Tioni 18

Iutasi mupilixinu Iesua no avo'a tauluaou

1Ioxe, Iesua mulemolu vaikala anene noxou Mosinge mukalu la oli'a tatisaipeliou milutu xo la mikisa'isou lexa se ne Kitiloni. Mikisa'isou la oli'a tatisaipeli mi'unalai no xai vile e muxolu xalevile ne. 2La Iutasi e so upilixinu Iesua no avo'a tauluaou mulavusou tanixu anene xo Iesua oli'a tatisaipeliou milavusou ipita ne lalaxu. 3Laso Iutasi mune'ene'i laili ami vile xe tamitema so latolo se'i ane tatiatilasi'a tapilisiti oli'a Tapalisi mipalusi'a ne. Ane'i a mitatavulenu lalamo xe telutelu xe mimi so oto. Mune'ene'i xo la muxalixi'a no anu apu e Iesua muxolu no anu. 4La Iesua mulavusou mimi mukalusi ane so uxalisou laso anu mu'avuti mulai no laxune'i mo mutali'isi'a lexe, “Ngingi ngakamulinu ena'eio?”

5La ane'i mikolinu lexe, “Nexi tene'e so takamulinu Iesua so Nasaleti.” La anu muvikalane'i lexe, “A eni ane axoxolu 'osi.” Xe Iutasi e so upilixinu no avo'a tauluaou anu a utulu no taine'i ne. 6Ane'i milomusou Iesua muvikala lexe, “A eni ane axoxolu 'osi,” sila alaxu vilesisi milapalapau milivu no tumali'asi.

7La Iesua mutali'isi'ala lexe, “Ngingi ngakamulinu ena'eio?” La ane'i milivuxu lexe, “Nexi tene'e so takamulinu Iesua so Nasaleti.” 8La Iesua muvikalane'i aloxo 'o, “A elemolu noxinge mukalu, eni ane axoxolu 'osi. Loxo anu e so ngakamulinu a eni 'osi, la nga'italone'i tamenexilo 'o ilailaisi.” 9La anene muxalixu nene'axu vaikala e mulemolu noxou Mosinge lexe, “Noxi'a ane'i ane nepilixine'i lexe tanoxilo, la e'oxonu latolosi'a mole vile noxi'a umamulo uasi.”

10Ioxe, no voxo anene Saimoni Pita muno'u laviso so oto vile laso anu mulavenu no tanixu sika mupasou uokuvoiou pilisiti tatila sangalou tema. Uokuvoi ne ualasou lexe Malikusi. 11La Iesua muvikalanu Pita lexe, “Namulaxu laviso so oto ne ulivu no tanixula. Xo axova, temanu kapu e Mamilo mulosilo 'o tu'umaxu, la aiexu uasi?”

Milaixu Iesua noxou Anasi

12Mukalu la laili ami oli'a tilasi'a xe tamitema so latolo noxi'a Taiuta mitetelisou Iesua kaio misakisakinu no lamota. 13Xe ili'i la milaixu tei noxou Kaiavasi leuanu e Anasi. Kaiavasi ne anu mutulu tilasi'a tapilisiti no anu tau ie anene. 14Xe Kaiavasi anu mosou e mupelototosi'a Taiuta lexe anu laixe so itema vile usoli si'a tamitema latala.

Pita musingisou Iesua

15Ioxe, Saimoni Pita ilou tisaipeli vile mimulinu Iesua milai. La tisaipeli e vile ne, tilasi'a tapilisiti mulavusou, laso anu mumulinu Iesua mu'unalai avile nonano no anu vimelusou tasou tilasi'a tapilisiti ne. 16Ia Pita la mutulu noale no aitengaxu vimelu, laso tisaipeli olele e tilasi'a tapilisiti mulavusou la mulai muvikalane sema so mixolu milo no aitenga, kaio mu'unanu Pita. 17Mu'unanu la sema e milaxa'inu aitenga ne mivikalanu Pita lexe, “Itema e mine'enu 'o, nini tisaipeliou vile kalumo, ne?” La anu mukoline lexe, “Eni to uasi.” 18Xe ane'i tamitema so xaixai oli'a tamitema so latolo mitauxu navu se kaio mitulu mixixaousou so mitu'exu xo tani lelemesou. La anu Pita a mutulu no taine'i so mutu'e kalumo.

Tilasi'a tapilisiti mutulusou Iesua no laxunu

19Ioxe, no taimu anene la tilasi'a tapilisiti a mutatali'isou Iesua so si'a tatisaipeliou xe no anu votovoto noxou. 20La Iesua mukolinu aloxo 'o, “Vaikala ma'ia elemolu la no tani keakeasi. Utotomu eni evotovoto no tanitanixu e Taiuta ilavusou ine'e ipipita no anu loxo no tatasou lavuloto xe no anu tasou Mosingesi. Atalume no mailu'a kaio alemolu vaikala vile uasisi. 21Laso natali'i noxilo xo ma'ia? Natatali'i noxi'a tamitema e loxo milomusou vaikala e elanu noxi'a. Xo nalomu, ane'i ne milavusou vaikala e elemolu ane.” 22Muvikala axone mukalu sila itema so latolo vile mutulu alai ne musavalou Iesua mo mu'oxo lexe, “Anene vote'i to e laixe so nakolinu tali'i noxou tilasi'a tapilisiti?” 23La Iesua mulivuxu lexe, “Loxo eni elemolu vaikala masua la napala'anixu vaikala ne. Ia loxo elemolu vaikala mulovosi, la axova so nevelo 'o?”

24Mukalu la Anasi mupalusou Iesua mulai noxou tilasi'a tapilisiti e Kaiavasi. La lamota e misakinu no anu tei a usaki uxoxolu noxousio.

Pita musingisou Iesuala

25Xe noxou Saimoni Pita la anu ututulu utu'e navusio. Sila ane'i ne mitali'isou lexe, “Nini itema ne tisaipeliou vile, ne?” La anu musingisou muvikala lexe, “Uasi, eni uasi.” 26Ia uokuvoiou tilasi'a tapilisiti vile anu tulanu itema e Pita mupasou sangalou. Anu mu'avuti muvikala lexe, “Ai, eni masi emaisine ngoli'a ngexolu no xai, ne?” 27La Pita musingisoula lexe, “Uasi to!” Sila alaxu vilesisi koko'a mu'ava.

Mitulusou Iesua no laxunu Pailati

28Ioxe, ane'i Taiuta milanu Iesua no tasou Kaiavasi so milaixu no tasou tila no anu xamani. La anene no kakau manina. Milaixu no tasou tila ne ia ane'i me'a i'unalai uasi xo lo noxi'a muvikala lexe mi axone uxalixi'a nuni'a no iou Mosinge, la mimasaxau ixolu malemalengasi mo so ipita i'ani no anu lavilelu so Mualasi'a. 29Laso ane'i mixolu noale io Pailati mula noxi'a la mutali'isi'a lexe, “Ngatulusou itema ano'o no anu susu mi ma'ia?” 30La ane'i mikolinu lexe, “Loxo anu itema so u'oxonu ilixo masua uasi la anu umomomo so nexi tapilixinu noxine aloxo 'o uasi.” 31La Pailati mulivuxa'a lexe, “Ngingi menge ngalaixu mo ngatilovosou no anu lo na'a ngingisi.” Xe Taiuta la mivikalanu lexe, “Anu laiti uai noxixe uasi so tatilovosou susu noxou itema kaio tavauxu.” 32Mi anene muxali axone so uxalixu nene'axu vaikalaou Iesua e mulemolu mala'o lexe anu usoli no anu vote'i axova.

33Ioxe, Pailati mulivu mu'unalai no tasou xamanila la muvikalane'i ta'amiou lexe ine'enu Iesua noxou. Mine'enui la mutali'isou lexe, “Axova, nini kingi noxi'a Taiuta, ne?” 34La Iesua mulivuxu lexe, “Vaikala nelemolu ne nini mene ne'avutinoxu no oponeni, o leviani mia'alomenixo?” 35La Pailati muvikalanu Iesuala lexe, “Xo axova, ne'oxo lexe eni a Iuta, ne? Ua, ane'i tatemanu xale lia noxinemo oli'a tatiatilasi'a tapilisiti mi'ataloneni noxilo. Laso atali'isine, nini ne'oxo mi ma'ia?”

36Ia Iesua mukolinu aloxo 'o, “Eni akingi so xale lia vile no lialia 'o uasi. Loxo eni akingi so lialia 'o la ane'i tamitemaxeli masi i'otosilo so a'italo no avo'a Taiuta uasi. Ani, mi e so eni akingi no anu a so apu ano'o uasisi.” 37Ka Pailati mutali'isoula lexe, “Laso anu manina lexe nini nakingi, ne?” La Iesua muvikalanu lexe, “Nini mene nelemolumo lexe eni akingi. Tava'u so evo'o exali no lialia a so apalapala'anixu vaikala anu temanu maninasi. Xe tamitema mukalusi ane so vaikala anu temanu maninasi ne ilavusou ilolomuxosi.” 38La Pailati muvikalanu lexe, “Vaikala anu temanu manina ne anu mi ma'ia mu'isalili?”

Pailati muvikala lexe Iesua usoli no ovu valautu

Ioxe, Pailati mulemolu mi ne mukalu la mula noxi'a Taiutala mo muvikalane'i lexe, “Eni axalisou tava'u susu noxou vile uasio. 39Ia ngingi ngelavu no anu ilixo e alavusou amulinu no anu tautau ie loxo ngasosovosou lavilelu so Mualasi'a 'o. Ilixo e so ngalemolu vile noxi'a takalavusu ka a'italonu so ula noxinge. Laso axova, ngamasaxau lexe a'italonu kingimengi Taiuta ula noxinge?” 40Ia ane'i mi'ava tatila noxou lexe, “Itema anene uasi. Na'italonu Valavasi so ula.” Anu Valavasi e milemolu ne anu lasikeli to.

Currently Selected:

Tioni 18: ATA

Highlight

Copy