Luku 4

Uluaou mutovonu Iesua

1Ioxe, Ulenu Laixe mupamupamuxanu Iesua la mulutu no lexa Tiotani so ulivu. La Ulenu mulaixu so muxixao no xale lia esi'esi. 2La muxolu ne mumomomo no anu voxo 40 mo Uluaou mutovotovonu. Muxolu voxo 40 mo u'ani uasi xo mole musolixu manina. 3La Uluaou muvikalanu aloxo 'o, “Ai, loxo nini Mosinge Olu manina la navikala mo lavo'o 'o uxiu uxali pileti.” 4Ia Iesua mukolinu lexe, “Vaikala noxou Mosinge uvikala aloxo 'o, 'Maulixa'a tamitema la ino'u no anu la'ilalisi uasi.'”

5Mukalu la Uluaou mutelaixu no apu vile teitexi so isu'asu'anu ie'i. Sila alaxu vilesisi mulosoiou Iesua no anu xalexale lia noxi'a takingi mo tatemanu no lialia mukalusi. 6La Uluaou muvikalanu lexe, “Namaisou xale tuatuala lailaixe 'o, eni alosine xo anu mukalusi uxolu no avolo so apilixinu noxo ei no anu masaxa na'a xeli. 7Laso loxo namaxa'u mama'u so na'itileli la nini na'a ninisi ane.” 8Ia Iesua mukolinu aloxo 'o, “Vaikalaou Mosinge uvikala aloxo 'o, 'Namaxa'u mama'u so naitinu Mosinge anu Tatananenge, mo nalomuxu anusisi.'”

9Xe ili'ila la Uluaou mutelaixu ne Ielusalemo la mutulusou teitexi e teitexi no latanu Mosinge Tasou. La muvikalanu lexe, “Loxo nini Mosinge Olu manina la naili'e nalu'e 'osi. 10Xo Mosinge vaikalaou lexe, 'Mosinge upalusi'a ta'angelou so i'oxo latolosine laixe.' 11Xe aloxo 'o, 'Ane'i i'itineni no avo'a so tava'ine ukaka no anu lavo'o uasi.'” 12Ia Iesua muvikalanu aloxo 'ola, “Mosinge vaikalou kalumo lexe, 'Mamu so natovonu Mosinge Anu Tatananenge.'” 13Ioxe, Uluaou mutovotovonu Iesua axone mukalu la muxexesou so uxomiaou voxo vile ili'ila.

Iesua musoko'u xaixai noxou ne Xalili

14Ioxe, Iesua mulivu mulai ne Xalili la no anu xavi noxou Ulenu Laixe. Mulivu xe muxali la a'alosou muiaveiave no anu xale tuatuala no apu ne. 15Muxolu la musoko'u so uvotovoto no tatasou lavuloto noxi'a. Xe tamitema milomusou la ane'i latala mivikala laixesou.

Ane'i Tanasaleti la'iaxa'aou Iesua

16Xe mune'e la Iesua mulai ne Nasaleti. Anu tuala e anu muxolu no anu mi ne molomoloxu mo mauluxu no anu. Muxali ne la anu mumulinu ilixou e mulavusou u'oxonu no anu Voxo so Ma'ila xo mu'unalai no tasou lavuloto mo mutulu so u'itisou Mosinge vaikalaou pa'usou vile. 17La ane'i milosou lavuku noxou polopeti Aisaia. Xe anu muxavulalanu mo muxalisou pa'usou ane uvikala aloxo 'o, 18“Ulenu Tatananenge mune'e mo a uxoxolu noxilo 'o. Xo anu munixi'u ueli no kisilo so musosovosilo so ane'enu vaikalaou noxi'a ta'oloxola. Mo mupalusilo ene'e so apala'anixu vote'i noxi'a takalavusu so ila ixolu lalavulusi. Xe noxi'a tamitema ie'i selevenu la apela'a lexe isaxila axova. Xe noxi'a tamitema ane itavulenu tu'umaxu no avo'a se'i la alosi'a xoluxolu manamana'usi. 19Mo mupalusilo ene'e so avikala lamana lexe voxo so Tatananenge u'oxone'i tamitemaou laixe a muxali 'oe.”

20Mu'itisou pa'usou anene noxi'a mukalu la mutatusou lavuku. Mutatusou ka mulosou itema so usaxila'u lavulavuku io anu mulai mutalupexala. Mutalupexa la ane'i mukalusi no tasou lavuloto mipitanu ie'iou Iesuasi. 21La anu mu'avuti muvikalane'i aloxo 'o, “Vaikala so lavukuou Mosinge ane ngexolu ngelomusou ne, nene'axu a muxali vaimomo 'oe.” 22Xe tamitema mixolu milomusou vaikala laixe ane mula no anaxu ne la mivikalasou laixe. Ia ane'i tane'ililiou mo mitali'isi'a ngato'o lexe, “Xo axova, ano'o Iosepu olusi a?”

23La anu muvikalane'i aloxo 'o, “Ngingi masi ngavikalaleli no anu vaikala ane tamitema ilavusou ilemolu lexe, 'Tokota, nini mene napaipouneni. Nexi telomu lexe nini ne'oxonu mimi iouiou ne Kapeniamu, laso na'oxo axone kalumo no anu nunisine 'o.'” 24Mo musolonu muvikala aloxo 'ola, “Eni avikalangengi manina. Loxo polopeti vile ulanu vaikala no anu tualasou u'isalili, la tatemanu ilomuxu to uasi. 25Xe avikalangengi manina aloxo 'ola. No voxo loxo Elaitia muxoxolu la loxotolo mutomu so uali usili uasi mumomomo no anu tau ie tatalu xe pa'usou. Vitolo toxoxu ne mukasou xale tuatuala mukalusi. No voxo ne tasema tavu'alo ane tamului'a misoisoli a mixolu ne Isilaeli. 26Ia Mosinge upalusou Elaitia so ulai usu'uline'i tasema ne uasi. Anu mupalusou mulai nopaxa no tuala ne Salevati e uxolu alai no taoni tatila ne Saitoni so usu'uline sema vile mulue musoli ne. 27Xe no voxo loxo polopeti Elisa muxoxolu la tamitema so siki lepelesi tavu'alo a mixoxolu ne Isilaeli. Ia vile noxi'a vasimolu muxali malemalengala to uasi, anu itema Namanisi so xale lia ne Silia muxali malemalenga no anu siki ne.”

28Ioxe, Iesua muvikala axone xe tamitema ane mixolu no tasou lavuloto milomusou la ane'i mukalusi opone'i ialuxuou manina. 29Sila mi'avuti mikusaou Iesua milaixu noale no tuala. Tuala noxi'a ne muxolu teitexi no la'olu la milaixu Iesua no maia kisou so lexe isu'anu ulu'elai no anu. 30Ia anu mumuamua'i mupolo no taitaine'i la mulai avilesi.

Iesua mukusaou angelo masua noxou itema vile

31Ioxe, Iesua mulutu xe mulu'elai la muxali ne Kapeniamu. Tuala ne so xale lia ne Xalili. Muxolu ne Kapeniamu xe no anu Voxo so Ma'ila la anu a muvotovotone'i tamitema. 32La ane'i mikuluke no anu votovoto noxou xo mulemolu la no anu xavisi.

33Iesua a uvotovoto la no tasou lavuloto ne itema vile muxolu ane angelo masua mukasou. La mu'unga tatila aloxo 'o, 34“Ai Iesua, nini so tuala Nasaleti. Nene'e noxixe so mi ma'ia? Mane nene'e so namamulonexi. Eni alavusine lexe nini Itema Malemalenga noxou Mosinge.” 35Ia Iesua mulavixu lexe, “Naxo tasiausi. Naxexesou itema ne.” Xe angelo masua mupalapeinu no taine'i tamitema sila muxexesou ia uvila'isou itema ne vasimolu uasi. 36“La tamitema latala ne tane'ilili manina la mivikalane'i ngato'o lexe, “Ai, votovoto kaini axova 'o? Xo itema ano'o vaikalaou xavinu mo pakia'u so upalusi'a ta'angelo tamasua, la ilomuxu tosi!” 37La a'alosou mimi ane Iesua mu'oxonu ne muiaveiave no tuatuala no xale lia ne.

Iesua mupaipoune'i tamitema ipipiena mose'i

38Mukalu la Iesua muxexesou tasou lavuloto la mulai mu'unalai no tasou Saimoni. Saimoni ne semau nenie mitavulenu tu'umaxu no vasimele xo pipiena a mukasiesi. Iesua mu'unalai la ane'i milingau su'ulisie noxou. 39Milingau su'ulisie laso Iesua musuku mutulu alai noxie la mulavixu pipiena ne sila mupaxelesie ka mi'avuti milalaxinu xa'a la'ilali.

40Ioxe no aso iou ulu'elai la tamitema mine'ene'i tamenexi'a ane pipiena iouiou mukasi'a. Mine'ene'i noxou Iesua la mumulaxu avolu noxi'a vilevilesi so upaipoune'i. 41Xe noxi'a se'i la ta'angelo tamasua mixexesi'a mo mi'unga tatila lexe, “Nini ne Mosinge Olu ane!” Ia anu mulavixa'a lexe ixolu tasiau xo ane'i milavu lexe anu ane so Kalaisiti ne.

42Ioxe, no kakau manina la Iesua mulutu no tuala la mulai no xale lia ane tamitema ixolu no anu uasi. La ane'i tamitema latala mikakamulinu mikakamulinu xo xe mixalisou la mitovonu so i'apixu lexe oli'a ixolusi. 43Ia anu muvikalane'i lexe, “Eni masi alai no taoni se'i so alanu vaikala so voxo ane Mosinge molu u'uli laxune'i tamitemaou. Xo mi e mupalusilo ene'e so lexe a'oxonu ane.” 44La anu muxixao no xale lia ne Iutea mo mu'unalai no tatasou lavuloto so uvotovoto.

Currently Selected:

Luku 4: ATA

Highlight

Copy