Tioni 12

Malia minixi'u ueli tuma'u lailaixe no tava'u Iesua

1Ioxe, voxo 6 a uxolusio kaio voxosou lavilelu so Mualasi'a uxali. No anu taimu anene la Iesua mulai ne Vetani. Vetani ne anu tualasou Lasalusu e Iesua mutulusou no anu soli. 2Iesua muxali mukalu la ane'i mi'oxonu ani'ani so imaxa'u osa noxi'a noxou. Ane Malita a ivevelu io Lasalusu anu vile noxi'a ane'i ane oli'a Iesua mitalupexa so i'ani no latevolo. 3La Malia mino'u ueli tuma'u lailaixe mumomomo no anu kilo pa'usou ane lamolisou tatila musuku. Ane mino'u ka minixi'u no tava'u Iesua mo milutunu no anu kisie laxusou. La tuma'u lailaixe ne mutomunu tani avile. 4Ia anu tisaipeliou vile e ualasou lexe Iutasi Isikalioti, anu ane so upilixinu Iesua no avo'a tauluaou, muvikala aloxo 'o, 5“Ai, axova so tasalimunu ueli tuma'u lailaixe 'o uasi? Xo axone la nenge masi taxalisou 300 siliva kaio taiti'a ta'oloxola. La ua.” 6Iutasi muvikala axone ia anu tanuxa'a ta'oloxola manina to uasi, anu mulemolu xo anu itema so pakalimo. Anu xaixai noxou so usaxila'u kesisou lamolii'a Iesua oli'a tatisaipeliou mo mulavusou upulumaou sevile no anu.

7Iesua mulomu axone la muvikala lexe, “Nalosie sema 'o tu'umaxu uasi. Napilixine so itetelisou mi ne umomomo no anu voxo loxo vasimelo uai no lulu. 8Xo ta'olaxola ne ane'i ngoli'a ngaxolusi ane. Laso voxo aneva ngamasaxau, la ngasu'uline'isi. Ia eni uasi, axolu maxuveni noxinge uasi.”

Tatiatila noxi'a tapilisiti milalaxi lexe ivau Lasalusu usoli

9Ane'i tamotu latala Taiuta mino'u lavulavu lexe Iesua uxoxolu no tuala ne Vetaniie, laso ane'i mine'ene'e ne. Ia so imaisou Iesuasi uasi, mine'e so lexe imaisou Lasalusu kalumo, anu e Iesua mutulusou no anu soli. 10Laso ane'i tatiatila noxi'a tapilisiti mipita so ilalaxinu vote'i so ivau Lasalusu usoli. 11Opone'i axone xo mimaisou lexe Taiuta tavu'alo a ixexesi'a ilai ilopala noxou Iesua xo no anu mi e muxalixu noxou Lasalususi.

Iesua mu'unalai ne Ielusalemo la tamitema mi'itinu ualasou a loxo kingi 'o

12Ioxe, no voxo loxo ne'ielae la tamotu latala e mine'e ne Ielusalemo so isosovosou lavilelu so Mualasi'a la milomu lexe Iesua a so une'e ne. 13Laso ane'i mixotosou pamu teti avo'avolu ka milai miaalaxu no vote'i. La misoko'u so i'ava'ava lexe, “Oponenge u'osasou Mosinge misevile mo ta'itinu ualasou. Tatananenge u'oxonu laixe noxou Itema anu molu mupalusou. Anu e kingi so xale lia Isilaeli.”

14La Iesua muxalisou toniki maulu vile ka mutalupexa no anu. La anene mumulinu vaikala vile ane uxolu no anu lavukuou Mosinge aloxo 'o, 15“Ngingi tatemanu tauni Saioni nga'ume uasi. Xo ngamalei, kingimengi a une'e 'oe. Anu a utalupexa no anu toniki maulu vile so une'e.” 16Tei la laxu mi ne upalasi noxi'a tatisaipeliou uasi ia ili'i loxo Mosinge mutulusou Iesua no anu tanixu mu'uli'ulii, laso ane. Ane'i tane'i mulivuou vaikalai'a tapolopeti tatei ane muxolu no anu Mosinge vaikalaou e so milemolu mimi ane tamitema mi'oxo noxou Iesua ne.

17La ane'i tamotu latala ane mixolu loxo Iesua mu'avalou Lasalusu uuatu no anu lulu, la mixolu kalumo no voxo ano'o mo a mia'aloxu mi e mu'oxonu ne. 18A'alosou sosovo so xavi ne muxali noxi'a tamotu latala e mixolu ne Ielusalemo laso maixene mine'e so ialaxu Iesua no vote'i. 19Xe Tapalisi mimalei axone la me'a mivikalane'i ngato'o lexe, “Uo ngamalei, nenge tapunenge 'oe, xo ane'i tatemanu lialia mukalusi a imulinusi.”

Tamitema Takiliki se'i mimasaxau ixali noxou Iesua

20Ioxe, tamitema Takiliki se'i a mixolu no taine'i tamotu e mitetelai ne Ielusalemo so i'itinu Mosinge ualasou no anu lavilelu so Mualasi'a ne. 21La ane'i Takiliki ne mine'e noxou Pilipi. Anu Pilipi ne so tuala Vetisaita e uxolu no xale lia ne Xalili. Mine'e noxou la mivikalanu lexe, “Tatilao, nexi tamasaxau talai taxali noxou Iesua.” 22Laso Pilipi mulai muvikalanu Anitilu kaio ilou mikei milai milemolu noxou Iesua. 23La Iesua mukoline'i ilou lexe, “Voxo so Itema ane molu noxou Mosinge utulu no anu tanixu u'uli'uli a muxali 'oe. 24Eni avikalangengi manina e maninasi. Loxo uiti ngiaxu vile uxolu vitanisi, ulapau uasi so u'una no lia mo usoli, la anu anusisi uxolu ane. Ia loxo usoli la anu uxalixu nene'axu tavu'alo ane. 25Loxo itema ena'ei u'osasou mauli noxou so utetelisousi, la maulixu ne usu'a vitanisi. Ia loxo itema ena'ei umatapianu mauli noxou so lialia 'o, la anu utetelisou ulai xo mole kaluxusou uasisi. 26Loxo itema ena'ei so u'oxonu xaixai noxilo la anu masi umulilelisi, mo so loxo eni axolu ne'ei la itema so xaixai noxilo ne uxolu kalumo. Mo loxo itema so u'oxonu xaixai noxilo la Maminge u'itinu itema ne ualasouxu.”

Iesua mulemolu soli noxou

27Ioxe, Iesua muvikala aloxo 'ola, “Eni a taleli uauavuti 'oe, ia eni masi alemolu axovae? Eni avikalanu Mamilo lexe u'umeleli no anu tu'umaxu e so uxalisilo 'o? Uasi manina, xo no anu mi anenesi a ene'e 'o. 28O Papa, na'itinu ualasine so u'uli'ulisi.” Muvikala axone mukalu sila xoli vile molu no tualasou Mosinge mulu'e lexe, “A eni e'itinu ualasilo u'uli'uli mukalu mo a'itinu axonesila.” 29La tamotu latala e mitulutulu alai ne milomusou xoli axone io se'i mivikala lexe lele'e mupau xe leviani lexe angelo vile a masi muvikala noxou ne.

30Xe Iesua muvikalane'i lexe, “Xoli e ngelomusou 'o anu so su'ulisilo uasi, anu so su'ulisinge ane. 31Anu voxo a muxali 'oe so Mosinge upilixinu vaikala so mamulusou susu noxi'a tatemanu lialia. Mo kalumo anu a voxo so anu ukusaou ane ane mu'uli laxunu lialia 'oe. 32Xe eni 'o, loxo i'itileli kaio axolu teitexi no lialia latanu, la anu so alapune'i tamitema mukalusi ine'ene'e noxilo.” 33Iesua muvikala axone so umaxa'u lexe usoli no anu vote'i axova. 34La tamitema latala ne milivuxu lexe, “No anu lavuku so lo la upela'ixe lexe anu ane so Kalaisiti loxo uxali la uxolu kaluxu uasi. Laso axova so nevikala lexe tamitema i'itinu Itema ane molu noxou Mosinge ulili teitexi? Mo Itema ane molu noxou Mosinge ne, a ena'ei manina?”

35La Iesua muvikalane'i lexe, “Lamana a uxoxolu no taingengi ia voxosou maxuvenila uae. Laso loxo lamana ne uxolu noxingesio la ngamuamua'i ngavaxasi mo so isivoxo usu'asinge uasi. Loxo itema ena'ei umuamua'i no isivoxo la ulavu lexe anu a ulalai ne'ei ne uasi. 36Vaimomo 'o lamana a uxolu noxingesio laso ngalopala no anu lamana nesi, mo so axone la ngingi ngaxali tamitema so lamanasi.

Tavu'alo noxi'a Taiuta ilopala noxou Iesua uasi

Iesua mulemolu mimi ne xo xe mukalui la anu muxexesi'a mo mu'umenu vasimolu mole voxo mose'i la uxolu no ie'i tamitema latala uasi. 37Anu a mu'oxonu sosovo so xavi tavu'alo no ie'i ia ane'i ilolopala noxou uasi. 38Anu muxali axone mo so vaikalaou polopeti Aisaia uxalixu nene'axu. Xo mulemolu tatei lexe, “Tatananexi, ane'i ta'ei milopalanu a'alo e telanu lexe manina? Mo ane'i ta'ei mimaisou xaixai xavinu noxou Tatananexi aloxo mu'oxonu 'o?”

39Ano'o tava'u so imomomo so ilopala noxou Iesua uasi. Aloxo Aisaia mulemolu no anu ngiou vile lexe, 40“Mosinge mutomunu ie'i mo mu'oxonu opone'i pakia'u. Mo so isaxisaxi no anu ie'ila uasi mo mi vile upalasi no opone'ila uasi. Xo loxo mulemolu, 'Ane'i ixiunu opone'i ine'e noxilo so apaipoune'i to uasi.'” 41Aisaia mulanu vaikala anene xo musaxi mu'uli no anu xoluxolu lailaixe mo xaviou Iesua ka muvikalasou.

42Ia manina, tavu'alo noxi'a tatiatilasi'a Taiuta kalumo milopalanu Iesua ia mi'ume'a Tapalisi xo loxo 'o io ikusasai'a so i'una no anu tasou lavulotola uasi. Laso ipala'anixu lexe milopalanu axone uasi. 43Xo mi ane opone'i mu'oxoxu a so tamitema i'osasi'asi, ia ane so Mosinge oponu u'osasi'a la ixavutalanu malaxo uasi.

Vaikalaou Iesua e mulanu la upala'anixu ilixone'i tamitema

44Ioxe, Iesua mulanu vaikala no anu xoli tatila aloxo 'o, “Ena'ei ane ulopala noxilo la no anene ulopalalelisi uasi, anu ulopala noxou anu ane mupalusilo ene'e 'o ane. 45Xe itema ane usaxisilo 'o, la anu a musaxisou anu ane mupalusilo ane. 46Eni ene'e no lialia 'o xo eni a so lamanasi'a tatemanu. Mo so ta'ei mukalusi ilopala noxilo la ixolu no isivoxola uasi. 47Loxo itema vile ulomusou vaikalaxeli ia umulinu uasi la eni alemolu mamulosou uasi. Xo eni ene'e no lialia so alemolu mamulosi'a tatemanu uasi, ene'e so apamauline'isi. 48Ia itema ane uxiunu tumalouilo mo uxililiou vaikalaxeli, la mi vile uxolu so upala'anixu lexe ilixou ne lakolisou a mamulosi. Mi ne a vaikalaxeli a alalanu 'o. Xo no anu voxo kaluxusou la anenesi ulemolu mamulosou ane. 49Xo eni alanu vaikala ane eni melo e'avutinoxu uasi. Anu Maminge e mupalusilo, anu molu muvotoleli lexe alanu vaikala axova mo alemolu mi ma'ia. 50Mo eni elavu lexe mi ma'ia uvotosou la uxalixu nene'axu a mauli kaluxu uasi. Laso maixene vaikala mukalusi alalanu la alemolu u'isalili loxo Maminge mupela'iloxu.”

Currently Selected:

Tioni 12: ATA

Highlight

Copy