लुका 6
6
येसु नाचामॆ डिनामि पारभु
(मट्टि १२:१-८; मारकुस २:२३-२८)
1इॽया येसु नुङ् खो टिङ्खुबाचि नाचामॆ डिना सिचाम्मि रोपाबाङ् खॆॽमॆ सिसामि। आक्रल खोम् टिङ्खुबाचिऎ सिचाम्मि बाला बिक्से हुक्पि नुक्मानुङ् चाबकुचि। 2आक्कुबि चुखुबा एक्क हिप्पा फरिसिचिऎ ग खाङ्टकुचि हाङ् आक्खाचि लोसुचि,
“मोसामि यायेॽमाऎ नाचामॆ डिनाबि लॆःॽमा फॆन्नि लोमिम्पा योम्पक् आन्नॆ मान्ठा लॆमिम्पा?” 3हाङ् येसुऎ आक्खाचि लोसुचि, “डाउड नुङ् खोम् लाङ्काम्चि सागॆ सिसुचिर खोसॆ माङ् लॆटुयॆ? आन्नॆ निवाँहाङ्मि साब्चिरा पाढामॆलॆटिटाम्नॆ? 4खो निवाँहाङ्मि खिम्पि खारा हाङ् युङ्ठङ्बि सङ्टिम्पा याटाङ्पाचिऎ टेःॽन चामा नुऎ चामा ठका टाबु हाङ् चउ हाङ् खोम् याॽमिचि सङ्क पिट्टुचि।”
5हाङ् येसुऎ खानावाँ लुक्पिसे आक्खाचि लोसुचि, “काङा याॽमिमि पासा नाचामॆ डिनामि सङ्क पारभुङा यो।”
येसुऎ नाचामॆ डिना नुबक्मिम्पा
(मट्टि १२:९-१४; मारकुस ३:१-६)
6होइक नाचामॆ डिना येसु याहुडिचि खोम्ठाम् खिम्पि खारा हाङ् चिन्पकुचि। आक्कुबि एक्क चुप्ठिङ् हुक् सोप्खॆमिम्पा याॽमि चुआ। 7हाङ् मोसामि यायेॽमा चिन्खुबाचि नुङ् फारिसिचि येसुऎ नाचामॆ डिना याॽमिचि नुबक्मिकुचि हाङ् काइखॆमिॽमा हेऎरु कामानुङ् चोप्से खाङुचि। 8टर खोसॆ आक्खाचिम् निवाँबिहा खानावाँ वाप्टकु हाङ् आक्क हुक् सोप्खॆम्पा याॽमि लोसु, “डाबॆ हाङ् चोब्नमि लुम्पि यॆबॆ।” आक्क डाबा हाङ् आक्कुबि यॆबा। 9हाङ् येसुऎ आक्खाचि सिमुचि, “यायेॽमा रक्न नाचामॆ डिना हाम्पॆ योम्पक् मुमा काम्नुऎ लिऎ? काम्नुऎ योम्पक् यिक्मा रु काइसॆ योम्पक् यिक्मा? हिङ्पॽमिॽमा रु सेॽमा?” 10हाङ् येसुऎ चोब्न गॆअङ्मॆअङ्हा याॽमिचि खाङुचि हाङ् आक्क हुक् सोप्खॆमिम्पा याॽमि लोसु, “आनाम् हुक् खिङ्पकॆ।” आक्कसॆ हुक् खिङ्पकु, हाङ् उम् हुक् नुबक्खारा।
11टर ग खाङ्टकुचि हाङ् मोसामि यायेॽमा चिन्खुबाचि नुङ् फारिसिचि सिर्ढॆ ङाङ्पखॆॽटाआमि हाङ् येसु माङ् लॆःॽमॆ कामानुङ् खोचि खोचिबि खानावाँ टङ्पकामि।
येसुऎ एपङ्हि टिङ्खुबाचि सॆःक्मिम्पा
(मट्टि १०:१-४; मारकुस ३:१३-१९)
12आक्रल टाङ्पाटेन निवाँहाङ् नुङ् यामुमाम् लागि येसु पङ्पङ्मा पोट्टि खारा हाङ् सेन्सेन् निवाँहाङ् नुङ् यामुसा। 13वेन्डाक् लाम्पॆ नाम्स लिसा हाङ् खोसॆ चोब्न खो टिङ्खुबाचि खोम् कॆक्पि सेरुचि हाङ् आक्खाचिबाङ् एपङ्हि सॆःगुचि हाङ् आक्खाचि सॆक्ढुङ्पाचि कामानुङ् निङ् पिट्टुचि। 14सॆःक्मिम्पा एपङ्हि टिङ्खुबाचिम् निङ् इघान यो, सिमोन, खो पाट्रुस निङ् स पिट्टु, हाङ् आन्डिरियास खोम् नुसा, याकुब, युहान्ना, फिलिप हाङ् बाराठोलोमाइ, 15माट्टि, ठोमा, आल्फायासमि पासा याकुब, सिमोन खो हाङ्टेम् नेन्चा लोयुक्सुचि, 16हाङ् याकुबमि पासा याहुडा, याहुडा इस्कोरियोट, डॆङ्पि खोसॆ येसु बङ्सिटु।
नुबक्माम् लागि याॽमिचि येसुबि टामिम्पा
(मट्टि ४:२३-२५)
17येसु नुङ् खो टिङ्खुबाचि पङ्पङ्माबाङ्कॆ युम्फे उक्सामि हाङ् एक्क ढ्या टेम्माबि येबामि। आक्रल आक्कुबि होइढा डिरिक् खो टिङ्खुबाचि नुङ् होइढा डिरिक्बाङ् डिरिक् याॽमिचि खो चुॽमाम् लागि चोब्न याहुडिया, यारुसालेम नुङ् पॆरॆरॆमा कॆक्पिऎ सिडोन नुङ् चेन्चेन् लोमॆ हाङ्टेम्बाङ् डाॽमिम्पा लॆटामि। 18आक्खाचि खोम् खानावाँ खेम्सि हाङ् टाटाङ्पाम् टुक्मावाबाङ् नुबक्माम् लागि आक्कुबि टामिम्पा लॆटामि। हाङ् आक्कुबि टाखुबा चोब्न खारिॽमाङ्ऎ लाॽमिम्पाचि नुबकामि। 19आक्कुबि चुखुबा चोब्न टुक्खाचिऎ खो डिन्चामा यगुचि मान्ठाभनॆ खोबाङ्कॆ टुक्खाचि नुबक्मिॽमॆ चॆक्मावा आम्पक्ढाङ्पा लॆटा, आक्कसॆ चोब्न टुक्खाचि नुबक्मिॽयुक्सुचि।
येसुऎ चिन्मिम्पा ढ्या खानावाँ
(मट्टि ५:१-१२)
20हाङ् येसुऎ खो टिङ्खुबाचि खाङ्से लोसुचि,
“निवाँ टक्चामिम्पा आन्ना माङ्स माआनिहा याॽमिचि, मान्ठाभनॆ निवाँहाङ्मि हाङ्डाम् आन्नाम्न।
21नुःचाक्मि ह सागॆसिमिम्पाचि, मान्ठाभनॆ आन्नॆ बखार चाटकाम्नि। निवाँ टक्चामिम्पा ह हाप्खुबाचि आन्ना यिचाकानि।
22“निवाँ टक्चामिम्पा आन्ना, याॽमिचिऎ काङा याॽमिमि पासा सक्पि आन्नॆ निवाँयुङ् लॆमिम्पासॆ आन्ना काइसा याॽमिचि कामानुङ् सिच्चासे फागुक्मि हाङ् ङेसिमा लुलु मुःक्मि। 23आक्रल आन्ना चेन्चासे लाॽलुसानॆ! मान्ठाभनॆ आन्नॆ पारुबि ढ्या इनाम् टक्चाकाम्नि। याॽलहा निवाँहाङ्मि खानावाँ लोखुबाचि सङ्क आक्खाचिम् टुबालाबाचिऎ आक्रक्न लॆटुचि।
24टर ढिक्कारा, आन्ना ह चुचाखुबाचि! मान्ठाभनॆ आन्नॆ आन्नामि काम्नुऎ हाङ् चुचाखुबा हिङ्खामा यॆस्सिडाम्नि।
25ढिक्कारा! आन्ना ह बखार चाखुबाचि! मान्ठाभनॆ आक्खाचि साक्मेन्चा लिॽमि। ढिक्कारा! ह यिचासे लाॽलुखुबाचि, मान्ठाभनॆ आन्ना मिॽवाबि सिकानि हाङ् हाबुकानि।
26ढिक्कारा, ह याॽमिचिम् लुम्पि निङ् चुचाखुबाचि, मान्ठाभनॆ गरहा निङ् ठेॽमॆ योम्पक् ग याॽमिचिम् टुबालाबाचिऎ सङ्क निवाँहाङ्मि हुन्नहा खानावाँ लोखुबाचि लॆःॽमिम्पा लॆटा।
टाङ्पा काइर लॆखुबाचि नुःर लॆःॽमॆ
(मट्टि ५:३८-४२)
27“टर काम् खानावाँ खेम्खुबाचि आन्ना कॆ लोकानि, टाङ्पा काइर लॆखुबाचि नाम्नावाँ पिट्टाम्चिनॆ हाङ् टाङ्पा सिच्चोखुबाचि काम्नुःर लॆटाम्चिनॆ। 28आन्ना चाप्हिमा लॆखुबाचि आसिका पिट्टाम्चिनॆ। हाङ् आन्ना काइर लॆखुबामि लागि निवाँहाङ् नुङ् काम्नुःर लिर कामानुङ् यामुबिट्टाम्नॆ। 29याॽमिऎ आना एक्क यापक्पि फॆगुक् आक्क होइक यापक्स टाप्पिटॆ। हाङ् आनाम् बोट्टाङ् लामा यक्खुबाचि लॽलिङ् स लाखॆॽमा पिट्टॆचॆ। 30आनानुङ् ङाग्खुबा चोब्न पिट्टॆ हाङ् आनाबाङ् लॆल्हॆमिम्पा ठका आऎन्डापॆ। 31होइढा याॽमिचिऎ आन्ना माङ् लॆपिॽङामिर मिनुकानि, आन्नॆ सङ्क खोचि आक्रक्न लॆटाम्चिनॆ।
32“आन्ना नाम्नाम् पिसिखुबाचि टेःॽन नाम्नाम् पिसिकाम्चिनि हाङ्ग आन्नॆ माङ् काम्नुऎ लॆटाम्निहा? मान्ठाभनॆ हिङ्वाचिऎ सङ्क टाङ्पा नाम्नाम् पिसिखुबाचि नाम्नाम् पिसिकुचि। 33हाङ् आन्ना काम्नुःर लॆखुबाचि टेःॽन काम्नुःर लॆकाम्नि हाङ्ग आन्नॆ माङ् काम्नुऎ लॆटाम्निहा? मान्ठाभनॆ हिङ्वा याॽमिचि सङ्क आक्रक्न लॆॽमि।
34“हाङ् ऎम्मॆ निवाँऎ याॽमिचि सिङि पिकाम्चिनि हाङ्ग आन्नॆ माङ् नुऎ लॆटाम्निहा? मान्ठाभनॆ हिङ्वाचिऎ सङ्क मरक्न लामॆ निवाँऎ हिङ्वा याॽमिचिन सिङि पिकुचि।
35“टर आन्ना काइर लॆखुबाचि नाम्नाम् पिसिटाम्चिनॆ, हाङ् आक्खाचि नुःर लॆटाम्चिनॆ। हाङ् पारुबि आन्नॆ ढ्या ठका टक्चाकाम्नि। एम्मॆ निवाँऎ सिङि आटिसानॆ हाङ् आन्ना चाइबान चोब्बाङ् सङ्पिऎ निवाँहाङ्मि पासाचि लिकानि, मान्ठाभनॆ निवाँहाङ्ऎ काइसॆ निवाँ नुङ् हिङ्वाचि नाम्नाम् पिसिकुचि। 36आन्नामि पारुबिऎ आपा नाम्नावाँ नुङ्मा लिसिन्टॽन आन्ना सङ्क नाम्नावाँ नुङ्मा लिसानॆ।
होइढा याॽमिचि आब्डिक् आटिमॆ
(मट्टि ७:१-५)
37“होइढा याॽमिचि ऎइचाआम्नॆ हाङ् आन्नामि सङ्क खानावाँ इचोउचिनि। होइढा याॽमिचि काइसॆ योम्पक् लॆःॽमि आलोसाम्चिनॆ हाङ् आन्ना सङ्क काइसा योम्पक् लॆखुबाचि कामानुङ् लोसानिनि। यङ्मिटाम्चिनॆ, हाङ् आन्नॆ सङ्क यङ्निमा टक्चाकाम्नि। 38होइढा याॽमिचि पिट्टाम्चिनॆ हाङ् निवाँहाङ्ऎ आन्ना सक्से सक्से चेप्खॆॽलढारि पिकानि। मान्ठाभनॆ माङ्टहाङ् आन्नॆ याॽमिचि पिकाम्नि आक्रहाङ्न निवाँहाङ्ऎ सङ्क आन्ना पिकानि।”
39हाङ् येसुऎ आक्खाचि एक्क काठा लोसुचि, “मिक् ऎखाङ्खुबा एक्क याॽमिऎ होइक मिक् ऎखाङ्खुबा याॽमि सॆस्से लाम्फु खाङ्मिहिसुनि। खोसॆ लाम्फु खाङ्मिइट्टु हाङ्स हिप्पान रुम्रुम्पाबि सिक्चि। 40टिङ्खुबा चिन्खुबाबाङ् ढ्या लिनि। टर काम्नुःर चिन्सिकु हाङ् चिन्खुबा रक्न लिमा हेकु।
41“टाङ्पाम् लाङ्काम्मि मिक्पिऎ मिःछुॽमा याॽवा सिवाँ खाङ्टकाम्नि टर मान्ठा टाङ्पाम् मिक्पि चुऎ डिड्ढा सिङ् खाङ्टकाम्निनॆ? 42आन्नामि मिक्पि चुहा डिड्ढा सिङ् खाङ्टकाम्निनि हाङ्ग, मान्टॽल आन्नॆ ‘मान्टॽल होइक याॽमि आनामि मिक्पिऎ याॽवा लाबक्पिक्खाना’ लोहिकाम्नॆ? ओ हुन्नऎ याॽमि, याॽलि आनामि मिक्पि चुऎ डिड्ढा सिङ् लाबकॆ, हाङ् लाङ्काम्मि मिक्पि चुहा मिःछुॽहा याॽवा सिवाँ लाबक्हिकुना हाङ् काम्नुःर खाङ्टकुना।
सिङ् नुङ् आक्कमि उम्चा
(मट्टि ७:१६-२०; १२:३३-३५)
43“काम्नुऎ सिङ्लुङ्ऎ काइसॆ उम्चा सिसुनि हाङ् काइसॆ सिङ्लुङ्ऎ काम्नुऎ उम्चा सिसुनि। 44चोब्न सिङ्लुङ् आक्कमि उम्चाबाङ्न लेटखॆ। मान्ठाभनॆ चिचिङ्मि झ्यालाबाङ् आसॆस अन्जिर बिगुचिनि, हाङ् चिचिङ्मि सिङ्बाङ् आङ्गुर कोबुचिनि। 45काम्नुऎ याॽमिऎ खोम् निवाँबि चुऎ काम्नुऎ ठकान लाबकु हाङ् काइसॆ याॽमिऎ खोम् निवाँबि चुऎ काइसॆ ठकान लाबकु। मान्ठाभनॆ मान्टक्मा खानावाँऎ निवाँ चेप्खॆमिम्पा लि, याॽमिचि आक्कन यामुक्मि।
हिच्चि खिम्मि काठा
(मट्टि ७:२४-२७)
46“काङॆ लोमिम्पा रक्न लॆटानिनि हाङ्ग मान्ठा काङा ‘पारभु, पारभु’ लोॽङानिहा? 47काबि टाखुबा हाङ् काम् खानावाँ खेम्खुबा हाङ् आक्रक्न लॆखुबा याॽमि मान्टक्मा लिऎ कॆ लोखानि। 48आक्क एक्क खिम् हेप्खुबा याॽमि रक्मान, खोसॆ खिम्मि खाँबा ठुङ्माम् लागि मिम्मु मिम्मु लुङ्कॽवा ढारि टोसु हाङ् खाँबा ठुङु। हाङ् ढ्या वारि नुङ् भोलाऎ आक्क खिम् डॆःरु हाङ्सङ्क आक्क खिम् माङ्स मॆलि, मान्ठाभनॆ आक्कमि खाँबा मिम्मु मिम्मुढारि ठुङ्ढिमिम्पा लॆटा। 49टर काम् खानावाँ खेमुकुचि हाङ्स आक्रक्न ऎलॆखुबा चाइ गरक्मा याॽमि रेम, आक्कसॆ खाँबा मिम्मुढारि मॆठुङ्रे खिम् हेबु हाङ् वारि नुङ् भोलाऎ आक्क खिम् डॆःरु हाङ् आक्क भङ्लिक्ट भङ्लिङ्खारा हाङ् योरारा।”
Currently Selected:
लुका 6: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
