युहान्ना 9
9
जान्मबाङ्न मिक्सुरुम्पा एक्क याॽमि येसुऎ नुबक्मिॽमिम्पा
1येसु आक्कबाङ् खॆॽमॆ सिसार खोसॆ जान्माबाङ्न मिक्सुरुम्पा लॆऎ एक्क याॽमि खाङ्टकु। 2हाङ् खोम् टिङ्खुबाचिऎ खो सिमुचि, “चिन्खुबो, आसॆ चाइ हिङ्वा लॆटुऎ हाङ् ग याॽमि जान्मबाङ्न मिक्सुरुम्पा लिसॆ? खोसॆॽन हिङ्वा लॆटुवॆ रु उम् आपाआमाचिऎ?” 3येसुऎ लोसुचि, “गसॆ हिङ्वा लॆमिम्पासॆ स हॆॽनॆ हाङ् खोम् आपा आमाऎ हिङ्वा लॆःॽमिम्पासॆ स हॆॽनॆ, टर निवाँहाङ्मि योम्पक् गमि हिङ्खामाबि खाङ्मुर कामानुङ् ग लिडॆ रेम। 4लेन्टा लॆरक्न काङा पाङ्हाङ्खुबामि योम्पक् मुमा लॆ। सेन्टारान्पा चाइ सॆॽलन टामेपाइ, आक्क टाहाङ् आसॆस योम्पक् मुहिसुचिनि। 5हाङ् काङा बाखाटेम्पि चुरढारि काङान बाखाटेम्मि ओप्लिङङा।”
6आक्खा खानावाँ इसिटु हाङ् येसुऎ बाखाबि डुगु, हाङ् बाखा चगुहाङ् मिःक्सुरुम्पामि मिक्पि टिबिटु। 7हाङ् खोसॆ आक्क लोसु, “खारॆहाङ् सिलोआम्मि टोम्पलिॽवाबि ङाचिक् सगॆ” (सिलोआम लोमिम्पा चाइ पाङ्हाङ्पा यो)। आक्क खाराहाङ् उम् ङाचिक् सगुहाङ् खाङ्खुबा लिसाहाङ् ऎन्टाआ।
8हाङ् खोम् गॆअङ्मॆअङ्हाचि नुङ् खोसॆ ङाग्चामिम्पा खाङ्खुबाचि टाङ्पाटाङ्पाबि गर कासामि, “गग पेन्से ङाग्चाखुबा आक्क याॽमि हॆॽनॆ?” 9हाङ् ऎॽवाचिऎ लोसुचि, “ग याॽमि आक्कनये” हाङ् होइढाचि चाइ गर कासामि, “आक्रक्मान खाङ्मु, टर हॆॽनॆ।” टर खोसॆ लोसुचि, “काङा आक्क मिक् आखाङ्खुबा याॽमिङान।” 10आक्क डॆङ्पि खोचिऎ खो सिमुचि, “मान्टक्लो आना मिक् खाङ्खुबा लिसानॆ?” 11हाङ् खोसॆ लोसुचि, “येसु निङ् लॆखुबा एक्क याॽमिऎ बाखा चगुहाङ् काम् मिक्पि टिबिटिङ् हाङ् सिलोआम लोमॆ टोम्पलिॽवाबि खारॆहाङ् सगॆ कामानुङ् लोसिङ। हाङ् काङा खारिङ् हाङ् सगुङ् हाङ् खाङ्खुबा लिखारिङ।” 12हाङ् आक्खाचिऎ सिमुचि, “आक्क याॽमि हाम्पि चुऎ?” आक्कसॆ लोसुचि, “लेआ, कॆ लेङानि।”
13हाङ् खोचिऎ आक्क याॽमि फारिसिचिबि लाखॆटुचि। 14येसुऎ बाखा चःग्मानुङ् आक्कमि मिक्पि टिसे नुबक्मिॽमिम्पा डिना चाइ नाचामॆ डिना लॆटा। 15मसॆ फारिसिचिऎ, “आना मान्टॽलो मिक् खाङ्खुबा लिसानॆ?” कामानुङ् सिमुचि। हाङ् खोसॆ लोसुचि, “खोसॆ बाखा चःगुहाङ् काम् मिक्पि टिबिटिङ् हाङ् काङॆ आक्क सगुङ् हाङ् खाङ्खुबा लिसिङ।” 16हाङ् एक्क हिप्पा फारिसिचि कासामि, “ग याॽमि निवाँहाङ्बाङ् टामिम्पा हॆॽनॆ, मान्ठाभनॆ खोसॆ नाचामॆ डिना सङ्क योम्पक् मुकु।” टर होइढाचि कासामि, “हिङ्वा याॽमिऎ मान्टक्ल आक्खॆॽमाहा योम्पक् यिक्हिकुवॆ?” आक्रहाङ् उम्चि लुम्पि याटक्माटक् लिसा।
17मसॆ खोचि होइखेपा सङ्क आक्क मिक्सुरुम्पा याॽमिबि ऎन्पकामि हाङ् लोसुचि, “खोसॆ आना मिक् खाङ्खुबा मुसा, आना चाइ खोम् बारेबि माङ् काग्नॆ?” खोसॆ लोसुचि, “खो ग निवाँहाङ्मि खानावाँ लोखुबान।”
18हाङ् आक्क याॽमिमि उम् आपाआमाचि सेःॽमानुङ् मासिम्लढारि आक्खा याहुडिचिऎ आक्क याॽमि मिक्सुरुम्पा लॆटा हाङ् मिक् खाङ्खुबा लिसा कामानुङ निवाँयुङ् मालॆटुचि। 19हाङ् आक्खा फारिसिचिऎ आक्क मिक्सुरुम्पामि आपाआमाचि सिमुचि, “माल् ग आम्नि पासा हॆ? हाङ् माल् ग मिक्सुरुम्पान जान्म लिडॆ हॆ? मरहाङ्ग मान्टक्ल ग खाङ्खुबा लिसॆ?” 20हाङ् आक्कमि उम् आपा आमाऎ लोसुचि, “एम, ग काचिगमि पासान। ग जान्म लिमारक्न मिक्सुरुम्पा लॆटा। 21टर खोसॆ मान्टलो मिक् खाङ्खुबा लिसॆ हाङ् आसॆ खाङ्हिखुबा मुसुवॆ कामानुङ् काङ्कॆ माङ्स लेसुङ्कानि। ग वॆन्चा पिक्खॆडा, खोम् खानावाँ खोसॆॽन इकु। मसॆ आन्नॆॽन खो सिमाम्नॆ।” 22याहुडिचिम् टुङ्घङ्पाचिम् किसिमावॆ खोचिऎ आक्र लोसाचु, मान्ठाभनॆ आसॆ चाइ येसु खिरिस्ट कामानुङ् लोकु आक्क याॽमि चाइ याहुडिचि खोम्ठाम् खिम्बाङ् लाबहाङ् कामानुङ् खानावाँ इसिम्पा लॆटामि। 23मसॆ उम् आपा आमाऎ “खो वॆन्चा पिक्खॆडा, खोन सिमाम्नॆ” कामानुङ् लोसुचि।
24हाङ् आक्खा याहुडिचिऎ आक्क मिक्सुरुम्पा याॽमि होइखेपा स सेःरुचिहाङ् लोसुचि, “निवाँहाङ्बि कासाम चासे चाइबानऎ खानावाँ इसॆ। काङ्कॆ लेकुङ्का ग याॽमि चाइबान हिङ्वा याॽमिन।”
25हाङ् खोसॆ लोसुचि, “खो हिङ्वा याॽमि रु हॆॽनॆ लोमॆ चाइ कॆ लेङानि। कॆ गरक्टे लेकुङ् काङा मिक्सुरुम्पा लॆटिङ्, टर खाङ्खुबा लिडिङ।”
26हाङ् आक्खाचिऎ खो गरहाङ् सिमुचि, “खोसॆ आना माङ् लॆटॆ? हाङ् आनाम् मिक् मान्टक्ल खाङ्खुबा मुसुवॆ?”
27हाङ् खोसॆ लोसुचि, “काङॆ आन्ना याॽलन लोइडानि, टर आन्नॆ माखेमाम्नि। हाङ् फेरि हस मान्ठा खेन्मा मिनुकानिह? आन्ना स खोम् टिङ्खुबाचि लिमॆ निवाँ मुसाम्निहा रु माल?”
28हाङ् खोचिऎ खो वोसे लोसुचि, “आना चाइ आक्क याॽमिम् टिङ्खुबाना, टर काङ्का ग मोसामि टिङ्खुबाचि। 29हाङ् निवाँहाङ् मोसा नुङ् यामुमिम्पा लॆटा कामानुङ् काङ्कॆ लेकुङ्का, टर ग याॽमि चाइ हाबाङ् टाडॆ लोमॆ स लेसुम्कानि।”
30हाङ् खोसॆ लोसुचि, “खोसॆ काङा मिक् खाङ्खुबा मुसिङ्, हाङ्स खो हाम्पा टाडॆ लोमॆ आन्नॆ लेसाम्निनि। गग आक्खॆॽमॆ खानावाँन लिसा! 31हाङ् निवाँहाङ्ऎ हिङ्वाचिम् खानावाँ खेमुनि, टर निवाँनेन् नुङ् खोम् निवाँर पाइखुबा याॽमिचिम् खानावाँ टे खेमुकु लोमॆ काङ्कॆ लेकुङ्का। 32हाङ् जान्म लिमारक्न मिक्सुरुम्पा याॽमि मिक् खाङ्खुबा मुमिम्पा खानावाँ ग बाखाटेम् लिबम्पाबाङ् हढारि माखेम्टि। 33हाङ् ग याॽमि निवाँहाङ्बाङ्कॆ टामिम्पा हॆॽनॆ हाङ्ग खोसॆ माङ्स योम्पक् यिक्हिसुनि।”
34हाङ् खोचिऎ लोसुचि, “आना हिङ्वाप्न जान्मा लिमिम्पा याॽमिऎ काङ्का चिन्मा यक्चिमॆ?” कामानुङ् आक्खाचिऎ खो याहुडिचि खोम्ठाम् खिम्बाङ् लाबहाक्सुचि।
लावामि मिक्सुरुम्पा
35हाङ् आक्खा याहुडिचिऎ आक्क याॽमि याहुडिचि खोम्ठाम् खिम्बाङ् लाबहाक्सुचि कामानुङ् खेमु हाङ् येसुऎ आक्क याॽमि चुबुहाङ् लोसु, “माल् आनॆ याॽमिम् पासा सक्पि निवाँयुङ् लॆःॽनॆ?”
36हाङ् आक्कसॆ लोसु, “चिन्खुबो, आक्क आसार? काङा लोङॆ, कॆ खो निवाँयुङ् लॆकुङ।”
37हाङ् येसुऎ आक्क लोसु, “आनॆ खो खाङ्डुना हाङ् आनानुङ् यामुखुबा खोन।”
38हाङ् खोसॆ म खानावाँ खेमुहाङ् लोसु, “पारभु, काङॆ निवाँयुङ् लॆकुङ्!” हाङ् खोसॆ येसु स्यामिटु।
39हाङ् येसुऎ लोसुचि, “काङा बाखाटेम्पि मिक्सुरुम्पाऎ खाङुर हाङ् मिक् खाङ्खुबा चाइ मिक्सुरुम्पा लिर कामानुङ् न्यायॆमि लागि टाडिङ।”
40हाङ् खोम् गॆअङ्मॆअङ् येप्ढाङ्मिम्पा एक्क हिप्पा फारिसिचिऎ म खानावाँ खेमुचिहाङ् लोसुचि, “माल् आनॆ काङ्का स मिक्सुरुम्पा लोक्चिमॆ?”
41हाङ् येसुऎ आक्खाचि लोसुचि, “आन्ना मिक्सुरुम्पा लॆटानि ग आब्डिक् नुङ्मा मालिसानि हला, टर आन्ना ‘काङ्का खाङुकिङ्का’ काकानि मसॆ आन्नाबि हिङ्वा लिढाङ।”
Currently Selected:
युहान्ना 9: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
