा, ‘आनॆ आनाम् पारभु निवाँहाङ् स्यामिटॆ हाङ् खोम् टेःॽन खानावाँ खेमॆ’।”
9हाङ् साइटानऎ येसु सॆङ्सॆङॆ हाटा यारुसालेमबि लाखॆटु हाङ् निवाँहाङ्मि खिम्मि वाचेन्टु टॆटु हाङ् लोसु, “आना चाइबान निवाँहाङ्मि पासाना हाङ्ग गबाङ् चेढिन्टॆ, 10मान्ठाभनॆ निवाँनेन् साब्चिराबि गरहाङ् साब्डा,
‘आना खाङ्माम् लागि निवाँहाङ्ऎ खोम् निवाँखाटॆखुबाचि पाङ्हाङ्कुचि’
11‘हाङ् आनाम् लाङ् लुङ्कॽवाबि ऎटःक्सिॽल कामानुङ्
आक्खाचिऎ आना हुक्हुक्पिॽन टाःबुक्मि’।”
12येसुऎ साइटान लोसु, “निवाँहाङ्मि खानावाँबि गर सङ्क साब्डा, आनॆ आनाम् पारभु निवाँहाङ्मि निवाँ ठाःग्मा फॆन्नि।” 13साइटानऎ येसुमि निवाँ ठाःग्सिटु हाङ् होइक काम्नुऎ लः मान्यक्टॽलढारि खो याइडउ हाङ् खाइटा।
गालिलबि येसुमि योम्पक
(मट्टि ४:१२-१७; मारकुस १:१४-१५)
14सॆङ्सॆङॆ लावामि चॆॽमावा टक्चउ हाङ् येसु गालिलबि ऎन्टाआ। हाङ् गॆअङ्मॆअङ्हा चोब्न ठालबि खोम् खानावाँ फॆबका। 15हाङ् खोसॆ याहुडिचि खोम्ठाम् खिम्पि चिम्पकुचि हाङ् चोप्पासॆ खोम् निङ् ठेॽयुङ्सुचि।
येसु याॽमिचि खोम्ठाम् खिम्पि
(मट्टि १३:५३-५८; मारकुस ६:१-६)
16येसु खो पुबक्मिम्पा हाटा नासारटबि टाआ। याॽलऎ रॽन खो नाचामॆ डिना याहुडि याॽमिचि खोम्ठाम् खिम्पि खारा हाङ् निवाँहाङ्मि खानावाँबि साॽमिम्पा खानावाँ इमाम् लागि येप्पका। 17खोसॆ इमाम् लागि निवाँहाङ्मि खानावाँ लोखुबा यासाइयाऎ साॽमिम्पा साब्चिरा पिट्टुचि हाङ् खोसॆ साब्चिरा हेम्बकु हाङ् गरक्मा साॽमिम्पा ठाल लाबकु,
18“निवाँहाङ्मि लावा का सक्पि चु, मान्ठाभनॆ निवाँहाङ्ऎ माङ्स माआमिहा याॽमिचि नुऎ खानावाँ खेम्मिॽमाम् लागि काङा सॆःक्डिङ। हाङ् सॆक्चिम्बि सिडामिहाचि फाॽमॆ नुङ् मिक् आखाङ्खुबाचि खाङ्खुबा मुमॆ खानावाँ इमाम् लागि हाङ् डुखा पिॽमिम्पाचि फाक्सि निवाँहाङ्ऎ काङा पाङ्हाङ्डिङ्,
19हाङ् टाङ्पाम् याॽमिचि फाॽमॆ डिना टाःडा कामानुङ् खेम्मिॽमाम् लागि पारभु निवाँहाङ्ऎ काङा पाङ्हाङ्डिङ।”
20आक्क डॆङ्पि येसुऎ साब्चिरा बॆगुहाङ् ऎल्लाहाङ्पिट्टुचि हाङ् खो पेना। आक्कुबि चुखुबाचिऎ खो खाङ्ढाङ्पा लॆटुचि। 21हाङ् खोसॆ आक्खाचि लोसुचि, “निवाँहाङ्मि ग खानावाँ आइ आन्नॆ खेम्भॆॽमारॽन लिखॆडा।”
22चोब्न याॽमिचिऎ खोम् निङ् ठेरुचि। नाम्नावाँऎ चेप्खेमिम्पा खोम् खानावाँ खेमुचि हाङ् खोचि आक्खॆटुचि। खोचि गर कासामि, “माल इग योसेफमि पासा हॆॽनॆ?” 23येसुऎ आक्खाचि लोसुचि, “चाइबान ह आन्नॆ काङा गर लोःॽङानि, ‘ओ सिढा लॆखुबा याॽमि, याॽल आनान नुबकॆ।’ हाङ् ‘काफारनुहुम लोमॆ ठालबि लॆमिम्पा आक्खॆॽमाहा योम्पक् आनाम् हाटाबि सङ्क लॆटॆ’।”
24“टर आन्ना कॆ चाइबान लोकानि, निवाँहाङ्मि खानावाँ इखुबाचि उम्चि ठालबिहा याॽमिचिऎ ङॆबुचिनि। 25हाङ् होइक सङ्क एक्क खानावाँ कॆ आन्ना लोकानि, निवाँहाङ्मि खानावाँ लोखुबा एलियामि लःबि सुम्चि निङ् ठुक्चि माइना वारि मॆन्टा हाङ् याॽमिचिऎ आचाटाक्मॆ लः टाआ। आक्रल इस्राएलबि ऎॽवा लाङ्मिॽमाचि चुआमि। 26हाङ्सङ् इस्राएलबिहा लाङ्मिॽमाचिबि हॆॽनॆ टर सिडोनमि सारपाट लोमॆ ठालबिऎ एक्क लाङ्मिॽमाबि टेःॽन निवाँहाङ्ऎ एलिया पाङ्हाङ्सु। 27आक्रक्न इस्राएलबि एलिसा निवाँहाङ्मि खानावाँ लोखुबा लॆटार आक्कुबि ऎॽवा साखक्मि टुक्खाचि चुआमि हाङ्सङ्क आक्खाचि आसास मानुबक्मिट्टुचि टर सिरिया हाङ्टेम्बिऎ नामान् लोमॆ याॽमि टेःॽन नुबका।”
28ग खानावाँ खेमुचि हाङ् याॽमिचि खोम्ठाम् खिम्पि खोम्टि खॆॽमिम्पा चोब्न याहुडिचि एट्टान याॽचाबक्कुचि। 29आक्खाचि पगामि हाङ् येसु लाबुचि हाङ् सॆस्से हाटाबाङ् लाबहाक्सुचि। हाटा एक्क पङ्पङमाबि चुआ, मसॆ खोचिऎ येसु म पङ्पङ्माबाङ् कक्ढाङ्मा यगुचि। 30हाङ्स येसु आक्खाचिम् लुम्पाङ् लेल्लिहिङ् खारा।
खारिॽमाङ्ऎ लाॽमिम्पा याॽमि नुबक्डॆ
(मारकुस १:२१-२८)
31आक्क डॆङ्पि येसु गालिलमि कफर्नहुम लोमॆ ठालबि टाआ। हाङ् चोब्न नाचामॆ डिना खोसॆ याॽमिचि चिन्युक्सुचि। 32खोम् खानावाँ खेमुचि हाङ् आक्खाचि आक्खॆटुचि मान्ठाभनॆ खोम् खानावाँ ढुप्पाट्ट नुङ्मा लॆटा।
33याहुडि याॽमिचि खोम्ठाम् खिम्पि एक्क काइसॆ खारिॽमाङ्ऎ लाॽमिम्पा याॽमि चुआ। आक्क ढ्या साम्लाऎ गर कामानुङ् याकासा, 34“ओ नासारटमि येसु, आनॆ काङ्का माङ् लॆःॽमा परक्डाचिमॆ? माङ् आना काङ्का सेस्सि टाडानॆ हॆ? आना निवाँहाङ्ऎ पाङ्हाङ्पा सॆङसॆङ्ऎ याॽमिना कामानुङ् कॆ लेःॽना।” 35ग खानावाँ खेमु हाङ् येसुऎ आक्क खारिॽमाङ् वोमानुङ् लोसु, “यङ् उगॆ हाङ् ग याॽमिबाङ् खाइहाङ् इट्टॆ।” आक्क याॽमि चेब्मानुङ् खारिॽमाङ् खाइटा हाङ्सङ् आक्क याॽमिबि हाम्पि स माङ्स हुवा मान्लि।
36चोब्न याॽमिचि आक्खॆटुचि हाङ् गर कामानुङ् खानावाँ इबकामि, “ग याॽमिम् खानावाँबि मान्टक्मा ढुप्पाट्ट चुऎ, मान्ठाभनॆ गसॆ वोमा अक्सि खारिॽमाङ् सङ्क खाइहाङ्ऎ रछ।” 37हाङ् गॆअङ्मॆअङ्बिहा चोब्न ठालबि येसुमि खानावाँ फुबका।
येसुऎ ऎॽवा ह ऎॽवा याॽमिचि नुबक्मिॽमिम्पा
(मट्टि ८:१४-१७; मारकुस १:२९-३४)
38याहुडि याॽमिचि खोम्ठाम् खिम्बाङ् येसु आम्पका हाङ् सिमोनमि खिम्पि खारा। आक्रल सिमोनमि नाम्मा डॆटॆम्पासॆ इम्चाढाङ्पा लॆटा। खिम्पिहा याॽमिचिऎ “इग नुबक्पिच्चिमॆ” कामानुङ् खो लोसुचि। 39येसु खोम् कॆक्पि खारा हाङ् डॆटॆमा वोसु हाङ् आक्रलॽन डॆटॆमा याइखॆटु हाङ् खो पःग्लिन्टा हाङ् खोचि चामा डुङ्मा पिट्टुचि।
40नाम् डाखॆटु हाङ् याॽमिचिऎ ओइर टुक्खुबाचि येसुबि लाटॆटुचि। खोसॆ खोचि चोब्नबि हुक् युङु हाङ् चोब्न नुबक्मिट्टुचि। 41ऎॽवाहा याॽमिचिबाङ् खारिॽमाङ्चि सङ्क गरहाङ् याकासे आम्पकामि, “आना निवाँहाङ्मि पासाना,” हाङ्सङ् येसुऎ आक्खाचि वोमानुङ् यामुमा मापिट्टुचि मान्ठाभनॆ आक्खाचिऎ खो निवाँहाङ्ऎ सॆक्मिम्पा खिरिस्ट कामानुङ् लेॽयुङ्सुचि।
येसु आसस माआमिहा ठालबि
(मारकुस १:३५-३९)
42नाम्सङ्माक्नि येसु आसास माआमिहा ठालबि खारा। हाङ्सङ् याॽमिचिऎ खो यक्से टाआमि। आक्खाचिऎ खो यक्टकुचि हाङ् ऎखॆॽमिॽमॆ निवाँऎ लोसुचि, “काङ्का ऎयाइडाचिमॆ।” 43टर खोसॆ आक्खाचि लोसुचि, “काङॆ होइढा ठालबि सङ्क निवाँहाङ्मि हाङ्टेम्मि काम्नुऎ खानावाँ खेम्मिॽमा लॆमि। मान्ठाभनॆ निवाँहाङ्ऎ काङा ग योम्पक्मि लागिन पाङ्हाङ्डिङ।” 44गरहाङ् खोसॆ चोब्न याहुडिया ठालबिहा याहुडि याॽमिचि खोम्ठाम् खिम्पि खेम्मिसे खारा।
Currently Selected:
लुका 4: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
