Maki 16

Iesua mutulu mumaulila

1 Ioxe, Voxo so Ma'ila mukalu la Malia Makatala xe Malia ane Tiemisi nenu xe Salomi, ane'i milotonu mimi ane tuma'u lailaixe so ilutunu noxou Iesua vasimolu. 2Xe no kakau manina aso muxali no anu voxo tei no anu viki ne la ane'i a milai no lulu. 3Ane'i a ilalai la mivikalane'i ngato'o lexe, “Ena'ei usu'ulinenge so upipalo'u lavo'o uxexesou lulu anaxu?” 4Ane'i a inene'e xe misu'anu ie'i sila mimaisou lavo'o toxoxu ne lexe evile mupipalo'u muxexe mukalu. 5Mixali mukalu xe mi'unalai no lulu sila mimaisou maulu vile lavalava kea a mutalupexa loxo no avonge tema. Mimaisou maulu ne la ane'i mikuluke kena.

6Mikuluke ia anu muvikalane'i lexe, “Ngakuluke uasi. Eni alavu lexe ngingi ngene'e so ngakamulinu Iesua so Nasaleti e mililinu no ovu valautu. Anu uxolu 'o uasi. Anu mumaulila. Ngamaisou, ano'o tanixu mimulaxu. 7Ia ngingi ngalai ngavikalane'i Pita oli'a tamenexu tatisaipeli lexe Iesua mu'uli noxi'a mulai ne Xalili. Ane'i ilai ixalisou ne Xalili loxo anu molu mulemolu.” 8Ioxe, tasema milomusou vaikala ne la mi'olo'olo mo mi'ume miiave mila no lulu. Mi'ume manina laso ia'alo noxou itema vile uasi.

Iesua mupala'a noxie Malia so Makatala

9Ioxe, Iesua mutulu mumauli no voxo tei no anu viki. La anu mupala'a tei noxi'e Malia so Makatala. Ane sema e Iesua mukusai'a ta'angelo tamasua 7 mixolu noxie. 10Iesua tamenexu a mixoxolu mitatamasou la ane Malia milai mia'aloi'a lexe Iesua mumaulila. 11Mi'oxo lexe, “Ai, anu mumauli, eni emaisou.” Ia ane'i mi'oxo lexe ane ikalavoi ane.

Tatisaipeli tamei mixalisou Iesua no vote'i

12Xe ili'i la tatisaipeli tamei milutu mi'umesou tuala la mimuamua'i milai. Mimuamua'i la Iesua muxali noxi'a la vasimolu iou vilemo. 13Laso ilou milivu mia'aloi'a tamenexi'a tatisaipeli ia ane'i ilomuxa'a uasi kalumo.

Iesua mupela'axu xaixai ane so upilixi noxi'a

14No voxo vile ili'i la tatisaipeliou 11 mixolu mo a i'ani'ani, la Iesua muxali noxi'a. Muxali la mulavixa'a xo ilopala uasi lexe manina so anu mumaulila. Mo xo ane'i ilomuxa'a uasi ane'i ane mimaisou xe mia'aloi'a lexe anu mulivu muxalila. 15La muvikalane'i lexe, “Ngingi ngalailai no xale tuatuala mukalusi mo ngavotone'i tamitema no anu vaikala laixe noxou Mosinge. 16Ngavotone'i no anu vaikala laixe laso ane'i ilopala. Ilopala ukalu laso nga'oxonu ilixo so kelele noxi'a. Tamitema ane xo ne Mosinge upamauline'i. Ia ane'i ane uasi la itulu no laxunu Mosinge so utilovosou mo ukolinu susu noxi'a ili'i. 17Ane'i ane ilopala la Mosinge u'oxonu sosovo so xavi no avo'a so umaxa'u lexe mi ne maninasou. Xo no anu ualasilo la ikusai'a ta'angelo tamasua mo ilemolu tokipelesi iouiou ane ilavusou tei uasi. 18Xe ane'i itetelisi'a tasineke tamasua no avo'a mo iiexu lamalasini ane ulavusou uve'a tamitema, ia isoli uasi. Xe loxo imulaxu avo'a noxi'a tapipiena la ane'i tapipiena ne laixene'isi.”

Iesua mulivu mutelai no tualasou Mosinge

19Ioxe, Tatananenge Iesua mupelototosi'a mukalu la anu mutelai muxali no tualasou Mosinge. Muxali, la mutalupexa no avolu Mosinge tema. 20Xe loxo tatisaipeli la milai no xale tuatuala so mivototo. Mivotovoto la Tatananenge musu'uline'i mo mu'oxonu sosovo so xavi no avo'a so upala'anixu lexe vaikalai'a manina.#16.20 Tamitema so lavulavu se'i ixavutala lexe Maki molu ukaukavunu vaikala ane uxolu no anu 16:9-20 anu iou vilemo sevile.

Currently Selected:

Maki 16: ATA

Highlight

Copy