Tioni 17

Iesua muvikala noxou Mosinge so ulingau su'ulisi'a tatisaipeliou

1Ioxe, mimi anene Iesua mulemolu mukalu la mutala mutelai aloxo no tualasou Mosinge. La muvikala aloxo 'o, “Papao, voxo olele a muxali 'oe. Laso na'itinu ualasou Iline u'uli'uli mo so Iline u'itinu ualasine u'uli'uli avile. 2Xo nepilixinu xavi noxou so u'uli laxune'i tatemanu lialia mukalusi. Mo so noxi'a tamitema mukalusi e nepilixine'i so lexe tanoxou, la anu ulosi'a mauli kaluxu uasi. 3La mauli kaluxu uasi ne xinu aloxo 'o, a so tamitema ilavusine nini Namosi'a maninasou vilesisi, mo ilavusilo eni Iesua Kalaisiti e nepalusilo 'o.

4Nepalusilo xe exolu no lialia 'o la epala'anixu uala mu'uli'uli noxine xo emomomosou xaixai e nepilixinu noxilo so a'oxonu. 5Laso Papao, nalivunixilo so axolu no ieni no anu tanixo mu'uli'uli aloxo nenge nengei texoxolu mi ne lialia uxali uao.

6Eni epalasinoxu ualasine noxi'a tamitema ane nepilixine'i lexe tanoxilo. Tei la xoluxoluxa'a no anu lialiasi ia nini nelane'i no anu so mixali tamitemameni kaio nepilixine'i lexe tanoxilomo. Mo ane'i a imumulinu vaikalamenisi. 7Xe mimi mukalusi e nepilixinu lexe noxilo 'o, la ane'i a mino'u lavulavu lexe molu noxinesi. 8Xo vaikala mukalusi e ne'italonu noxilo la a e'italonu noxi'a mukalu 'oe. La ane'i mi'osa so mino'usi mo milavu manina lexe eni melo a noxinesi. Xe milopala lexe nini mene nepalusilo ene'e 'o.

9Eni avikala ulai noxine so alingau su'ulisi'a. Alingau su'ulisi'a tatemanu lialia mukalusi uasi, ia so si'a ane'i ane nepilixine'i lexe tanoxilosi. Xo ane'i 'osi a tamitemameni ane. 10Mi ma'ia noxilo la nini na'a ninisi. Xe mi ma'ia noxine la eni na'a xelisi. Noxi'a tamitema ane nepilixine'i lexe tanoxilo la ane'i ne a vote'i so ualasilo utila mo u'uli'ulisi.

11Eni a so ane'e noxine mo axolu no lialia 'ola uasi. Io ane'i tamitemaxeli 'o la ixolu no lialiasio. Laso Papa, nini ane xoluxoluxene mukalipala xo malemalengamo, nalaxa'ine'i no anu xavinu ualasinesi. Anu uala e nepilixinu lexe ualasilo 'o. Nalaxa'ine'i mo so ane'i ixolu vilesisi aloxo nenge nengei vilesisi. 12Xo loxo exolu noxi'a 'o la elaxa'ine'i no anu xavinu ualasine e nepilixinu lexe ualasilo 'o. Eni e'oxo latolosi'a la vile noxi'a umamulo uasi, ia vilesisi e so mamulosi xo no anu ane la vaikala e uxolu no lavukumeni uxalixu nene'axu. 13Eni a ane'e noxine la alemolu vaikala ano'o loxo axolu no lialiasio xo amasaxau lexe ixamulinu osa noxilo uxolu ulomotele no tane'i.

14Eni e'italonu vaikalameni noxi'a mukalu 'oe. La tatemanu lialia imatapiane'i xo xoluxoluxa'a tamitemaxeli ne a so lialia uasi aloxo eni so lialia 'o uasi. 15A eni alinga lexe nini naxexene'i no anu lialia avile uasi, ia mi e alingausi'a ane so nalaxa'ine'i noxou mosou susu olele. 16Ane'i xoluxoluxa'a so lialia uasi aloxo eni kalumo so lialia 'o uasi. 17Laso na'isalilinoxu vaikala anu temanu manina noxi'a mo so no anu vote'i anene la nakalipalane'i lexe tamitemameni mu'isalili. Vaikala anu temanu manina ne a vaikalamenisi ane. 18Aloxo nepalusilo ene'e noxi'a tatemanu lialia la eni kalumo apalusi'a tatisaipelixeli so ilailai noxi'a tatemanu lialia. 19Eni ekalipalaleli mo so emulinu masaxa noxine u'isalili. E'oxo axone xo opoleli mutului'a lexe no anu vote'i e so vaikala anu temanu manina nesi la ane'i kalumo ikalipala ixali tamitemameni mu'isalili.

20Ia eni alinga so si'a ane'i ano'osi uasi. Xo ane'i 'o loxo ilai ia'aloxo la leviani ilomuxu vaikalai'a mo ilopalaleli. Laso linga noxilo 'o, anu so si'a tamitema anene kalumo. 21Linga noxilo aloxo 'o. Amasaxau lexe tamitema ano'o mukalusi ipita vilesisi aloxo nini Mamilo naxolu vilesisi noxilo mo eni axolu vilesisi noxine. Xo axone la ane'i ipita vilesisi noxinge nengei mo so tatemanu lialia ilopala lexe nini mene nepalusilo ene'e 'o. 22No anu tanixu mu'uli'uli e nepilixinu noxilo la eni epilixinu noxi'a kalumo. Xo axone la ane'i ipita vilesisi aloxo nenge nengei taxolu vilesisi. 23Eni axolu noxi'a xe nini naxolu noxilo mo so ipita loloni vilesisi. Xe no anu vote'i anene la upala'a noxi'a tatemanu lialia lexe nini nepalusilo ene'e 'o. Mo ane'i ilavu lexe nini nesexelaxa'a tamitemaxeli ne iou vilesisi aloxo nesexelaxo 'o.

24Papa, amasaxau lexe ane'i ane nepilixine'i lexe tanoxilo la ixolu kalumo no apu e so alai no anu. Xo amasaxau lexe ane'i isaxisilo mi ne axolu no anu tanixo iaxu mu'uli'uli e nepilixinu noxilo ne. Nepilixinu noxilo xo nasexelaxomo mi ne lialia uxali uao. 25O Papa, nini ane ilixomeni mulapusi, tatemanu lialia ilavusine uasi, ia enisisi elavusine. Xe ane'i tamitemaxeli 'o la ilavu lexe nini nepalusilo ene'e 'o. 26Eni epala'anixu ualasine noxi'a mo apalapala'anixu axonesio. Mo so sexela ane nesexelaxo no anu ne la uxolu no tane'i mo eni axolu noxi'asi.”

Currently Selected:

Tioni 17: ATA

Highlight

Copy