युहान्ना 8
8
ब्याबिचारि मेॽनुङ्मा
1टर येसु जाइटुन लोमॆ पङ्पङ्माबि खारा।
2हाङ् येसु वेन्डाक् लाम्पॆ नाम्समाक्मि होइखेपा सङ्क निवाँहाङ्मि खिम्पि टाआ। हाङ् चोब्न याॽमिचि खोबि खोम्टाआमि हाङ् येसु पेनाहाङ् आक्खा याॽमिचि चिन्पकुचि।
3हाङ् मोसामि यायेॽमा चिन्खुबाचि हाङ् फारिसिचिऎ ब्याबिचारामि योम्पक्पि लाब्भुङ्पा एक्क मेॽनुङ्मा याॽमिचिम् लुम्पि युङुचि। 4हाङ् खोचिऎ येसु लोसुचि, “चिन्खुबो, इग मेॽनुङ्मा ब्याबिचारा लॆःॽमॆ पाइटार लाप्भुङ्सुङ्का। 5हाङ् मोसामि यायेॽमाऎ ग गरक्मा मेॽनुङ्मा लुङ्कॽवॆ डॆसिॽमा लॆ लोकु। गमि बारेबि आना चाइ माङ् काग्नॆ?” 6खोचिऎ आक्क सिम्मिम्पा खानावाँबाङ् येसुमि काइसॆ खानावाँ भॆट्टऎ रु हाङ् आब्डिक् टिटऎरु कामानुङ् सिम्मिम्पा लॆटुचि। टर येसु हुहु पोप्मानुङ् उम् खॆरॆॽवासिऎ बाखाबि साबु। 7हाङ् आक्खाचिए खो सिम्मिम्पा सिम्मिम्पान लॆःॽमिम्पासॆ येसु येप्पकाहाङ् लोसुचि, “आसा चाइ हिङ्वा मॆड्डिङ्मा याॽमि लॆ, आक्कसॆ याॽल ग मेॽनुङ्मा लुङ्कॽवाऎ डॆरुर।” 8हाङ् खो फेरि हुहु पोबाहाङ् बाखाबि साबु। 9हाङ् आक्क खानावाँ खेमुचि हाङ् पासिङ्चि हाङ् होइढा याॽमिचि एक्क एक्क लॆसॆ आक्कबाङ् खाइटामि। डॆङ्पि म ग येसु टे आक्कुबि याइडाआ हाङ् खोम् कॆक्पि आक्क मेॽनुङ्मा येप्ढाङ्पा लॆटा। 10हाङ् येसु होइखेपा सङ्क येप्पकाहाङ् आक्क मेॽनुङ्मा लोसु, “आक्खा याॽमिचि हाम्पि खाइटामिहा? माल् खोचिऎ आना आब्डिक् माटिमिहॆ?” 11आक्क मेॽनुङ्मॆ लोसु, “चिन्खुबो, माआ” हाङ् येसुऎ आक्क मेॽनुङ्मा लोसु, “कॆस आना आब्डिक् टिनानि। ह खारॆ हाङ् फेरि हिङ्वा योम्पक् आयिगॆ।”#८:११ ग ७ अढ्यायमि ५३ पदबाङ् ८ अढ्यायमि ११ पदढारि साप्मिम्पा खानावाँ याॽलिहा साब्चिराबि माआ।
बाखाटेम्मि ओप्लिङ् येसु
12हाङ् येसुऎ फेरि याॽमिचि लोसुचि, “काङा बाखाटेम्मि ओप्लिङ्ङा, काङा टिङ्खुबा याॽमि चाइ हानाम्स माॽयाक्टबि लाम्ढुनि, टर आक्कनुङ् हिङ्खामामि ओप्लिङ् लि।”
13हाङ् फारिसिचिऎ खो लोसुचि, “आनॆ आनाम्न चुमॆक्सङ् पिकुना। मसॆ आनाम् चुमॆक्सङ् चाइबानऎन लोमॆ खानावाँ खाङ्मुसुनि।”
14येसुऎ आक्खाचि लोसुचि, “कॆ काम् चुमॆक्सङ् काङॆॽन पिकुङ् हाङ्स आक्क चाइबानऎन। मान्ठाभनॆ का हाम्पा डाप्डिङॆ हाङ् हाम्पि खॆःॽङॆ लोमॆ खानावाँ कॆ लेकुङ्, टर आन्नॆ चाइ म लेसाम्निनि। 15हाङ् आन्नॆ ग याॽमिमि निवाँ आनुसारॆ न्यायॆ लॆकाम्नि, टर कॆ चाइ आसाम्स न्याय लॆःॽङानि। 16टर काङॆ न्यायॆ लॆटुङ् हाङ्ग आक्क चाइ चाइबानऎ लि मान्ठाभनॆ काङा उङ्टाङ्पॆ लॆःॽङानि टर काङा पाहाङ्खुबा आपा निवाँहाङ् काङानुङ् लि। 17आन्नामि यायेॽमाबि स ‘हिप्पाङ्ऎ पिॽमिम्पा चुमॆक्सङ् चाइबानऎ लि’#यायेॽमा १९:१५ कामानुङ् साप्डा। 18हाङ् काम् बारेबि चुमॆक्सङ् पिक्खुबा काङान हाङ् होइक चाइ काङा पाङ्हाङ्खुबा आपा।”
19हाङ् आक्खाचिऎ खो सिमुचि, “आनामि आपा चाइ हाम्पि चुऎटा?” येसुऎ खानावाँ ऎम्पिटुचि, “ना आन्नॆ काङा लेःॽङानि, ना काम् आपान लेकाम्नि। आन्नॆ काङा लेमिम्पा हाङ्ग, काम् आपा सङ्क लेकाम्नि।”
20येसुऎ इघा चोब्न खानावाँ निवाँहाङ्मि खिम्पिऎ भेटि सङ्टिॽमॆ ठालमि कॆक्पि लोमिम्पा लॆटुचि। हाङ्स खो आसॆस मालाबुचि मान्ठाभनॆ खोम् लः माटामिम्पा लॆटा।
निवाँयुङ् आलॆखुबा याॽमिचि येसुऎ वोमिम्पा
21हाङ् येसुऎ आक्खाचि होइखेपा सङ्क लोसुचि, “काङा खाइङा हाङ् आन्नॆ काङा यक्ङानि, टर आन्ना आम्नि हिङ्वाबि सिखॆकानि। काङा हाम्पि खॆङा, आक्कबि आन्ना टाहिसानिनि।”
22हाङ् याहुडिचि टाङ्पा टाङ्पाबि गर कासामि, “गसॆ ग खो खोसॆॽन सेॽमा परकुवॆ रु माल? मान्ठाभनॆ ‘काङा हाम्पि खॆःॽङा आन्ना आक्कुबि टाहिसानिनि का’।”
23हाङ् खोसॆ आक्खाचि लोसुचि, “आन्ना चाइ खुक्माबिहानि, काङा चाइ सङ्पिटुऎङा। हाङ् आन्ना इग बाखाटेम्पिहानि, टर काङा चाइ हॆॽङानॆ। 24मसॆ काङॆ आन्ना ‘आम्नि हिङ्वाबि सिखॆकानि’ मान्ठाभनॆ आन्नॆ काङा आसारङा काङा मन#८:२४ हिबुरु खाप्पि याहुडिचिम् लागि ऎट्टान सॆङ्सॆङॆ साम्देन् चाइ “याहॆ” लोमॆ रेम। हाङ् गसॆ लोमा यकुवॆ खानावाँ चाइ “काङान” यो कामानुङ् सङ्क लोयुक्सुचि। युहान्नाऎ साप्मिम्पा साब्चिराबि येसुऎ काङा आसाङार लोमॆ खाङ्मिॽमाम् लागि “काङान” कामानुङ् साब्डु। पारास्ठान ३:१४-१५ कामानुङ् काॽङा म खानावाँबि निवाँयुङ् मालॆटानि हाङ्स आम्नि हिङ्वाबि सिखॆकानि” कामानुङ् लोसानि।
25हाङ् आक्खाचिऎ खो गरहाङ् सिमुचि, “आना आसारना टा?” खोसॆ लोसुचि, “काङॆ याॽलऎ बाङ्न माङ् लोकॆडानि काङा आक्कन। 26हाङ् काङॆ आन्नामि बारेबि लोमा लॆऎ नुङ् लॆःॽमॆ न्यायॆमि योम्पक् ग डिरिक् चु। टर काङा पाङ्हाङ्खुबा चाइ चाइबानऎ लॆ, हाङ् खोबाङ्कॆ माङ् खेमुङ् म खानावाँ बाखाटेम्पिहा याॽमिचि लोकुङ्चि।”
27हाङ् येसुऎ आपा निवाँहाङ्मि बारेबि खानावाँ इमिम्पा कामानुङ् खोचिऎ मावाबुचि। 28मसॆ येसुऎ आक्खाचि लोसुचि, “हानाम् आन्नॆ याॽमिमि पासा कुरुसा सक्पि ठेरुकाम्नि हाङ् काङा खोन कामानुङ् वाबुकाम्नि। कॆ काम् निवाँबाङ् माङ्स लॆःॽङानि, टर निवाँहाङ् आपाऎ इमिम्पा खानावाँ टे इकुङ। 29हाङ् काङा पाङ्हाङ्खुबा कानुङ्न चु। खोसॆ काङा उङ्टाङ्पॆ मायाइडाटिॽङा मान्ठाभनॆ कॆ हानाम्स खो चेन्चामिॽमॆ योम्पक् यिगुकुङ।” 30हाङ् येसुऎ यामुमिम्पा म खानावाँ खेमुचि हाङ् डिरिक् याॽमिचिऎ खो सक्पि निवाँयुङ् लॆटुचि।
आबाराहाममि पिसानासाचि
31हाङ् येसुऎ खो सक्पि निवाँयुङ् लॆखुबा याहुडिचि लोसुचि, “आन्नॆ काम् खानावाँबि निवाँ टिढाङ्साम्नि हाङ्ग आन्ना चाइबान काम् टिङ्खुबाचि रेम। 32हाङ् आन्नॆ माङ् चाइ चाइबानऎ लोमॆ खानावाँ वाबुकाम्नि हाङ् आक्कसॆ आन्ना फाक्बकानि।”
33हाङ् खोचिऎ लोसुचि, “काङका आबाराहाममि पिसानासाचि रेम। हाङ् काङ्का हानाम्स हाङ् आसाम्स योम्पक् मुखुबाचि मालिलिटिङ्का हाङ् आनॆ आन्ना फागुकानि लोमिम्पा खानावाँ चाइ माल?”
34हाङ् येसुऎ आक्खाचि लोसुचि, “चाइबान कॆ आन्ना लोकानि, हिङ्वा लॆखुबा चोब्न याॽमिचि हिङ्वामि योम्पक् मुखुबा याॽमिचि यो। 35हाङ् योम्पक् मुखुबा याॽमि ग खिम्पि हानाम्स पेन्टॽनि, टर आक्क खिम्पिऎ पासा चाइ पेन्ट। 36मसॆ पासाऎ चाइ आन्ना फागानि हाङ्ग चाइबान फाक्बकानि। 37हाङ् आन्ना आबराहाम्मि पिसानासाचि कामानुङ् लेकानि। टर आन्नॆ काङा सेॽमा यगुॽङानि मान्ठाभनॆ कॆ लोमिम्पा खानावाँ आन्नॆ सिच्चोकाम्नि। 38हाङ् काङॆ चाइ काम् निवाँहाङ् आपामि ङारिङ्पि माङ्माङ् खाङुङ् मन इकानि। हाङ् आन्नॆ स आम्नि आपाबाङ् माङ्माङ् खेम्डाम्नि मन लॆकानि।”
39हाङ् आक्खाचिऎ लोसुचि, “काङ्काम् आपा ग आबाराहामन।” हाङ् येसुऎ आक्खाचि लोसुचि, “चाइबान आन्ना आबराहाम्मि पासा लॆटानि ग आबाराहामऎ रक्न योम्पक् यिक्खुबा लॆटानि।
40“टर काङॆ निवाँहाङ्बाङ् खेम्मिम्पा चाइबानऎ खानावाँ खेम्मिखुबा याॽमि काङा आन्नॆ सेॽमा यःॽङानि। गरक्मा योम्पक् ग आबाराहामऎ मायिगु। 41हाङ् आम्नि आपॆ यिक्मिम्पा योम्पक् रक्न आन्नॆ स यिक्मॆ पाइकाम्नि।” खोचिऎ येसु लोसुचि, “काङ्का ब्याबिचाराबाङ् जान्म लिमिम्पा याॽमिचि हॆॽनॆ, कानिम् एक्क टे आपा चाइ निवाँहाङ् यो।”
42हाङ् येसुऎ आक्खाचि लोसुचि, “निवाँहाङ् आम्नि आपा लॆटा ग, आन्नॆ काङा नाम्नाम् पिसिखुबा लॆटिङ्नि, मान्ठाभनॆ काङा काम् निवाँ रक्न टाडिङॆ हॆॽनॆ। निवाँहाङ्बाङ् टाडिङ। निवाँहाङ्ऎन काङा पाङ्हाङ्डिङ। 43काङॆ लोमिम्पा खानावाँ आन्नॆ मान्ठा वाबाम्निनॆ? मान्ठाभनॆ आन्नॆ काम् खानावाँ खेम्हिसाम्निनि। 44हाङ् आन्ना आम्नि आपा साइटानमि पासाचि रेम, हाङ् खोम् निवाँ रक्न पाइमा मिनुकानि। आक्क ग याॽलऎ बाङ्न सेक्खुबा लॆटा। खोसॆ चाइबानऎ खानावाँ सिटेसिच्चाकु मान्ठाभनॆ खोबि चाइबानऎ खानावाँ माआ। आक्कसॆ उम् निवाँ रक्न हुन्नऎ खानावाँ इकु, मान्ठाभनॆ खो हुन्नऎन, हाङ् हुन्नऎम्न आपा यो। 45टर काङॆ चाइ चाइबानऎ खानावाँ इकुङ्, मसॆ आन्नॆ काङा निवाँयुङ् लॆःॽङानिनि। 46हाङ् आन्ना हङसिबि आसॆ चाइ काङा हिङ्वामि आब्डिक् टिहिङॆ? काङॆ आन्ना चाइबानऎ खानावाँ लोकानि हाङ्ग मान्ठा आन्नॆ काङा निवाँयुङ् लॆङानिनिहा? 47हाङ् निवाँहाङ्मि याॽमिचिऎ ग निवाँहाङ्मि खानावाँ खेम्कुचि। आन्ना चाइ निवाँहाङ्मि याॽमिचि हॆॽनॆ, मसॆ खोम् खानावाँ खेमाम्निनि।”
येसुऎ खो आबाराहामबाङ् ढ्याङा लोमिम्पा
48हाङ् याहुडिचिऎ येसु लोसुचि, “काङ्कॆ आना चाइ सामारि याॽमिना, हाङ् खारिॽमाङ्ऎ लाब्डा लोमार टङुक् हॆॽनॆ टा?”
49हाङ् येसुऎ आक्खाचि लोसुचि, “काङा खारिॽमाङ्ऎ मालाप्टिॽङा। बोरु काङॆ चाइ काम् निवाँहाङ् आपा नुःर ङेबुकुङ। हाङ् आन्नॆ चाइ काङा सिच्चाङानि। 50काङॆ काम् लागिॽन ग निङ्लावा यक्चाङानि टर निवाँहाङ्ऎन काङा निङ्लावा पिःॽङा। खो चाइ चाइबानऎ न्यायॆ लॆखुबा लॆ। 51चाइबान कॆ आन्ना लोकानि, आसॆ चाइ काम् खानावाँबि निवाँ टिकु, आक्कसॆ हानाम्स सिखॆॽमा पाब्नि।”
52हाङ् याहुडिचिऎ येसु लोसुचि, “ह चाइ आना चाइबान खारिॽमाङ्ऎ लाब्डा कामानुङ् काङ्कॆ लेसुङ्का। आबाराहाम सिखारा हाङ् आक्रहाङ्न निवाँहाङ्मि खानावाँ लोखुबाचि सिखारामि। टर आना चाइ काम् खानावाँबि निवाँ टिखुबाचि हानाम्स सिखॆॽमिनि काग्ना। 53माल् आना काङ्कामि सिखॆम्पा टुबालाबा आबाराहाम नुङ् निवाँहाङ्मि खानावाँ लोखुबाचिबाङ्स ढ्याना हॆ? हॆॽनि काङा आसाङार मिन्नॆ?”
54हाङ् येसुऎ आक्खाचि लोसुचि, “काङॆ काम् लागिॽन निङ्लावा यगिङ् हाङ्ग आक्क हुन्नऎ लि। काङा निङ्लावा पिक्खुबा काम् आपा निवाँहाङ्न। खो चाइ आन्नॆ आम्नि निवाँहाङ् लोकाम्नि। 55टर आन्नॆ खो मालेट्टिटाम्नि। काङॆ चाइ खो लेडुङ। काङॆ खो लेङानि कासिङ् हाङ्ग आन्न रक्न हुन्नऎ याॽमि लिःॽङा। टर काङॆ खो लेकुङ् हाङ् खोम् खानावाँ खेमुकुङ। 56हाङ् आम्नि टुबालाबा आबाराहामऎ का टामॆ डिना खाङ्मा मिम्मिम्पा लॆटु। खोसॆ आक्क खाङुहाङ् ऎट्टान चेन्चाआ।”
57मसॆ याहुडिचिऎ येसु लोसुचि, “हॆॽनि आना ङापङ् निङ् स मायाक्टिॽना हाङ् हाम्पारो आबाराहाम खाङुनॆ?”
58हाङ् येसुऎ आक्खा याहुडिचि लोसुचि, “चाइबान कॆ आन्ना लोकानि, काङा आबाराहाम बाङ्स याॽलएबाङ् चुःॽङा।”
59हाङ् आक्खाचिऎ येसु डॆमा कामानुङ् लुङ्कॽवा कोबुचि, टर येसु आक्खाचिबाङ् खुनिङ्म आम्पखारा हाङ् निवाँहाङ्मि खिम्बाङ् खाइटा।#८:५९ याॽमिचिऎ येसु सेॽमा परक्मिम्पा लॆटुचि मान्ठाभनॆ येसुऎ काङा निवाँहाङ्मि पासाङा कामानुङ् लोमिम्पा लॆटु। हाङ् खोचिऎ येसुऎ यामुमिम्पा खानावाँऎ निवाँहाङ्मि नाबुक् चेन्डु हाङ् ग लोमॆ चाइ निवाँहाङ् काइर लोमॆ यो कामानुङ् मिट्टुचि
Currently Selected:
युहान्ना 8: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
