Tioni 16

1Ioxe, mimi ano'o elemolu noxinge mo so ngingi ngalapau ngexexe no anu lopala noxinge uasi. 2Xo Taiuta ikusainge so nga'una no anu tatasou lavuloto noxi'ala uasi. Mo voxo vile uxali ili'i la tamitema ivenge ngasoisoli xo ikalavoi lexe no anu anene la ane'i a i'oxonu xaixai noxou Mosingemo. 3Ane'i i'oxo mimi to axone xo ilavusou Maminge uasi mo ilavusilo uasi. 4Ia eni elemolu mimi ne lumamo noxinge mo so loxo voxosou uxalii la tangengi ulivu lexe a epela'ingexu mukalu 'oe.

Iesua mupela'axu xaixai noxou Ulenu Laixe

Ioxe, tei la apalasinoxu mimi ano'o noxinge uasi xo eni exoxolu noxingesio. 5Ia vaimomo 'o eni a so alai noxou anu ane mupalusilo ene'e 'oe. La axova, vile noxinge utali'i noxilo lexe alai ne'ei uaio? 6Io epala'ingexu mimi anene noxinge sila muvau opongengi tu'umaxu avile, ne? 7Ia alemolu vaikala e maninasi aloxo 'o, eni axexesinge 'o la anu so su'ulisinge ane. Xo loxo axolu la Mosou Su'uli une'e noxinge uasisi. Ia loxo eni alai, la eni apalusou une'e noxinge 'o. 8Xe loxo anu une'e la ulamananixa'a tatemanu lialia no anu susu xe ilixo malemalenga xe vaikalasou mamulo so susu, xo tane'i ukilikalu so mimi ne. 9Anu ulamananixa'a no anu susu xo ane'i ilopala noxilo uasi. 10Xe ulamananixa'a no anu ilixo malemalenga xo eni alai noxou Maminge mo axolu no iengila uasi. 11Xe ulamananixa'a no anu vaikalasou mamulo so susu xo anu ane u'uli laxunu lialia la uxolu no laxu vaikalasou mamulo ne mukalu.

12Eni vaikala tapiena amasaxau so alosingela ia ngingi ngamomomo so ngano'u ukalusi to uao. 13Ia loxo anu Ulenu so Vaikala Manina une'e la anu upamuxanu xavutala noxinge mo so ngalavusou vaikala anu temanu manina mukalusi. Anu ulemolu vaikala ane molu u'avutinoxu uasi, ulemolu mi ma'ia ulomusou noxou Mamingesi. Mo anu upela'ingexu mimi ane so uxali ili'i. 14Mo mi ma'ia so alemolu la uno'u noxilo kaio upala'anixu noxinge. Mo so axone la u'itinu ualasilo u'uli'ulisi. 15Mimi mukalusi noxou Mamilo ne eni na'a xeli kalumo. Laso maixene evikala lexe anu Ulenu Laixe uno'u vaikala noxilo kaio upala'anixu noxinge.”

Iesua muvikala lexe opone'i tu'umaxu tei ia ili'i la i'osa'ilasi

16La Iesua muvikala aloxo 'ola, “Eni axolu noxinge voxo ataxu sesi ka ngamaisilola uae. Xe ulai maxuveni uasi la ngasaxisilola.” 17La ane'i tatisaipeliou se'i mivikalane'i ngato'o lexe, “Mi ma'ia ulemolu ne lexe, 'Eni axolu noxinge voxo ataxu sesi ka ngamaisilola uae. Xe ulai maxuveni uasi la ngasaxisilola.' Xe no anu vile la mu'oxe tava'u so u'umesinge a xo ulai noxou Maminge. Ia laxu axovaio?” 18La ane'i mivikalala lexe, “Anu mulemolu voxo ataxu se ne la ma'ia to ne? Nenge talavusou vaikalaou laxu uasio.”

19La Iesua mulavu lexe ane'i imasaxau itali'isouxu noxou, laso muvikalane'i lexe, “Ngingi a tangengilili mo ngatali'isinge ngato'o no anu vaikalaxeli lexe, 'Eni axolu noxinge voxo ataxu sesi ka ngamaisilola uae. Xe ulai maxuveni uasi la ngasaxisilola.' Ne, ngevikalasou anene? 20Eni avikalangengi manina e maninasi. Maxuveni uasi la ngingi iengi lexaxu unixinixi mo ngaiele so tama ia tatemanu lialia la i'osa'ilasi. Ngingi opongengi tu'umaxu ia ili'i la mi vile uxali so uxiunu mole nga'osa'ilasi. 21Loxo voxo so lavulo'o noxie sema vile la opone tu'umaxu xo ilavu lexe ane a so i'una no anu navunavusou. Ia loxo ilie ulapaui la ixavutalanu navunavu anene la uasi, i'osa'ilasi xo ilie muxali mo muxolu no lialia mukalu. 22Anu axone kalumo noxinge laso maixene opongengi tu'umaxu 'o. Ia ili'i la eni amaisingela, mo no voxo ne opongengi u'osa'ila la vote'i so evile u'umenu osa noxinge ne uasisi.

23No voxo anene la ngalingau mi vile noxilo u'isalili uasi. Xo avikalangengi manina e maninasi, loxo ngalingau mi vile noxou Maminge no anu ualasilo la anu ulosinge ane. 24Xo mune'e avile vaimomo 'o la ngalingau mi vile no anu ualasilo uasi. Ioxe, laso ngalingasi xo ngingi ngaxalisou lakolisou ane. Xe loxo ngaxalisoui la u'oxonu osa noxinge ulomotelesi.”

Iesua muua'ulixu xavi so lialia 'o

25Iesua musolonu aloxo 'ola, “Eni elemolu mimi ano'o noxinge no anu latilovosi. Ia voxo vile a unene'e la avikalangengi no anu latilovola uasi. Eni apela'ingexu Maminge no anu tani keakeasi. 26La no voxo anene ngalinga noxou Maminge no anu ualasilo. Ia eni avikalangengi lexe eni melo so alinga singe noxou Maminge uasi. 27Uasisi, xo Maminge molu musexelangengemo. Anu usexelangenge xo ngingi ngesexelaxo mo ngelopala lexe eni melo a noxousi. 28Xo manina, eni melo noxou Maminge kaio ene'e no lialia 'o. Io eni a so axexesou lialia mo alivu alai noxou Mamingela.”

29La tatisaipeliou mivikalanu lexe, “Anu ane, nini a navivikala no anu tani keakeasi 'o. Laixe, no anu vaikalameni 'o la no anu latilovola uasi. 30Nexi a telavu 'o lexe mimi mukalusi mupalasi noxine. Anu mi so itema utali'i noxine kaio naxalisou lavulavusou uasi, xo nelavusou oponu lumamo ane. No anu anene la lopala noxixe lexe nini mene a noxou Mosingesi.”

31La Iesua mulivuxa'a lexe, “Vaimomo 'o ngingi ngelopala avile, ne? 32Ai ngalomu, voxo vile unene'e mo a muxali 'oe so tamitema ipaxelelengengi mo ngalai no tuatualasinge. Ngalai la ngapilixileli so enisisi axolu, ia enisisi uasi xo Maminge a uxoxolu noxilo 'o. 33Eni elemolu vaivaikala ano'o mo so noxilo la ngaxalisou xoluxolu lalavulusi. Xo no anu xoluxolungenge so lialia 'o la ngaxalisou tu'utu'umaxu, ia laixe so opongengi uxolu pumuxusi, xo xavi so lialia a eua'ulixu 'oe.”

Currently Selected:

Tioni 16: ATA

Highlight

Copy