Luku 5

Iesua muvikala la Pita mukaine'i tasinana la'olusi

1No voxo vile la Iesua mutulu no tasisou kupa toxoxu Xenesaleti. La tamitema tavu'alo e tavu'alo ine'e noxou so ilomusou Mosinge vaikalaou. Mine'ene'e la mitulu miveli noxousi. 2Xe Iesua mumaisou pouti tamei a musua no pa'umolu kupa ne. Anene poutii'a tamitema so ikaine'i tasinana ia ixolu no anu uasi, ane'i milu'e so i'uinu uvenixa'a. 3Laso Iesua mutelo no anu pouti vile la mutali'i noxou mosou e Saimoni so usounu usukusou tasii se. Mukalu la Iesua mutalupexa no pouti mo uvotone'i tamitema a mixolu no tasii ne.

4Muvikalane'i tamitema xe mukalu la muvikalanu Saimoni lexe, “Nasuku nalai no anu lautuxu mo nga'italonu uveningenge ulu'elai so ngakaine'i tasinana. 5La Saimoni muvikalanu lexe, “Tatilao, olovoxo loloni nexi tekaine'i tasinana ia ativoku vitanisi, taxalisou vile uasisi. Ia loxo nini nalemolu la alomuxenesi so asu'anu uvenila.” 6Ane'i mi'oxo axone la mikaine'i tasinana e la'olu loloni mole uveni so ukakae. 7Laso Saimoniena mi'avali'a tamenexi'a no anu pouti vile olele. Mine'e xe oli'a mi'itinu uveni so mi'unane'i tasinana no pouti tamei sila muana'anasi mo manela u'uo'uosi. 8Xe Saimoni Pita mumaisou axone la mutangatulu no tava'u Iesua la muvikala lexe, “O Tatanaleli, naxexesilo xo eni amitema so susu a.” 9Muvikala axone xo mumalei lexe tasinana mikaine'i ne tavu'alo musuku la oli'a tamenexu mikuluke lapilai uasisi. 10Ane'i Saimoni tavaitamiou tamei Tiemisi ilou Tioni e Sepeti ta'olu la mikuluke kalumo. La Iesua muvikalanu Saimoni lexe, “Na'ume uasi, xo vaimomo 'o ngataxusi'a tasinana ia ili'i la xaixai noxinge so ngataxusi'a tamitema.” 11Muvikalane'i mukalu la ane'i milivunoxu poutii'a so musua no tasii. Mukalu sila mi'italonu mixamixa'a ne mukalusi so mimulinu Iesua.

Iesua mupaipounu itema vile so siki lepelesi

12Xe mune'e xe voxo vile la Iesua muxolu no taoni vile. La no taoni ne itema vile siki lepelesi mukasou vasimolu a muxolu ne. Xe mumaisou Iesua la mulalusi no laxunu mo muvikalanu lexe, “Tatilao, loxo nini namasaxa la nini namomomo so naxexenu pipiena ano'o so eni axali amalemalenga.” 13Laso Iesua mumexinu avolu mo mumulaxu no vasimolu itema ne la muvikala lexe, “Eni amasaxa. Nini namalemalenga.” Xe alaxu vilesisi la pipiena lepelesi ne muxexesou itema ne. 14La Iesua muvikala pakia'u noxou lexe ua'aloxu mi ane muxali noxou uasi. Mo mupela'u lexe, “Nalai namaxa'ine noxou pilisiti mo na'oxonu ilixo so navu no anu vote'i u'isalili loxo Mosisi mulemolu so tamitema ixali tamalemalenga no vasime'a. Mo so axone la tamitema ilavu lexe nini namalemalengala.” 15Ia a'alosou mimi ane Iesua mu'oxonu muiaveiave mulai nopaxapaxasi. La tamitema latala e latala mine'ene'e so ilomusou vaikalaou mo so upaipoune'i no anu siki noxi'a. 16Ia alaxu tavu'alo anu muxexesi'a mo mulai no xale lia ane tamitema ixolu no anu uasi so uvikala noxou Mosinge.

Iesua mupaipounu itema xixinu musoisoli

17 Ioxe, mune'e xe voxo vile la Iesua a muvotovoto. La ane'i Tapalisi oli'a tatisa so lavuloto a mixolu milolomu ne. Ane'i me'a ne Ielusalemo xe no anu tuatuala no xale lia ne Xalili mo ne Iutea. La xavi noxou Tatananenge muxolu noxou Iesua so upaipoune'i tamitema isiki iouiou. 18Anu muxolu la tamitema se'i mivaivolonu itema vile no anu lu. Itema ne xixinu musiosoli laso maixene a mitavulenu mine'enu so i'unanu no tani mo imulaxu alai noxou Iesua. 19Mine'enu ia tamitema tavu'alo e tavu'alo miveli la vote'i so i'unalaixu uasisi. Laso ane'i mitelaixu teitexi ka milokesou pilika e mutei so laxa'u. Mukalu la mililixu no anu lusou mulu'elai mupolo no taine'i tamitema xo la mua'i mu'isalili no laxunu Iesua. 20La Iesua mumaisou lopala noxi'a la muvikalanu itema ne lexe, “Maula, tina'uxene so susu mukalu.” 21Ia tamitema so lavulavu no anu lavuloto oli'a Tapalisi milomu axone la mitatali'i no opone'i lexe, “Anu u'oxo lexe anu ena'ei to? Xo vaikala e so noxou Mosinge u'isalili la itema ano'o ulemolu vuluvulusi. Mosinge anusisi umomomo so ukalusou tina'u so susu.” 22Iesua mulavusou opone'i ne la muvikalane'i lexe, “Axova laso opongengi utatali'i axone? 23Ma'ia ane ialuxu so alemolu? Ialuxu so avikala lexe tina'uxene so susu mukalu o ialuxu so avikala lexe natulu nano'u lusine mo nalai? 24Ia eni emasaxa lexe ngingi ngalavu lexe Itema ane molu noxou Mosinge uxoxolu no lialia mo xavinu so ukalusou tina'u so susu.” Anu muvikalane'i tamitema so lavulavu axone mukalu la muvikalanu itema e xixinu musoisoli ne lexe, “Nini natulu mo nano'u lusine mo nalai no tasine.” 25Sila alaxu vilesisi itema ne mu'avuti mutulu no ie'i tamitema latala ne mo muno'u lusou. Mukalu la mulutu mulai no tasou mo mu'iti'itinu Mosinge ualasou. 26Xe tamitema latala ne mimaisou mi ne la mikulukemolu mo mimama'u manina la mi'itinu Mosinge ualasou lexe, “Mimi ane temaisou vaimomo 'o iou vilemo manina.”

Iesua mu'avalou Livai so umulinu

27Mune'e xe ili'i la Iesua mumuamua'i xo la musaxisou itema so utaxusou taxisi vile a muxolu no tasou taxisi. Itema ne ualasou lexe Livai. La Iesua muvikalanu lexe, “Nane'e namulileli.” 28Xe Livai mu'avuti sila mu'italonu mixumixu ia mumulinu Iesua mulai.

29Xe ili'i la Livai mu'oxonu la'ilali tatila no tasou so umaxa'u osa'ilasou Iesua. La tamitema so itaxusou taxisi tavu'alo xe tamitema levianila a oli'a italupexa so i'ani no latevolo. 30Oli'a i'ani'ani io Tapalisi oli'a tamitema se'i noxi'a so lavulavu no anu lavuloto mine'e misoko'u so ito'oto'ome'a tatisaipeliou no anu vaikala aloxo 'o, “Ai, loxova so ngingi ngoli'a tamitema so itaxusou taxisi xe tamitema so ili'iloxo masua iouiou a nga'ani mo ngaie ne?” 31La Iesua muvikalane'i lexe, “Tamitema ipipiena uasi la ilai noxou tokota uasi. Ane'i ane ipipienasi a ilai noxou tokota. 32Ioxe, ane'i ane me'a i'oxo lexe ane'i tamalemalenga, la ene'e so a'avali'a uasi. Eni ene'e so a'avali'a ane'i ane ilamana no anu susu noxi'a so ixiunu opone'i mo i'isalilinoxu so susu noxi'a ne.”

Iesua mu'oxonu latilovo se'i so ilixo e so i'apixa'a no anu la'ilali

33La ane'i mivikalanu Iesua lexe, “Voxovoxo utotomu la tatisaipeliou Tioni i'oxonu ilixo so ixolu voxo se'i mo i'apixa'a no anu la'ilali avile mo ixolu ivivikala noxou Mosinge. Xe tatisaipelii'a Tapalisi kalumo i'oxo axone. Ia axova, xo tatisaipelimeni a i'ani'ani mo iie nesi?” 34La Iesua mukoline'i mo mutilovo aloxo 'o, “Loxo itema vile so utaula'i la tavikalane'i tamenexu lexe i'apixa'a no anu i'ani'ani? Uasi to! 35Ia loxo ili'i tamitema isaxanu menexi'a so uxexesi'a laso anu ane. No voxo anene masi italo no anu ani'ani.”

36Mo musolonu mutilovo aloxo 'ola, “Loxo lavalava teinu mo utolotolo la umomomo uasi so tateanu lavalava alavua so tasimenu xasixu se no anu ane teinu ne. Ta'oxonu uasi xo loxo 'o io tavila'isou lavalava alavua ne mo xasixu se ne usime laixe no anu ane tei uasi. 37Xe vile aloxo 'ola. Loxo itema vile uno'u uaini alavua la anu unava? Anu uno'u lexa vexasou teinu e mu'oxonu no anu misoposi sosoiou so utau no anu? Uasi! Xo loxo 'o io uaini alavua masi usoxonixu mole upaunoxu avile la ukasavala no lialia mo lexa vexasou ne umasua avile. 38Laso maixene tatau uaini alavua no anu lexa vexasou alavuasi. 39Xe loxo itema uxolu uiexu uaini teinu la oponu u'osasou alavua uasi. Anu u'oxo lexe anu teinu ne laixesi.

Currently Selected:

Luku 5: ATA

Highlight

Copy