Luku 6

Iesua muvikalasou Voxo so Ma'ila

1Ioxe, no Voxo so Ma'ila vile la Iesua oli'a tatisaipeliou mimuamua'i. Mimuamua'i la mipolo no vote'isou xai so uiti vile. Mipolo la ane'i tatisaipeliou mipitisou uiti ngiaxu se'i mo miloloinu no avo'a so mixexenu sosou ka mi'ou. 2Xe Tapalisi se'i mimaisi'a la mivikalanu lexe, “Ai axova so ane'i i'oxonu mi ane mamu so ta'oxonu no anu Voxo so Ma'ila?” 3La Iesua mukoline'i lexe, “Xo ngingi nga'itisou a'alosou mi e Tevitiena mi'oxonu tatei uasi? No anu voxo vile anu oli'a tamenexu la'ilalixa'a uasi mo misolixa'a. 4Misolixa'a laso anu mu'unalai no tasou Mosinge la muno'u mo mu'ou pileti ane tapilisiti mikalipalanu lexe noxou Mosingesi. No anu lo la uvikala lexe mamu so tamitema vitanisi i'ou pileti ne, anene noxi'a tapilisitisi. Ia Teviti mu'ou mo mulosi'a tamenexu so mi'ou kalumo, la Mosinge la'iaxui'a uasi.” 5La muvikala lexe, “Laso ane, Itema ane molu noxou Mosinge anu Tatatananu Voxo so Ma'ila ane.”

No Voxo so Ma'ila vile la Iesua mupaipounu itema vile avolu musoli

6Xe mune'e no Voxo so Ma'ila vile la Iesua mu'unalai no tasou lavuloto mo a muvotovoto. La itema vile avolu tema musoli a muxolu ne. 7La tamitema so lavulavu no anu lavuloto oli'a Tapalisi mixolu ituluxu Iesua lexe upaipounu itema ne no anu Voxo so Ma'ila. Ane'i mituluxu axone xo loxo anu upaipounu no anu Voxo so Ma'ila la anene tava'u so itulusou no anu vaivaikala. 8Ia Iesua mulavusou xavutala no opone'i ne laso muvikalanu itema ane avolu musoli lexe, “Nane'e mo natulu no talaxa'a tamitema 'o.” La anu mu'avuti mulai mutulu. 9Xe mukalu la Iesua muvikalane'i tamitema ne aloxo 'o, “Loxova. Mosinge u'osa loxo ta'oxo mi ma'i no anu Voxo so Ma'ila? U'osa loxo ta'oxo alauna o loxo tamasuane'i tamenexinge? Anu u'osa loxo tapamaulinu itema vile o loxo tavau usoli?” 10La Iesua iou mukakai'a mukalusi mo muvikalanu itema ne lexe, “Namexinu avone.” Xe mumexinu avolu sila laixenu avile. 11Ia ane'i tamitema so lavulavu no anu lavuloto oli'a Tapalisi la'iaxa'a manina la mivikalane'i ngato'o mo milalaxi lexe i'oxo axova noxou Iesua.

Iesua muiloune'i tatisaipeliou 12

12Ioxe, no voxo anene Iesua mutelai no la'olu vile so uvikala noxou Mosinge. La muxolu olovoxo loloni muvikala noxou Mosingesi xo mo lamana mukea. 13Ioxe, aso muxali la anu mu'avali'a tatisaipeliou mo muiloune'i 12 noxi'a so umoxo'a lexe ta'aposeliou. 14La tamitema 12 ane musosovosi'a ne ualaualasi'a aloxo 'o. Saimoni ane Iesua mulemolu lexe Pita. Xe Pita vimou Anitilu. Xe Tiemisi mo Tioni mo Pilipi mo Patolomiu. 15Xe Matiu mo Tomasi. Xe Tiemisi e Alipiusi olu mo Saimoni anu so laili noxi'a Taseloti. 16Xe Iutasi anu Tiemisi olu mo Iutasi Isikalioti e itema ane so upilixinu Iesua no avo'a tauluaou.

Iesua mupaipoune'i tamitema ipipiena mose'i

17Xe mukalu la oli'a Iesua milivu milu'e no la'olu mo anu mutulu no anu apu latia vile. La oli'a tatisaipeliou tavu'alo mukalusi xe tamitema se'ila e lapilai uasisi a mixolu mipita ne. Ane'i tatemanu xale lia ne Iutea xe so taoni Ielusalemo xe so luaki pa'umolu no taoni Taili mo Saitoni. 18Ane'i mipita so ilomusou votovoto noxou xe so upaipoune'i no anu siki iouiou. Xe ane'i ane ta'angelo tamasua milosi'a xoluxolu masua la anu mu'isalilinixi'a. 19La ane'i tamitema latala mitovonu so ikasi noxou xo anu xaviou a mulutu noxou mo mupaipoune'i.

Iesua mupala'anixu xoluxolu aneva laixe xe masua

20La Iesua iou muxiu mulaii'a tatisaipeliou la muvikala aloxo 'o, “Laixe noxinge ane xoluxolungenge loxo ta'oloxola xo ili'i la ngingi ngaxolu nonano no voxo so Mosinge molu u'uli laxune'i tamitemaou. 21Laixe noxinge ngingi a ngasolingenge vaimomo 'o xo ili'i la ngakalusou masaxa avile. Laixe noxinge ngingi a ngatatama vaimomo 'o xo ili'i ngingi nga'osa mo ngakekesi ane. 22Laixe noxinge ngingi a so tamitema imatapiangengi. Xo ngingi ngatavulenu ualasou Itema ane molu noxou Mosinge laso tamitema ikalitotongengi xe ivikala masuainge xe ixililiou ualasinge. 23Ia loxo mi axone uxali noxinge la nga'osa mo opongengi ulei. Xo ngalomu, palaisimengi la'oluxu to a uai ulalaxi no tualasou Mosinge. Mo ngalavu aloxo 'ola, tatei ta'ilusune'i mi'oxo axone noxi'a tapolopeti kalumo.

24Ia masua noxinge ngingi ane ngaxolu no anu mimi latanu xo osa noxinge se a ngexolu no anu mukalu 'oe. 25Masua noxinge ngingi ane nga'ani laixe vaimomo 'o xo ili'i la ngasolingenge ane. Masua noxinge ngingi ane ngakeke vaimomo 'o xo ili'i la ngatatama mo iengi lexaxu upeipei. 26Masua noxinge loxo tamitema mukalusi i'itinu ualasinge xo tatei ta'ilusungengi mi'oxo axone noxi'a tapolopeti kalavoi.

Pelototo lexe tasexelaxa'a tauluamenge

27Mo musolonu aloxo 'ola, “Noxinge ta'ei so ngalomuxu vaikalaxeli la apelototo aloxo 'o. Ngingi ngasexelaxa'a tauluamengi mo nga'oxonu alauna noxi'a ta'ei imatapiangengi. 28Mo loxo se'i masi opone'i utatamasou mamulosinge ia ngingi la ngalingau mimi laixe so xoluxoluxa'asi. Xe ane'i ane i'oxongengi masua la ngapilixine'i noxou Mosinge so u'oxone'i laixesi. 29Loxo itema usavaline xalevile la naxiu so usavaline xalevilela. Loxo itema vile u'umenu saketimeni la napilixinu lasiotimeni noxou so uno'u kalumo. 30Xe loxo tamitema ilingau mimimeni la mi vile uasi, nalosi'asi. Mo loxo evile ulaixu mi vile noxine la nakaitolonu mamu so ulivunoxu. 31No anu vote'i axova namasaxau lexe tamitema i'oxoneni la na'oxone'i axonesi.

32Xe loxo ngasexelaxa'a ane'i ane loxo isexelangengesi la anu mi lailaixe so tamitema ikulukemolu malaxo to uasi. Xo tamitema so susu kalumo isexelaxa'a ngato'o axone. 33Xe loxo nga'oxo laixe noxi'a ane'i ane i'oxo laixe noxingesi la anu mi vile no anu malaxo uasi. Xo tamitema so susu kalumo i'oxo axonesi. 34Xe loxo tamitema ixalisou tina'u noxinge ia ngalavu lexe ikolinu, la anu mi so tamitema ivikalasingexu laixe uasi. Xo tamitema so susu ixalisou tina'u noxi'a ngato'o axone kalumo, xo ilavu lexe ili'i la ixalisou lakolisou ane. 35Ia ngingi nga'oxo aloxo 'o. Ngasexelaxa'a tauluamengi mo nga'oxonu alauna noxi'asi. Mo loxo tamitema ixalixu tina'u noxinge la mi vile uasi, ngalosi'a mi ma'ia imasaxau io opongengi ututuluou lakolisou uasi. Xo ngingi ngaxalisou lakolisou lailaixe ili'i ane. Mo ngaxolu Anu U'uli'uli ta'olu xo anu ilixo noxou alaunasi noxi'a tamitema tamasua ane ivikala laixe so su'uli noxou uasi. 36Xe opongengi mamalaxu noxi'a tamenexinge a loxo Maminge oponu mamalaxu noxi'a tamitema mukalusi.

Tatilovosi'a tamenexinge so tato'ome'axu susu noxi'a uasi

37Ioxe, Iesua musolonu aloxo 'ola, “Ngingi ngatilovosi'a tamenexinge so ngato'oto'ome'axu susu noxi'a uasi, xo loxo 'o io tilovo no anu susu noxinge uto'omenge u'isalili axone. Xe loxo evile ususunixinge la opongengi uiasou susu noxou xo susu noxinge so uiasi axone kalumo. 38Mo avonge temanusi noxi'a tamenexinge mo so ngingi kalumo ngaxalisou avonge temanu ane. Ngalosi'a tamenexinge, ia ane so ngaxalisou la la'oluxusi mo upeipeisingesi ane. Lasixeli axova so ngalosi'a la lasixeli so lakolisou ulivu noxinge ili'i ne a iou vilesisi.”

39La mu'oxonu latilovo aloxo 'o, “Axova, itema iou mutomu umomomo so ulosoiouxu menexu iou mutomu kalumo vote'i? Ilou masi ilapau no taxa e lautu ane. 40Itema usikulu uua'ulixu tisaou uasi. Ia loxo usikulu xo xe ukalui laso ane, anu uxali iou vilesisi loxo tisaou ne. 41Xe axova so namaisou lapipia utuxu se uai noxou menexine iou ia naxavutalanu ovu alelaxu uai no ieni ne ua'? 42Loxo natilovosou ovu alelaxu ane uai no ieni uasi, la axova so navikala lexe, “Ai vivilo, eni axexenu lapipia utuxu se emaisou uai no ieni ne.” Uo kalavoi, nini naxexenu ovu alelaxu tatila to e uai no ieni teio. Mo so axone la nini nasaxi laixe so naxexenu lapipia utuxu se uai no iou menexine ne.”

Ovu masua uxali nene'axu masuasi

43Iesua muvikala aloxo 'ola, “Ovu laixe uxalixu nene'axu masua uasisi. Xe axone kalumo no anu ovu masua, umomomo so uxalixu nene'axu laixe to uasi. 44Vote'i so tatilovosou ovu lexe anu laixe o masua a no anu nene'axusi. Xo tamitema ilai itaxusou viki ngiaxu no anu lamota ana'anaxu uasi. Xe i'elesou uaini ngiaxu no anu ovu kitukitu ane uleleme vitanisi. 45Itema ane laixe la oponu ututuluou mimi lailaixe ane uxolu no oponu, laso maixene uxalixu nene'axu laixe. Xe ane itema masua la oponu ututuluou mimi masumasua, laso maixene uxalixu nene'axu masua to ne. Mi ma'ia uuana'ananixu itema oponu la ula no anaxusi ane.”

Latilovo so tani utulu no anu mi ma'ia

46Mo musolonu lexe, “Axova so ngamoxomoxo'ilo lexe, 'Tatananexi, Tatananexi,' ia ngalomuxu vaikalaxeli to uasi? 47Loxo itema une'e noxilo ulomusou vaikalaxeli mo ulomuxu la apela'ingexu ilixo noxou aloxo 'o. 48Anu loxo itema umasaxau utulusou tani. Utulusou ia tei la u'asou tanixu ulu'elai avile xe uxalisou lavo'osi laso utulusou tani tava'u no anu. Utulusou xo xe tani ukalui sila anipa toxoxu uxali la lexa u'otu'otunu tani. U'otu'otunu ia ukunikuni uasisi, utulu pumuxusi xo tava'u no anu lavo'osi. 49Ia loxo itema ulomusou vaikalaxeli ia ulomuxu uasi la anu loxo itema utulusou tasou no anu io'i vitanisi. Laso loxo lexa no anipa u'otonu tani la alaxu vilesisi ulume mo umamulo avile.

Currently Selected:

Luku 6: ATA

Highlight

Copy