Luku 7

Iesua mupaipounu voiou tila vile no anu ami

1Ioxe, Iesua muvotovoto noxi'a tamitema xo xe mukalu laso mulutu mu'unalai no taoni ne Kapeniamu. 2La tila vile no anu ami e u'uli laxune'i ta'ami 100 a muxolu ne. Anu voiou vile e mu'osasou misevile musiki tatila mo anu a so usoli. 3Anu tila no anu ami ne mulomusou a'alosou Iesua laso mupalusi'a tatiatila noxi'a Taiuta se'i milai so ilinga noxou lexe une'e upamaulinu voiou ne. 4Ioxe, ane'i milutu xo xe mixali noxou Iesua la milinga mo mitama noxou lexe, “Itema tila ne anu ilixo noxou laixe umomo so nasu'ulinu. 5Xo anu usexelanenge Taiuta manina. Mo anu mutulusou tasou lavuloto noxixe 'o.”

6Ioxe, Iesua mulomuxu vaikalai'a mo oli'a milai. Milai xo la mixali alai no tani ia tila no anu ami mupalusi'a tamenexu se'i so i'alaxu. Mi'alaxu se noale la mivulunu vaikalaou menexi'a lexe, “Ai Tilao, navila'isine so nane'e avile uasi. Eni amitema alaixe so na'una no tasilo uasi. 7Mo tava'u so eni melo ane'e noxine uasi a xo eni amitema alaixe to uasi. Loxo vote'i, la naxolu ane mo navikalasi, mo voixeli 'o laixenusi. 8Eni avikala axone xo eni axolu no laxu tilasilo no anu ami e u'uli laxuleli. Xe ta'ami ane a'uli laxune'i la ane'i ixolu no laxo kalumo. Xo loxo avikalanu vile lexe, 'Nalai!' la anu ulutusi. Xe loxo avikalanu vile lexe, 'Nane'e 'o,' la anu une'esi. Xe loxo avikalanu voixeli vile lexe, 'Na'oxo aloxo 'o.' la anu u'oxonusi ane.”

9Iesua mulomusou vaikala noxou itema e mivulunu ne la mukisikula. Mo muxiu muvikalane'i tamitema latala ane mimulinu ne aloxo 'o, “Avikalangengi aloxo 'o. No taingengi Ta'isilaeli la axalisou itema vile lopala noxou pakia'u aloxo itema ano'o to uasi.” 10Mukalu xe ane'i e tila noxi'a ta'ami mupalusi'a so i'ala milivu no tani la mimaisou voiou ne laixenusi.

Iesua mutulusou maulu vile no anu soli

11Ioxe, maxuveni uasi la Iesua mulutu mulai no taoni vile ilemolu lexe Naini. La oli'a tatisaipeliou xe tamitema latala e latala. 12Mulutu xo xe muxali alai mo anu a so u'una no anu aitengaxu vimelusou taoni ne. Sila muxalisi'a tamitema a milala mo mitavulenu vasimolu itema musoli. Mitavulenu la nenu itema musoli xe tatemanu tuala leviani a mimuline'i. Sema ne mulue musoli tatei mo ilie soxu vilesisi a musoli ne kalumo. 13Tatananenge mumaisie sema ne la tanuxe misevile la muvikalane lexe, “Natama uasi.” 14Muvikalane mukalu la mulai mumulaxu avolu no lusou itema vasimolu laso ane'i ane mitavulenu la mitulusi. Xe Iesua muvikala lexe, “Mauluo, eni avikalaneni lexe natulu.” 15Sila alaxu vilesisi itema musoli ne mu'avuti mutulu mutalupexa mo muvivikalasi. La Iesua muno'u mulaixu noxie nenu. 16Tamitema mimaisou mi ne la mama'u mukasi'asi mo misoko'u so i'itinu Mosinge ualasou. La mivikala lexe, “Ai, polopeti vile tila manina a muxali no tainenge 'oe!” Mo mivikala lexe, “Mosinge a mune'e noxi'a tamitemaou 'o.” 17Xe a'alosou mi e Iesua mu'oxonu la muiaveiave musu'asou xale lia ne Iutea mo mulai avile no tuatuala no pa'upa'umolu.

Tioni e itema so kelele mupalusi'a tatisaipeliou tamei so itali'i noxou Iesua

18La tatisaipeliou Tioni milai mia'alou no anu mimi ane Iesua mu'oxonu. 19Laso Tioni mu'avali'a tamei noxi'a mo mupalusi'a ilai noxou Tatananenge so utalai'isou aloxo 'o, “Nini itema Mosinge muvavalimasou e texoxomaiou o tautitiou evilela masi a uaosio?” 20Ioxe, milutu xo xe mixali noxou Iesua la mivikalanu lexe, “Tioni e itema so kelele mupalusixe tene'e noxine so tatali'i noxine aloxo 'o. Nini itema Mosinge muvavalimasou e texoxomaiou o tautitiou evilela masi a uaosio?”

21No voxo loxo mine'e mitali'i noxou la anu a upaipoune'i tamitema tavu'alo ane mitavulenu siki mo navunavu iouiou no vasime'a. Mo a mukusai'a ta'angelo tamasua noxi'a tamitema se'i xe ane'i tavu'alo loxo ie'i mutomu la mupaipounu so mimaleila. 22La Iesua mukoline'i tatisaipeliou Tioni aloxo 'o, “Ngilou ngalivu la ngaa'alou Tioni no anu mimi e ngemaisou mo ngelomusou 'o. Xo tamitema ane ie'i mutomu la imaleila. Xe ane'i ane tava'a musoisoli la imuamua'isi. Xe tamitema so siki lepelesi la vasime'a malemalengala. Xe ane'i ane sangali'a mutomu la ilolomula. Xe se'i ane misoisoli la itulutulu imaulila. Xe tamitema ta'oloxola la ilomusou votovotosou vaikala laixe. 23La anu laixe noxou itema aneva ulopalaleli mo usasalo uasi.”

24Ioxe, tatamei e Tioni mupalusi'a ne milivui laso Iesua musoko'u so uvikala lamana so Tioni noxi'a tamitema latala ne aloxo 'o, “No voxo loxo ngelailai no xale lia esi'esi la ngelai so ngesaxisou mi ma'ia? Ngesaxisou itema pelesou loxo lele'i ane sivo utaotaonu? 25O masi axova, ngelai so ngasaxisou itema lavulutiou lailaixe? Ai ngalomu, tamitema ane ivilasi no anu mimi lailaixe mo ixoxolu no latanu mimi lailaixe so vasime'a ne ane'i ixoxolu no tasi'a takingisi. 26O masi ngelai so ngasaxisou mi ma'ia, polopeti vile, ne? Ani, ngesaxisou polopeti vile ane. Ia avikalangengi lexe polopeti anene uua'ulixa'a tapolopeti mukalusi. 27Xo anu mosou e vaikalaou Mosinge uvikalasou lexe, 'Nalomu, eni apalusou itemaxeli vile no laxuneni so ulanu vaikalaxeli. Anu u'uli noxine so ulalaxinu vote'isine.' 28Eni avikalangengi aloxo 'o. No taine'i tatemanu lialia mukalusi, la Tioni uua'ulixa'a avile. Ia no voxo so Mosinge molu u'uli laxune'i tamitemaou xe ena'ei noxi'a ualasou vitanisi, la uua'ulixu Tioni ane.”

29Iesua muvikalasou Tioni axone xe tamitema vitavitanisi oli'a tamitema so itaxusou taxisi loxo milomusou la mivikala aloxo 'o, “Ai, ilixou Mosinge ne mulapu e mulapusi.” Ane'i mivikala axone xo Tioni mu'oxonu ilixo so kelele noxi'a. 30Ia ane'i Tapalisi oli'a tamitema so lavulavu no anu lavuloto la mixiunu tumali'aou vote'i laixe e Mosinge mulalaxisi'a ne. Ane'i anene ilai so Tioni u'oxonu ilixo so kelele noxi'a uasi.

31La Iesua muvikala aloxo 'ola, “A'oxonu latilovo so apala'anixu ilixone'i tamitema so vaimomo 'o axova? Ane'i tamitema kaini axovao? 32E aloxo 'o. Ane'i loxo tamolomolo ixoxolu no loxomala mo i'ava noxi'a tamenexi'a lexe, 'Nexi tetausou mavusinge ia ngingi ngalei uasi. Xe nexi tetalingalele ia ngingi ngatama uasi.' 33Xo Tioni e itema so kelele u'ou pileti mo uie uaini uasi. Sila ngingi ngevikala lexe, 'Iu, ulenu masua uxolu noxou to ne!' 34Mo vaimomo 'o Itema ane molu noxou Mosinge a muxali mo u'ani mo uie. Sila ngingi ngevikalasou lexe, 'Ngamaisou anu itema so vune mo ulavusou usipaki. Xe anu vaitami'a tamitema so itaxusou taxisi oli'a tamitema so susu to!' 35Ngingi ngalavusou ngavikala axone ia tamitema ane ilomuxu lavulavu u'asi'asi noxou Mosinge la imaxa'u lexe manina ane.”

Sema vile milutunu ueli no tava'u Iesua

36Xe ili'i la Palisi vile mu'avalou Iesua so ilou i'ani. La anu mulai no tasou Palisi ne mo a oli'a italupexa i'ani no latevolo. 37La sema vile so taoni ne ane sema so sususi. Ane milomu lexe Iesua u'ani'ani no tasou Palisi ne laso mino'u lavotoni so ueli tuma'u lailaixe. Lavotoni ne tamitema mi'oxonu no anu lavo'o lailaixe. 38Mino'u la mine'enu ka mitulu no tumalou lu e Iesua tava'u muai no anu. La mitatama mo iei lexaxu totoloxuou Iesua tava'u mo miasouiasou no anu kisie laxusou. La mimaxa'u sexela noxie noxou mo milutunu ueli tuma'u lailaixe no tava'u ne.

39Mi'oxo axone xe Palisi e mu'avalou Iesua mune'e ne mumaisie la muxavutala no oponu lexe, “Uo, loxo anu polopeti manina la anu ulavusie sema e ikasou 'o lexe ane sema so sususi ane.” 40Ia Iesua mulavusou xavutalaou ne la muvikalanu lexe, “Saimonio, eni vaikala vile so alemolu noxine 'o.” La anu mu'oxe, “Io'o, Tisa nalemolusi.” 41La Iesua mu'oxonu latilovo aloxo 'o, “Tamitema tamei mixalixu tina'uxa'a noxou itema so lamoli vile. La vile tina'uxu 100 xe vile tina'uxu 10-si. 42Ioxe, ilou ne vote'i so ikolinu tina'uxa'a ne uasi. Laso itema ne muiaiama noxi'a mo muiasou tina'uxa'a ne. La nexavutala lexe ena'ei noxi'a ilou usexelaxu mosou lamoli ne manina?” 43La Saimoni mukolinu lexe, “Eni axavutala lexe anu ane tina'uxu tatila muiasi.” La Iesua muvikalanu lexe, “Anu ane, nelemolu mulovo.”

44Xe Iesua muxiu noxie sema la muvikala noxou Saimoni lexe, “Namaisie sema ano'o. Eni e'una no tasine la nalosilo lexa so a'uinu tava'ilo uasi. Ia ane mi'oxonu tava'ilo pita'u no anu iei lexaxu ka milutunu no kisie laxusou. 45Mo ene'e no tasine la namaxa'u sexelasilo uasi. Ia ane la misoko'u loxo exali mo a imaxa'u sexela noxilosio. 46Mo kalumo la nalutunu ueli so kisilo uasi, ia ane sema ano'o milutunu ueli e tuma'u lailaixe no tava'ilo 'o. 47Laso avikalaneni aloxo 'o. Sema ano'o susu noxie mulolutu, ia tina'uxe muiasi mukalu. Laso maixene isexelaxo tatila 'o. Ia itema ane tina'uxu so uiasi malaxo uasi, la usexelaxo malaxo to uasi.” 48La muvikalane sema lexe, “Tina'u so susu noxine muiasi mukalu.” 49Xe tamitema oli'a ita'olu so i'ani no latevolo ne mivikalane'i ngato'o lexe, “Itema ano'o ena'ei so ulemolu tina'u so susu lexe uiasou aloxo 'o.” 50Ia Iesua muvikalane sema ne lexe, “Nini nelopala laso nexalisou pamauli ane. Nalai naxolu lalavulusi.”

Currently Selected:

Luku 7: ATA

Highlight

Copy