Luku 19

Iesua mulai no tasou Sakiusi

1Ioxe, Iesua mupolo no taoni ne Ieliko mukalu xe anu so ulai. 2La itema vile ualasou lexe Sakiusi a muxolu no taoni ne. Anu tilasi'a tamitema so itaxusou taxisi mo anu itema lamolamolixu. 3La anu mumasaxau manina so umaisou Iesua lexe anu itema kaini axova. Ia umomomo uasi xo tamitema milolutu mo mivelisi xe anu ata'ataxu soxusi. 4Laso anu muiave mu'uli no anu vote'i e so Iesua umulinu la mutelekai no anu ovu viki vile so usaxisou. 5Ioxe, Iesua munene'e xo xe muxali no tava'u ovu ne sila musaxi mutelo teitexi la muvikala lexe, “Sakiusi, napalea nalu'e 'o xo eni masi alai axolu se no tasine.” 6Laso anu mupalea musalusalulu mulu'e la oponu mu'osa'osa mo mulaixu Iesua no tasou. 7Ia ane'i latala mimaisou axone la opone'i tu'umaxu mo minuminuxu lexe, “Ai anu a ulai so uxolu no tasou itema ane so ilixo masumasua to ne!”

8Ane'i Sakiusiena mixoxolu no tasou xo xe mu'avuti muvikalanu Tatananenge lexe, “Tilao nalomu. Masi eni akalipalanu mimixeli mukalusi uxali pa'usou tamei mo so apilixinu vile noxi'a ta'oloxola. Xe loxo e'oxo loloxa'a tamitema ta'ei so exalisou mi vile noxi'a la akolinu no anu tamitami'a.” 9La Iesua mukolinu lexe, “Vaimomo 'o pamauli muxalisi'a tatemanu tani ano'oe. Itema ano'o anu ilusunu Apala'amu kalumo. 10Xo Itema ane molu noxou Mosinge mune'e so ukakamuline'i mo upamauline'i ane'i ane milusi.”

Latilovo so tauokuvoi 10 mino'u lamoli

11Ioxe, tamitema latala mixolu milomusou Iesua muvivikala laso anu musolonu vaikalaou la mu'oxonu latilovo. Latilovo ne so upalomatanane'i xo anu a muxali alai ne Ielusalemo la ane'i latala opone'i lexe voxo so Mosinge u'uli laxune'i tamitemaou masi a so upala'a. 12La muvikala aloxo 'o, “Tatila vile umasaxau so ulai no xale lia nopaxa so isosovosou mo utulu ukingi. Xe ukalui laso anu ulivu no nunisou so u'uli laxune'i tatemanu. 13Ioxe, anu so ulutu la mu'avali'a tauokuvoiou 10 la mulosi'a 20 kina vilevilesi. Mo muvikalane'i lexe, “Ngingi ngaxaxaisou lamoli ano'o so ngaxalixu nene'axu xo mo eni alivu axali noxinge 'o.”

14Mukalu la anu mulutu mulai ia tatemanu tualasou mimatapianu tila ne. Laso ane'i mipalusi'a se'i noxi'a so ilai no anu tuala ane ulai no anu. Milai ne so ivikala lamana lexe ane'i imasaxau itema ne utulu ukingi noxi'a to uasi. 15Ia tila ne mulai la mitulusou no anu tanixu kingi xe mulivu muxali laso mu'avali'a tauokuvoi e muvelunu lamoli noxi'a mala'o. Mu'avali'a so ine'e noxou mo ia'alou lexe mixaxaisou lamoli ne mo mixalixu nene'axu axova.

16Ioxe, uokuvoi ane muxali tei la muvikalanu lexe, 'Tilao, eni exaxaisou 20 kina noxine mo exalixu 200 no latanu a.' 17La kingi muvikalanu lexe, 'Nini uokuvoi laixe ane, xo eni elopalanenixu mi isusu'a se ne la nesaxila'u laixe manina. Laso eni atulusine so na'uli laxune'i taoni 10.'

18Xe tameisou mune'e la muvikala lexe, 'Tilao, eni exaxaisou 20 kina noxine mo exalixu 100 no latanu a.' 19Laso kingi muvikalanu lexe, 'Eni atulusine na'uli laxune'i taoni ta'uve.' 20Xe vilela mune'e la muvikala lexe, 'Tilao, 20 kina noxine a uai 'o. Epiliunu ka epailanu muaisi. 21Xo nini namitema so loxo tamitema isusunixine la nalosi'a ialuxu. Mo nini nalavusou naxalisou nene'axu xaixai noxi'a se'i xe nalavusou na'elesou temanu xai ane natounu uasi. Laso maixene e'ume noxine.'

22La kingi muvikalanu lexe, 'Nini uokuvoi masua to! Eni atulusine no anu vaikalamenisi ne. Xo nelavu lexe eni amitema so loxo tamitema isusunixo la alosi'a ialuxu. Mo alavusou axalisou nene'axu xaixai noxi'a se'i xe a'elesou temanu xai ane atounu uasi. 23Laso loxova so nemulaxu lamoli no anu bengi uasi? Xo axone xe loxo elivu exali 'o la alanu lamoli ilou ane upita no latanu. La ua'.' 24Laso anu muvikalane'i ane'i ane itulutulu ne lexe, 'Nano'u lamoli 20 kina noxou mo nalosou uokuvoi e muxalixu 200 olele.' 25La ane'i mikolinu kingi lexe, 'Tilao, 200 kina muai noxou mukalu.' 26Ia kingi muvikalane'i lexe, 'Avikalangengi aloxo 'o. Tamitema ane mimi se'i muai noxi'a mukalu la alosi'a se'i no latanula. Xe loxo ane'i ane ixalisou mi vile uasi, la axexenu mi se ane muai noxi'a. 27Xe tamitema tauluaxeli e imasaxa'ilo so a'uli laxune'i uasi la ngano'a ine'e 'o mo ngave'ave'a no ieli isoisoli avile.'”

28Iesua mutilovo axone noxi'a mukalu la anu mumuamua'i mulutula so utelai ne Ielusalemo.

Iesua mu'unalai ne Ielusalemo la tamitema mi'itinu ualasou a loxo kingi 'o

29La oli'a Iesua milai xo xe mine'e alai ne Ielusalemo la mixali no tuala ne Petivaxe xe no tuala ne Vetani, no anu la'olu Olivi. La Iesua mupalusi'a tatisaipeliou tamei. 30Xe muvikalane'i lexe, “Ngingi ngilou ngalai no tuala no laxunenge olele. Ngaxali no iou xalenga la ngamaisou toniki vile maulu a misakinu ne. Toniki ne itema vile utelo no anu uao. La ngalulusou mo ngane'enu. 31Xe loxo itema vile utali'isinge lexe, 'Ngalulusou toniki ne so ma'ia?' la ngakolinu lexe, 'Tatananenge umasaxau so mi vile.'”

32Iesua mupalusi'a xe ilou milai la mimaisou mimi muxali a loxo anu mulemolu. 33La ane'i ilou a ilulusou toniki sila tamosou mitali'isi'a ilou lexe, “Ngingi ngalulusou toniki ne so ma'ia?” 34La ilou mikoline'i lexe, 'Tatananenge umasaxau so mi vile.”

35Ioxe, la ilou mine'enu toniki noxou Iesua mo misia'u lasiotii'a veveni no xinu toniki so Iesua muxolusou. 36Xe mutalupexa no anu toniki mo a ulalai la tamitema latala mixexenu lasiotii'a veveni so misia'u mumulinu vote'i. 37Iesua muxolusou toniki xe mulai la muxali no vote'i so ulu'elai no tava'u la'olu Olivi. La tatisaipeli tavula'o e mimulimulinu ne tane'iou sosovo so xavi iouiou e misaxisou mukalu laso misoko'u so i'itinu Mosinge ualasou no anu osa tatila. 38La mi'ava'ava aloxo 'o, “Oponenge u'osasou Mosinge misevile mo ta'itinu ualasou. Tatananenge u'oxonu laixe noxou kingi ane molu mupalusou 'o. Anu uxolu no anu xoluxolu lalavulusi mo iaxu no tualasou.”

39Xe Tapalisi se'i a mikei nonano noxi'a tamitema latala ne mivikalanu lexe, “Tisa, nalivaxa'a tatisaipelimeni no anu vaikalai'a 'o.” 40Ia anu mukoline'i lexe, “Eni avikalangengi aloxo 'o. Loxo ane'i italo mo ixolu tasiausi la ava'ava so osa masi uxalixali no anu lavolavo'o uta'olu 'o.”

Iesua tanuxu mo mutatamasou Ielusalemo

41Ioxe, Iesua mulutu xo xe muxali alai ne Ielusalemo xe musu'anu iouou taoni ne la tanuxu mo mutamasou. 42La muvikala aloxo 'o, “O Ielusalemo, tatei mo mune'e muxali vaimomo se 'osi eni emasaxau nalavu no anu vote'i so xoluxolu lalavulusi. Ia uasi, upala'a no ieni uasi xo a mutalume noxine mukalu. 43Xo nalomu. Voxo vile ili'i la tauluameni ine'e isu'anu la'oluxu lia uxixaosou vimelusine so loxo ukapikapineni avile. 44Xe imamuloneni ngoli'a ta'iline ixolu nonano ne naxali loxo lia uvilimisi. Xo mole lavo'osine vile uai no latanu vile la uasisi. Mi ne uxalisine xo nini netongonu voxo so Mosinge mune'e so upamaulineni uasi.”

Iesua mukusai'a tamitema ane mimaketi no tasou Mosinge

45Ioxe, ili'i xe muxali ne Ielusalemo la mu'unalai no vimelusou tasou Mosinge. La anu mukusakusai'a tamitema ane mimaketi ne. 46Xe muvikala lexe, “Mosinge vaikalaou uvikala aloxo 'o, 'Tasilo 'o anu tasi'a tamitema so ine'e ivikala noxilo.' Ia ngingi nge'oxonu muxali loxo tasi'a talasikelisi e so italumeu mimi ipakalinu.”

47La no voxovoxo utotomu anu muxolu nonano no anu vimelusou tasou Mosinge so muvotovoto. Ia ane'i tatiatila noxi'a tapilisiti xe tamitema so lavulavu no anu lavuloto xe tatatila noxi'a tamitema mimolo vote'i so lexe ivau Iesua usoli axova. 48Ia vaikala ma'ia mulemolu la tamitema opone'i mututulusi so ilomusou, laso ane'i tatiatila ixalisou vote'i vile so ivau usoli uasi.

Currently Selected:

Luku 19: ATA

Highlight

Copy