Sabiduría 2
2
1Ísku ampema eratsepariniksï arhip'erasïnti
Juchari tsípekua no ióskasti
ka kánekuachi mískorheparini irekaxaka,
ka nóchi úaka no uarhini,
ka nónemanchi míteska
enka uétsent'aka enka na uarhik'ia.
2Ískuchi úkorheska
ka ískuchi nitamamaaka,
nómpemenichi nitamamaaka
jimpoka juchari jiret'akua
sïrateni jáxeska,
ka juchari eratsekua misirini jáxesti,
enka juchari mintsita jinkuni
márku manakorheni jarhak'a.
3Enka na ima misiri párhuaka,
juchari anhanhatakua
t'upuri jápu úkorhent'aati,
ka juchari espiritu ísku nómpemeuati
eska ampe tarhiata
enka no k'uetsapeka.
4Ka ma jurhianits'ïni
nóteru nema míauati
juchari jakankurhikua
nóteru nema míauati,
ka iámu ampe mirikurhinhaati
enkachi xáni ampe úka
juchari tsípekua xántku ísï niuati
eska janikua ma
ka ísku nóneuati
eska xúmu na nirak'a
enka ísku k'amantek'a
tata jurhiateri t'íntskua jimpo
enka jurheperak'a ka k'amak'uni.
5Juchari tsípekua
xántku ísïsti eska k'umanta,
enkachi na niáranchak'a,
nóteruchi k'uanhatsesïnka.
Parhakpeni anapu uantarixati,
eska nónema úaka k'uanhatseni.
6¡Jimpochisï tsípekorheaka
imani ampe jimpo
enkachi iásï jatsikorheka
ka ju je tsípekorheni íni parhakpeni
iásï enkachi sapichku jaka!
7¡Ju je ma arhani
auakachi ka ampakitichi auaka
enka sánteru jukaparhaka
ka imanchi p'untsurhukua atarhekorheaka
enka sánteru ampakeka!
¡Ju je nóma tsïtsïkini ísku exeni
enka iásï tsïpant'ani jaka!
8Ju je iámentu tsïtsïkichani mínkorheani
jimpokaksï tátsekua ísku xanirhuaka,
9Ásï nema kueratee
jima enkachi iámentuecha p'áp'átperaaka.
Jurak'u iápuru mítenhani
na enkachi xáni tsípekorheni jaka:
¡Ísïsï tsípekueti,
jimpochisï íni parhakpeni jaka!
10Ju je jatantunt'ani
imani enka tumina no jatsikorheka,
ju je uarhiti tsîntini nósani p'amok'unt'ani,
ka ju je t'arhepitichani no janhanharhiani.
11Ju je uinhapekua xarhatani
ju je uinhapetarhu juramuni,
jimpoka nómpema marhuasïnka
enka ma no uinhapeaka.
12Ju je kaxumpitini apintukuni
jimpokats'ïni ách'atani jarhasïnka,
no jaiapanhent'ani jarhasïnti juchari jánkuani,
méntkuts'ïni arhiparhatani jarhasïnti
eskachi no janhanharhisïnka juramukuani
ka arhinharhikusïntits'ïni
eskachi no ísï irekaxaka
eskachi na arhistamenhaka.
13Ka uantasïnti eska Diósïni míteska
ka uantakorhesïnti jamperi
eska ima ACHA uáp'eska.
14Jima ménterueni eratsesïnti
eskachi jucha
ka exerintkuchi nósesi p'ikuarhenhesïnka.
15Méntku ménterueni irekorhesti
ka méntku ménterueni jámasïnti.
16Ísïts'ïni ikimchasïnti
ísku nák'ichi jucha imeni jásï tumine
enka no jukaparhakueka,
ka nóts'ïni uéksïnti pírekorheni
eskachi ampe jucha no pímpinharhani.
Uantasïnti eskaksï kaxumpiticha
uarhirini sánteru kánekua tsípekua jatsisïnka,
ka k'éri p'ikuarherasïnti
enka Diósïni tátjemperak'a.
17Ju je xéni ísïski o nómpe
ima ampe enka xáni uantak'a
ka ju je eramkurhant'ani
néna k'amarhukua imeri tsípekua.
18Eka ampe kaxumpiti
sési jimpo Diósï uáp'eka,
Diósï jarhuataati
ka imeri ikiatspirichani kéntitakuauati.
19Ju je nósesi arhini útakuni
ka nósesi ampechi úkuaka,
ka jimachi exeaka náxani tekant'asïnki
ka náxani uinhapekua kámasïnki.
20Ju je nósesi kánt'ani atani uántikuni
jimpoka uantasïnka eska kuáp'enhaaka.
Ampe enkaksï támisï úk'a no kaxumpiticha
21Ísïksï eratsesïnti no kaxumpiticha,
enka úka, támu ísïksï eratsexati,
imeri no kaxumpekua jimpoksïsï no exet'i.
22Nóksï kurhankusïnti Diósïri eratsekuani
ka nóksï jakak'usïnti
eska kaxumpekua jinkuni irekani
sési jásï maiamperakua juákorhesïnka,
ka nóksï jánhaskasïnti
eskaksï kaxumpiticha sési maiamunhant'aaka.
23Diósï kueraasti k'uiripuni
ka uantasti eska no uarhiaka,
ka méntkueni ják'usti
eska ima na jáxeka,
24enka úka, nóampakitiri epuperakua jimpo
janosti uarhikua íni parhakpeni
ka imechani pánt'aasïnti
enkaksï nóampakiti jinkunika.
Currently Selected:
Sabiduría 2: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.