Sabiduría 1
1
Kaxumpekua méntkisï anapu irekua antakorhekuesti
1Ma parhakpeni anapu juramuticha
xénhcha je kaxumpekuani
ACHAeri eratsekuani sési eranku je
ka mintsita jinkuni kaxumpe je.
2Ima, imechani jinkuni xarharasïnti
enkaksï no kurhak'orheni jarhak'a
ka imechani jinkuni xarharasïnti
enkaksï mintsinharhik'a.
3Nósesi járhati eratsekuechaksï
Diósïni jinkuni jarharetpesïnti.
Ne enkaksï imeri uinhapekuani ts'ék'uk'a
ísku pakataasïnti no míakua jukarichani.
4No úati ima míakua jukarini
enka mintsitarhu ikichakua ampe kámka,
ka enka k'amanharhintskuani
iámu incharhekorhetini kámani jaka.
5Espiritu kaxumpiti
enka k'uiripuecheri jurhentpirika
no pírekorhesïnti chkuántirakuani
kéntikukusïnti nósesi jásï eratsekuani,
ka kéntikukorhesïnti
enka no kaxumpenhani janhaaka.
6Míakua jukakua
sési jásï ma pámpetpiristi
enka no púakunt'ak'a imani
enka Diósïni uantakua jimpo útakuk'a.
Diósï mítetixati iámentu ampe
enka k'uiripu jantiok'u mítetini jarhak'a.
Ima iámu ampe mítetini jarhasïnti
eska xáni ampe mintsitarhu kánhani jarhak'a
ka kurhasïnti eska xáni ampe uantatsenhak'a.
7Ka jimposï ACHAeri espiritu
ma parhakpeni uinirat'i,
iámu auantani uinhaperasïnti
ka mítesti, parhakpeni anapu
ampe enka uantak'a,
8jimposï nónema út'i jirikorheni
enka nósesi ampe uantariuaka
ka no úati sïpakorheni
enka Diósï arhinharhikpeni jauaka.
9Iámu ampe jirinhamenhant'aati
ampe enka nósesi eratseni jaka
ima enka nósesi ampe niátatika
ka imani ampe jimpo arhinharhikunhaati
enka Diósï aiankunhaaka
enka xáni ampe nósesi uantaka.
10Diósï iámentu ampe
sési kurhach'peni jarhasïnti,
imani jamperi kurhasïnti
enka nema sïpasïpameni jarhak'a.
11Jimpots'ïsï no jámaaka arhinhchpeni
ka ásï ampema nósesi uanta je,
jimpoka ima jamperi maiampenhasïnka
enka sïpatekuarhku uantanhak'a
ka ne enka chkuántirak'a
chkuántirakua jimpo uarhisïnti.
12Ásï uarhikua jirinhakorhe je
ikichakueni irekorheparini,
ka ásï tsînchekorhekua antsitakorhe je
chári nósesi úkuechani jimpo.
13Jimpoka no Diósï úska uarhikuani
ka no tsípesïnti
parhakpeni anapuni
nósesi ampe úkuni jarhani.
14Iámentu ampe ústi
mintsikaparini eska sési japirinka,
ka ampe enka parhakpeni tsikik'a
sési útspesïnti,
ka no ima tsikirasti
imani ampe enka uántikpek'a,
jimpoka íni parhakpeni
no uarhikua juramusïnka,
15jimpoka kaxumpekua
méntkisï tsípeni jauaka.
Néna enkaksï eratsek'a nósesi ampe niátaticha
16Nósesi niátatichaksï
uarhikuani antsikorhesïnti
enkaksï ísï ikichakueni nínharhik'a
ka enkaksï uinhachak'a,
jimpokaksï eratsesïnka
eska uarhikua imecheri p'íchpiriska
tsípekua jinkuniksï jirinhant'asïnti
ka pakatperatixatiksï uarhikua jinkuni,
uarhikuaksï antakorhesti.
Currently Selected:
Sabiduría 1: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.