Tioni 11

1 Ioxe, itema vile so tuala ne Vetani ualasou lexe Lasalusu anu mupipiena. Tavimou tasema ane Malia olie Malita mixoxolu no tuala ne kalumo. 2Lasalusu ane mupipiena ne, vimou Malia ane sema e minixi'u ueli tuma'u laixe no tava'u Tatananenge mo milutunu no kisie laxusou. 3Mupipiena laso tavimou tamei ne mikalanu vaikala mulai noxou Iesua lexe, “Tatananexi nalomu, itema e nasexelaxu a upipiena.” 4Xe Iesua mulomusou vaikala anene la muvikala aloxo 'o, “Pipiena anene so nene'axu soli uasi. Anene nene'axu so tamitema i'itinu ualasou Mosinge xo loxo imaisou lexe Mosinge Olu u'oxo axova, la ane'i i'itunu ualasouxu.”

5Ioxe, Iesua musexelaxa'a Lasalusu oli'a tavimou Malita xe Malia. 6La a'alosou Lasalusu lexe mupipiena muxali noxou ia anu upalea ulai noxi'a uasi, muxolu voxo tameila no apu loxo muxolu no anu ne. 7Voxo tamei mupolo mukalui la anu muvikalane'i tatisaipeliou lexe, “Nenge'a talivu talai ne Iutea.” 8La tatisaipeli milivuxu lexe, “Uo Tisao, mala'o se'osi Taiuta ne Iutea ne mikamulinu vote'i so ileaxene no lavolavo'o so ivene nasoli. Ia nini na'oxo lexe nalivu nalaila?” 9Xe anu mukoline'i aloxo 'o, “No anu voxo utotomu la aso iou 12 a uxolu. Laso loxo itema umuamua'i no aso axone la utulaki ulapau uasi xo usaxi no anu lamanasou lialia 'o. 10Ia loxo itema umuamua'i no olovoxo la anu utulaki ulapausi xo noxou la lamana uxolu so umalei uasi.”

11Iesua muvikala axone mukalu xe ili'i la muvikalane'i tatisaipeliou aloxo 'ola, “Malamenge Lasalusu a muai mukalu, ia eni alai so atulusou no anu ai noxou ne.” 12Xe ane'i milomusou la mivikalanu lexe, “Tatananexi, anu laixe loxo uai axone mo so laixenula.” 13Iesua mulemolu ai so utotokalasou soli noxou Lasalusu ia ane'i tatisaipeli mikalavoi lexe anu mulemolu ai maninasousi ane. 14Mukalu laso Iesua muvikalane'i lamana lexe, “Lasalusu a musoli mukalu. 15Ia xo noxingesi, la a'osa so axolu noxou loxo musoli uasi xo aloxo 'o la vote'i so ngalopala uxalisi. Laso nenge talutu talai noxou.” 16La Tomasi e ualasou vilela lexe Titimusi anu muvikalane'i tamenexu tatisaipeli lexe, “Ioxe, nenge talai mo so loxo Tatananenge usoli la nenge'a kalumo.”

Iesua muvikala lexe tava'u so tamitema itulu no anu soli mo imauli, a noxousi

17Ioxe, Iesua oli'a tatisaipeliou milutu xo xe mixali no tualasou Lasalusu. Mixali la Iesua mulomu lexe Lasalusu muai no lulu e no maia taxanu voxoxu tami'a mukalu. 18Tualasou Lasalusu e Vetani ne uxolu nopaxa ne Ielusalemo uasi, kilomitasou loxo tatalusi. 19Laso tamitema Taiuta tavu'alo mine'ene'e noxi'a Malita olie Malia so imamatolane'i no anu soli noxou vimo'a.

20Ioxe, Malita milomu lexe Iesua a unene'e laso ane mi'italone Malia no tani io ane miuatu so i'alaxu. 21Milai xe mixalisou la mivikalanu lexe, “O Tatanaleli, loxo nini nexolu lai 'osi la vivilo usoli uasi. 22La uasi, anu musoli mukalu, ia eni alavu lexe alala'e 'osi Mosinge ulosine mi ma'ia loxo nalingau.” 23La Iesua mukoline lexe, “Vivine ne utulu umaulila ane.” 24La Malita mivikala lexe, “Eni alavu lexe anu utulu umauli no anu voxo kaluxusou olele loxo tamitema mukalusi itulutulu no anu soli.”

25La Iesua muvikalane aloxo 'o, “Enisisi atulusi'a tamitema no anu soli mo enisisi a tava'u mauli. Itema aneva ulopala noxilo xe loxo usoli la anu umaulisi ane. 26Xe tamitema mukalusi ane imamauli mo ilopala noxilo la ixalisou soli uasi. Nini oponeni ulopalanu vaikala ano'o lexe manina?” 27Sila Malita mikolinu lexe, “Ani Tatanaleli, eni opoleli mulopala lexe nini ane so Kalaisiti ane. Mo elavu lexe nini Mosinge Olu e nene'e no lialia 'o.”

Iesua mutatamasou soli noxou Lasalusu

28Ioxe mivikala axone mukalu la milivu mi'avalie vimoe Malia. La mivikala se'isisi noxiesi lexe, “Tisamenge muxali mo anu a u'avaline lexe nalai noxou.” 29Malia milomu axone sila mi'avuti palea so milai noxou Iesua. 30Milai la anu uxali no tuala uao, anu a uxoxolu no tanixu e Malita mixalisou no vote'isio. 31Malia milutu paleasi la Taiuta ane mixolu no tani so imamatolane mimiasie axone laso mimuline. Mimuline xo mikalavoi lexe ilai no lulusou vimoe so itamasou.

32Xe Malia milai mixali no apu e Iesua muxoxolu no anusio. Mixali ne xe mimaisou la ane milalusi no tava'u mo mivikalanu lexe, “O Tatanaleli, loxo nini nexolu lai 'osi la vivilo usoli uasi.” 33Xe Iesua mumaisie Malia itatama xe mumaisi'a Taiuta e oli'a Malia mine'e ne a itatama kalumo. Mumuaisi'a axone la anu oponu tu'umaxu mo muamuavuti misevile. 34La anu mutali'isi'a lexe, “Ngingi ngemulaxu vasimolu a ne'ei?” La ane'i mivikalanu lexe, “Tatananexi, nane'e mo namalei.” 35La Iesua mutatamasi. 36Ane'i Taiuta mimaisou la mi'oxo lexe, “Ngamaisou, anu musexelaxu misevile.” 37Ia ane'i se'i mimunumuxu lexe, “Itema ano'o mupaipounu tamitema ane ie'i selevenu so muka. Ia axova, xo loxo muxolu no voxo loxo Lasalusu so usoli la anu masi umomomo so upaipounu kalumo to ane. La ua'.”

Iesua mutulusou Lasalusu mumaulila

38Ioxe, Iesua oponu tu'umaxu misevilela la mulai muxali no lulu. Lulu ne anu maia taxanu no alaele tava'u. Anu lavo'o toxoxu mutulu no anaxu so mitaulovonu no anu. 39Muxali no lulu mukalu la anu muvikala lexe, “Ngaxexenu lavo'o no taxa.” La Malita e itema musoli vimou ne mi'oxo lexe, “Tatananexi, anu muai ne voxosou tami'a mukalu. Loxo taxexenu lavo'o la tuma'u masua.” 40La Iesua mukoline aloxo 'o, “Eni evikalaneni mukalu lexe loxo nini nalopala la namaisou xavi noxou Mosinge mo so na'itinu ualasouxu.”

41Ioxe, laso ane'i mixexenu lavo'o. Mukalu la Iesua mutala mutelai la muvikala lexe, “Mamilo, eni avikala laixe noxine xo nini nalolomuxu linga noxilo. 42Eni elavu lexe utotomu nini nalomuxu linga noxilo. Ia vaimomo 'o alemolu aloxo 'o xo axavutala noxi'a tamitema ane'i ixoxolu 'o. Mo so ilavu lexe nini mene nepalusilo ene'e 'o.” 43Muvikala axone mukalu la mu'ava tatila lexe, “Lasalusuo, nauatu.” 44Sila Lasalusu muuatu. La tava'u mo avolu mo vasivasimolu ne lavalava e miisisinu no anu a uxoxolusio. Mo lavalava vile musu'asou alaiou. La Iesua muvikalane'i tamitema lexe “Ngalulusou lavalava no vasimolu ne mo so umuamua'isi.”

Tatiatila noxi'a Taiuta misakinu vaikala lexe ivau Iesua usoli

45Xe tapiena noxi'a Taiuta e mine'e noxie Malia ne loxo mimaisou mi ane Iesua mu'oxonu ne la milopala noxousi. 46Ia se'i noxi'a milutu milai noxi'a Tapalisi mo mia'aloi'a no anu mi e Iesua mu'oxonu ne. 47Mia'aloi'a laso tatiatila noxi'a tapilisiti oli'a Tapalisi mikalakalanu vaikala lexe ane'i mukalusi ipita. Mipita mukalu la mivikalane'i ngato'o lexe, “Nenge a ta'oxo ma'ie? Itema anene u'oxo sosovo so xavi tapiena toe. 48Loxo nenge ta'italonu mo u'oxo aloxo 'osi la ane'i tamitema latala masi ilopalanusi. Mo loxo 'o io Talomu imamulonu tasou Mosinge na'a nenge oli'a tatemanu xale lia noxinge.”

49Ia vile no taine'i ualasou lexe Kaiavasi, anu e tila noxi'a tapilisiti so tau ie anene, mu'avuti muvikalane'i lexe, “Ngingi lavulavu to uasisi. 50Ngingi opongengi utaxunu vote'isinge laixe uasi. Xo anu laixe so itema vile usoli si'a tamitema latala. Mo so axone la tatemanu xale lia mukalusi imamulo uasi.”

51Ioxe, vaikalaou Kaiavasi ne u'avuti noxoumo kaio mulemolu ne uasi. Ia xo anu muxolu tila noxi'a tapilisiti no anu tua ie anene laso vaikala so pela'a mula no anaxu. Xo mulemolu mi e so uxali noxou Iesua ili'i loxo musolisi'a tatemanu xale lia ne. 52La usolisi'a laili Taiutasi uasi, musoli kalumo so upitane'i Mosinge ta'olu ane ixolu ipaxepaxele nopaxapaxa ixali laili vilesisi.

53La musoko'u no voxo anene la ane'i tatiatila mipitanu xavutali'a mo milalaxinu vote'i so lexe ivau Iesua usoli. 54Laso Iesua uxixao no taine'i Taiuta no tani keakeala uasi. Anu muxexesou apu ne mo mulai muxolu alai no xale lia esi'esi no anu taoni e ualasou lexe Epelaimu. La anu oli'a tatisaipeli mixoxolu ne.

55Ioxe, lavilelu noxi'a Taiuta e so Mualasi'a mune'e alai. Laso ane'i tatemanu tuatuala milutulutu mitelai ne Ielusalemo mo i'oxonu ilixo so malemalenga tei no anu lavilelu so Mualasi'a. 56La tamitema latala ie'i mukakamulinu Iesua mo mitutulu no tasou Mosinge ka mivikalane'i ngato'o lexe, “Ngexavutala axova, anu masi une'e no anu voxo so lavilelu 'o uasi, ne?” 57La ane'i tatiatila noxi'a tapilisiti oli'a Tapilisiti mimulaxu vaikala pakia'u noxi'a tamitema latala aloxo 'o. Loxo vile ulavu lexe Iesua a uxolu ne'ei la upala'anixu noxi'a mo so ane'i itetelisou.

Currently Selected:

Tioni 11: ATA

Highlight

Copy