मरकुस 14

यीसू नै फसाण गी चाल

(मत्ती 26:1-5; लूका 22:1,2; यूहना 11:45-53)

1फसह गै त्यूंहार अर बिना खमीर गी रोटी गो त्यूंहार आण गै दो दिन पेलां गी बात है कै मुख्य याजक अर यहुदी धर्म सासतरी कोई हिस्यो रा ढूंढण लागरया हा जिंऊं चलाकी गै सागै बिनै बन्दी बणायो जावै अर मार दियो जावै। 2बे केवा हा कै पण ओ काम आपां नै त्यूंहार गै दिना में कोनी करणो चईयै इंऊं तो हो सकै है, लोग कोई ओर फसाद खड़यो कर सकै।

3जद बो बेतनियाह गाम में समौन कोढी गै घरे रोटी जिमै हो तो जद एक लुगाई संगमरमर गै भांडै में बाळा में लगाण आळो तेल लेगे आई अर ल्यागे यीसू गै सिर पर मूंदो मार दियो। 4इऊ बठै कीं आदमी रीस में आपस में केण लाग्या कै क्यामी मेंगो तेल बरबाद करयो है। 5ओ तीन सौ दीनारी ऊं बी जादा में बेच्यो जा सकै हो। अर बो धन कंगाला में बांटयो जा सकै हो, बे बिनै झिड़कण लागग्या।

6जद यीसू केयो, “बिनै क्यू तंग करो हो, छोड़ो बिनै, बण तो मेरै खातर एक बडिया काम करयो है। 7क्यूंकै कंगाल तो सदां थारै कनै रेवैगा थे जद चावो बांगी मदद कर सको हो, पण मैं थारै सागै सदां कोनी रेऊंगा 8अण लुगाई बो करयो है झिको बा कर सकै ही बण टेम ऊं पेलां ई गाडै़ जाणै गै खातर मेरै सरीर पर सुगन्ध छिड़क गे बिनै तैयार करयो है। 9मैं थानै साची केऊं हूं सारै संसार में जद कठैई सुब समाचार गो परचार करयो जावैगो, बठै बिंगी याद में झिको कीं बण करयो है, इंगी बात होवैगी।”

यहूदा गो बिस्वास तोड़णो

(मत्ती 26:14-16; लूका 22:3-6)

10जद यहूदा इस्करियोति झिको बिंगै बारा चेला मू एक हो। प्रधान याजक गै कनै यीसू नै धोखै ऊं पकड़वाण खातर गेयो। 11बे बिंगी बात सुणगे भोत राजी होया अर बां बिनै धन देण गो बचन दियो। ईंखातर फेर यहूदा यीसू नै धोखो देगे पकड़वाण गी ताक में रेण लागग्यो।

चेला सागै आखरी खाणो

(मत्ती 26:17-25; लूका 22:7-14,21-23; यूहना 13:21-30)

12बिना खमीर गी रोटी गै त्यूंहार ऊं एक दिन पेलां, जद फसह गी बली दी जांवंती ही बिंगा चेला बिनै पूछयो, “तूं के चावै है कै म्हे कठै जा'गे तेरै भोजण गी तैयारी करां।”

13जद बण आपगै दो चेला नै ओ केगे भेज्यो, “गाम में जाओ, जठै थानै एक आदमी पाणी गो घड़ो लिये मिलै, बिंगै लारै हो जावो। 14फेर जठै कठैई बी बो मा जावै बिं घर गै मालिक ऊं केईयो गुरूजी पूछै है भोजन गो मेरो कमरो किस्यो जठै मैं आपगै चेला गै सागै फसह गो भोजन खा सकूं। 15फेर बो थानै उपर एक मोटो सज्यो सजायो कमरो दिखावैगो, बठै मेरै खातर भोज तैयार करियो।”

16जद बिंगा चेला नगर ऊं जाण लागरया जद बां हर बात बिंयाई होई, जिंया यीसू कैई ही। जद बां फसह गो भोज तैयार करयो।

17दिन ढळे आपगै बारा चेला गै सागै यीसू बठै पोंच ग्या। 18जद बे बेठगे खाणो खावा हा, जद यीसू केयो, “मैं साची केऊं हूं, थारै मू एक झिको मेरै सागै भोज करण लागरयो है बो ही मनै धोखो देगे पकड़वावैगो।”

19इंऊं बे दुखी होगे एक दूसरै नै केण लागग्या साची बो मैं कोनी हूं।

20जद यीसू बानै केयो, “बो बारा मू एक है झिको मेरै सागै एक थाळी में खावै है। 21आदमी गै बेटै गै बारै में जाणै ई है, जिंया कै बिंगै बारै में लिखेड़ो है। पर बिं आदमी नै धिकार है झिकै गै द्वारा मिनख गो बेटो पकड़ाईजैगो। बिं आदमी गै खातर कितो आच्छो होवंतो कै बो पैदा ई ना होवंतो।”

प्रभु भोज

(मत्ती 26:26-30; लूका 22:14-20; 1 कुरुन्थी 11:23-25)

22जद बे खाण पीण लागरया हा यीसू रोटी ली अर धन्यावाद दियो, रोटी तोड़ी अर चेला नै देवंता केयो, ल्यो आ मेरी देह है।

23फेर बण कटोरो लियो धन्यावाद दियो अर सारा बिमुं पीयो। 24जद यीसू बोल्यो, “ओ मेरो खून है झिको एक नुअ वायदै गी सुरूआत है ओ भोतां गै खातर बहायो जावैगो।” 25मैं थानै साची केऊं हूं कै, “अब मैं बिं दिन तांई दाखरस नै कोनी चाखूंगा जद तांई परमेसर गै राज में नूंओ दाखरस ना पीऊं।”

26जद बे एक गीत गा'गे जेतुन गै पहाड़ पर उड़ग्या।

पतरस गै इनकार गी बात

(मत्ती 26:31-35; लूका 22:31-34; यूहना 13:36-38)

27यीसू बानै केयो, “थारो सारा गो बिस्वास गिर जावैगो क्यूंकै लिख्यो है कै, मैं गुवाळिया नै मारूंगा अर भेड़ा तितर बितर हो जावैगी।” 28पण फेर मैं जी उठण गै बाद मैं थारूं पेलां ई गलील उड़ जाऊंगा।

29जद पतरस बोल्यो, “चायै सारा आपगो बिस्वास छोड़दैय पण मैं कोनी छोडूंगा।”

30ईं पर यीसू बिंऊं केयो, “मैं तनै साची केऊं हूं आज'ई रात नै कुकड़ गै दो बारी बांग देण ऊं पेलां तूं तीन बारी मेरो इनकार करैगो।”

31ईं पर पतरस ओर बी जोर देगे केयो, जे मनै तेरै सागै मरणो बी पडै़ तो बी मैं तनै कोनी छोडूंगा जद बाकी सारा चेला बी इयां केयो।

गतसमनै में पराथना

(मत्ती 26:36-46; लूका 22:39-46)

32फेर बे एक हिसी जिग्यां पर आया जिनै गतसमनै केयो जावै है। बठै यीसू आपगै चेला ऊं केयो जद तांई मैं पराथना करूं हूं थे अठै बेठो। 33अर पतरस, याकूब अर यूहना नै बो आपगै सागै ले गेयो। बो भोत दुखी अर परेसान हो। 34बण बानै केयो, “मेरो मन दुखी है जिंया मेरा प्राण निकळण लागरया है। थे अठैई रूको अर सावधान रेवो।”

35फेर थोड़ो ओर आ'गै जाण गै बाद बो धरती पर झुकगे पराथना करण लागग्यो कै जे हो सकै तो आ घड़ी मेरै पर ऊं टळ जावै। 36फेर बण केयो, “हे पिता,” तेरै खातर सारो कीं सोरो है। ईं कटोरै नै मेरै कनूं दूर कर फेर झिको कीं मैं चाऊं हूं बो कोनी पण झिको कीं थे चावो हो बो पूरो होवै।

37फेर बो आयो तो बण आपगै चेला नै सोऐड़ा देखगे पतरस ऊं केयो समौन के तूं सोण लागरयो है? कै तूं एक घड़ी बी जाग कोनी सक्यो? 38जागता रेवो अर पराथना करो कै थे कीं तरियां गी बिपता में ना पड़ो। आत्मा तो चावै है पण सरीर निरबल है।

39अर बो फेर उड़ग्यो अर बिंयाई बचन बोलतां होयां बण पराथना करी। 40जद बो दुसर आयो तो बण बानै फेर सूत्या देख्या, बांगी आंख्या में नींद भरेड़ी ही बानै समझ कोनी आई कै बानै के उतर देवां।

41बो तीसरी बारी फेर आयो अर बोल्यो, के थे अजे बी आराम ऊं सूत्या हो? बा घड़ी आ'गी जद मिनख गो बेटो धोखै ऊं पकड़वायो जा'गे पापियां गै हात सोंपयो जावैगो। 42खड़या होज्यो। मनै पकड़ाण आळो कनै आ'ग्यो है।

यीसू नै धोखै ऊं पकड़ायो जाणो

(मत्ती 26:47-56; लूका 22:47-53; यूहना 18:3-12)

43यीसू बोलै ई हो कै बिंगा बारा चेला मू एक यहूदा बठै दिख्यो बिंगै सागै लाठियां अर तलवारां लेगे एक भीड़ ही बिनै याजका धर्म सासतरियां अर बुढा यहुदी नेता भेज्यो हो। 44धोखै ऊं पकड़ाण आळै आदमी बानै आ निसानी बता राखी ही झिकै गो मैं लाड करूं बो ई हो'सी। बिनै थे पकड़लेईयो अर ध्यान ऊं ले जाईयो।

45अर जिंयाई यहूदा बठै आयो बण यीसू गै कनै जा'गे केयो, “गुरु” अर बिनै चूमंयो। 46फेर बिनै बां पकड़ गे हिरासत में ले लियो। 47बांगै एक चेलै झिको बिंगै कनै खड़यो हो आपगी तलवार काड ली अर महा याजक गै एक दास पर चला दी जिंऊं बिंगो कान बडग्यो। 48फेर यीसू बिनै केयो, “मैं कोई अपराधी हूं झिकै नै थे पकड़ण खातर लाठी तलवार लेगे आया हो। 49रोज मिन्दर में परबचन देवंता होया मैं थारै सागै ही हो पण थे मनै कोनी पकड़यो। पण ओ इंया होयो कै सासतर गो बचन पूरो होवै।”

50ओ देखगे सारा चेला बिनै एकलो छोड़ भाज खड़या होया।

51आपगै एक नागै सरीर पर चादर लपेटेड़ी एक नोजवान बिंगै लारै चाल पड़यो अर लोगां बिनै पकड़नो चायो। 52पण बो आपगी चादर छोड़गे नागो ही भाजग्यो।

महा पंचायत गै सामणै यीसू

(मत्ती 26:57-68; लूका 22:54,55,63-71; यूहना 18:13,14,19-24)

53बे यीसू नै प्रधान याजक गै कनै लेग्या। फेर सगळा मुख्य याजक बुढा यहुदी नेता ओर धर्म सासतरी कठ्ठा होया। 54पतरस बिंयू दूर दूर रेवंता होया बिंगै लारै लारै महा याजक गै आंगणै तांई उड़ग्यो। अर बठै पेरेदारां गै सागै बेठगे आग तपण लागग्यो। 55सारा यहुदी महासभा अर मुख्य याजक यीसू नै मोत गी सजा देण खातर बिंगै बिरोध में कोई सबूत ढूंढण गो यत्न करण लागरया हा पर ढुंढ कोनी पाया। 56भोत सारा लोग बिंगै बिरोध में झूठी गवाइयां दी, पण बे गवाइयां आपस में बिरोधी ही।

57फेर कीं लोग खड़या होया अर बिंगै बिरोध में झूठी गवाई देवंता होया केण लागग्या। 58म्हे इनै ओ केवंता सुणयो है कै आदमियां गै हात ऊं बणाऐड़ै मिन्दर नै मैं तोड़ देऊंगा ओर फेर तीन दिना में दुसर बणा देऊंगा झिको हात ऊं बणेड़ो कोनी होवैगो। 59पण इमै बी बांगी गवाइयां एकसी कोनी ही।

60जद बिंगै सामणै महा याजक खड़यो होगे यीसू कनूं पूछयो, “ऐ लोग तेरै बिरोध में ऐ के गवाईयां देण लागरया है तूं कीं उतर कोनी देण लागरयो।”

61ईं पर यीसू चुप रेयो बण कोई उतर कोनी दियो। महा याजक बिंऊं फेर पूछयो, “के तूं पवितर परमेसर गो बेटो मसी है?”

62यीसू बोल्यो, “मैं हूं।” अर थे मिनख गै बेटै नै बिंगै परम सकतीसाली गै दाहिणी ओर बेठयो ओर सुरग ऊं बादळां में आवंतो देखोगा।

63महा याजक आपगा गाबा फाड़गे केयो, “म्हानै ओर गवाई गी के जरूरत है?” 64थे ऐ झूठी बातां अब सुण ई ली। अब थारो के बिचार है? बां बिनै अपराधी मानगे केयो, “इनै दण्ड दैयो।”

65जद केई आदमियां बिं पर थूकयो, कणैई बिंगो मूं ढकयो अर कणैई बिंगै थपड़ मारया अर कणैई बिंगी मजाक उड़ाई कै, परमेसर गी बात बोल अर फेर पेरेदारां बिनै पकड़गे कुटयो।

पतरस गो ना करणो

(मत्ती 26:69-75; लूका 22:56-62; यूहना 18:15-18,25-27)

66पतरस अजे तांई नीचै आंगण मैं बेठयो हो कै महा याजक गी एक दासी बोली। 67जद पतरस नै बठै आग तापतां देख्यो तो बड़ै ध्यान ऊं बिनै पिछाण गे बोली तूं बी तो यीसू नासरी गै सागै हो।

68पण पतरस मुकरग्यो अर केण लागग्यो मैं कोनी जाणूं मेरी समझ में कोनी आयो, कै तूं के केवै है ओ केवंता होया बो ड़ेवढ़ी तांई उड़ग्यो अर कुकड़ बांग दी।

69बण दासी जद बिनै दुसर देख्यो तो बठै खड़यै लोगां नै फेर केण लागी, ओ आदमी बी बामूं एक है। 70पतरस फेर मुकरग्यो, फेर थोड़ी देर बाद बठै खड़यै लोगां पतरस नै केयो साची ही तूं बी बामू एक है क्यूंकै तूं बी गलील गो है।

71जद पतरस अपणै आपनै धिकारण अर सोगन खाण लागग्यो झिकै गै बारै में थे बात करो हो बिं आदमी नै मैं कोनी जाणूं।

72जद, कुकड़ दूसरी बांग दी तो पतरस नै बिं टेम बिं बात गी याद आई झिकी यीसू बिनै कैई ही इंयु पेलां कै कुकड़ दो बारी बांग देवै तूं मनै तीन बारी इनकार करैगो। जद पतरस ईं बात नै सोचगे जोर जोर गो रोण लागग्यो।

Currently Selected:

मरकुस 14: BGQ

Highlight

Copy