Sabiduría 4
4
1Sánteru sésisti kaxumpeni
na uék'i no kánkorheani sapichani
jimpoka kaxumpekua míamenhani
nómeni mirikurhinhasïnka,
Diósï ka k'uiripu míani pakarasïnti.
2Enka exenhani jarhak'a
méntkueni uékasïnti jánhani
ka enka no exenhani jauaka
jirinhanhantani janhasïnti,
iápuru jámasïnti uantantani eska antaska
jimpoka antarini jarhasïnkia,
ka jimpoka sési jimpo antasïnka.
3Nóksï méni úati sési jarhani
nósesi ampe niátaticha
na uék'iksï xáni uáneka
ísku jánti uáp'echaksï ísïsti
eska anhatapu ma
enkaksï sïrankua no iauani p'ák'a
ka enkaksï nósani uinhapek'a.
4Na uék'iksï sónti xunhupxkurhini
tarhiata ísku kuáskuauati
jimpokaksï no uinhapeska
ka akuitse janikua murupatauati.
5Sóntkuksï kuarhantiati
nótki jamperi niáraati jurhia
ka t'uíniksï kuarhantiati
nómpema marhuauati
ima ampe enka jima jukarhukurhaaka,
nónema úati arhani
jimpoka no úaka ninini.
6Ima sapicha jimpoksï arhinharhikunhaati
ne enkaksï ísku jántiparini
sapichani kánkorheauaka
imani jurhia
enka Diósï arhianharhikuauaka.
Kaxumpitiri sóntku uarhikua
7Na uék'i kaxumpiti sóntku uarhini
sési mintsikorheati,
8nóksï iámentu k'ératicha janhanharhikatesïnti
na uék'iksï xáni ióni irekani
no ióni irekua jimpoksïsï
k'ératicha janhanharhinhateti.
9Kaxumpekua méntkuenisti
eska míakua jukarini,
ne enka nómpema arhikua jukaaka
ima míakua jukaristia.
10Kaxumpiti Diósïni sési p'ikuastasti,
ka Diósï kaxumpitini xénhchasti
k'amanharhintsticha jinkuni irekaxapti
ka Diósï pántasti.
11Pántasti jimpoka no uékaska
eska nósesi jásï
ikichakua ampe eratsetarapirinka,
no uékasti eska chkuántirani jurhenkorhepirinka,
12jimpoka no míamanhasïnka
ka nósesi jásï ampe únhchakua
kaxumpekuani ópchakurasïnti
ka ísku jánhchakua
kaxumpitiri espirituni
sóntku nósesi pásïnti.
13Ima no ióntasti kaxumpent'ani,
enka máru uánekua uéxurhinicha jimpo
kaxumpenhantak'a.
14Diósï kaxumpitiri álmani xénhchasïrempti,
jimposï Diósï
no ióntati kéntitani jima
enka nósesi ampe únhani jaka.
K'uiripu íni ampe exerini
no úsïnti kurhankuni,
no jánhaskanhasïnti
15eska Diósï xénhchaasïnka
imechani enka erakuaka
ka eska p'amok'uasïnka,
ka eska Diósï exeni jarhasïnka
imeri ireta pímpinhasïni.
16Enka kaxumpiti ma uarhik'a
nósesi xarhatasïnti nósesi ampe niátatini
enka útasï no uarhini jaka,
ka enka sapichku ma kaxumpent'ak'a
nósesi xarhatasïnti imani
enka t'arhepekia
ka útasï ikikurhini jarhani.
17No kurhankunhaati
antisï míakua jukari ma uarhi,
no jáskanhaati
ACHA antisï p'íkuntsï
ka no kurhankunhaati
antisï támu péra patsani.
18Ikianhaati ísï ampe exerini
ka ACHA teresmarhuauati.
19Ima jurhia enkaksï ima uarhiaka
nónema k'érini káuati
ka nónema xénhchauati
ni jima k'éri ampe xenha
enkaksï jatsinhantaaka.
ACHA no jamperi jiáretauati uantani
ka ép'u urhetatapakuauati
k'uaninhantaani, murutauati
ka méntku k'amak'uauati.
Kánekuaksï k'únk'umanchantaati
ka nónema míauati imechani.
Kaxumpitiri ka no kaxumpitiri arhinharhikperakua
20Imani jurhia enka Diósï
nósesi ampe niátatichani
k'amanharhintskua miiukuantauaka,
imaksï kánekua chéparini niáraati,
ka imecheri nósesi niátakua
jima xarhakuantauati
ka imani ampe jimpoksï
arhinharhikunhaati.
Currently Selected:
Sabiduría 4: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.