Tioni 13

Iesua mu'uinu tava'a tatisaipeli

1Ioxe, voxo vile a uxolusi kaio lavilelu so Mualasi'a uxali. La Iesua mulavu lexe voxo so anu uxexesou lialia mo ulai noxou Maminge a muxali 'oe. Anu musexelaxa'a tanoxou ane mixolu no lialia mo musexelaxa'a axonesi mumomomo avile no anu telexu xoluxolu noxou no lialia 'o.

2No anu olovoxoe la Iesua oli'a tatisaipeli mixolu so i'ani. La no voxo ne Uluaou mu'unanu xavutalaou noxou Iutasi tanu mukalu so lexe upilixinu Iesua no avo'a tauluaou. Iutasi ne anu Saimoni Isikalioti olu. 3La Iesua mulavu lexe Maminge mupilixinu mimi mukalusi no avolu so u'uli laxunu. Mo mulavu lexe anu molu noxou Mosinge mune'e xe anu a so ulivu noxou Mosinge. 4Laso Iesua mutulu muxexesou latevolo kaio musisinu lasiotiou veveni xe muno'u taulu mo mu'utupokoxu. 5Mukalu la anu munixi'u lexa no anu lisi kaio mu'uinu tavatava'a tatisaipeli. Xe muiasoiasou no anu taulu e mu'utupokoxu.

6Mu'oxo axone xo xe muxali noxou Saimoni Pita la anu mutali'isou lexe, “Tatanaleli, axova, nini na'uinu tava'ilo io?” 7La Iesua mukolinu lexe, “Mi ane a'oxonu 'o ulamana noxine vaimomo 'o uasi, ia anu uxali lamana noxine ili'io.” 8Xe Pita la mulivuxu lexe, “Nini na'uinu tava'ilo uasi e uasisi manina.” Sila Iesua mukolinu lexe, “Loxo eni a'uinu tava'ine uasio, la naxolu vile noxi'a tanoxilola uasi.” 9La Saimoni Pita muvikalanu lexe, “Ioxe Tatanaleli, laso na'uninu tava'ilosi uasi. Na'uinu avolo mo kisilo mukalusi kalumo.” 10Ia Iesua muvikalanu lexe, “Itema loxo mu'ulo mukalui, la anu mumalemalenga avile laso ili'i la anu mi so u'uinu tava'u sesi. Mo ngingi a tamalemalenga, ia ngingi mukalusi to uasi.” 11Iesua mulavusou anu ane so upilixinu no avo'a tauluaou, laso maixene muvikala lexe ane'i mukalusi tamalemalenga to uasi.

12Iesua mu'uinu tavatava'a xo xe mukalu la muvaxanu lasiotiou veveni olele ka mutalupexa no tanixula. Kaio mutali'isi'a lexe, “Mi e e'oxonu noxinge 'o laxu mupalasi noxinge? 13Ngingi ngalavusou ngamoxo'ilo lexe Tisamengi mo Tatanangengi, la anu laixe so ngamoxo'ilo axone xo anene eni tanixo ane. 14Ioxe, loxo eni Tatanangengi mo Tisamengi a e'uinu tava'inge 'o laso ane, ngingi kalumo nga'uinu tava'inge ngato'o. 15Xo mi e e'oxonu noxinge 'o la anu so pikisa mo so ngingi kalumo ngamulinu ilixo axonesi. 16Eni avikalangengi manina e maninasi, uokuvoi tanixu uua'ulixu ane noxou tilasou uasi. Xe itema ane loxo ulai no anu xaixai vile la u'uli laxunu anu e mupalusouxu uasi. 17Ioxe, laso loxo mimi ano'o upalasi noxinge la anu laixe noxinge loxo ngamulinusi.

18Eni alemolu vaikala ano'o so singe mukalusi uasi. Eni alavusi'a ane'i ane eiloune'i lexe tanoxilo. Ia vaikala no anu lavukuou Mosinge uxalixu nene'axu xo ngiou vile uvikala lexe, 'Itema e noxou te'ani no anu ani'anixo la mu'itinu tava'u so utaxapalisilo.' 19Mi ne uxali uao ia alemolu noxinge lumamo aloxo 'o mo so ili'i loxo uxalii la ngalopala noxilo lexe eni Melo Axoxolumo. 20Eni avikalangengi manina e maninasi, loxo apalusou ena'ei so u'oxonu xaixai noxilo xe itema vile u'osa so u'unanu, la anu a u'unaleli ne. Xe loxo itema ena'ei u'unaleli la anu a u'unanu anu ane mupalusilo ene'e 'o.”

Iesua muvikala lumamo lexe evile so upilixinu no avo'a tauluaou

21Ioxe, Iesua muvikala axone mukalu la tanu muavuavuti misevile. Sila muvikala aloxo 'o, “Eni avikalangengi manina e maninasi, vile noxinge 'o upilixileli no avo'a tauluaxeli. 22Muvikala axone sika tatisaipeli ie'i mukakai'a ngato'o, mo tane'ilili manina lexe anu uvikalasou ena'eio. 23La tisiapeliou Iesua vile ane musexelaxu misevile muxolu alai se no pa'umolu. 24Laso Saimoni Pita mulosi noxou tisaipeli ne lexe ulomu noxou kaio muvikalanu lexe, “Natali'isou lexe mulemolu ena'ei.” 25Xe tisaipeli ne musae mulivu alai no pa'umolu Iesua la muvikalanu lexe, “Tatanaleli, nini nevikalasou ena'ei?” 26La Iesua mukolinu lexe, “Eni ano'u peleti matovinu 'o mo akelenixu no anu supu xe alosou itema ena'ei, la anusi e elemolu ane.” Laso anu muno'u pileti matovinu mo mukelenixu no anu supu kaio mulosou Iutasi e Saimoni Isikalioti olu.

27Ioxe, Iutasi muno'u pileti matovinu ne mukalui, sila Uluaou mu'unanu tanu noxou so upamuxanu. Laso Iesua muvikalanu Iutasi lexe, “Mi ane so na'oxonu, la napaleanusi.” 28La ane'i ane mita'olu so mi'ani no latevolo ne, vile noxi'a ulavusou tava'u vaikala e mulemolu noxou Iutasi uasi. 29Xo anu ne mosou e so usaxila'u kesisou lamolii'a laso ane'i leviani la xavutali'a lexe Iesua masi mupalusou so lexe ulotonu xa'a la'ilali so lavilelu o so ulai uiti'a ta'oloxola. 30Anu Iutasi muno'u pileti matovinu ne mukalu sila alaxu vilesisi mula. La anu a olovoxo mukalu.

Iesua mupilixinu voto alavua noxi'a tatisaipeli

31Iutasi mula mukalui la Iesua muvikala lexe, “Vaimomo 'o anu voxo so Itema ane molu noxou Mosinge uxalisou uala u'uli'uli. Xe noxou, la Mosinge ualasou u'uli'ulimo. 32Mo loxo Mosinge ualasou utila no anu mi ma'ia Itema ne u'oxonu, la anu u'itinu ualasou Itema ne kalumo no anu mi ma'ia Mosinge molu u'oxonu. La alala'e se'osi Mosinge a so u'itinu ualasou Itema ne. 33O ta'alixeli mososi, eni axolu noxinge voxo maxuvenila uae. Xo ili'i la ngingi ngakakamulileli ane. Mo aloxo elemolu noxi'a Taiuta, la alemolu noxinge kalumo aloxo 'o. Anu tanixu e so alai no anu la vote'i so ngane'e no anu uasi. 34Ano'o voto alavua so apilixinu noxinge aloxo 'o. Ngingi ngasexelangenge ngato'o. Iou vilesisi aloxo eni esexelangengi la ngingi ngasexelangenge ngato'o axone. 35Xo loxo sexelasinge ngato'o uxolu no taingengi la anene vote'i so upala'a no ie'i tamitema mukalusi lexe ngingi tatisaipelixeli.”

Iesua muvikala lumamo lexe Pita uxiunu tumalou noxou

36La Saimoni Pita mutali'isou Iesua lexe, “Xo Tatananexi, so nalai ne'eio?” Xe Iesua mulivuxu lexe, “Tanixu e so alai no anu la nini vote'i so namulileli no anu vaimomo 'o uasi. Ia ili'i laso ane, namulilelisi.” 37Ia Pita muviklanu lexe, “Tatananexi, loxova so eni amulineni alala'e se 'o ua'? Eni a elalaxi so apilixinu maulixo mole asolisine avile 'o.” 38Xe Iesua mukolinu lexe, “Nini nelalaxi so napilixinu maulixene silo, ne? Eni avikalaneni manina e maninasi, koko'a vile u'ava uao ia tei la nini nasingisilo alaxu tatalu.”

Currently Selected:

Tioni 13: ATA

Highlight

Copy