Luku 2

Malia mivo'onu ilie Iesua

1 No voxo ne la Sisa Oxasitusi mu'oxonu voto vile mo mukalanu mulai no tuatula ane mu'uli laxunu ne. Mu'oxo lexe i'oxonu senisisi mo ino'u ualaualasi'a tatemanu mukalusi. 2Anene alaxu tei so mi'oxonu senisisi no voxo loxo Kuiniliusi muxolu tatila no anu xamani no anu polovinisi ne Silia. 3Laso tamitema latala a mililivu no anu tuatualasi'a u'isalili mo so taxamani ino'u ualaualasi'a.

4Ioxe, Iosepu kalumo mulutu so ulivu no tualasou. Anu ilusunu Teviti xo anu so laili noxou u'isalili laso mulutu no tuala Nasaleti ne Xalili e muxolu no anu ne. Mulutu la mulai no tualasou ane Peteliemu ne Iutea xo anene tuala noxou Teviti. 5Iosepu mulai, la olie sema misosovosie lexe noxou e Malia milai so taxamani ikaukavunu ualasi'a. La no voxo anene Malia opone. 6Ilou a mixoxolu ne Peteliemusio sila voxo so Malia ivo'onu ilie muxali. 7Laso no voxo anene mivo'onu ilie anu laposalaxu. Mivo'onu mukalu la misu'asou no anu lavalava mo miaisou no anu lusou la'ilalixa'a takau. Ane'i a mixolu no anu ngiou noxi'a tamisoposi axone xo tasi'a tamitema taasila a mua'anana, mole tanixa'a nonano uasisi.

Ta'angelo milaixu vaikala lamana noxi'a tamitema so isaxila'a tasipisipi

8 Ioxe, no apu ne tamitema se'i so isaxila'a tasipisipi. La mixolu noale va'axu no taoni no olovoxo ne so isaxila'a tasipisipi no laxalaxalasi. 9Mixolu sila angelou Tatananenge muxali no laxune'i. Muxali la Tatananenge iaxu mutalo no pa'upa'ume'a sika tane'i kalaua misevile. 10Ia angelo ne muvikalane'i aloxo 'o, “Nga'ume uasi, ngalomu. Eni ene'enu a'alo laixe no anu mi vile so osa'ila tatila noxi'a tamitema mukalusi 'o. 11Xo no anu taoni noxou Teviti la sema vile mivo'o mo ilie ne anu so upamaulingengi. Anu ane Mosinge musosovosou so Kalaisiti mo anu Tatananenge ane. 12La alemolu sosovo so ngatongonu aloxo 'o. Ngingi ngamaisou keakea ne misu'asou no anu lavalava mo miaisou no anu lusou la'ilalixa'a takau.”

13Angelo ne muvikala mukalu sila alaxu vilesisi ta'angelo so tualasou Mosinge tavu'alo e tavu'alo mipa kalumo. Mipa la milexenu lexe so i'itinu Mosinge ualasou. Milexe aloxo 'o, 14“Ta'itinu ualasou Mosinge e uxoxolu teitexi avile. Xe noxi'a tamitema no lialia ane Mosinge u'osasi'a la ixolu lalavulusi.”

Tamitema so isaxila'a tasipisipi milai so imaisou Iesua

15Ioxe, ta'angelo mixexesi'a so milivu no tualasou Mosinge mukalu la tamitema so isaxila'a tasipisipi mi'oxo lexe, “Ioxe, nenge tapalea talai ne Peteliemu mo tamaisou mi ma'ia muxali a loxo Tatananenge mupela'ingexu 'o.” 16Laso ane'i milutu palea milai xo xe milavusi'ae laso mixalisi'a Malia ilou Iosepu. Mo mimaisou keakea a muai no lusou la'ilalixa'a takau. 17Ane'i mimaisou mukalu laso mipala'anixu vaikala ane angelo mulemolu so molomolo ne noxi'a. 18Xe noxi'a ane'i mukalusi ane milomusou vaikalai'a tamitema so isaxila'a tasipisipi ne la tane'ililiou manina. 19Ia noxie Malia la mikasou vaikala ne no opone mo mimolo taneousi. 20Xe no anu lailivu noxi'a tamitema so isaxila'a tasipisipi la milalai mo mi'itinu Mosinge ualasousi. Milemolu osa noxou Mosinge xo mimi e milomusou mo mimaisou la muxali mu'isalili a loxo angelo mupela'axusi.

Ane'i milosou uala noxou Iesua

21Ioxe, muvo'o mo muxolu xo xe voxosou 8-soui, la ane'i mixotonu vasimolu mo milemolu ualasou Iesua. Uala ne angelo mulemolu lumamo mi ne muxolu noxie nenu opone uaosio.

Simioni olie Ana misaxisou Iesua no tasou Mosinge

22Xe mune'e la Iosepu olie Malia mixolu mimulinu lo noxou Mosisi so lexe lavulo'o ukalu la ixali malemalengala axova. Laso mixolu xo xe voxo loxo lo mulemolu mukalui la milaixu keakea ne Ielusalemo so ipilixinu xoluxoluxu noxou Tatananenge. 23Xo mimulinu lo noxou Tatananenge ane vaikalaou mulemolu aloxo 'o, “Loxo sema ivo'onu ilie ane tei xe mulu, la molomolo ne ngakalipalanu lexe noxou Mosinge mu'isalili.” 24Xe ilou mino'a tangiala so i'oxonu ilixo so navu a loxo ulemolu no anu lo noxou Tatananenge aloxo 'o, “Tangiala utu tamei o tangiala sovu tamaulu tamei.”

25La no voxo anene itema vile a muxolu ne Ielusalemo ne, ualasou lexe Simioni. Anu xoluxolu noxou mulapusi mo oponu mututuluou masaxa noxou Mosingesi. Anu muxoxomaiou itema Mosinge musosovosou so uaisou tane'i Ta'isilaeli. La no voxo ne Ulenu Laixe a mupamuxanu Simioni ne. 26Mo Ulenu Laixe mupela'u lexe usoli tei uasi, uxolu xo mo umaisou itema e Tatananenge musosovosou so Kalaisiti uxalio. 27Ulenu laixe a mupamuxanu la mu'unalai muxolu no tasou Mosinge. Muxolu la keakea Iesua nenu ilou momu mine'enu noxou Simioni so umulinu ilixo noxou a loxo lo mulemolu. 28La Simioni mivo'onu no avolu mo muvikala laixe noxou Mosinge aloxo 'o, 29“Tatananexi, anu umomomo so napilixileli amitema so xaixai noxine 'o alaisi, xo opoleli uai lalavulusi a. Anu muxali aloxo nini nelemolu. 30Vote'i e ne'oxonu so tapamauli no anu, a emaisou no ieli 'oe. 31Vote'i nelalaxinu ne anu upala'a no ie'i tamitema mukalusi. 32Xo anu lalamo so upela'a tamitema noale'ale, xe anu so u'itinu ualasi'a tamitemameni Ta'isilaeli.”

33Simioni muvikalasou keakea axone xe Iosepu olie keakea nenu milomusou la mikisikula manina. 34Mukalu la Simioni muvikala laixe so xoluxoluxa'a mo muvikalane keakea nenu Malia aloxo 'o, “Nalomu, noxou molomolo soxu e Mosinge musosovosou 'o la Ta'isilaeli tavu'alo ixalisou mamulo xe tavu'alo ixalisou pamauli. Mosinge musosovosou ia ane'i latala ixililiou. 35Ixililiou laso maixene mi e uxolu no opone'i ne upala'asi. Ia noxine la naxamulinu navunavu a loxo laviso so oto uto'omolu e'eneni avile.”

36Ioxe sema aululu vile so pela'a ualasie lexe Ana a mixolu. Ane Vanueli olu no anu laili noxou Asa. Tei ane mitaula'i mo ilou mulue mixolu tau ie 7. 37Mukalu la anu musoli ia ane mixolusi xo mo tau iexe muxali 84 'o. La Ana ne mixoxolu no tasou Mosinge, ilai noalela uasi. Mixolu opone mutuluou mimi noxou Mosingesi la utotomu i'apixe no anu la'ilali mo mivivikala noxou Mosinge. 38La no voxo ne ane kalumo mine'e misaxisou keakea laso mivikala laixe noxou Mosinge. La mia'a'aloxu noxi'a tamitema ta'ei ane mixoxomaiou voxo so Mosinge upamauline'i tatemanu taoni ne Ielusalemo.

Iosepuena milivu milai ne Nasaleti

39Ioxe, Iosepu olie Malia mimulinu mimi mukalusi aloxo lo muvikalasou xe mukalui la milivu milai no xale lia ne Xalili mo mixali avile no tualasi'a ne Nasaleti. 40Xe molomolo muxoxolu la vasimolu muleleme mo pakia'u xe lavulavuou mutatila la iaiama noxou Mosinge muxolu noxou.

Iesua tau iexu 12 ka mulai ne Ielusalemo

41Xe no anu tautau ie utotomu ne momu olie nenu milavusou ilai ne Ielusalemo. Milailai utotomu axone so i'oxonu lavilelu so Mosinge Mualasi'a. 42Xe Iesua tau iexu 12 mukalu laso anu kalumo oli'a milai ne Ielusalemo so imulinu ilixo noxi'a mo isosovosou voxo tatila ne. 43Xe voxosou la'ilali ne mukalu la momu olie nenu milutu so ilivu no tuala. Ia anu maulu soxu Iesua ne anu muxolu ne Ielusalemosio ia ane'i ilavusou to uasi. 44Ane'i ilou mikalavoi lexe anu a oli'a ikei ne la mimuamua'i voxo loloni mukalu. Xo xe no olovoxoe sila ilou mikamulinu no taine'i taminemine'i xe tamenexi'a. 45La ilou ikakamuli ikakamuli xo la ixalisou uasisi laso milivu milai ne Ielusalemo so lexe ixalisou ne. 46Ilou mixali ne Ielusalemo la mikakamulinu xo mole voxo tatalu. Xe mukalui sila mixalisou muxolu no mataunaxu tasou Mosinge. La muxoxolu no taine'i tamitema so lavulavu no anu lavuloto ne mo a mulolomusou vaikalai'a xe mutatali'isi'axu. 47Io anu kalumo mukolinu tali'i noxi'a la ane'i mikuluke mo tane'ilili no anu lavulavuou.

48Xe momu olie nenu mimaisou ne la ane'i mikuluke manina mo nenu mivikalanu lexe, “Alixeli, aloxova so ne'oxonexi aloxo 'o? Nexi noxou mamine oponexi mutamasine xo tekakamulineni.” 49Ia anu muvikala lexe, “Xo ngingi ngekakamulileli so ma'ia? Ngingi ngalavu uasi lexe eni amulinu masaxa noxou Mamilo mo axolu no tasou?” 50Ia ane'i ilamana no anu vaikalaou laxu uasi.

51Ioxe, laso anu oli'a milivu no tualasi'a ne Nasaleti la utotomu anu mumulinu vaikalai'a. Ia nenu mimolou taneou vaikalou ne. 52Xe Iesua muxali maulu avile la lavulavuou mu'asi'asi manina. La Mosinge mu'osasou mo tamitema mi'osasou kalumo.

Currently Selected:

Luku 2: ATA

Highlight

Copy