Ta'aposeli 1

Iesua muvavalima lexe upalusou Ulenu Laixe une'e

1Eni akaukavunu a'alo vilela ano'o so ulai noxine nini Tiopilusi. No anu a'alo noxilo tei la ea'aloxu xaixai mo pelototo noxou Iesua mukalusi. 2Mo mune'e muxali no voxo ane Mosinge muno'u mulivunoxu no tualasou. Mulivunoxu, ia tei la Iesua mupelototosi'a ta'aposeli ane muiloune'i tatei. Mupelototosi'a la no anu xavi noxou Ulenu Laixe. 3Xo tei la anu mutavulenu tu'umaxu mo musoli. Ia Mosinge mupamaulinu mukalu la anu mumaxa'u noxi'a tamenexu. La anu muxolu no taine'i voxo 40 mo mumaxa'u noxi'a alaxu tavu'alo so ilavu manina lexe anu mumaulila. Mo muvikalane'i so voxo ane Mosinge molu u'uli laxune'i tamitemaou.

4Ioxe, no voxo vile ane muxoxolusio la oli'a mixolu mipita. La anu mupelototosi'a lexe, “Mamu so ngaxexesou Ielusalemo. Ngingi ngaxolu ngaxomaiou anu ane Mamilo muvavalimasou e elemolu noxinge mala'o. 5Xo tei, la Tioni mukelenixa'a tamitema no lexa, ia voxo tavu'alo uasi la Mosinge molu ukeleningenge noxou Ulenu Laixe so anu uxolu noxinge.

6Xe no voxo anu so utelai la oli'a mixolu mipita. La ane'i mitali'isou lexe, “Tatananexio, aloxova? No voxo ano'o nini mene natulu nakingi no xale lia ne Isilaeli so nexi talalavulusi?” 7La anu mukoline'i lexe, “Anene mi na'a ngingi so ngalavusou uasi. Mamilo molu musosovosou mo mulavusou mimi anene no anu xavi noxousi. 8Ia ili'i no voxo Ulenu Laixe uxali noxinge la ngingi ngano'u xavi so ngaa'aloxo noxi'a tamitema. Ngaa'aloxo ne Ielusalemo mo no xale lia ne Iutea mo ne Samalia mo ulai avile no xale tuatuala ukalusi.”

Iesua mulivu mutelai no tualasou Mosinge

9Ioxe, Iesua muvikalane'i axone mukalu la ane'i a isaxisousio la anu mutelai. Mutelai sila sauma vile musu'asou mole imaisoula ua'. 10Anu mutelai mukalu ia ane'i isaxi utelosio, sila alaxu vilesisi tamitema tamei mipa no taine'i. Ane'i tamei ne lasiotii'a veveni kea. Mipa no taine'i la mivikala lexe, 11“Ai, tamitema so Xalilio, loxova so ngatulu ngasaxi utelo vitanisi aloxone? Mosinge muno'u Iesua no taingengi alala'e 'o so ulaixu teitexi no tualasou. Ia ili'i la anu ulivu une'e no anu vote'i ane loxo ngemaisou mutelai no anu 'o.”

Ta'aposeli misosovosou lakolisou Iutasi

12Ioxe, ta'aposeli milutu no la'olu Olivi la milivu milai ne Ielusalemo. Anene nopaxa malaxo uasi. Mimuamua'i loxo Taiuta imomomo so imuamua'i no anu Voxo so Ma'ila. 13Ane'i mixali no tani la mitelai no anu ngiou tameisou teitexi ane mixoxolu no anu. La ualaualasi'a aloxo 'o. Pita xe Tiemisi xe Tioni xe Enitilu xe Pilipi xe Tomasi xe Patolomiu xe Matiu xe Tiemisi ane Alipiusi olu xe Saimoni ane so laili Seloti xe Iutasi Tiemisi olu. 14Ane'i mixoxolu la utotomu mipita mo mivikala noxou Mosinge. La Malia Iesua nenu oli'a tasema se'i xe Iesua tavimovimou, ane'i kalumo ilavusou ine'e ipita noxi'a ta'aposeli. 15Ioxe, no voxo anene la navasi'a tamitema loxo milopala noxou Iesua mumomomo no anu 120. La Pita mutulu no taine'i la muvikalane'i lexe, 16“Tavivilo tatei Ulenu Laixe mulosou Teviti vaikala se'i la mukaukavunu mo a uxolu no anu lavukuou Mosinge. Vaikala ne so Iutasi e mulosoie'i tauluaou Iesua vote'i so mitetelisou. Teviti mukaukavunu tatei la temaisou muxali axone. 17Xo tei la Iutasi ne anu vile noxixe mo mu'oxonu xaixai noxixe nexi ta'aposeliou Iesua 'o. 18Ia anu mu'oxonu ilixo masua mo muxalisou lamolisou. La mulotonu xale lia sevile no anu lamoli ne. Xe ili'i la anu mulapau no xale lia se ne mo oponu mupau la tamusinu mula.

19A'alosou muiaveiave noxi'a tamitema ne Ielusalemo, la ane'i milemolu tanixu ne lexe Akelitama. No anu vaikalai'a la anu laxu lexe apu so sialu. 20Xe Pita muvikala aloxo 'ola, “Teviti mukaukavunu no anu lavuku so Lexelexe aloxo 'o, 'Tanixu ne usivu, evile uxolu nela uasi.' Xe no anu mautunu vilela muvikala lexe, 'Itema vilela uno'u tanixu so u'uli laxune'i tamenexu.' 21Laso nenge tasosovosou itema vile so uno'u Iutasi tanixu. Ia tano'u itema alavua uasi. Tano'u itema vile ane noxou texolu tatei mo temulinu Tatananenge Iesua no voxovoxo loxo muxixao. 22Usoko'u no voxo loxo Tioni mu'oxonu ilixo so mukelenixa'a tamitema no lexa mune'e avile no voxo so Mosinge mulivunoxu Iesua mutelaixu. Nenge tasosovosou itema vile ane mumaisou mimi anene mo so noxou taa'aloxu Iesua. Taa'aloxu, la taa'alo lexe Mosinge mupamaulinu mu'umenu no anu soli. 23Ioxe, Pita muvikalane'i aloxone mukalu la mileme'a tamitema tatamei. Vile ualasou lexe Iosepu Vasavasi, anu ualasou vilela lexe Iasitusi. Xe itema vilela ualasou lexe Matiasi. 24Mileme'a mukalu la mivikala noxou Mosinge aloxo 'o, “Tatananexi, nini nalavusou opone'i tamitema mukalusi. Nini mene nalosoiexi lexe nini nailounu itema aneva noxi'a ilou 'o. 25Laso anu uxali aposeli so uno'u tanixu Iutasi. Xo Iutasi muxexesou xaixai ano'o mukalu mo mulai no anu tuala ane mulovo no anu ilixo noxou.” 26Mivikala noxou Mosinge mukalu la ane'i mi'oxonu ilixo so uala. La Matiasi ualasou muxali. Laso ane'i mipitanu noxi'a ta'aposeli 11.

Currently Selected:

Ta'aposeli 1: ATA

Highlight

Copy