Tioni 20

Mimalei lexe lulu tasiausi

1Ioxe, no voxo tei no anu viki la Malia so Makatala mixali no lulu no mi ne maxasesela manina. Xe mimalei loxo 'o sila mimaisou lavo'o so lulu anaxu lexe muai muxexe. 2Laso ane miiave xo la mixali noxi'a Saimoni Pita ilou tisaipeli e Iesua musexelaxu misevile kaio mivikalane'i lexe, “Ane'i mixexenu Tatananenge vasimolu mula no lulu mo talavu lexe mimulaxu ne'ei uasi.”

3Laso Pita ilou tisaipeli ne milutu so ilai no lulu. 4Ilou miiave ia tisaipeli vile olele muiave palea noxou Pita la muxali no lulu tei. 5Muxali ia u'unalai uasi, mutangatulu so muia'ili nonanosi, la mumaisou lavalava kea e mi'isisinu vasimolu Iesua no anu a muaisi. 6Io Saimoni Pita muili'i xe muxali la mu'unalai no lulu avilesi. La mumaisou lavalava kea ne a muai nesi. 7Xe lavalava e misakinu vasimolu kisou no anu a uai upita no anu lavalava kea e misisinu no anu uasi, anu mupipi muai no tanixumo. 8Pita mumalei axone mukalui la tisaipeli e muxali tei olele a mu'unalai no lulu kalumo. Mu'unalai xe mumalei sila mulopalasi. 9Xo mune'e muxali no anu voxo se nesi la vaikala ane uxolu no anu lavukuou Mosinge lexe Iesua utulu no anu soli, anu upalasi noxi'a uaosio. 10Xe mukalui laso tatisaipeli tamei ne milivu no tani ane mixolu no anu.

Iesua mupala'a noxie Malia so Makatala

11Ioxe, Malia mitutulu noale se no lulu mo a itatama. A itatamasio la mitangatulu so miia'ili nonano no lulu. 12Miia'ili sila mimaisi'a ta'angelo tamei lavulutii'a kea a mitalupexa no anu tanixu e vasimolu Iesua muai no anu tei. Vile mutalupexa loxo no kisou xe vile no tava'u. 13La ane'i ilou mivikalane lexe, “Semao, natatamasou mi ma'ia ne?” La ane mikoline'i lexe, “Atatama xo ane'i mixexenu Tatanaleli vasimolu mo alavu lexe mimulaxu a ne'ei uasi.” 14Ane mivikala axone xe mixiu xo'o sila mimaisou Iesua a mututulu ne ia ane itongonu lexe anu Iesua uasi.

15Laso Iesua mutali'isie lexe, “Sema, natatamasou mi ma'ia ne? Nini nakakamulinu ena'eio?” Ane Malia mikalavoi lexe anu itema so usaxila'u xai nesi ane, laso mivikalanu lexe, “Tilao, loxo nini netavulenu vasimolu mulai la napela'ilo lexe nemulaxu ne'ei mo so eni ano'u alaixu.” 16Sila Iesua mumoxo'e lexe, “Malia.” Xe Malia la mixiu mulai noxou ka milemolu no anu vaikala Ipilu lexe, “Lavonai.” Vaikala ne laxu lexe Tisa. 17Xe Iesua muvikalane lexe, “Nasavunixo uasi xo eni alai teitexi noxou Mamilo uao. Ia nini nalai noxi'a tavivilo mo navikalane'i lexe eni a so alai teitexi noxou anu e Maminge nenge'a xe Mosinge nenge'a.”

18Muvikalane Malia so Makatala ne mukalu la ane milai mivikala lamana noxi'a tatisaipeli lexe, “Ai, eni emaisou Tatananenge mukalu.” La ane mivikalane'i no anu vaikala ano'o e Iesua mupilixinu noxie.

Tatisaipeli latala mimaisou Iesua

19Ioxe, no voxo tei no anu viki nesio la tatisaipeli mixolu mipita no olovoxo. Mipita la mitatusou aitengaxu tani ne pakia'u xo mi'ume'a tatiatila noxi'a Taiuta. Mixolu sila Iesua mupa mutulu no taine'i ka muvikalane'i lexe, “Opongengi uai se'isisi.” 20Muvikala axone mukalu la mumaxa'u avolu tamei xe vaimolu noxi'a. Xe ane'i tatisaipeli mimaisou Tatananenge axone la opone'i mu'osa misevile. 21La Iesua muvikalane'ila lexe, “Amasaxau lexe opongengi uai se'isisi. Aloxo Mamilo mupalusilo ene'e 'o la axone kalumo eni apalusinge so ngalailaisi.” 22Muvikala axone mukalu sila mutausou tauxu mulai noxi'a mo muvikalane'i lexe, “Ngingi opongengi u'osa so Ulenu Laixe u'una noxinge 'o. 23Loxo ngingi ngavikala lexe tina'u so susu noxou evile uiasi la anu manina, uiasi ane. Xe loxo ngingi ngavikala lexe tina'u so susu noxou evile uxolusio la anu manina, anu uxolusi ane.”

Tomasi mumaisou Iesua

24 Ioxe, no voxo loxo Iesua muxali noxi'a tatisaipeli la vile noxi'a e 12 tei olele uxolu uasi. Anu ne Tomasi e ualasou vilela lexe Titimusi. 25Uxolu uasi laso tatisaipeli leviani mivivikalanu lexe, “Ai, nexi temaisou Tatananenge mukalu.” Ia anu Tomasi mulivuxa'a lexe, “Loxo eni amaisou lalili tanixu no avolu uasi, xe amulaxu avolo simisou no anu lalili tanixu uasi, mo amulaxu avolo u'una no vaimolu uasi, la eni alopala uasisi.”

26Xe voxo 7 mupolo mukalui la ane'i tatisaipeliou Iesua a mipitala, la Tomasi a oli'a mixolu. Mixolu la mitatusou aitengaxu tani ia Iesua mupa mutulu no taine'i ka muvikala lexe, “Opongengi uai se'isisi.” 27Mukalu la muvikalanu Tomasi aloxo 'o, “Nane'e namulaxu avone simisou 'o mo namaisou avolo 'o. Xe namulaxu avone u'una no vaimelo 'o. Mamu so oponeni tamei, nalopalasi.” 28Sila Tomasi muvikalanu lexe, “O, nini Tatanaleli mo nini Mosilosi.” 29La Iesua mulivuxu lexe “Nini nelopala 'o xo nemaisilosi, ne? Anu laixe manina noxi'a ane'i ane imaisilo uasi, ia ilopalasi.”

Tava'u lavuku ano'o

30La Iesua mu'oxonu sosovo so xavi tavu'alola no ie'i tatisaipeli ane a'alosou uxolu ukaukavu no anu lavuku 'o uasi. 31Ia mimi ano'o mukaukavu muai aloxo 'o mo so ngingi ngalopala lexe Iesua anu ane so Kalaisiti e Mosinge Olusi. Xe loxo ngalopala la ngaxalisou mauli no anu ualasousi.

Currently Selected:

Tioni 20: ATA

Highlight

Copy