Luku 3

Tioni itema so ilixo so kelele mulanu vaikala

1Ioxe, Sisa Taiveliusi muxolu mukingi noxi'a Talomu tau iexu 15 xe Ponitiasi Pailati mutulu kisou xamani no anu xale lia ne Iutea. Mo no voxo anene kalumo Eloti mu'uli laxunu xale lia ne Xalili xe vimou Pilipi mu'uli laxunu xale lia ne Itulia mo Talakonitisi xe Lisaniasi mu'uli laxunu xale lia ne Avilene. 2La Anasi ilou Kaiavasi mixolu no anu tanixu pilisiti tatila. Ioxe, no voxo anene la Tioni e Sekelaia olu muxolu no anu xale lia esi'esi. Muxolu la Mosinge mupilixinu vaivaikalaou se'i noxou Tioni. 3Laso Tioni mulai no xale tuatuala muxolu no pa'upa'umolu lexa Tiotani. La mulanu vaikala noxi'a tamitema lexe ixiunu opone'i mo i'isalilinoxu no anu Mosinge vaikalaou. Mo i'oxonu ilixo so kelele so imaxa'u lexe Mosinge muiasou susu noxi'a. 4Anu muxali loxo polopeti Aisaia mukaukavunu mo uxolu no lavukuou aloxo 'o, “Anu uxixaou no xale lia esi'esi mo xolinu ula aloxo 'o, 'Ngalalaxinu mo nga'isalilinoxu vote'isou Tatananenge. 5Loxo vanuvanunu la usovo xe laxalaxa'ilu la umamulo so latiasi. Xe loxo vote'i ukilikalu la uxali ulovosi xe vote'i ane kongekongexu la uvilimisi. 6Mo tatemanu lialia mukalusi isaxisou pamauli noxou Mosinge.'”

7La tamitema tavu'alo e tavu'alo mine'ene'e noxou so anu u'oxonu ilixo so kelele noxi'a. La anu muvikala noxi'a lexe, “Ngingi ne, ngingi ngaxilisi mo nga'oxo loloxa'a tamitema, ia anu loxo lamalasini masua uxolu no anangene a loxo tasineke tamasua to. Ena'ei muvikalangengi so nga'umesou voxo so la'ia e unene'e 'o? 8Loxo ngexiunu mo nge'isalalinoxu opongengi maninasou la nexi masi tamaisou nene'axu uxali no anu xoluxolu noxinge ane. Mamu so nga'itingengi xo ngingi Apala'amu ta'ilusunu. Anene mi vitanisi ane. Eni avikala lexe Mosinge umomomo so uxiunu lavolavo'o uta'olu 'o so ixali ta'ilusunu Apala'amu. 9Mo anu laixe kalumo so ngingi ngamama'u xo Tatananenge anu loxo itema a utatavulenu lapemu. Anu a mulalaxi so uxetasou ovuovu aneva ulavusou uxalixu temanu laixe uasi. Uxetasou ukalu laso upeinu no navu.”

10Ioxe, ane'i tamitema latala ane milomusou vaikalaou Tioni axone la mitali'isou lexe, “Laso nexi tanava io?” 11La anu mukoline'i lexe, “Itema lasiotiou tamei la ulosou vile noxou itema ane lasiotiou uasi. Xe itema ane la'ilali la u'oxo axone kalumo.” 12Xe tamitema ane so itaxusou taxisi se'i a mine'ene'e noxou so u'oxonu ilixo so kelele noxi'a kalumo. La mitali'isou lexe, “Tisa, nexi 'o la tanavae?” 13La mukoline'i lexe, “Ngataxusou lamoli so taxisi u'isalili loxo xamani musosovosou. Ngasosovosou se'i no latanu so lexe na'a ngingila uasi.” 14Xe ta'ami se'i la mitali'isou lexe, “Xe axova noxixe 'o, nexi ta'oxo mi ma'ia?” La anu mukoline'i lexe, “Ngasousoune'i tamitema so ngano'u lamoli noxi'a uasi. Mo ngakalavoisi'a tamitema no lakoti so ngapulumao lamolii'a vitanisi mamu. Lapemenge axova la opongengi u'osasousi, nga'isuxu se'ila uasi.”

15Tamitema mukalusi ne milomusou vaikalaou la opone'i mu'avuti mo tane'ilili noxou Tioni lexe axova, anu ane so Kalaisiti o uasi. 16Laso Tioni mukolinu tali'i noxi'a ne aloxo 'o, “Loxo eni la akeleningenge no anu lexasi. Ia Itema ane une'e ili'i noxilo ne anu xavinu mutiatila noxilo. Anu itema tila ia eni amitema vitanisi. Xaixai vile so loxo alulusou lamotasou lasuou ne eni alaixe umomomo so a'oxonu to uasi. Laso noxou la ukeleningenge noxou Ulenu Laixe xe no anu navu. 17Xe anu loxo itema e utetelisou lasovolu so ususunu no anu uiti ngiaxu ka uleanu ulai teitexi. Uleanu ulai teitexi xe sivo uilisou la utavulenu sosou uxexe io ngiaxusi ulapau uai no lia. Mukalu la anu utaxusou uiti ngiaxu mo uta'olunu no tasou u'isalili. Ia sosou ne, anu usi'alonu so u'elaxu no navu ane u'ani'ani mo kaluxu uasi.” 18La Tioni mupelototosi'a no anu vaivaikala tavu'alola so ulanu vaikala laixe noxi'a tamitema.

Eloti mukalavusunu Tioni

19Ioxe, Tioni mulanu vaikala so upala'anixu susu noxou Eloti e mu'uli laxunu xale lia ne. Mususu noxie vimou semau e Elotiasi xe no anu mimi tavu'alola la susu noxou mutila to. 20Xe mune'e la musolonu susu noxou no anu ngiou ano'ola, xo mukalavusunu Tioni.

Tioni mu'oxonu ilixo so kelele noxou Iesua

21La no voxo loxo tamitema latala a mi'oxonu ilixo so kelele la Iesua mune'e so Tioni u'oxonu noxou kalumo. Tioni mukelenixu mukalu xe Iesua muxolu muvikala noxou Mosingesio sila loxotolo mua'a. 22Xe Ulenu Laixe mulu'e noxou la loxo ngiala e utu. Mulu'e la muai noxou. Mukalu la xoli vile molu no loxotolo mo muvikala aloxo 'o, “Nini alixeli asexelaxene ane. Eni a'osasine misevile.”

Nanasou Iesua

23Ioxe, no voxo loxo Iesua musoko'u xaixai noxou la tau iexu 30 mukalu. La tamitema mukalusi mikalavoi lexe anu Iosepu olu ane. Iosepu anu Eli olu. 24Xe Eli anu Matati olu. Xe Matati anu Livai olu. Xe Livai anu Meleki olu. Xe Meleki anu Tianai olu. Xe Tianai anu Iosepu olu. 25Xe Iosepu anu Matatiasi olu. Xe Matatiasi anu Amosi olu. Xe Amosi anu Na'umu olu. Xe Na'umu anu Esili olu. Xe Esili anu Naxai olu. 26Xe Naxai anu Mati olu. Xe Mati anu Matatiasi olu. Xe Matatiasi anu Semeni olu. Xe Semeni anu Ioseki olu. Xe Ioseki anu Tiota olu. 27Xe Tiota anu Tioanani olu. Xe Tioanani anu Lesa olu. Xe Lesa anu Seluvaveli olu. Xe Seluvaveli anu Sealitieli olu. Xe Sealitieli anu Neli olu. 28Xe Neli anu Meliki olu. Xe Meliki anu Ati olu. Xe Ati anu Kosami olu. Xe Kosami anu Elimatami olu. Xe Elimatami anu Elu olu. 29Xe Elu anu Iosua olu. Xe Iosua anu Elieseli olu. Xe Elieseli anu Tiolimi olu. Xe Tiolimi anu Matati olu. Xe Matati anu Livai olu. 30Xe Livai anu Simioni olu. Xe Simioni anu Iuta olu. Xe Iuta anu Iosepu olu. Xe Iosepu anu Tionamu olu. Xe Tionamu anu Eliakimi olu. 31Xe Eliakimi anu Melea olu. Xe Melea anu Mena olu. Xe Mena anu Matata olu. Xe Matata anu Natani olu. Xe Natani anu Teviti olu. 32Xe Teviti anu Ie'isi olu. Xe Ie'isi anu Oveti olu. Xe Oveti anu Voasi olu. Xe Voasi anu Salimoni olu. Xe Salimoni anu Nasoni olu. 33Xe Nasoni anu Aminatapu olu. Xe Aminatapu anu Atimini olu. Xe Atimini anu Alini olu. Xe Alini anu Esilioni olu. Xe Esilioni anu Pelesi olu. Xe Pelesi anu Iuta olu. 34Xe Iuta anu Iakovo olu. Xe Iakovo anu Aisaki olu. Xe Aisaki anu Apala'amu olu. Xe Apala'amu anu Tela olu. Xe Tela anu Na'oli olu. 35Xe Na'oli anu Seluku olu. Xe Seluku anu Leu olu. Xe Leu anu Peleki olu. Xe Peleki anu Eveli olu. Xe Eveli anu Sela olu. 36Xe Sela anu Kainani olu. Xe Kainani anu Alipakisati olu. Xe Alipakisati anu Semi olu. Xe Semi anu Noa olu. Xe Noa anu Lameki olu. 37Xe Lameki anu Metusela olu. Xe Metusela anu Inoki olu. Xe Inoki anu Ialeti olu. Xe Ialeti anu Ma'alaleli olu. Xe Ma'alaleli anu Kainani olu. 38Xe Kainani anu Inosi olu. Xe Inosi anu Seti olu. Xe Seti anu Atamu olu. Xe Atamu anu Mosinge olu.

Currently Selected:

Luku 3: ATA

Highlight

Copy