Tobit 14
14
1Ísï Tobiti, Diósïni uantamukukorheni k'amaraspti.
Tobiti enka uarhini jampkia arhispti Tobiasïni ampesï úpirini
2Tobiasï sési uarhispti enka iumu ekuatse ka tempeni tsimani uéxurhini jatiripka, ka uánekua ampeksï míntakuspti Nínive. Enka pátenharhipka kuimu ekuatse ka tempeni tsimani uéxurhini jatirispti. Enka ménteru eskantapka kánekua sési irekorhespti, jarhop'espti ka Diósïni kánekua kómu arhispti ka uantantaspti na enka xáni ampe sési úkupka. 3-4Enka na uarhini jápkia, Tobiasïni uantap'asti enka uáp'epka ka arhispti ampe enka jatsipka úni: Jucheti uátsïti, jankorhe sóntku ueákuni Media, jimpokani ji jakak'usïnka enka Nahumi Dióisï uantari na uantaka ampe enka úkorhenchaaka Nínive. Ka iámentu ampe ísï úkorheati, iámentu ampe enkaksï Diósï uantaricha Israeli anapu na uantaka, imecha enka Diósï axapka, uantastiksï ampe enka úkorheaka Asiria ka Nínive. Iámentu ampe enkaksï xáni antaka ísï úkorheati. Iámentu ampe úkorheati jiáni enka uantakata jaka, Media no úkorheati, Asiria ka Babilionia ísï úkorheati ji sési mítetixaka eska ísï úkorheaka eska Diósï na uantaka ka eska iámentu ampe enka xáni uantakata úkorheati. Ka iámentu jucheni anapuecha enkaksï Israel irekaka, chúnhaatiksï ka etsakunhaatiksï jima enka ampakitika echeri, ka iámu jima k'arhinteati.
Samaria ka Jerusaleni k'arhinteatiksï. ACHAeri tiósta nóteru nema niuati ka ma jurhiani kurhupanhaati. 5Ka Diósï ménteru p'amok'uauati ka juánkuauati ménteru Israeli. Tióstaniksï úntaati, ka nóteru xáni sési jaxentaati eska na jaxepka úrhetku, ka niáraati ima jurhiatekua, enkaksï k'uanhatsentaaaka chúkatecha, ka Jerusaleniksï úntaati mák'ueni eska úrhetku na jáxepka, ka tiósta ménteru únhantaati ísï eskaksï na uantapka Diósï uantaricha Israeli anapuecha. 6Ka iámentu iretechaksï ka iámentu k'uiripuechaksï Diósïni antarhentaati, ka janhanharhiatiksï, ka nóteruksï jamaati diósï eratakatechani kómu arhiani, enkaksï tántochaaka ka enkaksï no sési úraaka, Diósï parhakpeni anapuntsï k'éri ampe arhiaaka kaxumpekua jinkuni. 7Iámentu Israeli anapuechaksï enkaksï no uarhiska, mintsita jinkuniksï miáuati Diósïni, tánkorheatiksï ka niuatiksï Jerusaleni, ka méntku ísïksï sési irekaati Abrahamiri echerirhu, ka imecheriuati echeri, ka enkaksï mintsita jinkuni xénchka Diósïni, tsípeatiksï, ka imaksï enkaksï k'amanharhintaaka, imaksï chúnhaati íni echerirhu uératini.
8-9Ka iásïksïni uékasïnka arhini jucheti uátsïticha: Diósïni kaxumpekua jinkuni marhuaku je, ka imani ampe úje enka ima jaiapanhentanka, chári sapichani kaxumpekueri ampe jurhentaa je, ka eskaksï jarhop'eaka, ka eskaksï Diósïni miauaka, ka eskaksï méntku ísï Diósïri jakankurhikuani k'éri ampe arhiaka, iámu uinhapekua jinkuni. Ka t'ú jucheti uátsïti Nínive ni, ásï ixu pakara, enka uarhiakia chéti nánte ka enkari na jucheti ját'akutini jatsintaaka, imani jurhiatekua uéaku, ásï jamperi ixu k'ui. Jimpokani exexaka eska ixu kánekua no sési úkorhexaka, ka ikichakueni janhasïnti. 10Jucheti uátsïti, miásïnti ampe enka Nadabi, Ajikarini úkupka, ima enka imeri témpani kurhepka, tsípitku jatsintaspti. Ka Diósï, Ajikari japantirhu maiámpetaraspti, Ajikari no uarhispti ka Nabadi kánekua no sési irekaspi imani jimpo enka uékaspka Ajikarini atani uantikuni. Jimpoka Ajikari kánekua ampakiti k'uiripueska ima jimposï uarhikuarhu uéch'ukupti enka Nadabi úskukupka, ka Nadabi ima uarhikuarhu jatameraspti. 11Exeje ampe enka sési ampe juák'a sési ampe úni ka jarhop'eni, ka nena enka no sési paáp'eka no sési ampe úni, uarhikuarhu paáp'esïnti. Ji niaranchaskia uarhikuani. K'uirakuarhu apontasptiksï ka jima uarhispti. Jatsintaspiksï uánekua ampe mintakuparini.
Ixu k'amarhuspti Tobiasïri uantantskua
12Enka na uarhipkia Tobiasï nánte, ima uámpa jémperi ját'akutini jatsintaspti. Ka ima ka imeri tempa jinkuniksï Media niraspti ka jimaksï pakaraspti irekani Ekbatana imeri témperi táte Ragueli jinkuni ka nánte jempani jinkuni. 13Tiosï exeaspti temperi táte ka nante jempani enkaksï k'éripkia ka sési káaspti. Jatsiantaspit Ekbatana enka Media jaka, ka ima p'iraspti jatsikorhekua ampe Ragueliri ka ístu imeri táteri enka Tobitipka. 14Iumu tsimani ka témpeni uéxurhini jatiri jatsintasti ka uánekua ampe úmenhaspti ima míntakumenhani. 15Enka nótki uarhimpka, kurhakorhespti eska Nínive no sési úkorhespka ka exespti eskaksï jima anapuecha Media chúnhaspka Siexares, ima enka Media irechepka. Tátsekua k'éri ampe arhispti Diósïni imani jimpo enka xáni ampe úkuapka Nínive ka Asiria anapuechani. Enka nótki uarhimka kánekua sési p'ikuarheraspti imani jimpo enkaksï Nínive anapuechani k'amantskaapka, ka k'éri ampe arhispti ACHAni, enka Diósïka ka enka méntku ísï irekaaka.
Currently Selected:
Tobit 14: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.