Luku 1

Luku mukaukavunu a'alo mulai noxou Tiopilusi

1Itema tila Tiopilusio, tamitema tavu'alo mitovonu mukalu so ikaukavunu a'alosou mimi mukalusi ane Mosinge muxalixu no tainexi 'o. 2A'alo ne mino'u noxi'a tamitema ane me'a mixolu misaxisou mimi ne no ie'i no tava'u manina. Misaxisou xe mixali tamitema so ixaxaisou vaikala ne laso mia'aloxu mune'e noxixe 'o. 3Ioxe, eni exolu ekilolo laixe no anu mi kikitu no anu a'alo noxi'a, musoko'u no tava'u manina mune'e. Laso maixene e'oxo lexe eni kalumo akaukavunu umulinu u'isalili. Xe ukalu, la akalanu ulai noxine nini Tiopilusi ne. 4A'oxo axone mo so loxo na'itisou la nalavu manina no anu mimi ane tamitema mipela'inexu mukalu.

Angelo mupela'u Sekelaia lexe Tioni so uxali

5No voxo ane Eloti muxoli kingi no xale lia ne Iutea, la pilisiti vile muxolu kalumo, ualasou lexe Sekelaia. Anu so laili vile noxi'a tapilisiti ilemolu lexe Apia. Xe semau ne ualasie lexe Elisapeti, ane Aloni ilusunu vile. 6La ane'i ilou xoluxoluxa'a malemalenga no iou Mosinge xo ilixo noxi'a mulapusi so mimulinu lavuloto u'isalili no anu masaxa noxou Tatananenge. 7Ia ane'i ta'ili'a uasi xo Elisapeti imomomo so ipala uasi. La ane'i ilou mixolu axonesi xo mo ane'i tatiatila mukalu.

8Ioxe, no voxo vile la Sekelaia muxolu so upilisiti no tasou Mosinge. Muxolu ne xo anu voxo ane misosovosou so oli'a laili noxou i'oxonu xaixai anene. 9La anu oli'a tamenexu tapilisiti mi'oxonu ilixo so ilounu uala. Ilounu uala so lexe ena'ei ualasou uxali la anu u'unalai no tasou Tatananenge so u'elaxu mi e tuma'u lailaixe. Mi'oxonu ilixo so uala mukalu sila Sekelaia ualasou muxali. 10La anu a u'elaxu mi tuma'u lailaixe nonano la ane'i tamitema latala mipita noale so ixolu ivikala noxou Mosinge.

11Ioxe, Sekelaia muxolu nonano la angelou Tatananenge mupa noxou mo mutulu no avolu tema no tanixu e i'elaxu mi tuma'u lailaixe ne. 12Xe Sekelaia mumaisou angelo ne la mukuluke mo mu'olo'olo kena. 13Ia angelo muvikalanu lexe, “Sekelaia, na'ume mamu. Xo Mosinge mulomusou linga noxine mukalu, semameni Elisapeti ivo'onu iline vile mulu. Ivo'onu laso namoxo'u ualasou lexe Tioni. 14La oponeni uleilaxu xe u'osasou iline ne mo osa'ila noxi'a tamitema tavu'alo uxali no voxo ane ivo'onu. 15Xo anu ualasou utiatila no iou Tatananenge. Anu uiexu uaini o lexa pakia'u uasi. Mo loxo uxolu no anu nenu oponesio, ivo'onu uao, la Ulenu Laixe uxolu noxou lumamo. 16La anu itema ne ulivunixi'a tamitema Ta'isilaeli tavu'alo ilai noxou Tatananenge anu Mosi'a. 17Anu uno'u xavi mo umulinu ilixo loxo polopeti Elaitia xo anu uxiunu opone'i tamitema uxali vilesisi noxi'a ta'ili'a. Xe tamitema ane ilomuanu Mosinge vaikalaou la vaikalaou itema 'o uxiunu opone'i mo so ilavu a loxo tamalemalenga. La anu u'oxo axone mo so loxo Tatananenge une'e la ane'i ixolu ilalaxi laixe lumamo.”

18Ioxe, angelo muvikala axone laso Sekelaia mutali'isou aloxo 'o, “Ia mi ne alavusou lexe manina axovao? Eni amitema tila 'o xe semaxeli tau iexe tavu'alo mukalui io.” 19La angelo mukolinu lexe, “Eni Xevilieli a. Eni ane alavusou atulu no laxunu Mosinge. Anu molu mupalusilo ene'e epala'anixu vaikala laixe ano'o noxine a. 20Ia nini nalopalanu vaikalaxeli lexe maninasou uasi laso avikala aloxo 'o. Nini anaxene utomu avile so navikala uasi. Naxolu axone xo mo uxali no anu voxo u'isalili loxo Mosinge musosovosou, laso ane, nene'axu vaikala elemolu 'o uxali.”

21Ioxe, tamitema ane mixolu noale la mixomaiou Sekelaia so ula. La tane'ilili lexe muxolu nonano no tasou Mosinge maxuveni xo ma'ia. 22Mixomaiou xo xe mula la anu umomomo so uvikalane'i uasi. Laso ane'i milamana lexe anu masi mumaisou mi vile loxo ai saxi nonano no tasou Mosinge ane. Anu mulosilosi no avolu so upela'a lexe mi ma'ia muxalisou ia loxo anaxu la mutomusi. 23La Sekelaia muxolu mu'oxonu xaixai so upilisiti xo xe voxosou mukalui, laso mulivu no tualasou.

24Xe mune'e la semau e Elisapeti opone. Opone la mimulinu iloxo noxi'a la mitalume mixolu so'io 5. Xe mivikala aloxo 'o, 25“Ai, Tatananenge tanuxo mo musu'ulileli 'o. Anu mumaxa'u osa noxou mo mukalusou maila noxilo e so apala uasio.”

Angelo mupela'e Malia lexe opone mo ivo'onu ilie Iesua

26 Ioxe, Elisapeti opone so'io 6 mukalu. La Mosinge mupalusou angelo e Xevilieli so ulai no tuala ne Nasaleti a uxolu no xale lia ne Xalili. 27La anu mulai noxie vuanga vile ualasie lexe Malia. Vuanga ne ilai noxou mulu vile uasi ia misosovosie so itaula'ixu Kingi Teviti ilusunu vile ualasou lexe Iosepu. 28Angelo muxali noxie la muvikala lexe, “Aso. Tatananenge musosovosine so u'oxoneni laixe manina la anu a uxoxolu noxine.”

29Xe Malia milomusou vaikala anene la mikuluke mo tanelili no anu laxu vaikalaou. 30Ia angelo muvikalane lexe, “Malia, na'ume mamu xo Mosinge mu'osasine ne. 31Une'e la nini oponeni xe ili'i la navo'onu iline mulu vile. La namoxo'u lexe Iesua. 32Anu ualasou uxali utiatila mo imoxo'u lexe Anusisi U'uli'uli Olu. La Mosinge Anu Tatananenge utulusou no anu tanixu kingi noxou ilusunu e Teviti. 33Xe anu uxolu no anu tanixu kingi so u'uli laxunu laili noxou Iakovo kaluxu uasi.”

34La ane Malia mitali'isou angelo lexe, “Mi anene uxali axova? E eni alai noxou mulu vile uaosio.” 35La angelo mukoline lexe, “Mosinge Anu Ulenu Laixe une'e noxine mo xavinu Anusisi U'uli'uli usu'asine. Laso ili'i nini navo'onu iline vile ilixo noxou malemalengasi mo ane'i ilemolu lexe Mosinge Olu. 36Xe tulaneni Elisapeti kalumo, ane sema tila mukalu ia ane kalumo opone mo so'ioxe 6 mukalu 'oe. Ulai ili'i la ivo'onu ilie vile mulu. 37Xo nalomu, Mosinge umomomo no anu mimi mukalusi, mi vile ialuxu noxou uasi.”

38Laso Malia mivikalanu lexe, “Ioxe, uxali loxo nelemolu xo eni sema so xaixai noxou Tatananengesi 'o.” Mukalu la angelo mulutu muxexesie.

Malia milai so imaisie Elisapeti

39Ioxe, Malia ixolu maxuveni uasi mi'avuti milai palea no xale lia vile. Milai ne la mixali no la'ola'olu mo milai avile no tuala vile ne Iutea. 40Mixali la mi'unalai no tasou Sekelaia mo mivikala aso noxie Elisapeti. 41Ioxe, Elisapeti milomusou aso noxie sila ilie no opone mu'avuti mu'oki. La Ulenu Laixe mupamuxane Elisapeti. 42La mivikala tatila aloxo 'o, “Ai, mi ane Mosinge muxalixu noxine ne lailaixe manina, uua'ulixu anene noxixe tasema mukalusi. Xe noxou iline no oponeni ne, Mosinge uxalixu nene'axu lailaixe misevile no anu xoluxoluxu. 43Ia tava'u axova so nini Tatananenge nenu nene'e noxilo aloxo 'o? Anu mi lailaixe manina. 44Xo loxo elomusine nevikala aso noxilo la alaxu vilesisi alixeli no opoleli mu'osa manina mo mu'avuti kena. 45Nini nelopala noxou Tatananenge lexe mi e mupela'inexu la uxali. Laso maixene muxalixu nene'axu laixe misevile no anu xoluxolu noxine.”

Malia milexe so i'itinu Mosinge ualasou

46La Malia mi'oxo aloxo 'o, “Taleli u'itinu ualasou Tatananenge. 47Xe opoleli u'osa noxou Mosinge e mosou pamauli noxilo. 48Eni exolu a mi vitanisi 'o xo eni sema so xaixai noxousi. Ia anu tanuxo misevile laso usoko'u vaimomo 'o xe ulai ili'i la tamitema mukalusi ilavu lexe anu mu'oxoleli laixe misevile. 49Xo Anusisi Xavinu ne muxalixu mimi mutiatila no anu xoluxoluxo. Anu ualasou malemalengasi. 50Xe noxi'a tamitema so tatei xe vaimomo 'o xe ili'i, la uiaiamane'i ane'i ta'ei imama'u noxou. 51Anu muxalixu nene'axu e xavinu musuku no anu avolu. Anu mupaxelelene'i ane'i ane mitoxa'a no opone'i. 52Tatiatila ane mitulu no anu tanixa'a teitexi so mikingi la mulu'ene'i. Ia tamitema vitanisi la mu'itine'i mo mutulusi'a no anu tanitanixa'a laixe. 53Tamitema ane misolixa'a la mu'itixa'a la'ilali xo la mikalusou masaxa avile. Ia ane'i ane mixolu no latanu mimii'a la mukusai'a milai mixaxasi. 54Anu musu'ulinu itema so xaixai noxou e Isilaeli. Anu oponu ututuluou vavalima so iaiama noxou. 55Vavalima e mu'oxonu noxi'a tatiatila tatei. Anu muxali noxou Apala'amu xe musuku noxinge ta'ilusunu la ulai kaluxu uasi.”

56Ioxe, Malia mixolu noxie Elisapeti. Mixolu xo xe so'io tatalu mukalui laso milutu milivu no tualasie.

Elisapeti mivo'onu ilie Tioni

57 Xe mune'e xe voxosie Elisapeti muxali la mivo'onu ilie mulu. 58La tatemanu tualasie oli'a tatulane milomusou a'alosou iaiama toxoxa'a Tatananenge mu'oxonu noxi'e Elisapeti ne. Milomusou laso mine'e noxie mo oli'a mi'osa'osa misevile.

59Ioxe, mivo'onu ilie xe muxolu voxo 8 mukalu laso tamitema mine'e so i'oxonu ilixo so ixotonu molomolo vasimolu. Mi'oxonu la ane'i so ilemolu no anu ualasou momu e Sekelaia. 60La molomolo nenu mi'oxo lexe, “Uasi to! Talemolu ualasou lexe Tioni.” 61La ane'i mivikalane lexe, “Ia noxi'a tatulaneni vile ualasou axone uasi.” 62La milosilosi no anu avo'a noxou molomolo momu so lexe anu umasaxau ilemolu olu ualasou axova. 63La mupalusi'a ine'enu mi vile so ukaukavu no anu. Mine'enu mukalu laso mukaukavu aloxo 'o, “Ualasou lexe Tioni.” La mikuluke. 64Sila alaxu vilesisi anaxu utomu la uasi mo levexu papaxe so uvikalala. La anu musoko'u so u'itinu Mosinge ualasou. 65Xe tatemanu tualasi'a mimama'u manina. La a'alosou muiaveiave sika tatemanu xale lia no la'ola'olu ne Iutea mukalusi ne mivivikalasousi. 66Mo tamitema ta'ei milomusou a'alo ne mixavutala piena mo mi'oxo lexe, “Ai, molomolo ne masi uxali itema kaini axovao?” Mivikalasou axone xo anu mulamana noxi'a lexe xavi noxou Tatananenge muxoxolu noxou.

Sekelaia mulemolu vaikala so pela'a sevile

67Ioxe, Mosinge Ulenu Laixe mupamuxanu Sekelaia so mulemolu vaikala so pela'a aloxo 'o, 68“Ta'itinu ualasou Tatananenge e Mosinge Taisilaeli, xo anu mune'e so usu'ulinenge mo mulotonenge tamitemaou talivu noxou. 69No anu laili noxou itemaou Teviti anu mutulusou itema xavinu so upamaulinenge. 70Loxo tatei e anu molu mua'alo no anu anaxa'a tapolopetiou. 71Anu upamaulinenge no avo'a tauluamenge xe no avo'a tamitema ane imatapianenge. 72Anu mu'oxonu iaiama noxi'a ta'ilusunenge mo anu oponu ututuluou vavalima noxou. 73Vavalima e mu'oxonu noxou ilusunenge Apala'amu. 74Muvavalima lexe u'umenenge no avo'a tauluamenge mo so ta'oxonu xaixai noxou mo ta'ume uasi. 75Mo so axone la utotomu taxolu tamalemalenga mo talapu no iou umomomo no anu telexu voxosinge 'o.”

76La anu muvikalanu keakea lexe, “Alixeli, ulai ili'i la tamitema imoxo'ine lexe nini polopetiou Anusisi Uli'uli. Mo nini na'uli noxou Tatananenge so nalalaxinu vote'isou.

77Xe anu uili'i la upela'axu tamitemaou vote'i so pamauli mo so ilavu lexe tina'uxa'a so susu ukalu axova. 78Xo Mosinge oponu mamalaxu mo u'oxonu iaiama la upalusou Tatananenge molu teitexi une'e. Anu uxali loxo aso uxali no loxotolo. 79Uxali, laso lamanaxu uiesi'a ane'i ane ixolu no isivoxo mo no maimaixu soli. La anu molu upamuxanu tava'inge so tapolo no anu vote'i so xoluxolu lalavulusi.”

80Ioxe, mune'e la molomolo ne muleme tatila mo tanu mututulu pumuxu no anu xaixai ane so u'oxonu. La muxolu no xale lia esiesi xo mo voxosou muxalii laso mulai mupala'a noxi'a Ta'isilaeli.

Currently Selected:

Luku 1: ATA

Highlight

Copy