Sabiduría 5
5
1Imani jurhiatekua
kaxumpiti no kuarhatseati
nósani chérheaparini
imechani enkaksï xáni nósesi kámaka
2Enkaksï exeka
kánekuaksï chérakorhesti
jimpokaksï uantasïrenka
eska no úpirinka uérakuni.
3Ka p'amondakorheparinksï,
uéparini ka kánekua p'amerapariniksï uantaati:
4Imesti enkachi ióntki teresmarhupka,
ima enkachi k'amarhentaka arhinhchani.
¡Xáni enkachi nósani eratsentaka!
Uantasïrempkachi
eska ima ísku nemeska
ka eska imeri uarhikua
nómpema jukaparhaspka.
5¡Ka iásï ima Diósï uáp'a arhinhastia
ka ima jamperi intsïnhaati ima ampe
enka imeri ireta kaxumpiti jurak'umenhaka!
6¡Na enkachi xáni tsînchetini jámani jápka
Kánekuachi no jurhimpekuarhu jámaxapka!
¡Kaxumpekuats'ïni nómeni janochesti,
ka tata jurhiatats'ïni no erantutasti!
7Ískuchi jámaska
nósesi jásï xanharichi jataska
imani xanharichi jataska enka tsîtpek'a
ka ACHAeri xanharichi
nómeni xéntaska.
8¿Ampechi antaskia k'éramakorheni?
¿Ampechi antaskia jatsikorhekua xarhatani?
9Iámentu ima ampe
tsánteni nitamamasti,
mák'ueni eska uantakuecha
enka tarhiata pák'a,
10enka ísï pák'a eska tepari
enka k'éri japuntani parhimek'a
ka enka nómpema xarhameni pakarak'a,
11Eska na nómpema xarharak'a
jimesï enka kuíni ma kárak'a
imeri p'araskua jimpo
tarhiatani mítapasïnti,
jamperi p'arari ástantasïnti
ka nómpema xarharani pakarasïnti
jimesï enka ísï nitamak'a.
12Méntkueni eska k'uimpimpeta
enka k'uaniranhak'a
tarhiatani mítapasïnti
ka tarhiata ménteru kúnkorhentapasïnti
ka jimesï nómpema xarharamani
enka ísï k'uimpimpeta nitamak'a.
13Juchachi méntkueniska,
nótkichi jamperi antap'enuni jarhasïnka
enkachi t'uíni uarhik'ia,
nómpemachi pakatasïnka
enkachi jimpo míanhani pakaranhaaka,
jimpokachi sánteru arhisïnka
nósesi ampe niátani.
14Nósesi ampe niátatiri mintsikua
ísïsti eska arho
enka tarhiata ísku kátatak'a,
eska k'uruata
enka nósani k'uetsapek'a
ka enka iurhekua pámak'a
ísï eska tarhiata na pák'a sïraatani
ka xántku ísï míanhani pakaranhasïnti
eska ima nema
enka ma chúrik'u k'u'ik'orhek'a.
Kaxumpiticheri irekua nómeni k'amakurhisïnti
15Kaxumpitichaksï méntkisï irekasïnti
ACHA maiamuasïnti imechani
Auantarhu anapu erankuani jarhasïnti
16Jimposï ACHA íntsauati
k'éri ma juramukua
ka sési jásï ma kanakua
ima kuách'akuani jauati
imeri ják'i jimpo kuách'akuauati
ka imeri uinhapxurhakua jimpo kuáp'eauati.
17Imeri ikiatani ísï jukantaati
eska tiámueri ampe jukarhekorhentani
ka iámentu imeri kueraakatecha jinkuni
maiampetarauati imeri ikiatspirichani,
18ka arhinharhikpeni ísï jámaati
eska iámu jukarhekorhetini jarhani
ka jurhimpitku uantantsku jukantsïati,
19ka imeri pímpinhaxekuarhu
nómpema úati inchakuni,
20ka imeri ikiatani
tiámu atap'etarakueni ampamukuntaati
ka iámu auanta ima jinkuni uarhipeati
ka márkuksï uarhipeati
no míakua jukarichani jinkuni.
21Janiati ka k'érati piritaati
ka jurhirakuatiksï
eska pitoki sési úkata ma
ka jurhimpitkuksï p'itaraati,
22ka xanuata ikiatintku uekorheati
eska ampe tsakapu uekorheni jarhani.
K'éri japunteri jenkuerakuechaksï
k'érati tarharaati imechani uékani umirhukuani
ka iurhekuechaksï
no p'amok'uauati ka iurhemauatiksï,
23k'éri ma tarhiauati
ka tarhanhatauati
eska akuitse janikua.
Ka ísï jámani ísku jánkua
ma parhakpeni nóteru nema irekaati
ka ísku jánhchakua uekopaati
k'ératicheri juramukua.
Currently Selected:
Sabiduría 5: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.