Tioni 10

Iesua anu itema so usaxila'a tasipisipiou laixe

1Xe Iesua musolonu mu'oxonu latilovo aloxo 'ola, “Avikalangengi manina e maninasi. Itema loxo u'una u'isalili no anu aitengaxu vimelusi'a tasipisipi uasi ia uili'esou vimelu u'una no anu vote'i vile, la anu itema so pakali mo anu lasikelisi ane. 2Io itema ane ulavusou u'una no aitenga ulovosi la anu itema so usaxila'a tasipisipi. 3Xe anu ane so ulosou aitengaxu vimelu la ukisinu noxou ne. Mo loxo umoxo'u ualaualasi'a tasipisipioumo la ane'i ilomuxu kaio imulinu ilai xo itongonu xolinu u'isalili. 4Laso loxo anu ulane'i tasipisipioumo ne la anu u'uli laxune'i ulai sila ane'i imulinu xo ane'i itongonu xolinu. 5Ia loxo itema vilemo u'avali'a la tasipisipi imulinu uasisi, ane'i i'umolu ane, xo itongonu xoline'i tamitema leviani to uasi.” 6Iesua mupilixinu latilovo anene noxi'a ia ane'i ilavusou laxu vaikalaou e ulemolu noxi'a ne uasi.

7 Ioxe, Iesua muvikalane'i aloxo 'ola, “Eni avikalangengi manina e maninasi. Aitengasi'a tasipisipi a eni 'osi. 8Ane'i tamitema mukalusi ane mine'e mi'uli noxilo ane'i tamitema so pakali mo ane'i talasikelisi, ia tasipisipi ilomuxa'a uasi. 9Eni enisisi a aitenga. Loxo itema ena'ei upolo noxilo so u'una la uxalisou pamauli. Laso axone la u'una xe ula mo uxalisou ani'ani lailaixe.

10Itema so pakali ne une'e so upakalisi xe so uxalixu soli ilou mamulosi. Ia eni 'o la ene'e so tasipisipi ixalisou mauli. Ia mauli vitanisi uasi, ixalisou mauli ane nene'axu mulolutusi. 11Itema so usaxila'a tasipisipi laixe a enisisi 'osi. La itema so usaxila'a tasipisipi laixe u'oxonu aloxo 'o, anu upilixinu maulixu so si'a tasipisipi. 12Ia itema loxo ilotonusi no anu xaixai anene la u'oxo axone uasi. Anu itema so usaxila'a tasipisipi manina uasi xe anu tatanane'i tasipisipi uasi laso loxo umaisou a'a vova une'e la u'italone'i tasipisipi mo u'umesi. Io a'a vova utokitokine'i mo upaxelelene'i tasipisipi. 13Itema loxo uxaxaisou lamoli axone la u'umesi xo anu tanuxa'a tasipisipi uasi.

14Enisisi amitema ane so asaxila'a tasipisipi laixe. Eni alavusi'a tanoxilo mo tanoxilo ne ilavusilo. 15Anu iou vilesisi aloxo Mamilo ulavusilo 'o mo eni alavusou Mamilo. La eni a'italonu maulixo so si'a tasipisipi. 16Mo eni tasipisipixeli se'ila, ane'i ne no anu vimelu ano'o uasi. Eni ane'ene'i tasipisipi anene kalumo xo loxo a'avali'a la ane'i ilomuxu xolileli so i'una ipita ixali tasipisipi laili vilesisi ane tatanane'i vilesisi. 17Mamilo usexelaxo misevile xo eni melo a'italonu maulixo kaio ano'u atulu no anula. 18Maulixo 'o evile so u'umenu noxilo uasisi io eni melo a'avuti a'italonu no anu masaxa na'a xelimo. Eni xavi uxolu noxilo so a'italonu maulixo mo xavi uxolu noxilo so ano'u atulu no anula. Voto so mi ne eni eno'u noxou Mamilo.”

19Ane'i Taiuta milomusou vaikalaou ne la mikalipala mixali loxo laili tameila. 20Xo tavu'alo noxi'a mi'oxo lexe, “Angelo masua uxolu noxou mo xavutalaou muxovulaulau ane. Xo ma'ia ngalolomu noxou?” 21Xe leviani mi'oxo lexe, Uasi to! Loxo angelo masua uxolu noxou itema vile la umomomo so ulanu vaikala aloxo 'o uasisi. Xe angelo masua upaipounu tamitema ie'i mutomu aloxo anu u'oxonu 'o uasisi.”

Ane'i Taiuta leviani mixililiou Iesua

22Ioxe, no taimu anenesi la voxo so lavilelu vile a muxali ne Ielusalemo. Lavilelu ne so xavutali'a ulivuou voxo tatei ane misosovosou tasou Mosinge lexe noxou mu'isalilimo. La anu muxali no anu tau lelemesou. 23Xe voxo vile la Iesua muxolu nonano no vimelusou tasou Mosinge mo a umaumua'i no anu lavalata ilemolu lexe noxou Solomoni. 24La Taiuta mose'i mine'e mitulu mixixaosou mo mitali'isou lexe, “Nexi a tanexililine 'o, talu laso napala'anixene noxixe. Loxo nini ane so Kalaisiti la napalasinoxu avile noxixe.”

25La Iesua mukoline'i lexe, “A elemolu noxinge mukalu ia ngalopala to uasi. Xaixai ane alavusou a'oxonu no anu ualasou Mamilo, anenesi uvalaxo lexe eni ena'ei 'o. 26Ia ngingi so laili tasipisipixeli uasi laso maixene ngingi ngalopala uasi ne. 27Xo ane'i tasipisipi ane tanoxilo la ilomuxu xolileli mo eni alavusi'a xe ane'i ilavusou imulilelisi. 28La eni alosi'a mauli kaluxu uasi mo ane'i imamulo uasisi xe evile utokine'i ixexe no avolo uasisi. 29Xo Mamilo e mupilixine'i lexe ane'i tanoxilo, anu xavinu u'uli'uli avile laso evile umomomo so utokine'i ane'i tanoxilo ne no avolu Maminge uasisi. 30La nexi noxou Maminge a vilesisi.”

31Xe ane'i Taiuta milomusou vaikalaou ne sila mino'u lavolavo'ola so lexe ileaxu mo ivau usoli no anu. 32La Iesua muvikalane'i lexe, “Maminge mulosilo xaixai lailaixe tavu'alo so a'oxonu la exalixu no iengi. La no anu xaixai ne aneva ngingi a so ngaveloxu no lavolavo'o 'o?” 33La ane'i Taiuta milivuxu lexe, “Nexi tavene no lavolavo'o xo no anu xaxai laixe vile e ne'oxonu uasi. Tavene xo navila'isou ualasou Mosinge mo xo nini namitema vitanisi ia ne'oxo lexe nini Mosingemo.”

34Ioxe, Iesua muvikalane'i aloxo 'o, “No anu lavuku so lo noxinge la vaikalaou Mosinge mukaukavu no anu aloxo 'o, “Eni evikala lexe ngingi vilevilesi a ngatulu Mosinge no ie'i tamitema.” 35Tatei la Mosinge mulanu vaikala axo'o noxi'a mo mumoxo'a lexe ane'i itulu Mosinge no ie'i tamitema. Mulemolu axone mo nenge telavu lexe vaikala no anu lavukuou Mosinge uxolu axonesi, ulapua vitanisi uasi. 36Ia eni 'o, la Maminge molu mukalipalaleli no anu xaixai e mupalusiloxu ene'e no lialia 'o. Laso loxo eni avikala lexe eni Mosinge Olu a, la axova so nga'oxo lexe eni avila'isou Mosinge ualasou? 37Loxo eni a'oxonu xaixai noxou Mamilo uasi, ioxe laso ngalopalaleli uasi. 38Io loxo a'oxonu xaixai noxou xe ngalopalaleli uasisio la ngingi masi ngalopala no anu xaixai a'oxonu nesi. Mo so axone la ngingi ngalavu mo upalasi avile no opongengi lexe Maminge a uxolu noxilo xe eni a axoxolu noxou.” 39La ane'i opone'i mu'avutila lexe itetelisou ia anu muxexesi'a mulaisi xo vote'i so ikasou uasi.

40Ioxe, laso Iesua mulivu mulai xalevile no lexa Tiotani la muxoxolu no anu tanixu e Tioni musoko'u tei so mu'oxonu ilixo so kelele noxi'a tamitema. 41Iesua muxoxolu ne la tamitema tavu'alo mine'ene'e noxou mo mivikalane'i ngato'o lexe, “Tioni u'oxonu sosovo so xavi so uvalaxu vaikalaou uasi, ia mimi mukalusi e mulemolu sou itema ano'o ne anu maninasi.” 42La tavu'alo noxi'a e mine'ene'e ne milopala noxou Iesua.

Currently Selected:

Tioni 10: ATA

Highlight

Copy