Tobit 11
11
Tobiasï k'uanhatsentaspti ka Tobiti ampakentaspti
1Enkaksï Kaserini no iáuani japkia, k'éri ireta enka Nínive urhepatini jaka, Rafaeli arhispti Tobiasïni:
2T'úri míteska náchi jurak'uspki chéti táteni. 3Úrhepakuntsï Sarani, ka ampantsïkarakuntsï jima enka niáraaka.
4Ka nirasptiksï tsimarheni ka Rafaeli arhispti eska p'itapirinka k'ameri jatakua kurucheri, ka uichu chúxapaaspti tsimarheni. 5Ana uáxakupuspti jimesï eraani enka xanhari jimpo junkuapirinka imeri uáp'a. 6Enka p'ikuarhetsepka eska Tobiti junkuaxapkia: ¡Janonkuasptia chéti tataka imeri p'ampiri jinkuni!
7Rafaeli arhispti enkaksï nótki niántani jápka k'umanchekuarhu: Mítetixaka eska chéti táte ampekentaaka ka eska exentaaka.
8Atanharhiku eskuarhu kurhcheri k'ameri. Sïpiati marhuakuati ka sési janharhintaati ka exentaati.
9Ana niraspti kúmani uiripaani ka uantaspti: ¡Iásikini exentaska jucheti uátsïti! ¡Úaka uarhinia! Ka ueraspti.
10Tobiti jauaraspti ka apintupasti uérani. 11Tobiasï enka kurucheri k'ameri kámani jápka, antarherhaspti táte jempani ka jupik'uspti. Eskuarhu p'uninharhikuspti ka arhispti: ¡Mintsika táte! Jikini sïpiáti atanharhikuaka.
12Tsimani ják'i jimpo p'ikunharhikuspti imani enka ónharhikuni jápka. 13Tobiti kámanharhispti imeri uáp'ani ka ueraspti: ¡Úska exentani, jucheti uátsïti, jucheti t'inkutskua!
14Ka máteru uantaspti: ¡Kánekua k'éri arhi Diósïni, eska imeri jakankurhikua k'éri arhinhaaka! ¡Eska k'éri arhinhaaka imeri santuecha ka ánjelicha! ¡Eska méntku ísï k'éri arhinhaaka imeri jakankurhikua! Jimpoka imarini maiampetarasti ka ménterurini p'amok'uspti ka iásï úsïnka exeni jucheti uáts'ïtini Tobiasïni.
15Tobiasï inchantaspti k'umanchekuarhu kánekua tsípepani ka Diósïni k'éri arhipani uinhachapani. Aiankuntaspti imeri táte jempani na enka sési jámapka jini enka nípka, ka eska juankuspka tumina ka eska tempuchaspka Sara jinkuni, Ragueli uáp'a jinkuni ka eska ima tátsepuxapka ka eska niárani jápkia Nínive.
16Tobiti kánekua tsipespti ka Diósïni k'éri arhiparini uéraspti k'éri iretarhu tarhaskuani jempani erokani. K'uiripu Nínive anapuechaksï ísku pakaraspti enka Tobiti kánekua sési jámpia ka enka nóteru k'uaninkia jup'itapani. Ka Tobiti arhispti eska Diósï p'amok'uspka ka eska ampakerantaspka. 17Tátsekua Sarani antarheraspti ima enka tarhaskuepka ka úch'akuraspti: ¡Sési jano jucheti uátsïti! ¡Diósï kánekua sési arhikuesti enkakini ixu juaka, eska uch'akuraaka chéti táteni ka eska úch'akuraaka jucheti uátsïti Tobiasïni, ka eskakini t'unheni úch'akuraaka! Sési jano ixu enka chenioueka, incha jucheti uátsïti.
18Imani jurhiatekua kánekua sési ampe úkorhespti iámentu judioechani jinkuni enkaksï Nínive irekapka. 19Nirastiksï Ajikari ka Nadabi Tobitiri erachi jempa uáp'echa sési ampe arhini.
Currently Selected:
Tobit 11: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.