Maki 14

Tatiatila noxi'a Taiuta mimolo soli noxou Iesua

1Xe mune'e la lavilelu so Mosinge Mualasi'a ne uxali loxo ualisa. Laso Taiuta milalaxisou mo mixutuxu pileti ane isitisou uasi so i'ou no anu lavilelu ne. Xe no voxo anene tatiatila noxi'a tapilisiti xe tamitema so lavulavu no anu lavuloto mipita. Mipita mo imolo vote'i so ilakokongoxu Iesua so itetelisou mo ivau usoli. 2La ane'i mivikala lexe, “Ta'oxo mi anene no anu voxo so lavilelu uasi. Xo loxo 'o io tamitema la'iaxa'a la ixililiienge mo ixalixu tu'umaxu.”

Sema vile minixi'u ueli no kisou Iesua

3Ioxe, Iesua muxolu no tuala ne Vetani no tani noxou itema vile ualasou lexe Saimoni. Saimoni ne tei la siki e lepelesi mukasou. Iesua muxolu no tani noxou la mutalupexa no lu so oli'a i'ani. Mixolu la sema vile mine'e la mino'u lavotoni so ueli e ilemolu lexe nati. Anu tuma'u lailaixe misevile mo lamolisou mutiatila manina. Mine'e la mixola'u lavotoni ka minixi'u no kisou Iesua. 4Ia tamitema se'i a mixolu xe mimaisie la opone'i masuaiexu la mivikalane'i ngato'o lexe, “Ai, axova so mipapunu ueli axone? 5Loxo tasalimunu la lamolisou masi 300 ane. Mo so axone la taiti'a ta'oloxola.” La ane'i mikaitolone sema anene. 6Ia Iesua muvikalane'i lexe, “Ai, ngalosie tu'umaxu uasi. Axova so ngavikalane axone? Ane mi'oxonu ilixo laixe noxilo. 7Xo ta'olaxola ne ane'i ngoli'a ngaxolusi ane. Laso voxo aneva ngamasaxau, la ngasu'uline'isi. Ia eni uasi, axolu maxuveni noxinge uasi. 8Manina, ane vote'i so ilutunu ueli no vasimelo no voxo so i'asixo uasi. Ia ane mi'oxonu lumamo aloxo 'o, la anu laixe kalumo. 9La avikalangengi manina aloxo 'o. Ili'i la tamitema ilai no xalexale tuatuala so ia'aloxu vaikalasilo laixe. Mo axone la ane'i kalumo ilemolu mi e sema mi'oxonu noxilo 'o, tane'ivulusie uasi.”

Iutasi muvikalane'i tatiatila lexe upilixinu Iesua no avo'a

10Ioxe, tisapeliou ane ualasou lexe Iutasi Isikalioti mulai noxi'a tatiatila noxi'a tapilisiti. Mulai noxi'a so uvikala lexe anu upilixinu Iesua no avo'a. 11Mulai muvikalane'i la ane'i mi'osa manina la mivavalima lexe ane'i ilotonu. Laso anu mumolo vote'i so lexe upilixinu Iesua no avo'a axova.

Iesua oli'a tatisaipeli mi'ani no ngiou teitexi

12Ioxe, voxo tei no anu lavilelu so Pileti Isitisou Uasi muxali. No voxo anene Taiuta milavusou ive'ave'a tasipipi ta'ili'a so isosovosou lavilelu so Mualasi'a. La tatisaipeli milai noxou Iesua mo mitali'isou lexe, “Nini namasaxau so nexi talai talalaxisou lavilelu so ta'ou a ne'ei?” 13Laso Iesua mupalusi'a tatisaipeliou tamei milai la muvikalane'i lexe, “Ngingi ngolou ngalai ne Ielusalemo xo la ngaxalisou itema vile utavulenu lexa vexasou. Ngaxalisou la ngolou ngamulinu. 14Ngamulinu xe u'unalai no tani aneva la ngingi kalumo nga'unalai. Nga'unalai la ngatali'isou mosou tani ne aloxo 'o, 'Tisamenge utali'i lexe ngiou noxi'a taasila so uxolu no anu a ne'ei? Xo anu oli'a tatisaipeliou ixolu no ngiou ne so i'ou lavilelu so Mualasi'a.' 15Laso anu ulosoiengixu ngiou vile tatila uxolu teitexi. Ngiou ne latevolosou xe lusou mulalaxi mukalu. La ngolou ngalalaxinu lavilelu so ta'ou ne.” 16Muvikalane'i mukalu la ilou milai. Ilou milai mixali ne Ielusalemo la mimaisou mimi ne muxali mu'isalili loxo Iesua mulemolu. Laso ilou milalaxinu la'ilali so lavilelu so Mualasi'a.

17Xe aso so u'una la Iesua oli'a tatisaipeliou 12 mine'e mixali no tani ne. 18Mixali mukalu la mixolu mixixaosou latevolo mo a mi'ani'ani. Ane'i a i'ani'ani la Iesua muvikalane'i aloxo 'o, “Eni avikalangengi manina lexe vile no tainenge 'o anu so upilixileli no avo'a tauluaxeli. Anu itema ne a nenge'a ta'ani'ani 'o.” 19Xe ane'i tatisaipeliou milomusou vaikala ne la opone'i tu'umaxu no anu. La ane'i vilevilesi mitalitali'i noxou lexe, “Eni uasi, ne?” 20La Iesua muvikala lexe, “Itema ne vile noxinge ngingi 12 'o. Anu ane nexi noxou takelenixu pileti no anu lisi no nixinu latevolo 'o. 21Vaikala noxou Mosinge tapolopetiou mikaukavunu tatei lexe Itema ane molu noxou Mosinge usoli ne, anu so uxali. Ia anu masua manina noxou itema ane upilixinu no avo'a tauluaou. Anu utavulenu tu'umaxusou ane, laixe loxo nenu ivo'onu uasi.”

Iesua muvelunuxa'a pileti ilou uaini

22Ane'i i'ani'anisio la Iesua muno'u pileti vile xe muvikala laixe noxou Mosinge. Mukalu la muse'inu mo muvelunuxa'a tatisaipeliou la muvikala lexe, “Ngingi ngano'u, ano'o eni vasimelo.” 23Xe muno'u kapusou uaini mo muvikala laixe noxou Mosinge. Mukalu la mulosi'a la ane'i vilevilesi miiexu. 24La Iesua muvikala lexe, “Ano'o sialuxo. Anu usosovosou konitalaki alavua. Eni asoli la sialuxo unixi so ulotonu tina'u so susu noxi'a tamitema tavu'alo. 25Eni avikala manina noxinge lexe eni aiexu uaini aloxo 'ola uasi. Ulai umomomo no anu voxo so Mosinge molu u'uli laxune'i tamitemaou, laso ane, aiexula.”

26Mukalu laso ane'i milexenu lexesou Mosinge. Milexenu mukalu la milutu milai mixali no la'olu Olivi.

Iesua muvikala lamana lexe Pita uxiunu tumalouou

27Mixali ne mukalu la Iesua muvikalane'i tatisaipeliou lexe, “Ili'i se 'o la ngingi nga'ume'umesilo ane. Xo no anu vaikalaou Mosinge muvikala lexe, 'Eni avau tatanane'i usoli la tasipisipi ipaxepaxelesi.' 28Asoli axone xe atulula la a'uli noxinge alai ne Xalili.” 29La Pita muvikalanu lexe, “Ane'i mukalusi masi i'ume'umesine, ia loxo eni la uasi manina. Axolu noxinesi.” 30La Iesua mukolinu lexe, “Avikalaneni manina aloxo 'o. Masi no olovoxo nini navikalane'i tamitema lexe nini nalavusilo uasi. Nalemolu alaxu tatalusou xe ukalu la nalomusou koko'a u'ava alaxu tameisou.” 31Ia Pita muolotetesi mo mu'oxo lexe, “Uasi ane. Loxo iveloxu asoli la anu mi vile uasi. Vaikala ane lexe eni alavusine uasi ne, la mamu so alemolu.” La tatisaipeli mukalusi mivikala axone kalumo.

Iesua mukatu noxou Mosinge ne Xetisemani

32 Ioxe, milutula la milai mixali no apu vile ilemolu lexe Xetisemani. Mixali mukalu la Iesua muvikalane'i tatisaipeliou lexe, “Ngingi ngaxolu 'oe xo eni avikala noxou Mosinge.” 33La anu muno'a Pita xe Tiemisi xe Tioni so oli'a milai va'axu sevile. La muxamulinu oponu mu'avuti lexe tu'umaxu mukasou. 34Anu muxamulinu axone la muvikalane'i ane'i tatalu ne lexe, “Opoleli tu'umaxu e tu'umaxu. Ukasilo mo axamulinu lexe umomomo no anu soli. Ngaxolu 'o mo ngaxomaieli laixe.”

35Anu muvikalane'i mukalu xe mulai sevile la mulapau muai no lia. Muai no lia la mulinga noxou Mosinge lexe loxo vote'i vile la tu'umaxu anene uxexesou. 36Xe mukatu lexe, “Papao, Mamiloo. Nini namomomo so na'oxonu mimi mukalusi no anu masaxa noxine. Tu'umaxu e so uxali noxilo la loxo lexa sixula. Loxo eni, la amasaxau lexe naxexenu mo so aiexu uasi. Ia namulinu masaxa na'a xeli uasi, namulinu masaxa na'a ninisi.”

37Muvikala axone mukalu la Iesua mulivu mulai noxi'a tatisaipeliou tatalu. Muxali noxi'a la mumaisi'a lexe ane'i a iai. La muvikalanu Pita lexe, “Saimoni, nini a naai, ne? Nini namomomo so naxomaieli no anu aso iou vilesisi uasi, ne? 38Ngingi ngaxomaieli mo ngavikala noxou Mosinge mo so ngalapau no anu tovotovo uasi. Opongengi umasaxau lexe ngaxolu pakia'inge ia vasimenge umomomo to uasi.”

39Xe Iesua muxexesi'ala la mulai muvikala noxou Mosinge aloxo ane teila. 40Xe mukalu la mulivu mune'e noxi'a la mumaisi'a ane'i a iai xo ie'i tu'umaxu misevile. Xe mitulu la mimaila mo ilavusou lexe ivikala axova noxou uasi.

41Xe muxexesi'a alaxu tatalusou xe muxalila la muvikalane'i tatalu ne aloxo 'o, “Ngingi a ngaai mo ngama'ilasio, ne? Mukalu ane. Voxo so Itema ane molu noxou Mosinge usu'a no avo'a tamitema so susu a muxali 'oe. 42Ngatulu. Nenge talai. Xo ngamaisou, itema ane so upilixileli no avo'a tauluaxeli a unene'e.”

Iutasi mupilixinu Iesua no avo'a tauluaou

43Iesua a uvivikala axonesio la vile noxi'a tatisaipeli e Iutasi mune'e muxali. La oli'a tamitema latala mine'ene'e. Mine'ene'e la mitetelisou lavilaviso ilou kulukulue. Ane'i tatiatila noxi'a tapilisiti xe tamitema so lavulavu no anu lavuloto xe tatiatila noxi'a Taiuta mipalusi'a. Mipalusi'a mine'e so itetelisou Iesua. 44Itema e so upilixinu Iesua no avo'a muvikalane'i lumamo so sosovo aloxo 'o, “Itema ane eni amaxa'u sexela noxou, la anu Iesua ane. Ngatetelisou mo ngatuluxu laixe so ngalai.”

45Ioxe, Iutasi mune'e muxali la alaxu vilesisi musexelaxu Iesua mo muvikala lexe, “Tisa.” 46Laso ane'i tamitema misavunoxu Iesua so mitetelisou. 47Mitetelisou la itema vile a mututulu alai noxi'a ne mutokinu lavisoou ka muposou itema so xaixai noxou pilisiti tatila. Mo laviso muxotonu sangalousi la muxexe.

48La Iesua muvikalane'i tamitema ne lexe, “Eni lasikeli so ngeno'u laviso ilou kulue mo so ngatetelisilo? 49Xo voxo utotomu eni exolu no taingengi mo evotongengi no tasou Mosinge. Exolu ne ia ngatetelisilo uasi xo ma'ia? Ia mi vile uasi, xo vaikalaou Mosinge tapolopeti mikaukavunu tatei a unene'a 'oe.” 50Anu muvikala axone mukalu la tatisaipeliou mukalusi mipaxepaxelesou mo mi'ume.

51Xe tamitema milaixu Iesua la maulu vile mumulimulinu. Anu musu'asou no anu lavalavasi. Mumulinu Iesua xe tamitema mitetelisou kalumo. 52Mitetelisou sila alaxu vilesisi mupisikei mu'umesi. Io ane'i miteteilisou lavalavaou, la anu vasimolusi mu'ume mulai.

Iesua mutulu no lakoti noxi'a Taiuta

53Ioxe, ane'i milaixu Iesua no tasou pilisiti tatila. La ane'i tatiatila noxi'a tapilisiti xe tatiatila noxi'a Taiuta xe tamitema so lavulavu no anu lavuloto mipita no tani ne. 54Ane'i milaixu Iesua ne la Pita mumulinu mulai ia anu muxolu va'axu sevile. Ane'i mi'unalaixu Iesua no tasou pilisiti tatila ne ia Pita muxolu no vaitanisi. La tamitema so latolo mitauxu navu no vaitani la oli'a Pita mixolu mitu'exu. 55La ane'i tatiatila noxi'a tapilisiti oli'a tatiatila noxi'a Taiuta mipita ne mi'avali'a tamitema se'i mine'e so mia'aloxu Iesua no lakoti. Tatiatila mimasaxa lexe ia'aloxu no anu susu ma'ia o lavuloto aneva anu muxola'u so ivauxu. Ia itema vile so ua'aloxu axone uasi. 56Tamitema tapiena mikalavoisousi ia vaikalai'a iou vilesisi uasi, muxililiou ngato'o. 57Xe tamitema se'i mitulu la mikalavoisou no anu vaikala aloxo 'o, 58“Nexi telomusou muvikala lexe umamulonu tasou Mosinge ane tamitema mitulusou no avo'a. Xe muvikala lexe utulusou alavua no anu voxo tatalusi ia uxali no anu tamitema avo'a uasi.” 59Ia vaikala anene kalumo vilesisi uasi, muxovulaulausi.

60Ioxe, mune'e la pilisiti tatila mutulu no laxune'i tatiatila mipita ne la muvikalanu Iesua lexe, “Nini nakolinu vaikala ano'o uasi, ne? Loxova no anu vaikala ane'i itulusine no anu 'o?” 61Ia Iesua muxolu tasiausi mo ukolinu vaikala vile uasi. Ioxe, pilisiti tatila mutali'isou aloxo 'ola, “Nini Kalaisiti ane Mosinge U'uli'uli Olu?” 62La Iesua mukolinu lexe, “Ani enisi ane, mo ili'i la ngamaisou Itema ane molu noxou Mosinge uxolu no anu Mosinge anu Mosou Xavi avolu tema. Mo ili'i la ngamaisou une'e no anu sausauma no loxotolo.”

63Tatila noxi'a tapilisiti mulomusou vaikalaou Iesua la oponu ialuxu manina. Oponu ialuxu la muteanu lasiotiou veveni mo muvikala aloxo 'o, “Nenge ta'avalou itema vilela so ua'aloxu susu noxou itema ano'ola uasi. 64Ngingi menge ngelomusou. Anu muvila'isou Mosinge ualasou. Ngingi ngaxavutala lexe ta'oxo noxou axova?” La ane'i mukalusi mikeinoxu lexe, “Anu mususu ane, takolinu no anu solisi.” 65Mukalu la ane'i se'i misoko'u so mituvesou. Xe ane'i se'i misakinu iou no anu lavalava mo mivau no avo'a la mivikalanu lexe, “Napela'ixe lexe ena'ei muvene to ne?” Xe ta'ami se'i mino'u mo misavasavalou.

Pita muvikala lexe anu ulavusou Iesua uasi

66Ioxe, la Pita muxolu no vaitani la sema so xaixai noxou pilisiti tatila mine'e. 67Mine'e la mimaisou Pita a utu'exu navu. La mimatakisou mo mivikala lexe, “Nini kalumo nevaitamiou Iesua so Nasaleti, ne?” 68Ia Pita mukoline lexe, “Uasi to! Vaikala nelemolu 'o eni alavusou uasi. Nalemolu mi ma'ia?” La Pita mulai no mataunaxu aitenga. Mulai ne la koko'a a u'ava. 69La sema ne mimaisoula mo mivikalane'i tamitema mitulutulu ne lexe, “Anu vile noxi'a tamitemaou Iesua ano'o.” 70Ia anu muvikalala lexe, “Uasi to, eni uasi!” Xe mixolu sevilela la tamitema ne mivikalanu Pitala lexe, “Ai manina, nini vile noxi'a. Xo nini itema Xalilisi ane.” 71Ia Pita muolotete mo muvikala pakia'u lexe, “Uasi e uasi manina. Eni alavusou itema ane ngelemolu uasi. Loxo akalavoi la Mosinge umamulolelisi.” 72Muvikala axone sila koko'a mu'ava alaxu tameisou. La Pita muxavutalanu vaikalaou Iesua e mulemolu lexe, “Nini navikalane'i tamitema lexe nalavusilo uasi. Nalemolu alaxu tatalusou xe ukalu la nalomusou koko'a u'ava alaxu tameisou.” Pita muxavutalanu vaikalaou ne la mutatama e lapilai uasisi.

Currently Selected:

Maki 14: ATA

Highlight

Copy