Maki 15

Iesua mutulu no laxunu Pailati

1 Mixolu mixolu xo xe no kakau manina la tatiatila mukalusi ne mipita. Ane'i tatiatila noxi'a tapilisiti oli'a tatiatila noxi'a Taiuta xe tamitema so lavulavu no anu lavuloto. Mipita so ivikala lexe i'oxo axova noxou Iesua. Mivikala mivikala xo xe opone'i vilesisi mukalui la misakinu Iesua mo milaixu mipilixinu no anu Pailati avolu. 2La Pailati mutali'isou lexe, “Nini kingi noxi'a Taiuta, ne?” La Iesua mukolinu lexe, “Ani, aloxo nini mene nelemolu.” 3La tatiatila noxi'a tapilisiti mito'omolu Iesua no anu vaikala tu'utu'umaxu tapiena. 4La Pailati mutali'isoula lexe, “Nelomusou vaikala tavu'alo ano'o ito'omene no anu. Ia axova, nakolinu uasi?” 5Ia Iesua ukolinu vaikala vilela uasi. La Pailati tanulili manina noxou.

6Ioxe, no anu tautau ie utotomu no anu voxo so lavilelu so Mualasi'a la ilixo noxi'a aloxo 'o. Taiuta milavusou imoxo'u ualasou itema vilesisi noxi'a takalavusu, laso Pailati u'italonu so ula no lakalavusu. 7Xe no voxo anene la itema vile ualasou lexe Valavasi a muxolu no lakalavusu. Ane'i mikalavusunu oli'a tamenexu se'i xo mi'otoxa'a taxamani mo mive'ave'a se'i noxi'a. 8Ioxe, tamitema latala mine'e noxou Pailati la milinga noxou so umulinu ilixo loxo u'italonu soxu vile noxi'a takalavusu so ula. 9La Pailati mutali'isi'a lexe, “Loxova, a'italonu kingi noxi'a Taiuta ula noxinge?” 10Pailaiti muvikala axone xo anu mulavu lexe tatiatila noxi'a tapilisiti mi'italonu Iesua no avolu axone xo mi'isuxusi. 11Ia tatiatila noxi'a tapilisiti mi'ou tane'i tamitema so ane'i ilinga noxou Pailati lexe u'italonu Iesua uasi. U'italonu Valavasi uuatu noxi'a.

12La Palaiti mutali'isi'a tamitema lexe, “Loxo eni a'italonu Valavasi uuatu la eni a'oxonu mi ma'ia noxou itema ano'o ngamoxo'u lexe kingi noxi'a Taiuta?” 13La ane'i mi'ava lexe, “Nalilinu no ovu valautu so usoli.” 14Xe Pailati mutali'i lexe, “Xo ma'ia? Susu noxou axova?” Ia ane'i mi'ava tatilala lexe, “Nalilinu no ovu valautu so usoli.” 15Laso Pailati mumulinu masaxa noxi'a tamitema xo mumasaxa lexe ane'i i'osasou. Laso anu mu'italonu Valavasi mula noxi'a. Mukalu laso mupalusi'a ta'ami se'i so ipuapuasou Iesua. Mipuapuasou mukalu la Pailati mu'italonu Iesua no avo'a ta'ami so ililinu no ovu valautu so usoli.

Ta'ami mimolo sukusou Iesua

16La ane'i ta'ami milaixu Iesua nonano no tasou xamani. Mukalu laso mi'avali'a ta'ami so xale lia ne mine'ene'e mukalusi. 17Mine'ene'e mukalu laso mino'u lavalava lauoinu vile xe misu'asou Iesua no anu. Misu'asou no anu mukalu la mipalixoxonu lamota ana'anaxu so muxali loxo atiou kingi ka mimulaxu no kisou. 18La ane'i misukunu mivikala lexe, “Kakau, kingi noxi'a Taiuta.” 19Xe ane'i mino'u vilaxo maxei mo mipuapuasou kisou no anu alaxu tavu'alo xe mituvetuvesou. Xe ane'i mixolasou tava'a mo mikalavoi lexe i'itinu ualasou. 20Ane'i mimolo sukusou axone mukalu la mixexenu lavalava lauoinu la misu'asou no anu lavalava noxou mu'isalili. Mo ane'i mino'u milaixu so ililinu no anu ovu valautu so usoli.

Mililinu Iesua no ovu valautu

21Ane'i mino'u milaixu xe mixalisou itema vile ualasou lexe Saimoni. Anu so tuala ne Sailini mo anu a unene'e so u'una no tuala ne Ielusalemo ne. Anu Alekisana ilou Luvusi mami'a. Ane'i mixalisou laso ta'ami mipalupalusou so utavulenu ovu valautusou Iesua.

22Ioxe, ane'i mixalixu Iesua no apu ane ilemolu lexe Xoloxota. Laxu vaikalai'a anene lexe apu so kisou xinu. 23Mixalixu mukalu la ane'i i'oxo so ilosou Iesua uaini miilanu ilou lamalasini, ia anu umasaxau uasi. 24Mukalu la mililinu avo'avolu no ovu ane muvalautu xe tava'u no anu ovu ane so utulu. Mukalu la mitulusou so mulili ne. La ta'ami mi'oxonu ilixo so uala so lexe ta'ei ualasi'a uxali, la mivelunu mimiou.

25Xe mililixu no ovu valautu ne la anu aso iou 9 no kakau. 26Anu ilixo noxi'a so ikaukavunu susu noxi'a tamitema mililinu no ovu valautu. Ia ane'i mikaukavunu no ovu valautu noxou Iesua lexe “Ano'o kingi noxi'a Taiuta.” 27Mililixu Iesua la no pa'upa'umolu mililixa'a tamitema so pakali tamei. Vile mulili no avolu tema xe vile no avolu kaisi. 28Laso vaikalou polopetiou vile ane muxolu no lavukuou Mosinge munene'a xo muvikala lexe, “Ane'i misaxisou la loxo anu vile noxi'a tamitema tamasua.”#15.28 Tamitema so lavulavu se'i ixavutala lexe Maki molu ukaukavunu vaikala ane uxolu no anu 15:28 uasi, itema vilemo masi mukaukavunu. 29La tamitema ane milai mine'e no apu ne milulu kisi'a mo misukunu Iesua lexe, “Ai, nini ane ne'oxo lexe namamulonu tasou Mosinge ka natulusoula voxo tatalu. 30Nini mene napamaulineni mo nalu'e no ovu valautu ne.” 31Xe ane'i tatiatila noxi'a tapilisiti xe tamitema so lavulavu no anu lavuloto ane'i kalumo misukunu mo mivikalane'i ngato'o lexe, “Anu mupamauline'i leviani ia anu molu umomomo so upamaulinu uasi. 32Loxo anu ane so Kalaisiti e Mosinge musosovosou so kingi noxinge Ta'isilaeli maninasou la anu umomomo so ulu'e no ovu valautu ne. Xe tamaisou axone la nenge talavu lexe manina mo talopala noxou.” La tamitema tamei milili no pa'upa'umolu ne, ane'i kalumo mimolo sukusou axone.

Iesua musoli

33Iesua mulili ne xo xe no veloe la isivoxo toxoxu musu'asou lialia mukalusi. Isivoxo ne muxoxolu xo mo aso iou 3 no olo'olovoxo. 34Xe aso iou 3 ne la Iesua mu'ava tatila lexe, “Eloi, Eloi, lama savakatani?” Laxu vaikala ne lexe, “Mosilo, Mosilo, loxova so ne'italoleli mo ne'umesilo?” 35Mu'ava axone la tamitema se'i a mitulu alai milomusou la mi'oxo lexe, “Ngalomu. Anu a u'avalou Elaitia.” 36La itema vile muiave mumulaxu lavalava xasixu no anu uaini sisielixu. Mukalu la musakinu no ovu so mutolosou so lexe Iesua uiexu. Xe muvikala lexe, “Taxolusi. Tamalei lexe Elaitia une'e ulu'enu no ovu valautu o uasi.” 37La Iesua mu'ava toxoxu mukalu sila tauxu mukalu. 38Xe alaxu vilesisi lavalava tatila e mulili no tasou Mosinge ne mutea teitexi mulu'e no lia avile, la muxali alelaxu tamei. 39Xe ami vile tatila noxi'a ta'ami 100 mutulu no laxunu Iesua. Anu mulomusou ava noxou Iesua mo mumaisou soli noxou la mu'oxo lexe, “Ai, manina misevile, ano'o Mosinge Olu.”

40Xe tasema se'i kalumo mitulu va'axu sevile mo mimalei lexe mi ma'ia muxali no voxo anene. Tasema ane Malia Makatala xe Malia vilela neni'a Tiemisi kitua ilou Iosepu. Xe sema vile ualasie lexe Salomi. 41No voxo ane Iesua muxoxolu ne Xalilisio la ane'i tasema ano'o mimulimulinu so mivu'ulinu. Xe tasema tapiena se'i kalumo oli'a Iesua mine'e ne Ielusalemo mixolu ne kalumo.

Mimulaxu Iesua vasimolu no lulu

42Voxo ne anu so lalaxi no anu Voxo so Ma'ila xo anu uxali loxo ne'iela. Ioxe, aso so u'unae, 43la Iosepu so tuala ne Alimatea mulai noxou Pailati so mutali'isouxu Iesua vasimolu. Mutali'isou lexe umomomo so uno'u vasimolu so u'asixu no voxo nesi, xo ne'iela la Voxo so Ma'ila. Iosepu ne anu vile noxi'a takaniseli noxi'a Taiuta. Anu kalumo muxomaiou voxo so Mosinge molu u'uli laxune'i tamitemaou. Mune'e so utali'isou Pailati ia oponu u'olo'olo lexe masi u'oxo axova noxou. Oponu mu'olo'olo ia mutali'isi. 44La Pailati mukuluke mo tanulili lexe Iesua musoli palea axova. La mu'avalou tatila noxi'a ta'ami mo mutali'isou lexe, “Iesua musoli mukalu, ne?” 45Tatila noxi'a ta'ami mukolinu lexe musoli mukalu, laso Pailati mu'italonu Iesua vasimolu noxou Iosepu. 46Mu'italonu axone laso Iosepu mulotonu lavalava kea mo mulu'enu Iesua vasimolu no ovu valautu. Mulu'enu mukalu la muisisinu vasimolu no anu lavalava kea. Mukalu la mulaixu mumulaxu no lulu ane mi'asou mu'unalai no maia tava'u. Mumulaxu mukalu la mupipalo'u lavo'o toxoxu so mutanuxu lulu anaxu. 47La Malia Makatala olie Malia ane Iosepu nenu mitulu mimalei lexe mumulaxu Iesua a ne'ei.

Currently Selected:

Maki 15: ATA

Highlight

Copy