Luku 20

Tatiatila mitali'isou Iesua lexe, “Ena'ei mutulusine natiatila 'o?”

1Mune'e xe voxo vile la Iesua muvotone'i tamitema so vaikala laixe nonano no vimelusou tasou Mosinge. La tatiatila noxi'a tapilisiti xe tamitema so lavulavu no anu lavuloto xe tatiatila noxi'a Taiuta mine'ene'e noxou. 2La mitali'isou lexe, “Navikalanexi, nini neno'u xavi ne'ei so na'oxonu ilixo te'o? Xo axova, evile mutulusine so naxali natiatila aloxo 'o?” 3La anu mukoline'i lexe, “O eni kalumo amasaxau atali'isingexu mi vile so ngavikalalelixu. 4No voxo loxo Tioni mu'oxonu ilixo so kelele la ngaxavutala axova? Mosinge molu mupalusou o anene mi noxi'a tamitemasi? 5La ane'i mivivikalane'i ngato'o mo mi'oxo lexe, “Ai loxo nenge ta'oxo lexe mi noxou Mosinge, la anu masi uto'omenge lexe, 'La axova so ngalomuxu vaikalaou uasi?' 6Ia loxo nenge ta'oxo lexe anu mi noxi'a tamitemasi, la ane'i latala masi ipalenenge no lavo'o ane. Xo ane'i milopala lexe Tioni ne anu polopeti manina.” 7Tane'ilili axone laso ane'i mikolinu lexe, “E, nexi talavu lexe Tioni muxalisou xavi noxou a ne'ei uasi.” 8La Iesua muvikalane'i lexe, “Ioxe, laso mamu so eni kalumo apela'inge lexe ena'ei mulosilo xavi so axaxai 'o.”

Latilovo so tamitema tamasua misaxila'u xaisou uaini

9Mukalu la Iesua mu'oxonu latilovo noxi'a tamitema latala ne aloxo 'o, “Itema vile mu'oxo xaisou uaini. Mukalu la mupilixinu xai ne no avo'a tamitema se'i so isaxila'u xo anu uxolu uasi ulai no tuala vile nopaxa. 10Mulai muxolu xo xe voxo so uaini lingamoe la anu mupalusou voiou vile so ulai noxi'a tamitema ane misaxila'u xaixu ne. Mupalusou mulai noxi'a so ilosou xai temanu se'i. Ia voiou mulutu xo xe muxali la tamitema so isaxila'u xai ne mi'otu'otunu mo mikusaou la mulivu muxaxasi. 11Mukalu la mosou xai mupalusou voiou vilela so mulai noxi'a. Ia tameisou 'o kalumo mi'otu'otunu mo mivila'isou ka mikusaou mulivu muxaxasila. 12Xe mune'e la mupalusou voiou vilela ia tatalusi'a 'o kalumo mipoposou ka mikusaousi.

13Ioxe, laso mosou xai mu'oxo lexe, 'Eni anava io? E, apalusou alixeli soxu vilesisi e asexelaxu misevile 'o xo ane'i masi itaxanu ane.' 14Ioxe, olu mulai xe tamitema so isaxila'u xai mimaisou la mivikalane'i ngato'o lexe, 'Ano'o ne mosou xai olu a. Ili'i la anu uxalisou mimiou momu mukalusi. Laso nenge tavau aliku 'o usoli mo so nenge menge tamosou xai ano'o.' 15Sila ane'i mivau musoli, mo misu'anu vasimolu noale no xai. Laso masi mosou xai ne unava? 16Ngalomu. A une'e umamulone'i tamitema so isaxila'u xaixu ne. Umamulone'i mo upilixinu xai no avo'a tamitema se'i ta'alavua.” la ane'i e mitulu milolomu ne mivikala lexe, “Ai, mamu so uxali axone!”

17Ia Iesua musaxi noxi'a la muvikalane'i lexe, “Ne? Laso axova so kaukavu muai no anu vaikalaou Mosinge aloxo 'o, 'Ane'i tamitema so itulusou tani mimatapianu lavo'o vile. Ia lavo'o nesi Mosinge muilounu so muxali lavo'o so tani kisou.' 18Loxo itema utulaki mo ulapau no latanu lavo'o ne la ukakaka e lapilai uasisi. Ia loxo lavo'o ne ulapau utuvusou itema la anu umamulo e utuxu upaxepaxelesi.”

19Xe tamitema so lavulavu no anu lavuloto oli'a tatiatila noxi'a tapilisiti milomusou latilovo mu'oxonu ne la milavu lexe anu so uto'ome'a no anu ane. La opone'i ialuxu manina so lexe itetelisou alala'e se nesi ia vote'i uasi xo i'ume'a tamitema latala ne.

Se'i mitali'isou lexe anu laixe so isu'anu taxisi o uasi

20Ioxe, ane'i tatiatila mituluxu Iesua laixe mo so loxo upolo va'axu no anu vaikalaou vile la itetelisou ka ipilixinu no avolu tila no anu xamani so ukotixu. Laso mipalusi'a tamitema se'i ane mikalavoi lexe ilolomu laixe noxou ia loxo manina la mine'e so milakokongoxusi. 21La mivikala noxou lexe, “Tisao, nexi talavu lexe nini namitema so vaikala maninasi. Ane'i tatiatila o tamitema vitanisi ne navikalane'i iou vilesisi. Ane'i latala ne napelototosi'a no anu vaikalaou Mosinge maninasousi. 22Laso naxavutala axova? Anu laixe so nenge tasu'anu taxisi ulai noxou kingi noxi'a Talomu e Sisa, o uasi?” 23Ia Iesua mulavu no anu lolo noxi'a to ne laso muvikalane'i lexe, 24“Ngane'enu lamoli siliva vile mo ngamaxa'uielixu.” Mine'enu laso mutali'isi'a lexe, “Pikisa mo uala no lamoli 'o noxou eio?” La ane'i mi'oxo lexe, “A noxou kingi Sisa to!” 25La Iesua muvikalane'i lexe, “Laso ane. Loxo mi noxou Sisa la ngapilixinu noxou u'isalili. Xe mi noxou Mosinge la ngapilixinu noxou u'isalili kalumo.” 26Mukoli axone la ane'i tane'ilili xo ane'i vote'i so i'oxo loloxu uasi. Vaikala ma'ia mulemolu no ie'i tamitema ne mulovosi, mi vile so tatiatila ikotixu no anu uasi. Laso mixolu tasiausi.

Tasatusi mitali'isou Iesua so tamitema isoli ka imauli

27Ioxe, mune'e la Tasatusi se'i mine'e mixali noxou Iesua. Ane'i Tasatusi ne xavutalai'a lexe loxo itema usoli la ukalu avile, Mosinge utulusoula uasi. Mine'e mixali noxou Iesua la mitali'isou aloxo 'o, 28“Tisa, Mosisi mukaukavunu lavuloto aloxo 'o. 'Loxo itema vile utaula'i xe olu uasi ia usoli, la vimou uno'u tanixu mo utaula'ixe ou ne. La ixalixa'a tali'a mo so laili noxou vimou e musoli la utalo uasi, usuku axone.' 29Ioxe, anene lavuloto e Mosisi mukaukavunu. Laso tatovonu latilovo aloxo 'o. Loxo tamulu 7 ane'i tavimovimo'asi. Xe laposalaxa'a mutaula'ixe sema vile xe olu uasi ia usoli. 30Xe mune'e la vimou tameisou mutaula'ixe sema nela. 31Xe mune'e la tatalusi'a muno'ela. Mo anu axone noxi'a tavimovimo'a 7 ne mukalusi. Ia ipala to uasi. 32Mune'e xo xe ili'i la sema ne kalumo misoli. 33Laso tali'i noxixe axo'. Loxo ili'i no voxo so Mosinge utulusi'a tamitema misoisoli, la axova? Sema ne mulue ena'ei manina, xo mitaula'ixa'a tavimovimo'a 7 mukalusi?”

34Laso Iesua mukoline'i aloxo 'o, “Ane'i tamulu xe tasema so vaimomo 'o ne ane'i itautaula'i. 35Ia ili'i loxo Mosinge utulusi'a tamitema ane utilovosi'a lexe laixe so ixolu noxou avile la ane'i itataula'i uasi. 36Ane'i loxo ta'angelosi, xo ane'i isolila uasi, ixoxolusi. Mosinge u'umene'i no anu soli mukalu laso ane'i ixolu ta'olu u'isalilisi. 37Ia no anu telexu so lexe tamitema isoli ka itulula la Mosisi mupela'ingexu mi ne loxo mua'aloxu ovu kitu'a navu mu'ani no anu. Xo anu mulemolu Tatananenge lexe anu Mosi'a Apala'amu xe Aisaki xe Iakovo. 38Ne ngamaisou, Mosinge uvikalasi'a ta'ilusungengi axone xo ixolu imauli ane. Mamu so ngaxavutala lexe Mosinge anu Mosi'a tamitema ane soli mukalusi'a avile. Anu Mosi'a tamitema ane imaulisi.”

39Muvikala axone xe tamitema se'i so lavulavu no anu lavuloto milomusou la mivikalanu lexe, “Tisa, vaikalameni ne laixesi.” 40La ane'i mimama'u so italitali'i noxou no anu mi vilela.

Iesua muvotone'i tamitema so Itema ane Mosinge musosovosou

41Ioxe, mune'e la Iesua mutali'isi'a tamitema latala lexe, “Tamitema ivikala lexe anu ane so Kalaisiti la ilusunu Teviti. Axova so ivikala axone? 42Xo no anu Lexelexe la Teviti mukaukavunu vaikala aloxo 'o, 'Tatananenge muvikalanu Tatanaleli lexe, “Nini natalupexa no avolo tema. 43Natalupexa ne xo mo eni apilixine'i tauluameni no laxene so namaloxo'a.” 44La Teviti molu mulemolu Itema ane Mosinge musosovosou ne lexe Tatananu. Laso vote'i axova so Tatananu Teviti ne anu muxali ilusunu?”

Iesua mupela'axu ilixo noxi'a tamitema so lavulavu no anu lavuloto

45Xe tamitema latala a ilolomu noxou Iesuasio la anu muvikalane'i tatisaipeliou aloxo 'o, 46“Ngingi masi ngalaxa'i laixe noxi'a tamitema so lavulavu no anu lavuloto. Ane'i ilavusou imulaxu lavuluti lailaixe so ixixao no loxoloxomala mo so tamitema itaxane'i mo ivikala kakau aso noxi'a. Xe no anu tatasou lavuloto la ane'i italupexa no anu lu u'uli. O loxo no anu la'ilali la imasaxau tanixa'a tatiatilasi. 47Mo loxo sema vile mulue usoli la i'oxo loloxe so isalimunu tasie, ia lamolisou la ane'i me'a ino'u. Mo itoxa'a no anu lakilaka so ivikala veveni musuku. Tamitema axone, no voxo loxo Mosinge utilovo mo ukolinu ili'ilixo la itavulenu tu'umaxusou ilixo noxi'a u'oki avile.”

Currently Selected:

Luku 20: ATA

Highlight

Copy