Luku 22

Iutasi muvikalane'i tatiatila lexe upilixinu Iesua no avo'a

1Xe mune'e la lavilelu so Mualasi'a ne muxali alai 'oe. Laso Taiuta milalaxisou mo mixutuxu pileti ane isiti so uasi so i'ou no anu lavilelu ne. 2La tatiatila noxi'a tapilisiti oli'a tamitema so lavulavu no anu lavuloto imasaxau soli noxou Iesua, ia i'ume'a tamitema laso mikakamulinu vote'i so ivau usoli axova.

3La Uluaou mu'unalai noxou Iutasi e ilemolu lexe Isikalioti. Anu vile noxi'a tatisaipeli 12. 4Laso anu mulai muvivikala noxi'a tatiatila noxi'a tapilisiti oli'a tatiatila noxi'a tamitema so latolo no tasou Mosinge. Oli'a mivivikala so ikamulinu vote'i lexe anu upilixinu Iesua no avo'a axova. 5La ane'i tamitema ne mi'osa noxou Iutasi mo mivavalima lexe ipilixinu lamoli noxou. 6Xe Iutasi oponu vilesisi noxi'a laso anu xavinu so ukakamulinu vote'i so upilixinu Iesua no avo'a. Ia muxomaiou voxo loxo tamitema tavu'alo ipita noxou Iesua uasi.

Tatisaipeli tamei milalaxi so lavilelu

7Ioxe, voxo tei no anu lavilelu so Pileti Isitisou uasi muxali. No voxo anene Taiuta milavusou ive'ave'a tasipipi ta'ili'a so isosovosou lavilelu so Mualasi'a. 8Laso Iesua mupalusi'a Pita ilou Tioni milai. La muvikalane'i lexe, “Ngingi ngolou ngalai ngalalaxinu la'ilali so ta'ou xo tasosovosou Mualasi'a.” 9La ilou mitali'isou lexe, “Xo namasaxau lexe talalaxisou a ne'eio?” 10Laso muvikalane'i lexe, “Ngingi ngolou ngamamua'i xo xe nga'unalai no taoni la ngaxalisou itema vile utavulenu lexa vexasou. Ngaxalisou laso ngilou ngamulinu xe u'unalai no tani aneva la ngingi kalumo nga'unalai. 11Nga'unalai la ngatali'isou mosou tani ne aloxo 'o, 'Tisamenge utali'i lexe ngiou noxi'a taasila so uxolu no anu a ne'ei? Xo anu oli'a tatisaipeliou ixolu no ngiou ne so i'ou lavilelu so Mualasi'a.' 12Laso anu ulosoiengixu ngiou vile tatila uxolu teitexi. Ngiou ne latevolosou xe lusou mulalaxi mukalu. La ngilou ngalalaxinu lavilelu so ta'ou ne.” 13Muvikalane'i mukalu la ilou milai la mimaisou mimi ne muxali mu'isalili loxo Iesua mulemolu. Laso ilou milalaxinu la'ilali so lavilelu so Mualasi'a.

Iesua muvelunuxa'a pileti ilou uaini

14 Mune'e xe voxo so ani'ani muxali la Iesua mutalupexa so u'ani no latevolo, la oli'a ta'aposeliou. 15La muvikalane'i lexe, “Eni opoleli mututuluo voxo ano'o lexe tapita ta'ani so tasosovosou Mualasi'a aloxo 'o teio. Ukalu laso atavulenu tu'umaxu. 16Xo eni avikalangengi lexe a'ani no anu la uasi xo mo temanu manina uxali no anu voxo so Mosinge molu u'uli laxune'i tamitemaou. Laso ane, a'ani no anula.”

17Muvikala axone mukalu laso anu muno'u kapu so uaini mo muvikalasou laixe noxou Mosinge. Mukalu la mulosi'a mo muvikala lexe, “Ngano'u mo ngavelungenge ngato'o. 18Xo eni avikalangengi lexe usoko'u vaimomomo 'o la aiexu uaini la uasi xo mo uxali no voxo so Mosinge molu u'uli laxune'i tamitemaou, laso ane, aiexula.” 19Xe anu muno'u pileti ka muvikalasou laixe noxou Mosinge. Mukalu la muse'inu mo mulosi'a tatisaipeliou. La muvikala lexe, “Ano'o eni vasimelo. Eni a'italonu so ngaxalisou mauli no anu. Laso nga'oxonu aloxo 'o so xavutalemengi uno'ilo.” 20Ioxe, mi'ou pileti mukalu la mu'oxo axone no anu kapu so uaini. La muvikala lexe, “Kapu so uaini 'o anu so konitalaki alavua a axalixu no anu sialuxo 'o xo unixinixi so ngaxalisou mauli no anu.”

21Ia ngalomu, itema e so upilixileli no avo'a tauluaxeli a nenge'a tapita taxolu no latevolo 'o. 22Xo manina, mimi uxali noxou Itema ane molu noxou Mosinge mu'isalili a loxo Mosinge molu mulalaxinu lumamo. Ia masua manina noxou itema ane so upilixinu no avo'a tauluaou.” 23Xe ane'i tatisaipeli milomusou vaikalaou la tane'ilili mo mivivikalane'i ngato'o so lexe ena'ei noxi'a u'oxo mi e mulemolu ne.

Tatisaipeli mi'oto no anu vaikala lexe ena'ei noxi'a u'uli laxune'i

24Ioxe, mukalu la tatisaipeli a misoko'u so i'oto'oto no anu vaikala lexe ena'ei noxi'a so u'uli laxune'i. 25La Iesua muvikalane'i lexe, “Ane'i takingi so xale tuatuala ane'i xavine'i so i'uli laxune'i tamitemai'a. Xe ane'i me'a imasaxa so tamitema imoxo'a no anu uala lexe Tamosou Alauna. 26Ia ngingi ngamulinu ilixo noxi'a uasi. Loxo vile no taingengi so u'uli laxungengi la anu uili'i manina tei. O loxo vile so uxali tatila la anu uxali loxo uokuvoi vitanisi tei. 27Xo ena'ei itema tila, anu ane uxolu uloxu la'ilali o anu ane ulalaxinu so une'enu noxou? A itema ane uxolu no latevolo so uloxu la'ilali, ne? Ia loxo eni, la axolu no taingengi loxo itema so u'oxonu xaixai vitanisi.

28No voxo loxo tu'utu'umaxu muxali so mutovoleli la ngingi nga'umesilo uasi, ngexolu noxilosi. 29La Mamilo muososovosilo so a'uli laxune'i tamitemaxeli laso axone kalumo eni asosovosinge so nga'uli laxune'i tamitema. 30Xo no voxo loxo eni a'uli laxune'i temitemaxeli la ngingi ngaxolu nonano so nga'ani mo ngaie no latevolo noxilo ne. Mo ngingi ngatalupexa no anu sia kingi so ngatilovosou ili'ilixone'i laili 12 noxi'a Ta'isilaeli.”

Iesua muvikala lexe Pita uxiunu tumalouou

31Xe ili'i la Iesua muvikala lexe, “Saimonio, Saimoni, nalomu. Uluaou mulinga lexe utovonu lopala noxine. Utovoneni la loxo itema umu'umunu uiti so sosou uxexe xe temanusi a uxolu. 32Ia eni epilixineni noxou Mosinge mukalu so lopala noxine ulapau avile uasi. Mo so axone xe naxiu nalivui la xavine so na'oxo pakia'a tavivine.” 33La Pita mukolinu lexe, “Uasi, Tatanaleli. Loxo tamitema ikalavusuneni mo ivene nasoli la eni alalaxi so amulineni no anu.” 34Xe Iesua muvikalanu lexe, “Pitao, eni avikalaneni lexe masi no olovoxo loxo koko'a u'ava uao la alaxu tatalu nini navikala lexe nalavusilo uasi.”

Muvikalane'i lexe ililaxi no anu tu'umaxu ane so uxali

35Mukalu la muvikalane'i tatisaipeli aloxo 'ola, “No voxo loxo epalusinge ngelailai so nge'oxonu xaixai la epelototosinge lexe ngatavulenu ulu'ulu so lamoli xe tiva xe lasu uasi. Ia axova, ngelai la ngesoti no anu mi vile o uasi?” La ane'i mi'oxo lexe, “Uasi to!” 36Xe muvikalane'i lexe, “Ia vaimomo 'o la itema ulu'ulu so lamoli la uno'usi. Xe loxo tiva la utavulenu. Xe itema loxo laviso so oto uasi la usalimunu saketi so sivo xe lamolisou la ulotonu laviso so oto. 37Xo no anu lavukuou Mosinge la vaikala vile mukaukavu no anu aloxo 'o, 'Ane'i tamitema isaxisou lexe anu vile noxi'a tamitema tamasua.' La avikalangengi lexe tamitema i'oxo axone noxilo xo vaikala ma'ia ulemolu silo la uxalixu nene'axu ane.” 38La ane'i mikolinu lexe, “Tatanenexi, namaisou, nexi laviso so oto tamei a uai 'oe.” La anu mu'oxo lexe, “Io, anu umomomosi.”

Iesua mukatu noxou Mosinge no la'olu Olivi

39Ioxe, Iesua mulutu no taoni mula mulai no la'olu Olivi loxo ulavusou u'oxonu utotomu. La ane'i tatisaipeliou mimulinu milai. 40Mulutu xo xe muxali no apu ne la anu muvikalane'i lexe, “Ngingi ngaxolu ngavikala noxou Mosinge mo so ngalapau no anu tovotovo uasi.” 41Xe anu muxexesi'a va'axu sevile aloxo talea lavo'o ulai utalo no anu. La muxolasou tava'u mo muvikala noxou Mosinge aloxo 'o, 42“Papao, tu'umaxu e so uxali noxilo la loxo lexa sixula. Loxo namasaxau la naxexenu mo so aiexu uasi. Ia namulinu masaxa na'a xeli uasi, namulinu masaxa na'a ninisi.”

43La angelo vile so tualasou Mosinge mune'e mupa noxou so mu'oxonu pakia'u. 44Xe mune'e la Iesua muxamulinu tu'umaxu mu'oki manina laso mukatu noxou Mosinge tatilala. La tu'umaxu ne mukasou mole sasaiou munixi mupei no lia la loxo sialu 'osi. 45Muvikala noxou Mosinge xo xe mukalu la mutulu mo mulai noxi'a tatisaipeliou. La mumaisi'a lexe ane'i a miai xo opone'i tu'umaxu misevile. 46Xe muvikalane'i lexe, “Axova so ngai aloxo 'o? Ngatulu mo ngapilixingengi noxou Mosinge xo loxo 'o io ngalapau no anu tovotovo.”

Iutasi mupilixinu Iesua no avo'a tauluaou

47Ioxe, Iesua uvikalane'isio la tamitema latala a mine'e. La itema e ilemolu Iutasi, anu vile noxi'a tatisaipeli 12 a mu'uli so ulosoie'ixu vote'i. Anu mune'e muxali noxou Iesua sila mu'oxo so lexe umaxa'u sexela noxou. 48Ia Iesua muvikala lexe, “Iutasi, nini nene'e nemaxa'u sexela noxou Itema ane molu noxou Mosinge so napilixinu no avo'a tauluaou, ne?”

49Xe tatisaipeliou e oli'a mixoxolu ne mimalei axone la mi'oxo lexe, “Tatananexi tave'ave'a no anu laviso 'o?” 50Sila vile mutokinu laviso so oto sika mupasou sangalou voiou tila noxi'a tapilisiti. 51Ia Iesua muvikala lexe, “Ngatalo! Mukalu!” Ka mumulaxu avolu no sangalou itema ne sila muxali laixenula.

52Mukalu la Iesua muvikalane'i tatiatila noxi'a tapilisiti xe tatiatila noxi'a tamitema so latolo no anu tasou Mosinge xe tatiatila noxi'a Taiuta e mine'e so mitelisou ne. Muvikalane'i lexe, “Ngingi ngeno'u laviso so oto ilou kulukulue ngene'ene'e aloxo 'o so lexe ngatetelisou itema lasikeli vile? 53Xo no voxovoxo loxo exolu no tasou Mosinge la axova so ngapitanu avonge so ngatetelisilo ua? Ia mi vile uasi, xo xavi no anu isivoxo uxoxolu noxinge laso anu voxosinge se 'osi.”

Pita muvikala lexe anu ulavusou Iesua uasi

54Ioxe, Iesua muvikala mukalu la ane'i mitetelisou mo milaixu la mixalixu avile no tasou tila noxi'a tapilisiti. Xe Pita mumuline'i mulai ia va'axu sevile. 55La tamitema se'i mitauxu navu noale no vaitani xe mixolu mipita so itu'exu. La Pita muxolu no taine'i kalumo. 56La sema so xaixai vile ne mumaisou Pita a uxolu utu'e navu sila mimatakisou mo mivikala lexe, “A itema ano'o mumulimulinu Iesua kalumo.” 57Ia Pita muxililiou vaikalaie lexe, “Nini sema ne nakalavoisi, eni alavusou to uasi.” 58Xe ili'i sevile la itema vilela iou mumulinu mo muvikala lexe, “Ai, nini vile noxi'a kalumo ane.” Ia Pita mukolinu lexe, “Uasi, eni vile noxi'a uasi!” 59Xe muxolu loxo aso iou vile mukalu la itema vile muvikala pakia'u mo muolotete lexe, “E manina, anu vile noxou Iesua ane. Xo anu so Xalili kalumo.” 60Ia Pita mu'oxo lexe, “Nini nalemolu vaikala ma'ia to ne, eni alavusou uasi.” Anu a uvivikala axonesio sila alaxu vilesisi koko'a mu'ava. 61Xe Tatananenge muxiu so iou mulaiou Pita. La Pita muxavutalanu vaikalaou Tatananenge mulemolu lexe, “Masi no olovoxo loxo kokoa u'ava uao la nini navikala alaxu tatalu lexe nalavusilo uasi.” 62Laso Pita mulai noale la mutama e lapilai uasisi.

Ane'i mimolo sukusou Iesua mo misavasavalou

63Ioxe, ane'i e mitetelisou Iesua mimolo sukusou mo mi'otu'otunu. 64Mo ane'i misakinu iou no anu lavalava la mivikalanu lexe, “Ioxe, nalemolu vaikala so pela'a. Ena'ei muvene to ne?” 65Mo ane'i milemolu vaikala masu'aou no anu vote'i iouiou.

Ane'i mitulusou Iesua no laxune'i tatiatila noxi'a Taiuta

66Mixolu xo xe aso muxali la tatiatila noxi'a Taiuta mine'e mipita. La ane'i oli'a tatiatila noxi'a tapilisiti xe tamitema so lavulavu no anu lavuloto. Mipita mukalu la milaixu Iesua no anu ngiou loxo mipita no anu. Xe mivikalanu aloxo 'o, 67“Nini navikalanexi. Nini ane so Kalaisiti o uasi?” Ia anu mukoline'i lexe, “Uo, loxo avikalangengi manina la umomomo so ngalopalanu lexe manina uasi. 68Xe loxo eni atatali'i noxinge la ngingi ngakolileli uasi ane. 69Ia vaimomo 'o xo mo ulai avile ili'i la Itema ane molu noxou Mosinge uxolu utalupexa no anu avolu tema noxou Mosinge anu mosou xavi.”

70La ane'i mitali'isou lexe, “Laso nini Mosinge Olu, ne?” La anu mukoline'i lexe, “Ani, enisi ane.” 71Laso ane'i mivikala lexe, “Ai, tava'u so ta'avalou itema vilela so ua'aloxu susu noxou itema ano'ola uasi. Anu molu muto'omolu no anu vaikalaou mula no anaxu, mo a telomusou 'oe.”

Currently Selected:

Luku 22: ATA

Highlight

Copy