Tioni 15

Iesua anu ovu uaini maninasou

1Ioxe, Iesua musolonu la mu'oxonu latilovo aloxo 'o, “Eni 'o, a ovu uaini maninasou xe Mamilo anu mosou xaisou uaini ne. 2Laso loxo avo'avolu noxilo ane unene'a uasi la anu uxotosou uxexe mukalusi. Io anu ane uxaxalixu nene'axu la Mamilo avo'avolusou xo upe'esou malusou mo so uxolu malemalengasi xo axone la nene'axu ulolutusi. 3La ngingi tamalemalenga mukalu xo no anu vaikalaxeli e elalanu noxinge. 4Laso nga'oxo aloxo 'o. Ngaxolu ngatoxo avile noxilo mo eni axolu atoxo avile noxinge. Xo loxo ovu uaini avolu la molu uxalixu nene'axumo uasi, anu vote'i so uxalixu nene'axu a so utoxo avile no anu ainusi. Mo ngingi axone kalumo, vote'i so ngingi ngaxalixu nene'axu a so ngatoxo avile noxilosi.

5Enisi 'o a ovu uaini xe ngingi a avo'avolu. Itema aneva utoxo avile noxilo xe eni atoxo avile noxou la uxalixu nene'axu ulolutusi. Xo loxo ngingisi ngaxolumo xe ngano'u su'uli noxilo uasi la ngaxalixu mi vile uasisi. 6Xe loxo evile uxolu utoxo avile noxilo uasi la uxexe usu'asi aloxo tamitema ixexenu isu'anu ovu avo'avolu ane unene'a uasi. Isu'anu xo xe uxaloe la ipitanu kaio ipeinu u'una no navusi mole u'ela avile.

7Loxo ngaxolu ngatoxo avile noxilo mo vaikalaxeli utoxo avile noxinge xe ngalingau mi ma'ia ngamasaxau la ngingi ngaxalisou ane. 8Loxo ngingi ngaxalixu nene'axu ulolutu la anu umaxa'u lexe ngingi tatisaipelixeli. La anene vote'i so Mamilo ualasou utilasi. 9Anu Mamilo usexelaxo misevile la anu axonesi eni asexelangenge ne. Laso ngingi, la ngaxolu ngatalupexa avile no anu sexelasinge noxilo ne. 10Eni 'o la emulinu voto noxou Mamilo mukalusi mo a atalupexa avile no anu sexelasilo noxou. La anu axonesi noxinge, ngingi ngamulinu voto noxilo mo so ngatalupexa avile no anu sexelasinge noxilo 'o. 11Elemolu mimi ano'o noxinge xo amasaxau manina lexe osa noxilo uxolu noxinge mo so osa noxinge uxali loloni avile.

12Voto noxilo so apilixinu noxinge aloxo 'o. Ngingi ngasexelangenge ngato'o aloxo eni esexelangenge ne. 13Sexela noxou itema ane uua'ulixu sexela iou se'i a ane so upilixinu maulixu so si'a tamenexu. 14Mo ngingi loxo ngamulinu voto e epilixinu noxinge 'o la ngingi tamenexilo ane. 15Loxo itema e so silevi la mi ma'ia tilasou u'oxonu la upalasi noxou uasisi. Laso maixene eni amoxo'inge lexe tasilevi la uasi, amoxo'inge lexe tamenexilosi xo mimi mukalusi ane elomusou noxou Mamilo la epalasinoxu noxinge mukalu.

16Ngingi ngailouleli uasi, eni melo eiloungengi ane. Xe mukalu la esosovosinge so lexe ngingi ngalailai mo ngaxalixu nene'axu ane so uxolu avile. Laso loxo mi ma'ia ngalingau noxou Maminge no anu ualasilo la anu ulosingesi. 17Voto noxilo apilixinu noxinge e so ngasexelangenge ngato'osi.

Tatemanu lialia a so imatapiane'i tatisaipeli

18No voxo loxo tatemanu lialia imatapiangengi la xavutalamengi ulivu so tangengi utaxunu lexe ane'i mimatapialeli tei 'o. 19Loxo ngingi xoluxolungenge no anu lialiasi, la ane'i tatemanu ne isexelangengisi xo ngingi ngoli'amo. Ia ngingi so lialia uasi xo eni eiloungengi ngela no anu xoluxolu so lialia mukalu, laso maixene tatemanu imatapiangengi ne. 20Tangengi uno'u vaikalaxeli e elemolu noxinge lexe, 'Uokuvoi tanixu uua'ulixu ane noxou tilasou uasi.' Laso loxo ane'i milosilo tu'umaxu aloxo 'o, la ane'i ilosinge tu'umaxu kalumo ane. Mo loxo ane'i mimulinu vaikalaxeli la ane'i imulinu vaikalamengi kalumo. 21Ia ane'i la ilavusou anu ane mupalusilo ene'e 'o uasi, laso maixene i'oxonu mimi masua noxinge axone xo ngingi ane so ngatatavulenu ualasilo.

22Loxo eni ene'e elanu vaikala noxi'a uasi, la susu noxi'a upala'a avile aloxo 'o uasi. Ia xo ene'e laso vaimomo 'o la vote'i so susu noxi'a utalumela uae. 23Itema ane umatapialeli la anu umatapianu Mamilo kalumo ane. 24Eni ene'e mo e'oxonu xaixai xavinu ane evilela umomomo so u'oxonu uasi. Loxo e'oxo axone no taine'i uasi la susu noxi'a upala'a uae. Ia aloxo 'o la ane'i a mimaisilo mukalu, sika imatapialeli xe a imatapianu Mamilo kalumo. 25Ilixone'i ne anu muxalixu nene'axu vaikala vile ane uxolu ukaukavu no anu lavuku so lo noxi'a lexe, 'Ane'i mimatapialeli vitanisi, tava'u vile uasisi.'

26Mosou Su'uli e Ulenu so vaikala manina, anu uxolu noxou Maminge kaio une'e. Eni apalusou molu noxou Maminge so une'e noxinge. Anu une'e mo ulanu vaikala so uvalavalaxo. 27Xe ngingi la ngalanu vaikala so ngavalavalaxo kalumo xo ngingi ngexoxolu noxilo no anu soko'u xaixai noxilo mune'e avile 'o.

Currently Selected:

Tioni 15: ATA

Highlight

Copy