Sabiduría 3
3
Kaxumpiticheri úkorhenchakua, nósesi ampe úricheri jinkuni exentaparini
1Kaxumpiticheri álma
Diósï ják'irhu kánkorheaxati
ka uantanheata nómeni antarheraasïnti
2Nósesi ampe úrichaksï uantasïnti
eskaksï kaxumpiticha uarhirixaka
ka imecheri uarhikuaniksï
nósesi ampe úkorhenchakueni exesïnti,
3ka eskaksï kánekua
nósesi ampe úkorhenchaska
enkats'ïni jurarkuka.
Enka úka,
kaxumpitichaksï sési p'ikuarheraxati.
4Na uék'iksï ísï exenhani jarhani
eskaksï maiampetaranhaxaka,
imaksï mintsikaxapti
eskaksï nómeni uarhipirinka.
5Enkaksï na sapirhati ampe
maiampetaranhaakia,
uánekua ampeksï intsïnhaati,
jimpoka Diósï ts'ék'uaska
ka exeasti eskaksï nitatarheska
eska Diósï imecha jinkuni jauaka.
6Méntkueni ts'ék'uasti
eska tiripiti na ts'ék'unhak'a
ka ísï jiókorheasti
eska kéts'ïtakuarhu uántikukata nema
enka Diósï aiamenhantak'a.
7Ima jurhia
enka ACHA maiampetarauaka,
imaksï kánekua t'íntskaraati
eska ampe k'ueramu,
eska misiri na nirak'a
enka arho kurhiranhani janhak'a.
8Imaksï iámentu k'érati iretechani
arhinharhikuauati
ka iámentu iretechaniksï
juramukuauati,
ka ACHA méntkisï juramukuauati.
9Ne enkaksï ACHAni mintsikak'a
imaksï úati kurhankuni
ampe enka ísïka
ka ima enkaksï nómeni jurarkuk'a
tsípekua ka xánhchperata jinkuniksï
imani jinkuni jauati,
jimpoka Diósï sési kámpitiska
ka imecha jinkuni jarhasïnti
enka ima erakuak'a.
10Nósesi ampe úrichaksï
imani ampe úkorhenchaati
enkaksï xáni nósesi ampe eratseni jaka,
jimpokaksï ima kaxumpitichani ikimchaaska
ka jimpokaksï ACHAni jarhareska.
11Ísku ampesti
ne enka no xénhchak'a ampakiti jurhenkuani
ískusï eroeronharhini jati
ískusï xáni jánkorhekuni jati
ískusï xáni uáni ampe úati.
12Imecheri nanachichaksï tantalesti
ka ima uáp'echaksï nósesi ampe úsïnti
ka imeri sïrukua ikimekatesti.
Sánteru sésisti no káani sapichani, eska nósesi ampe jurhentaani
13Ima k'ória nanachi
enka no úka kánkorheani sapichani
enka nómpema arhikua jukaka
ka enka nómeni nósesi ampe niátaka:
Ima sési ampe maiamunhaati
enka ACHA junkuaka arhinharhikpeni.
14Ima k'ória tatachi
enka no úk'a sapi káani
ka enka nómeni nósesi ampe niátaka
ka enka ACHAni
nómeni nósesi uantatseka,
xásïkua jimpo,
ampakiti ampe antakorheati
ka sési jántu arhutamenhaati
ACHAeri tióstarhu.
15Kánekua sési ampesti
enka nema jurhimpitku ánchekorhek'a
ka ne enka no chkuántirak'a
imeri sïrankua nómeni k'arhisïnti.
16Ísku jánti uáp'echaksï
no ióntasïnti uarhini
ísïksï jámani ísku jánti uáp'eni,
nósesi jásï ma uarhikua janokuauati.
17Na uék'iksï t'arhepenia
ískuksï exenhaati
ka enkaksï na k'ératiuakia
nónema janhanharhiauati.
18Ekaksï sapichku uarhiska
xántku ísïksï pakaraati
ka imani jurhia
enka arhinharhikperanhaaka
kánekuaksï ueraati
ka nónema sési arhiantauati
19Ne enkaksï nósesi ampe úrika
kánekuaksï nósesi ampe úkorhenchaati.
Currently Selected:
Sabiduría 3: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.