Maki 13

Iesua mulemolu mamulosou tasou Mosinge

1Ioxe, Iesuaena milutu mila no tasou Mosinge mo mimuamua'i milai. La tisaipeliou vile muvikalanu lexe, “Tisa namaisou lavolavo'o so tasou Mosinge 'o lailaixe mo ngioungiou no anu ne usaxi laixe misevile.” 2La Iesua mukolinu lexe, “Namaisou tani ngioungiou toxoxa'a 'o, ili'i la lavo'o vile utoxo no anu menexu uasi, upaxele mukalusi. Tani ano'o ne umamulosi.”

Iesua mupela'axu tu'utu'umaxu ane so uxali ili'i

3Xe mune'e la Iesuaena mixolu no la'olu Olivi la iou mulaiou tasou Mosinge muxolu xalevile olele. La Pita xe Tiemisi xe Tioni xe Anitilu mine'e mitali'isou aloxo 'o, 4“Nini napala'anixu noxixe lexe voxosou mi e nelemolu a talu? Axova, sosovo vile so nexi talavu lexe nene'axu mi ne a so uxali?” 5La Iesua mukoline'i lexe, “Ngalaxa'i laixe, xo loxo 'o io tamitema ikalavoingengi ane. 6Tamitema tavu'alo ine'ene'e mo ivikala lexe, 'Eni amitema melo noxou Mosinge a.' La ilemolu ualasilo so ikalavoine'i tamitema tapiena. 7Mo ili'i loxo ngalomusou a'alo so oto tatila mo sivo lexe oto tatila so uxali no tuatuala la ngakuluke no anu uasi. Mimi anene uxali, ia kaluxusou voxo a uao. 8Xe tamitema no anu laili se'i i'alivulane'i laili se'i. Xe takingi so xale lia se'i ilai i'alivulane'i takingi so xale lia se'i. Mo no xalexale lia se'i la uni'uni tatila mo anene voxo so vitolo kalumo. Mimi anene uxali ia anene soko'u no anu tu'umaxusi. Anu loxo sema ilie ukitikitinesi so ivo'onu, u'oki uao.”

9Mo Iesua musolonu aloxo 'ola, “Ia ngingi ngalaxa'i laixe. Xo ane'i itulusinge so ikotingenge mo ipuapuasinge no anu tatasou lavuloto. Mo tava'u xo ngingi ngaa'aloxo laso itulusinge no laxune'i taxamani xe takingi. Itulusinge laso ngingi ngaa'aloxo noxi'a. 10Ia loxo vaikalasilo laixe uxali noxi'a tamitema no anu lailaili no tuatuala mukaluasi uao, la anu voxo kaluxusou 'o umomomo so uxali uasi. 11Mo no voxo loxo itetelisinge so ngalai no lakoti la mamu so nga'ume. Mo mamu so ngalalaxinu opongengi lumamo so lexe ngalemolu ma'ia no lakoti. Xo ngingi uasi, no voxo loxo ngatulu la Ulenu Laixe molu ulosinge vaikala so ngalemolu.

12Xe no voxo anene la tamitema ipilixine'i tavimovimo'a so ikotixa'a mo ive'a isoisoli. Xe tamitema i'oxo axone noxi'a ta'ili'a kalumo. Mo ane'i se'i la ixililie'i tamami'a taneni'a mo ipilixine'i so tamitema ive'a isoli. 13Xe loxo ngingi, la tamitema opone'i umatapiangengi xo ngingi tamitemaxeli. Ia ngingi ngaxolu pakia'inge xo mo uxali no anu voxo kaluxusou xo ngingi ngaxalisou pamauli ane.

No voxo anene tu'umaxu e tu'umaxu manina

14Ioxe, Iesua musolonu vaikalaou, ia itema ena'ei u'itisou la uxavutalanu laxu laixe. Muvikala aloxo 'o, “Xe ili'i la ngamaisou mi e so matapia mo mamulo uxolu no tanixu e tavu no anu. No voxo loxo ngamaisou uxolu ne la laixe so Taiutea i'ume'ume ilai italume no la'ola'olu. 15Xe itema ane u'ole'ole no laxa'u tani la ulu'e ne u'ume ulaisi. U'unalai no tani so utaxusou mimioula uasi. 16Mo loxo itema uxolu no xai la ulivu no tani so uno'u lasiotiou vevenila uasi. Ulai u'ume avile. 17La tanengexa'a tasema ane opo'opone'i xe ane'i ane ta'ili'a i'ou sususio. Xo masi i'au'ausi'a la i'ume palea uasi. 18Mo ngalinga noxou Mosinge lexe voxo ne uxali no anu tau la'ave mo lelemesou uasi. Xo polovu uvenge la xalengenge so nga'ume'ume axova? 19Mo no voxo anene tu'umaxu e tu'umaxu manina. Musoko'u no voxo loxo Mosinge mukokoinu mimi mune'e muxali avile vaimomo 'o la tu'umaxu axone uxali uasi. Mo uxali ili'i kalumo axone uasi. 20Xe loxo Tatananenge uxotonu voxosou tu'utu'umaxu anene uasi la itema vile umauli uasi. Ia anu uxavutalane'i tamitema ane musosovosi'a lumamo lexe tanoxou. Uxavutalane'i laso uxotonu voxo anene.

21Mo aloxo 'o. No voxo anene loxo itema vile uvikalangengi lexe, 'Ngamaisou Kalaisiti a.' O loxo vile u'oxo lexe, 'Kalaisiti a olele.' la ngalomuxa'a uasi. 22Xo Takalaisiti kalavoi se'i mo tamitema so pela'a kalavoi se'i itulu no voxo anene. Itulu mo i'oxonu sosovo so xavi so itovonu so ilapune'i tamitema ane Mosinge mososovosi'a lexe tanoxou. 23Laso ngalaxa'i laixe xo eni epela'ingexu mimi ane so uxali ili'i mukalusi.”

Iesua mupala'anixu lailivu noxou

24Muvikala axone mukalu la musolonu aloxo 'ola, “Tu'utu'umaxu anene uxali ukalui la aso uxali isivoxosi mo so'io ukala uasi. 25Mo loxotolo ukunikuni la tataoto ulapalapau ulu'e. 26Laso ane. Tamitema imaisou Itema ane molu noxou Mosinge une'e no anu sausauma. La une'e no anu xavi mo iaxu tatila. 27Mo no voxo anene anu upalusi'a ta'angelo talaixe ilailai. Ilailai no anu noti xe sauti xe uesiti xe isiti no anu lialia ilou loxotolo teletelexu. Mo ipitane'i tamitema ane Mosinge musosovosi'a lexe tanoxou.”

28La Iesua mu'oxonu latilovo aloxo 'o, “Ngingi ngano'u lavulavu no anu ovu viki. Loxo avolu umauli mo uxata la ngalavu lexe voxo so aso laixe so uxali. 29La anu axonesi. Loxo ngamaisou tu'utu'umaxu elemolu 'o uxali la ngalavu lexe eni a axali mo no iou xalengasi. 30Mo avikalangengi manina aloxo 'o. Laili ano'o ixolu mo ixalisou mimi ne, isoisoli tei uasi. 31Mo ili'i la loxotolo ilou lialia tasiauxu ia vaikalaxelisi umomomo so tasiauxu uasi.”

Evile ulavusou voxosou mimi anene uasi

32Mo musolonu aloxo 'ola, “Ia evile ulavusou voxo o aso iou so mimi anene uxali uasi. Ta'angelo talaixe no tualasou Mosinge ilavu uasi kalumo. Mo eni a Olu kalumo alavusou uasi. A Mosinge anu Mamingesi ulavusou. 33Laso ngalaxa'i laixe mo ngaxolu ngautitisi, xo ngalavusou voxo e Mosinge musosovosou uasi. 34Aloxo 'o. Loxo itema vile u'umesou tasou so uxixao ulai nopaxa. So ulutu la utulusi'a tamitema so xaixai noxou no anu xaixai noxi'a vilevilesi. Mo itema so ulo no aitenga la upelototosou lexe uloxu laixe xo ulavusou voxosou lailivuxu uasi. 35Laso ngingi ngaloxo laixe axone. Xo eni loxo tatananu tani, mo ngalavusou voxo so alivu ane'e uasi. Masi ane'e no aso ulu'elai o no olovoxo lixinu o no anu koko'a u'ava o no kakau. Laso ngalaxa'i laixe. 36Xo masi axali la ngingi ngaaisio. 37Vaikala ane a'italonu noxinge 'o ne noxi'a latala. Ngalaxa'i mo ngautiti laixe.”

Currently Selected:

Maki 13: ATA

Highlight

Copy