Tobit 13
13
Tobiti, Diósïni k'éri ampe arhisïnti
1K'éri ampe arhikuesti Diósï,
2enka méntu ísï irekaaka ka juramuni, ima maiámpetarantasïnti ka ístu p'amok'upesïnti. Iánuani tsïtaspesïnti ka ístu jarhok'pesïnti sési niántani, no nema úsïnti imeri uinhapekua jinkuni.
3K'éri ampe arhije Israeli uáp'echa, iámentu k'érati iretecharhu, imaksïnisï etsakuti iápuri ísï.
4Ka neni exeraski na enka xáni k'érika.
Kéri ampe arhije iámentuechani japarini.
Ima juchari ACHAesti,
Juchari Diósï ka juchari táte,
ka méntku ísï Diósiuati.
5Ima maiampetarapesïnti k'amanharhitskuechani jimpo,
ka ístu p'amokusïnti,
ka ménteruksïni márku úntaati,
ka ísï eskakts'ïni na etsakupka ísïksïni márku úntaati.
6Enkats'ï antarhentaska Diósïni mintsita jinkuni,
ka chári alma jinkuni,
ka sési jasï mintsita jinkunits'ï antarhentani,
imaksïni jióntaati,
ka méntku ísï cha jinkuni jauati.
7Iásï exexaka ampe enka úpka cha jinkuni,
k'uiripu japarini maiámuntsï je.
K'éri ampe arhi je, enka jurhipekua ampe úk'a.
Méntu ísï k'éri ampe arhi je Irechani enka méntku ísïka.
8Ji ixu uératini k'éri ampe arhisïnka enkani jasïpeni jaka,
ka kaxumpekua xarhatakuasïnka ixu enkaksï k'amanharhintika,
Diósïri uinhapekua kánekua k'éristi,
ka arhiasïnka: K'amanharhintsticha, Diósini antarhentsï je,
Ima ampe ú je enka Diósï jaiapanhentaaka,
nantikats'ï ísï sési irekaaka
ka imaksïni p'amok'uati.
9Ji k'éri ampe arhisïnka jucheti Diósïni, ima enka auantarhu anapu irecheka,
jucheti mintsita kánekua sési p'ikuarherasïnti imani jinkuni.
10Eskaksï iámentuecha k'éri arhiaka,
ka eskaksï maiamuntaaka Jerusaleni.
Jerusaleni, k'éri ireta enka Diósï úch'akuraka,
imakini maiampetarasïnti,
imani jimpo enkaksï jima anapuecha xáni úk'a,
k'óru menteru p'amok'uauati imechani enkaksï kaxumpentaaka.
11K'éri arhi ACHAni,
k'éri arhi Irechani enka méntku ísïuaka,
ka ísï imeri tiosta tsípekua jinkuni únhantaati,
12ka enkakï k'uanhatsentaata ima enkaksï uékuka,
ima sési p'ikuatauati,
ka xarhatakuauati xencheperata imacheni enkaksï xáni komu nitamakorheka,
méntku ísï xenchauati.
13Jerusaleni, chéti t'intskua iámu t'inkarantaati
iámu parhakpeni,
iápuru anapuecha k'uiripuechaksï ka iauani anapuechaksi juati t'unkeni jinkuni,
Diósïri jakankurhikuani juatiksï k'éri arhini, ACHAni.
Intsïmpekuaksï juakuati Irechani enka auantarhu anapueka,
k'uiripu méntku ísï anapu,
kánekuaksï tsípeati t'unkeni jinkuni.
Ka k'éri iretarhu anapu jakankurhikua enka Diósï erakuka,
méntku ísï jauati.
14¡Ikimenhaati iámentu imaksï enkaksï no sési arhiaka,
ikimenhaati iámentu imaksï enka xerheaaka,
enkaksï ótakuechani xereauaka,
enkaksï erap'atakuechani xereauaka,
enkaksï kurhupaaka!
¡Ka imaksï úch'akunhati enkaksï,
úntaaka!
15Jiániri kánekua tsípeaka amparhati k'uiripuechani jimpo.
Iámentuksï tánkorheati,
ka ACHAni enka imerika parhakperni imaniksï k'éri ampe arhiati.
¡Sésiksï jamaati imaksï enkaksï xenchaak'a!
¡Sésiksï jamaati ima enkaksï tsípek'a t'únkeni jimpo!
16¡Sésiksï jamaati imaksï enkaksïni exeaka kómu nitamanchani,
imani jimpo enkaksïni kómu kámaaka,
jimpokaksï sánteru urhepatini t'únkeni jimpo tsípeati,
enkaksï exeaka chéti uinhapekua!
Jucheti alma k'éri ampe arhi ACHAni enka k'éri Irecheka.
17Jerusaleni ireta ménteru únhantaati,
ACHAeri tiósta méntku ísï jauati.
¡Kánekua sésiuati enka tsípiti pakaraaka nemeri sïrukua,
enka exeaka uinhapekua,
ka k'éri ampe arhini auantarhu anapu Irechani!
Jerusaleni anapu ómukua ménteru únhantaati,
kánekua sési jarhati tsakapuecha enkaksï safiro ka esmeralda arhinhak'a.
Ka tsakapu amparhati iámu tsíntsïkatarhu.
Jerusaleni anapue erap'atakuechani ka ka iótakuarhu anapu erap'atakuecha,
imaksï tiripiti jimpo tsïntsïnhaati no ma jásï ampe jeuetani.
Kópekuarhuksï tsakapu jatanteati,
Kánekua amparhati tsakapuechani jimpo enkaksï rubi arhinhak'a.
18Jamukutinicharhuksï xáni tsípeni pirenhaati,
ka k'umanchekuarhuecharhu uantanhaati,
¡Aleluya!
¡Diósï israeli anapu k'éri arhinhe!
Ka imeri jakankurhikuanisï k'éri ampe arhiati méntku ísï.
Currently Selected:
Tobit 13: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.