Luku 21

Sema oloxola mipilixinu lamolie sevile noxou Mosinge

1Ioxe, Iesua muxolu no tasou Mosinge la mumaisi'a tamitema e lamolamolixa'a mine'e mitanu lamoli so lexe noxou Mosinge no anu kesisou. 2Sila anu mumaisie sema vile oloxola ane mulue musolisie a mine'e mipilixinu koini se tamei mu'unalai. 3La Iesua mu'oxo lexe, “Ngamaisie sema oloxola e mulue musolisie 'o olele. Avikalangengi manina axo', ane'i tamitema tavu'alo mipilixinu lamoli ia se noxie sema ne, uua'ulixu noxi'a avile. 4Xo ane'i tavu'alo ne ixolu no latanu lamoli mo mipilixinu pa'usou sesi. Ia sema ne ixolu vitanisi mo lamoli se so la'ilalixe a mipilixinu mukalusi 'oe.”

Iesua mulemolu mamulosou tasou Mosinge

5La ane'i se'i mivivikalasou tasou Mosinge lexe mi'oxonu no anu lavolavo'o lailaixe mo mivilasinu no anu mimi e tamitema mipilixinu lexe noxou Mosinge. La Iesua muvikala lexe, 6“Eni avikalangengixu mi e ngasaxisou ne aloxo 'o. Voxo une'e ili'i la lavo'o vile utoxo no anu menexu uasi, upaxele mukalusi. Tani ano'o ne umamulosi.”

Iesua mupela'axu tu'utu'umaxu ane so uxali ili'i

7Xe mukalu la ane'i mivikalanu lexe, “Tisa, napala'anixu noxixe lexe voxosou mi e nelemolu a talu? Axova, sosovo vile tei mo so nexi talavu lexe nene'axu mi ne a so uxali?” 8La Iesua mukoline'i lexe, “Ngalaxa'i laixe, xo loxo 'o io tamitema ikalavoingengi ane. Tamitema tavu'alo ine'ene'e xe ilemolu ualasilo mo ivikala lexe, 'Eni amitema ane melo noxou Mosinge a.' Mo ivikala lexe, 'Voxo a mune'e alai mukalu.' Ia ngalomuxa'a so ngamuline'i to uasi. 9Mo ili'i loxo ngalomusou a'alo so oto tatila xe tu'utu'umaxu la ngakuluke mo na'olo'olo no anu uasi. Mimi anene so uxali tei, ia kaluxusou voxo a uao. 10Xe tamitema no anu laili se'i i'alivulane'i laili se'i. Xe takingi so xale lia se'i ilai i'alivulane'i takingi so xale lia se'i. 11Mo no xalexale lia se'i la uni'uni tatila mo anene voxo so siki iouiou xe vitolo tatila kalumo. Xe no loxotolo la ngamaisou sosovo mutiatila iouiou mo mimi so umolo umengenge uxali.

12Ia tei no anu mimi anene la i'oxongengi aloxo 'o. Ane'i itetelisinge mo ilosinge tu'umaxu. Xe ikotingenge no anu tatasou lavuloto ka ipilixingengi no lakalavusu. Mo tava'u xo ngingi ngatavulenu ualasilo laso itulusinge no laxune'i taxamani xe takingi. 13Itulusinge laso anu vote'i so ngingi ngaa'aloxo noxi'a. 14Laso opongengi utulu lexe loxo itulusinge axone la ngalalaxinu vaikala lumamo so latolosinge uasi. 15Xo eni melo alosinge vaikala so ngalanu noxi'a ilou lavulavu u'asi'asi. Laso loxo ngalemolu vaikala la ane'i ane ixililiienge ne imomomo so ikolingengi uasi, saexa'a uxolasi.

16La tamaminge taneninge xe tavivinge xe tatulangengi xe tamenexinge ane'i kalumo ipilixingengi no avo'a tauluamengi. Laso ane'i ivenge ngingi se'i ngasoisoli. 17Mo ane'i tamitema latala mukalusi imatapiangengi xo ngingi a ngatavulenu ualasilo ne. 18Ia kisinge laxusou soxu vile tasiauxu vitanisi uasi. 19Laso ngatulu pumungenge mo so ngaxolu ngapamauli ane.”

Iesua muvikala lamana lexe mamulo uxalisou Ielusalemo

20La Iesua musolonu aloxo 'ola, “Loxo ngamaisi'a ta'ami ixolu ixixaosou Ielusalemo la ngalavusou voxo so umamulo a so uxali ne. 21Laso no voxo anene la tamitema no xale lia ne Iutea i'ume'ume ilai no la'ola'olu. Xe ane'i ane mixolu no taoni ne Ielusalemo la ixexesou ilai no apu vile. Xe ane'i ane ixolu noale no taoni la i'unalai uasi manina. 22Xo no voxo anene Mosinge ukolinu susu laso vaikala ane uxolu ukaukavu no lavukuou la uxalixu nene'axu mukalusi. 23La tanengexa'a tasema ne opo'opone'i xe ane'i ane ta'ili'a i'ou sususio. Xo masi i'au'ausi'a la i'ume palea uasi. La anene voxo so tu'utu'umaxu uxali no lialia mo la'ia noxou Mosinge utuvusi'a tatemanusi. 24Mo tauluai'a ive'ave'a leviani no anu laviso so oto. Xe ilaixi'a leviani so ikalavusu no anu xale tuatuala nopaxapaxa. La tamitema noale'ale imalomaloxo'u Ielusalemo umomomo no anu voxo Mosinge musovosou lexe voxosi'a ane.”

Ili'i la Itema ane molu noxou Mosinge une'e

25La Iesua muvikala aloxo 'ola, “Mo kalumo no voxo anene sosovo se'i uxali no anu aso xe so'io xe tataoto. Xe noxi'a tatemanu lialia mukalusi la ixolu ilomusou xasi no luaki luluxu tatila la tane'ilili manina. 26Mo ane'i opone'i u'olo'olou mimi ane uxaxali no lialia ne la ie'i uxalixalili mole ilapalapau no liasi. Xo mimi e xavixavinu no loxotolo ukunikunisi. 27Sila no voxo anene tamitema imaisou Itema ane molu noxou Mosinge upolo no anu sauma une'e, la no anu xavinu mo iaxusi.

28Laso ane, loxo ngamaisou mimi anene usoko'u so uxali la ngatulu ngalapu mo kisinge uasaxa xo voxo so Mosinge u'umengengi a so uxali ne.

Iesua mupala'anixu lailivu noxou

29La Iesua mu'oxonu latilovo noxi'a aloxo 'o. “Ngingi ngamaisou ovu viki xe ovuovu se'ila. 30Loxo ngamaisou uxata alavua la ngalavu lexe voxo so aso laixe a so uxali. 31La anu axonesi. Loxo ngamaisou mimi ne uxaxali la ngatongonu lexe voxo so Mosinge u'uli laxune'i tamitemaou a mune'e ala'alai ne. 32Mo avikalangengi manina aloxo 'o. Laili ano'o ixolu mo ixalisou mimi ne, isoisoli tei uasi. 33Mo ili'i la loxotolo ilou lialia tasiauxu ia vaikalaxelisi umomomo so tasiauxu uasi.

34Laso ngalaxa'i laixe. Xo loxo 'o io ngavaxa ngane'e so ngaie no anu leilei mo ngasipakisi xe opongengi uauavuti so mimi so vasimenge. Loxo mimi axone utetelisingesi xe voxo olele uxali la alaxu vilesisi ukulukengengi ane. Ukulukengengi aloxo tamisoposi ikuluke mi ne tamitema ipiliune'i no anu kae. 35Voxo anene uxali noxi'a tatemanu lialia mukalusi. 36Ia ngingi la iengi uka laixe voxovoxo utotomu. Mo ngalingau xavi noxou Mosinge so loxo vote'i la mimi anene uua'ulingengi uasi. Mo so axone la ili'i ngingi ngatulu no laxunu Itema ane molu noxou Mosinge.”

37Ioxe, no voxovoxo utotomu la Iesua muxolu muvotovoto nonano no vimelusou tasou Mosinge. Ia no olovoxo la anu ula so ulai uno'u ai no la'olu Olivi. 38Xe tamitema latala milavusou itulu no kakau manina so ilai ilomusou votovoto noxou no tasou Mosinge.

Currently Selected:

Luku 21: ATA

Highlight

Copy