मरकुस 13

मिन्दर गै नास गी बात

(मत्ती 24:1,2; लूका 21:5,6)

1जद यीसू मिन्दर मू निकळै हो जद बांगै चेला मू एक जणै केयो गुरू देखो ओ मिन्दर कितो सुणो है, ईं मिन्दर गो मकान कितो सुणो है, इंगा पथर ई किता सुणा अर मोटा मोटा है।

2यीसू केयो, “थे आं मोटै मकान नै देखो हो पण हिस्यो टेम आवैगो जद दुसमण ईं मिन्दर नै पूरी तरियां फोड़ दैयगा, अठै तांई कै एक ई पथर दूसरै पथर गै उपर कोनी रेवैगो।”

संकट अर कलेस

(मत्ती 24:3-14; लूका 21:7-19)

3फेर जद यीसू मिन्दर गै सामै जेतुन प्हाड़ पर जा'गे बेठग्या पतरस, याकूब, यूहना अर अन्दियास अलग ऊं यीसू नै पूछयो। 4म्हानै बताओ कै ओ कद हो'सी ओ होण ऊं पेलां के हो'सी जिऊ म्हानै ठा लागै कै दुसमण मिन्दर फोड़न आळो है?

5यीसू बानै केयो, “ध्यान ऊं संभळगे रेवो कोई बी थानै धोखो ना देवै। 6क्यूंकै मेरो नाम लेगे कीं लोग आवैगा ओर केवैगा मैं हूं मसी ओ केगे केईयां नै धोखो देवैगा। 7जद लोग थानै केवै कै लड़ाईयां होवै है या केवै लड़ाईयां होण आळी है तो डरियो ना। ऐ बातां तो जरूर होवैगी पण सारा गो अन्त इतो बेगो कोनी होवैगो। 8इंयु पेलां एक देस दूसरै पर अर एक राजा दूसरै राजा ऊं लड़ाई करैगा। धरती हालैगी, काळ पडै़गा। जद दुख आण गी सुरूआत हो'सी।”

9पण थे सावधान रेईयो क्यूंकै थारै मू केई लोगां नै पंचायत में सूंप देसी अर केईयां नै पराथना घरां में मार देसी। अर मेरै पर बिस्वास गै कारण हाकिम अर राजावां सामै खड़या करसी। जद बां लोगां नै मेरै बारै में बताण गो आच्छो मोको हो'सी। 10सारा गो अंत होण ऊं पेलां सुब समाचार गो परचार सारी जातियां गै लोगां में करणो जरूरी है। 11जद थानै पकड़गे पंचायतां में खड़या करै तो, चिंता ना करियो कै पंचायत में के बोलणो है, के केणो है बिं टेम परमेसर थानै बोलण खातर केवै बो ई बोलणो है क्यूंकै बोलण आळा थे कोनी होस्यो पण पवितर आत्मा हो'सी। 12अंत होण गै टेम, भाई भाई नै अर बाप बेटै नै अर बेटा मां बाप गै खिलाफ होगे मरवा दैयगा। 13मेरै उपर थे लोग बिस्वास करो हो ईंखातर लोग थारूं नफरत करैगा थानै बिलकुल आच्छा कोनी मानसी झिको आखरी टेम तांई मेरै उपर बिस्वास करतो रेवैगो अर दुख सेवंतो रेवैगो बो बच जावैगो।

महासंकट काळ

(मत्ती 24:15-28; लूका 21:20-24)

14ईंखातर यीसू गी बात नै पढण आळा ध्यान ऊं समझो। जद बे माड़ी चिजां झिकी ऊं म्हे नफरत करां, मिन्दर में खड़ी देखो जद झिका यहुदी गामां में है बे पहाड़ा में भाज जाईयो। 15झिका छत पर होवै, बे कोई सामान लेण खातर नीचै ना उतरै अर ना घर गै मा जावै। 16झिको खेत में होवै बो आपगा गाबा लेण घरे ना आवै। 17बिं टेम बां लुगाईयां खातर माड़ो हो'सी झिकियां गै छोटा टाबर है अर झिकी गर्भवती हो'सी। क्यूंकै बाऊं भाजिजै गो कोनी। 18थे लोग पराथना करो कै ऐ बातां सरदी में ना होवै। 19क्यूंकै जद ऐ बातां घटसी आदमियां गो भोत दुख गो टेम हो'सी झिको ईं दुनिया गै सुरु ऊं लेगे जद परमेसर दुनिया बणाई अब तांई कदी कोनी होयो अर आ'गै बी कोनी हो'सी। 20पण दुख गै दिना नै थोड़ा कर देसी नई तो कोई कोनी बचैगो।

21बां दिना में जे थानै कोई केवै कै मसी आ ग्यो बो अठै है तो बां पर बिस्वास ना करियो। 22क्यूंकै अपणै आपनै मसी अर परमेसर गो संदेस सुणाण आळा, केण आळा आवैगा झिका साची झूठा हो'सी परमेसर नै मानण आळै लोगां नै बी धोखो देण गी कोसिस कर'गे सबूत गै रूप में अदभुत चमत्कार गा काम करैगा। 23ईंखातर थे सावधान रेवो क्यूंकै थानै सारो कीं पेलां ई बता दियो है।

मिनख गै बेटै गो दुसर आणो

(मत्ती 24:29-31; लूका 21:25-28)

24मुसीबत कळेस दुख गै बां दिना गै बाद सूरज गी रोसनी कोनी होवैगी चांद बी रोसनी कोनी देवैगो।

25आसमान गा तारा नीचै पड़ ज्यैगा

अर झिको कीं आसमान में है हाल ज्यैगो।

26फेर सारा लोग परमेसर गी ओर ऊं मिनख गै बेटै नै बादळां ऊं मोटी ताकत गै सागै भोत आच्छै तरिकै ऊं आंवता देखैगा। 27बिं टेम बो आपगै सुरगदूतां नै भेजगे, धरती ऊं लेगे आसमान गै सिरै तांई अर च्यारूं कूंटा मू आपगै चुणेड़ा लोगां नै भेळा करैगो।

अंजीर गै दरखत गी मिसाल

(मत्ती 24:32-35; लूका 21:29-33)

28अंजीर गै दरखत ऊं एक बात सिखो जिंया ईं दरखत गी डाळियां काची मुलायम होगे बामु पता निकळै है तो थानै ठा लागै है कै गरमी गो मोसम कनै है। 29इंयाई थे जाण ल्यो कै परमेसर गी ओर ऊं मिनख गो बेटो बेगो ई पाछो आण आळो है जद मेरी बताएड़ी सारी बातां सारी घटनावां गी बातां हो'सी 30मैं थानै बताऊं हूं आं बातां गै हो जाण ऊं पेलां ईं पीढी गा आदमी कोनी मरसी। 31आसमान अर धरती नास हो सकै पर मेरी बातां झूठी कोनी हो सकै परमेसर गै बिना कोई कोनी जाणै कै बो अंत गो टेम कद हो'सी।

जागता रेवो

(मत्ती 24:36-44)

32परमेसर गी ओर ऊं मिनख गै बेटै गै पाछो आणै गो दिन या घड़ी गो किनैई ठा कोनी ना तो बो खुद जाणै है अर ना ई सुरगदूत जाणै बिंगै बारै में सिरफ पिता परमेसर जाणै है कै बो टेम कद आवैगो। 33-34इनै एक क्हाणी ऊं समझा ऊं, बोळै दूर गै गाम में जाण आळो एक आदमी आपगै घर गै नोकरां नै सारी जिमेदारी देगे उड़ जावै है हर एक नोकर नै के काम करणो है ओ बी बता देवै है गेट पर पेरो देण आळै नै सावधान रेण खातर केगे जावै है। 35इयां थे बी सावधान रेवो क्यूंकै थानै ठा कोनी थारो मालिक कद पाछो आ जावैगो या आदी रात नै सूरज उगण ऊं पेलां या झांझरकै गै टेम में, 36जे बो चाणचकै आ जावै तो थे सुत्या होया ना दीखियो। 37बांगै उडीक में चोकस रेवो ऐ बातां झिकी मैं थानै केऊं हूं सारा नै बताओ।

Currently Selected:

मरकुस 13: BGQ

Highlight

Copy