Tioni 21

Iesua mupala'a noxi'a tatisaipeli 7

1Ioxe, ili'ila la Iesua mupala'anixula noxi'a tatisaipeli no kupa Xalili, e ilemolu kalumo lexe kupa Taiveliasi. La mupala'anixu noxi'a no anu vote'i aloxo 'o. 2Voxo vile la Saimoni Pita xe Tomasi e ualasou vilela lexe Titimusi xe Natanieli anu so taoni Kana ne Xalili xe Sepeti ta'olu tamulu tamei xe tatisaipeliou Iesua tameila ane'i mukalusi mixoxolu. 3Sila Saimoni Pita mu'avuti muvikalane'i lexe, “Ai, eni masi alai akae tasinana.” La ane'i tamenexu mivikalanu lexe, “Io' nenge nenge'a talai.” Laso ane'i milai mitelo no anu pouti vile so mixixao no kupa. Mixixao olovoxo loloni so ikakae ia ixalisou sinana vile uasisi.

4Xe no kakau manina e aso upolosile la mimaisou Iesua a ututulu no tasii ia tatisaipeli itongonu lexe anu uasi. 5La Iesua mutali'isi'a lexe, “Tamaula moso 'o, ngingi ngaxalisi'a tasinana uaosio?” La ane'i mikolinu lexe, “Uasi e.” 6Xe anu muvikalane'i lexe, “Ngakalanu kae ulu'e no anu poti pa'umolu loxo no tema, la ngingi ngaxalisi'a se'i ane.” Laso ane'i mikalanu mulu'elai xo xe so ilapunui la imomomo uasi xo mikaene'i tasinana tavu'alo kena. 7Mimalei axone laso tisaipeli e Iesua musexelaxu misevile muvikalanu Pita lexe, “Ai, anu Tatananengesi ane.” Xe Saimoni Pita la musakinu lasiotiou veveni xo tei la muxexenu so muxaxai ne. Musakinu mukalu la muili'e mulu'e no kupa ka munou so upalea uxali no tasii. 8Io ane'i tatisaipeli leviani mine'e no anu pouti so ilapunu kae e muana'ana noxi'a tasinana olele. Ane'i mixolu nopaxa no tasii uasi, mixolu se loxo 100 mita 'osi.

9Mine'e xo xe misua mukalu la mimaleisou navu taxulaxu xe sina a muai so uxutu no anu xe pileti muta'olu ne kalumo. 10La Iesua muvikalane'i lexe, “Tasinana e ngekaene'i 'o ngano'u se'i une'e.” 11Laso Saimoni Pita mutelo no anu pouti kaio mulapunu kae mula no tasii. La kae muana'ana noxi'a tasinana tatatilasi navasi'a umomomo no anu 153. Ane'i tasinana tavu'alo musuku ia kae ukaka uasi.

12Xe Iesua muvikalane'i tatisaipeli lexe, “Ngane'e mo nga'anisi.” La ane'i mimama'u mo vile noxi'a utali'isou lexe, “Nini ena'ei ne?” uasi, xo milavu lexe anu Tatananengesi ane. 13La Iesua mulai muno'u pileti e muta'olu ne ka mulosilosi'a mo mu'oxo axone no anu sinana e muxutu olele kalumo. 14La ano'o alaxu tatalusou so Iesua mupala'a noxi'a tatisaipeli ili'i no anu voxo loxo musoli ka mutulula.

Iesua muvikalanu Pita lexe “Nasaxila'a tasipisipixeli.”

15Ioxe, ane'i mi'ani mukalu la Iesua muvikala noxou Saimoni Pita aloxo 'o, “Saimoni e Tioni oluo, axova, nini nasexelaxo uua'ulixa'a ano'o?” La anu mukolinu lexe, “Ani, Tatanaleli, nini nelavu lexe eni asexelaxene ane.” Laso Iesua muvikalanu aloxo 'o, “Ioxe, laso nasaxila'a tasipisipi ta'ili'a noxilo.” 16Xe Iesua mutali'i noxou alaxu tameisoula aloxo 'o, “Saimoni e Tioni oluo, axova, nini nasexelaxo?” La anu mukolinu lexe, “Ani, Tatanaleli, nini nelavu lexe eni asexelaxene ane.” Laso Iesua muvikalanu aloxo 'o, “Ioxe, laso nalaxa'ine'i tasipisipixeli.” 17Xe Iesua mutali'i noxou alaxu tatalusoula aloxo 'o, “Saimoni e Tioni oluo, axova, nini nasexelaxo?” La anu Pita tanu mutama so Iesua mutali'i no anu sexelasou noxou alaxu tatalusou axone laso anu mukolinu lexe, “O Tatanaleli, nini nelavusou mimi mukalusi. Nini nelavu lexe eni asexelaxenesi.” Laso Iesua muvikalanu aloxo 'o, “Ioxe, laso nasaxila'a tasipisipixeli.”

18Xe Iesua muvikala noxou aloxo 'ola, “Eni avikalaneni manina e maninasi. Loxo nini namaulusio la nini mene nasakinu lavalava kaio namuamua'i nalai no anu masaxa na'a ninisi. Ia ulai xo xe namitema tilae la nini natolosou avone so evilala usakineni kaio ulaixine no anu ane namasaxau so nalai no anu uasi.” 19Iesua muvikala axone so ulosi lexe Pita usoli no anu vote'i axova mo uxalixu ualasou Mosinge utila avile no anu. Mulemolu vaikala ane mukalu la muvikalanu Pita lexe, “Namulileli.”

Vaikala noxou tisaipeli e Iesua musexelaxu misevile

20Ioxe, Pita muxiu loxo 'o mo musaxisou tisaipeli e Iesua musexelaxu misevile a umuline'i ilou. Tisaipeli ne anu e musae alai no pa'umolu Iesua no olovoxo loxo mixolu mi'ani ka mutali'isou lexe, “Tatanaleli, ena'ei so upilixineni no avo'a tauluameni?” 21Pita musaxisoui laso mutali'i noxou Iesua lexe, “Tatanaleli, ia axova noxou itema anene?” 22La Iesua mulivuxu lexe, “Loxo no anu masaxa noxilo itema ne uxolu avile uxali no anu lailivu noxilo la anu mi na'a nini uasi. Loxo nini, la namulilelisi.” 23Laso maixene vaikala mulailai noxi'a tavivinge no anu lopala lexe tisaipeli anene usoli uasisi. Ia vaikala e lexe usoli uasi ne Iesua ulemolu uasi ane. Muvikalasi lexe, “Loxo no anu masaxa noxilo itema ne uxolu avile uxali no anu lailivu noxilo la anu mi na'a nini uasi.”

24Anu tisaipeli nesi anu a ulalanu vaikala so upala'anixu mimi 'oe. Anu molu mukaukavunu mo a uxoxolu 'o. Xe nenge telavu lexe vaikalaou mulalanu ne anu maninasi.

25La Iesua mu'oxonu mimi pienala, ia loxo takaukavunu mi kikitu no anu mukalusi la eni axavutala lexe lialia 'o umomomo no anu lavulavukusou uasi.

Currently Selected:

Tioni 21: ATA

Highlight

Copy