Tobit 12
12
Ánjeli
Ánjeli uantantaspti nespki
1Enkaksï tempuchanku k'amarapka, Tobiti uantap'aspti Tobiasïni enka imeri uáp'epka ka arhispti: Jucheti uátsïti ásï mirikurhi maiamuni ísï eskachi na pakatperatini jápka inteni enkakini pámpetapka jini enkats'ï nípka, jukariri íntskupirinka.
2Tobiasï arhispti: Táte ¿Náxani maimperata sési japirini? Enkani teruk'ani íntskupirinka imani enkachi juaka, kánekua sési japirinti.
3Nokcha interi juankuski tsíti juankuski anti, ka jucheti tempanit'u tsípiti juankusti, ka t'únkenikini ampakerantasti. Inte nompa ampemesti enkachi maiamuaka.
4Tobiti arhispti: Kánekua sési jauati íntskuni teruk'ani enkats'ï xáni juaka.
5Tobiasï uantap'aspti ka arhispti: I teruk'ani ampe enkachi xáni juaka, ka eskari sési nintaaka.
6Rafaeli támu páspti tsimarheni ka arhiaspti: Kánekua k'éri ampe arhi je Diósïni ka uantantsï je ampe enkaksï sési ampe úcheka. K'éri ampe arhije, pireku je imeri jakankurhikuani. Sési p'ikuasta je Diósïni k'uiripuni aiankuntapari na enkaksï sési ampe úcheka. Ka ásï méni kuatara je maiamukua arhintani.
7Enkakini irecha mintsikaaka eskani no uantantaaka, sésisti no uantantani ampe enkakini ima mintsikaaka, k'óru kánekau sésisti imani ampe uantantani enkakini ima sési úcheaka, kaxumpe je ka nóksïni antarheraati no sési jasï. 8Kánekua sésisti Diósïni uantamukukorheni ka míntakuni no t'íreni, járop'eni ka kaxumpitku irekani eska jatsikorhekua ampe uanerani ka no ampakeni. Sánteru sésisti ampe intsïmp'eni imani enka uétarhenchani jauaka eska tiripiti kánerakorheni. 9Intsïmpe ampe imani enka uétarhenchaaka uarhikuarhukini p'ímutantasïnti ka pinpinhakusïntikini k'amanharhintskueri. Imaksï enkaksï no jatsikorherichani jarhoataaka imaksï ióni irekasïnti. 10Ka imaksï enkaksï k'amarhintka ka no kaxumpekuarhu irekani imaksï no xenchakorhesïnti. 11Iásïksïni iámentu ampe aiánkuntaaka, nómaksïni óch'akuracheaka. Arhispkaksïnia, enkakini irecha mintsikaaka eskari ampe ma no uantantaaka, sésisti no uantantani ampe, k'óru kánekua sésisti eskakini Diósï ampe sési úcheaka ka t'úri uantantani imani ampe. 12Ka nirasïnkaksï aiánkuntani, Tobiti enkats'ï Sara jinkuni Diósïni uantamukorhenka, ji pákusïrempka ACHAni chári uantanheatechani, eska ima kurhaapirinka. Ka mák'ueni pákusïrempka uantanheatechani enkari t'ú uarhirichani jatsiantempka. 13Imani jurhiatekua enkari jauapatsepka enka t'írekua jatsirakata jápka ka niraspkari uarhirini jatsintani, Diósïri axaspti eskakini tsék'upirinka. 14Ka iásïrini ménteru axasti Diósï eskakini tsinapirinka, ka eskani tsinapirinka Sarani chéti tarhaskuani. 15Ji Rafaeliska, ACHAeri ánjeli ma, jucha iumu tsimaniska, jucha úsïnka inchani imeri k'érikuarhu.
16Imaksï tsimarheni enkaksï kurhani jápka chérakorhesptiksï ka tinkuxurhisptiksï tsérukua antaskueraparini, ka kánekuaksï chéxapti. 17K'óru ánjeli arhiaspti: ¡Ásï jama je chéni! Méntku ísï k'éri ampe arhije Diósïni.
18Enkani ji chá jinkuni jamani jápka no jimpokani ji ísï uékasïrempka, Diósïri sésikua jimpoespti, mántani pauani maiamuntsï je ka k'éri ampe arhi je. 19Enkats'ïni cha exempka t'ireni o itsïmani no jísïrempka enkats'ï cha exempka, eranhaskakua maespti. 20Maiámuntsï je ACHAni enka echerirhu anapueka, k'éri ampe arhije Diósïni, enkari jinteni ixu axaka. Karantsï je iámentu ampe enka ixu úkorheka. Ka ánjeli karhanchentaspti.
21Imaksï jauaraspti no nóteruksï úspti exeni. 22Iániksï uénaspti k'éri ampe arhini Diósïni ka maiamuntani imani ampe jimpo enkaksï xáni sési úkorhenchapka, ka jimpokaksï Diósïri ánjelini ma exespka.
Currently Selected:
Tobit 12: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.