युहान्ना 10
10
सामुङ्मि काठा
1हाङ् येसुऎ लोसुचि, “चाइबान कॆ आन्ना लोकानि, हाम्पॆ याॽमि चाइ सामुङ्मि गोठ्ठाबि लम्भॆरॆङ्माबाङ् हङ्सियु भॆन्नि, टर होइक ठावाँबि ठाङ्मानुङ् भॆनुक्, आक्क चाइ खुसुबाङ् नुङ् लुप्चान। 2टर आसा चाइ लम्भॆरॆङ्माबाङ् हङ्सिॽयु भॆनुक्, आक्क चाइ खोम् सामुङ्चिम् कुचान। 3हाङ् गोठ्ठा हुङ्खुबॆ खोम् लागि लोम्भॆरॆङ्मा हेम्बक्पिकु। हाङ् खोम् सामुङ्चिऎ खोम् खानावाँ खेमुकुचि हाङ् खोसॆ आक्खा सामुङ्चि उम्चि निङ् कोःप्से सेसे बाहिरा लाबक्कुचि। 4हाङ् खोसॆ टाङ्पामि चोब्न सामुङ्चि बाहिरा लाबकुचिहाङ् खो चाइ आक्खाचिम् याॽलि याॽलि लङ्प। हाङ् सामुङ्चिऎ खो टिङुकुचिमि मान्ठाभनॆ आक्खाचिऎ खोम् साम्ला लेकुचि। 5टर खोचिऎ मालेमिम्पा याॽमि टिङुचिनि, बोरु खोचि आक्क याॽमिबाङ् पिल्लिङ्खॆमि मान्ठाभनॆ खोचिऎ आक्कमि साम्ला लेसुचिनि।”
6येसुऎ आक्खा याॽमिचि आक्क काठा लोसुचि, टर आक्खाचिऎ म काठाऎ लोमा यकुवॆ खानावाँ मावाबुचि।
चाइबानऎ लम्भॆरॆङ्मा
7हाङ् येसुऎ फेरि लोसुचि, “चाइबान कॆ आन्ना लोकानि, सामुङ्मि गोठ्ठामि लम्भॆरॆङ्मा चाइ काङान। 8हाङ् काबाङ् याॽल टाखुबाचि चाइ चोब्न खुसुबाङ् नुङ् लुप्चाचि लॆटामि। टर सामुङ्चिऎ आक्खाचिम् खानावाँ माखॆमुचि। 9हाङ् गोठ्ठा हङ्सि भॆन्ठाम् लम्भॆरॆङ्मा चाइ काङान, आसा चाइ काबाङ् हङ्सिॽयु भॆनुक्, आक्क हिङ्चा। हाङ् खो हङ्सि नुङ् बाहिरा टासे खॆस्से लॆहि हाङ् नुऎ ठालबि डोब्चाट। 10खुसुबाङ् ग खुसि, सेस्सि नुङ् नासॆलॆसि टेःॽन टा। टर काङा चाइ आक्खा याॽमिचिऎ चाइबानऎ हिङ्खामा टक्चाउचिर हाङ् आक्क खेःॽल टक्चाउचिर कामानुङ् टाइङ।
येसु नुऎ कुखुबा
11“काङा चाइ नुऎ कुखुबाङा। नुऎ कुखुबॆ चाइ टाङ्पाम् सामुङ्चिम् लागि खो सिखॆॽमा स माङ्स मिन्नि। 12हाङ् सामुङ्चि खाङ्सि युङ्मिम्पा याॽमि चाइ सामुङ्चि पोट्टा स्याला टामॆ पाइमिम्पा खाङ्टकुहाङ् खो पिल्लिङ्खॆ। खोसॆ सामुङ्चि वेड्डाकुचि मान्ठाभनॆ आक्खा सामुङ्चि खोम् हॆॽनॆ। हाङ् स्याला टाहाङ् आक्खा सामुङ्चि हॆरुकुचि हाङ् गिउमिउ फुबकुचि। 13खो पिल्लिङ्खॆ मान्ठाभनॆ खो ग याङ्मि लागि पाइखुबा टेःन रेम। खोसॆ सामुङ्चिम् लागि माङ्स योम्पक् यिगुनि।
14-15“काङा नुऎ कुखुबाङा। माङ्टहाङ् आपॆ काङा लेःॽङा हाङ् काङॆ निवाँहाङ् आपा लेकुङ्, मरहाङ्न कॆ काम् सामुङ्चि लेकुङ्चि हाङ् सामुङ्चिऎ स काङा लेङामि। हाङ् काङॆ सामुङचिम् लागि काम् हिङ्खामान पिकुङ। 16हाङ् ग गोठ्ठाबि माआमिहा काम् होइढा सामुङ्चि चुक्मि। आक्खाचि स कॆ लाटॆॽमान लॆःॽमि। आक्खाचिऎ काम् साम्ला खेमुकुचि हाङ् आक्खाचि एक्कन बागाला लिक्मि हाङ् कुखुबा एक्कन लि।
17“मसॆ काम् निवाँहाङ् आपॆ काङा नाम्नाम् पिस्सिङा मान्ठाभनॆ फेरि लामॆ गारि काङॆ काम् हिङ्खामा सङ्टिकुङ। 18हाङ् आसॆस काम् हिङ्खामा लाहिसुचिनि, टर काङॆॽन काम् हिङ्खामा सङटिकुङ। मान्ठाभनॆ आक्क सङ्टिॽमॆ हाङ् होइखेपा सङ्क हिङ्पॽमिॽमॆ ढुप्पाट्ट कानुङ् चु। मान्ठाभनॆ निवाँहाङ् आपॆ काङा ग लॆटॆ कामानुङ् लोडिङ।”
19हाङ् आक्क खानावाँऎ फेरि याहुडिचिम् लुम्पि याटक्माटक् लिसा। 20हाङ् डिरिक् याॽमिचिऎ लोसुचि, “आक्क याॽमि ग चाप्ऎ लाब्डु हाङ् निवाँ मॆड्डिङ्मा पिक्खॆडा। मान्ठा आक्कमि खानावाँ खेम्काम्नॆ?” 21टर होइढा याॽमिचि कासामि, “चाप्ऎ लाप्मिम्पा याॽमिऎ गरक्हा खानावाँ इसुनि! माल चाप्ऎ लाप्मिम्पा याॽमिऎ मिक्सुरुम्पामि मिक् नुबक्मिॽहिकुहॆ?”
येसुऎ काङा निवाँहाङ्मि पासाङा लोमिम्पा
22ह चाइ यारुसालेमपि निवाँहाङ्मि खिम्पि आक्क निङ्मि लागि सङ्टिॽमॆ ल टामिम्पा लॆटा। ग लः चाइ चुङ्लावाबि सिॽमिम्पा लॆटा। 23हाङ् येसु चाइ निवाँहाङ्मि खिम्पिऎ सोलोमान्मि ओम्फुबि लुटिॽमॆ पाइटा। 24हाङ् याहुडिचि खोमि गॆअङ्मॆअङ् खोम्टि खारामिहाङ् सिमुचि, “आनॆ काङ्कानुङ् हानाम्ढारि खानावाँ चुम्मानुङ् युङ्चिमॆ? आना फाक्खुबा खिरिस्ट ना हाङ्ग खानावाँ मायिङ्ले लोइचिमॆ।”
25हाङ् येसुऎ आक्खाचि लोसुचि, “कॆ आसिॽन इसिडानि, टर आन्नॆ निवाँयुङ्न लेटाम्निनि। कॆ काम् आपामि निङ्पि माङ्माङ् योम्पक् यिक्मॆ पाइकुङ्, आक्खासॆॽन काङा आसाङा लोमॆ खानावाँमि चुमॆक्सङ् पिकु। 26टर आन्नॆ काङा निवाँयुङ् लॆङानिनि, मान्ठाभनॆ आन्ना काम् सामुङ् हॆॽनि। 27हाङ् काम् सामुङ्चिऎ चाइ काम साम्ला खेम्कुचि हाङ् कॆ आक्खाचि लेकुङ्चि हाङ् आक्खाचिऎ काङा टिङ्ङामि। 28हाङ् कॆ आक्खाचि हानाम्स सिखॆॽनॆ हिङ्खामा पिकुङ्चि हाङ् खोचि हानाम्स लुक्खॆमिनि। हाङ् खोचि आसॆस काम् हुक्बाङ् ङाप्फॆॽमा हेसुचिनि। 29हाङ् आक्खाचि काम् हुक्पि पिक्खुबा काम् आपा चाइ चोब्बाङ् चॆकुवॆ लॆ। आसॆस काम् निवाँहाङ् आपामि हुक्बाङ् आक्खाचि ङाप्हिसुचिनि। 30काङानुङ् आपा एक्कन।”
31हाङ् येसु डॆःमाम् लागि याहुडिचिऎ होइखेपा सङ्क लुङ्कॽवा कोबुचि। 32हाङ् येसुऎ आक्खाचि लोसुचि, “काङॆ आन्ना काम् निवाँहाङ् आपाबाङ् डिरिक् काम्नुहा योम्पक् यिक्मानुङ् खाङ्मिटानि, आक्खा योम्पक्बाङ् हाम्पॆ योम्पक्मि लागि चाइ आन्नॆ काङा लुङ्कॽवाऎ डॆःरुॽङानिहा?” 33हाङ् याहुडिचिऎ खो लोसुचि, “काङ्कॆ आना नुऎ योम्पक्मि लागि लुङ्कॽवाऎ डॆःॽमा परक्मिम्पा हॆॽनॆ, टर आना याॽमि लॆःॽना हाङ्स टाङ्पॆ टाङ्पान निवाँहाङ्ङा कामानुङ् खोमि नाबुक् चॆन्मिम्पासॆ लुङ्कॽवॆ डॆःॽमा परक्मिम्पा।”
34हाङ् येसुऎ आक्खाचि लोसुचि, “माल आन्नामि निवाँनेन् साब्चिराबि ‘कॆ लोडानि, आन्ना निवाँहाङ्न’#खोम्मिम्पासाम् ८२:६ कामानुङ् मासाप्टिहॆ? 35हाङ् आसाचिऎ चाइ निवाँहाङ्मि खानावाँ टःक्डुचि, खोचि निवाँहाङ्ऎ निवाँहाङ्न लोकुचि। निवाँनॆन साब्चिरा ग हुन्नऎ लिनि। 36हाङ् निवाँहाङ् आपाऎ काङा सॆङसॆङॆ मुमानुङ् खोम् योम्पक् यिक्सि बाखाटेम्पि पाङ्हाङ्सिङ। हाङ् काङॆ काङा खोम् पासाङा कामार मान्टक्ल निवाँहाङ्मि नाबुक् चेनु लोङानियॆ? 37काङॆ यिक्मिम्पा योम्पक् काम् निवाँहाङ् आपामि योम्पक् हॆॽनॆ मिकाम्नि हाङ्ग काङा निवाँयुङ् आलॆङानॆ। 38टर काङॆ आपामि योम्पक् यिगुकुङ् हाङ्ग, काङा निवाँयुङ् लॆङानिनि हाङ्स काङॆ यिक्मिम्पा आक्खॆॽमाहा योम्पक् खाङानॆहाङ् निवाँयुङ् लॆटानॆ। हाङ् आन्नॆ आपा कानुङ् चु हाङ् काङा आपानुङ् चुःॽङा लोमॆ लेकाम्नि हाङ् वाबुकाम्नि।” 39हाङ् होइखेपा सङ्क आक्खाचिऎ येसु लाप्मा यगुचि, टर खो उम्चि हुक्बाङ् लेॽलिङ्खारा।
40हाङ् खो होइखेपा सङ्क यारडान हङ्मा मॆआरेङ् खारा आक्क ठालबि युहान्नाऎ याॽल बाप्टिस्मा पिॽयुङ्सु। येसु आक्कुबि पेना। 41हाङ् डिरिक् याॽमिचि खोबि टाआमि हाङ् टाङ्पा टाङ्पाबि कासामि, “युहान्नाऎ ग माङ्स आक्खॆॽमाहा योम्पक् मायिगु, टर खोसॆ येसुमि बारबि लोमिम्पा चोब्न खानावाँ चाइ चाइबानऎन।” 42हाङ् आक्कुबि डिरिक् याॽमिचिऎ येसुबि निवाँयुङ् लॆटुचि।
Currently Selected:
युहान्ना 10: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
