Tioni 14

Iesua anusisi vote'i so tamitema ilai noxou Mosinge anu Maminge

1La Iesua muvikala aloxo 'ola, “Ngingi opongengi tu'umaxu mo tangengilili uasi. Ngingi ngalopala noxou Mosinge mo ngalopala noxilo kalumo. 2No tualasou Mamilo la tanitani lailaixe tavu'alo a uxolu. La eni alai so alalaxinu taningenge. Ia loxo axone uasi, la eni alemolu vaikala ano'o noxinge uasisi. 3Eni alai so alalaxinu tualasinge, xo laso eni alivu ane'e so ano'ingela. Ano'inge so nenge'a talai taxolu tualasinge vilesisi. 4La ngingi ngelavusou vote'isou tuala e eni so alai no anu mukalu.”

5La Tomasi muvikalanu lexe, “Tatananexi, nexi talavu lexe nini nalai ne'ei ne uasi. Laso nexi talavusou vote'isou ne axova?” 6La Iesua mukolinu lexe, “Eni enisisi vote'i mo tava'u vaikala manina mo tava'u mauli. Eni enisisi vote'i so tamitema ilai noxou Mosinge anu Maminge. Vote'i vilela so ipolo no anu uasi. 7Loxo ngingi ngelavusilo laixe mukalu la ngingi ngelavusou Mamilo laixe kalumo. Io vaimomo 'o ngingi a ngelavusou mo ngemaisou mukalu 'oe.”

8La Pilipi muvikalanu lexe, “Tatananexi, nalosoiexixu Maminge, xo aloxone la anu umomomo noxixe ane, tamasaxau mi vilela uasi.” 9La Iesua mukolinu lexe, “Pilipi, eni exolu no taingengi voxo maxuveni mukalu 'oe, ia axova, nalavusilo uao? Itema aneva mumaisilo ne anu mumaisou Mamilo ane. Laso aloxova so nalinga lexe alosoiengixu Mamilo? 10Vaikalaxeli lexe eni axolu noxou Mamilo xe Mamilo uxolu noxilo 'o, nalopalanu lexe manina uasi, ne? Vaikala ane alolosinge 'o, ne eni melo a'avutinoxu uasi. Mamilo molu a uxoxolu noxilo mo u'oxonu xaixai noxou 'o. 11Ngalopalanu vaikalaxeli 'o. Eni axolu noxou Mamilo xe Mamilo uxolu noxilo. Ia loxo opongengi ulopala uao, la ngamolo tangengiou xaixai e e'oxonu mukalu, xo anene u'avutinoxu lopala noxinge. 12Eni avikalangengi manina e maninasi, itema ena'ei ulopalaleli la anu kalumo u'oxonu xaixai aloxo eni a'oxonu 'o. Ani, mo u'oxonu xaixai uua'ulixu ane noxilo 'o xo eni a so alai noxou Mamilo. 13Xe mi ma'ia ngalingau no anu ualasilo la eni a'oxonu ane. Xo axone la Maminge ualasou utila mo u'uli'uli no anu mi ma'ia Olu u'oxonu. 14Mi ma'ia ngingi ngalingau no anu ualasilo la eni axalixu ane.”

Iesua muvavalima lexe anu upalusou Ulenu Laixe une'e

15La Iesua musolonu aloxo 'ola, “Loxo ngingi ngasexelaxo la ngingi ngamulinu voto noxilo mukalusi. 16Xe eni alinga noxou Mamilo, la anu upalusou Mosou Su'uli vilela une'e noxinge, mo so anu uxolu noxinge kaluxu uasi. 17Anu ne, anu Ulenu so Vaikala manina. Ane'i tatemanu lialia 'osi, la imomomo so i'osasou mo i'unanu noxi'a uasi xo ane'i isaxisou mo ilavusou to uasi. Ia ngingi, la ngalavusou xo anu uxolu noxinge mo anu so uxolu nonano noxinge ane.

18Eni apilixingengi so ngalili vitanisi aloxo ta'oloxola uasi. Eni alivu ane'e noxingela. 19Eni axolu 'o voxo ataxu sesi kaio tatemanu lialia isaxisilola uae. Ia ngingisi a so ngasaxisilo. Xo eni so amauli laso maixene ngingi a so ngamauli kalumo. 20La no voxo anene anu upalasi noxinge lexe eni axoxolu noxou Mamilo mo anu a uxoxolu noxilo 'o. Mo ngalavu lexe ngingi ngaxoxolu noxilo mo eni axoxolu noxinge ne. 21Itema aneva u'osasou voto noxilo so umulinu, la anu anesi so usexelaxo ane. Xe anu ane usexelaxo ne, la Mamilo usexelaxusi. Xe eni kalumo esexelaxu mo apala'anixilo noxou.”

22Iesua muvikala axone la Iutasi vilemo, ane Isikalioti uasi, mutali'isou lexe, “Tatananexi, axova so nini napala'anixene noxixe 'o io noxi'a tatemanu lialia la uasio?” 23La Iesua mulivuxu lexe, “Loxo itema ane so usexelaxo manina la anu ulomuxu vaikalaxeli ane. Mo axone la Mamilo usexelaxu xe nexi noxou Mamilo tane'e noxou mo anu tasixe so tatalupexa no anu avile. 24Ia loxo itema ane so usexelaxo manina uasi la anu ulomuxu vaikalaxeli uasi ane. Vaikala ane ngalolomusou 'o anu vaikala na'a xelimo uasi, anu vaikalaou Maminge e mupalusilo ene'e 'o.

25Mimi ano'o elelemolu noxinge mi ne exolu no taingengisio. 26Ia Mosou Su'uli anu Ulenu Laixe e Maminge upalusou une'e no anu ualasilo, la anu so upelapela'ingexu mimi mukalusi mo ulivunoxu xavutalamengi no anu vaikala mukalusi e elemolu noxinge 'o.

27Eni loxo a'italongengi la apilixinu xoluxolu lalavulusi noxinge. Apilixinu la anene xoluxolu lalavulusi noxilomo, anu kaini ane loxo tatemanu lialia i'oxe ilosinge 'o uasisi. Laso ngapilixingengi so tangengi uavuavuti mo kalaua mamu. 28Ngingi ngelomusou vaikalaxeli e elemolu noxinge 'o lexe, 'Eni a so alai xo xe ukalu la alivu ane'e noxingela.' Laso loxo ngingi ngesexelaxo manina la opongengi u'osa'oasi xo eni alai noxou Mamingemo, xe Maminge ne, anu u'uli'uli noxilo. 29Mi ne uxali uao ia alemolu noxinge lumamo aloxo 'o mo so ili'i loxo uxalii la ngalopalasi.

30Eni alemolu vaikala piena noxinge la uasi xo anu ane u'uli laxunu lialia anu a unene'e 'oe. Anu xaviou so u'oxonu mi vile noxilo to uasi. 31Ia eni amasaxau lexe tatemanu lialia ilavu lexe eni asexelaxu Maminge laso voto ma'ia Maminge mupilixinu noxilo la eni amulinusi. Ioxe, laso ngatulutulu mo talaisi.”

Currently Selected:

Tioni 14: ATA

Highlight

Copy