Tobit 10
10
TOBIASÏ K'UANHATSENTSKUA KA TOBITI AMPAKENTSKUA
Tobiti ka Anaeri uantanheata
1Tobiti miupaxapti jurhiatechani, jimpoka miurixapkia na enka xáni ióntapirinka k'uanhatsentani Tobiasï, enka na iónipkia ka uáp'a no janonkuani jarhani, 2uánekua ampe eratsespti: ¿Jiniksï p'inku? ¿Gabaeli uarhi ka no néma íntskuntani tumina? 3Kánekua uantanheaspti ka kómu p'ikuarheraspti. 4Ana tempa jempa arhisïrempti: ¡Jucheti uátsïti uarhisti, nóteru tsípiti jarhasti! Ka uerasïrempti ka p'amontakorhesïrempti ka uantasïrempti:
5¡Ai jucheti uátsïti! ¿Antikinisï jurak'uni jápki nirani? T'úk'uespkari.
6Tobiti arhisïrempti: Ísku ja, ásï uantanheani ja, ima sési jarhaspti, ima ampe ma úni jati jimposï xáni ióntani jati, ima enka nika pámpetani ima kánekua tsiuenharhikuesti, ka támu juchari márkuesti, ásï kómu ja, janonkuani jatia.
7Ka ima uantasïrempti: ¡Pínasku ja! Ískurini exe, ásïrini chkuantirache, jucheti uátsïti urhiristia.
Mántani pauani ima jaurasïrempti ka jiniasï eraasïrempti nani enka ísï ima junkuapirinka, ka no nemani kurhach'asïrempti, enka xáni niárempka ínchantasïrempti ka uerasïrempti, ma chúri uerasïrempti ka no k'uisïrempti.
Tobiasï eratsespti k'uanhatsentani
8Enka na nitamapkia tempeni t'amu jurhiatekua enka tempuchakueri k'uinchekua úkorhepka, enka Ragueli aiákorhepka eska k'uinchekua úntapirinka imeri uáp'ani jimpo, Tobiasï niraspti ka arhispti Raguelini: Íntskurini sésekua nirani jucheti táte ka nánteni exeni, jucheti nánte ka táte kánekuaksï uantanheani jati, ka uantani jatiksï eskats'ïni nóteru méni exentaaka. Táte íntskurini sésekua nintani jucheti táteo, aiánkuskakini ia na enkani jurak'uaka.
9Ragueli arhispti: Ixu pakara jucheti uátsïti, ixu pakara. Ji uantakua axakuaka chéti táte Tibitini, eskari sési jarhaska. Ka Tobiasï arhispti: Nómbe, íntskurini sésekua nintani juchenio.
10Tátsekua Ragueli íntskuspti sésekua eska níntapirinka chéni jémpao, ka eska Sara jinkuni nipirinka, ka íntskuspti jatsikorhekua teruk'ani jamperi, tataka ka nanaka jántspirichani, uákásïchani, karichichani, ch'anch'akichani, cameiuchani, xukuparhakua, tiripiti ka úratakua ampe. 11Tátsekua jurak'uastpi eskaksï nipirinka, Tobiasïni arisï arhiparini tsïnkuntaaspti: ¡Eska sési jámaaka jucheti uátsïti! ¡Ásï uantanheapa! Eska ACHA auantarhu anapu íntskuaka sésikua eskats'ï sési niántaaka t'ú ka Sara enka chéti témpeka, míntsikani jauaka eskani uáka miteani chári sapichi!
12Ka imeri uáp'a Sarani arhispti: Ásï uantanheapa nirani chéti uamperi táte jempo, iásï uératini imaksï chéti tátesti, ísï eskakï jucha na tsípekua íntskuka, ásï uantanheapa jucheti uátsïti, ka enkani xáni irekaaka eskani sési ampe kurhauaka chéti ampe. Ka uantanukorhespti ka jurakuaspti eskaksï nipirinka.
13Edna ima arhispti Tobiasïni: Jucheti uátsïti, eskakini ACHA urhechepantaka ka sésiri niántani, ka eskani ji uáka ióni irekani ka míteani chári sapichani. ACHAni japantiru míntsikaxaka eskakini kuách'akuaka, ásï jama no kurhantirani jarhani. ¡Eskats'ï sési niuaka! Iásï uétarini ji chéti nanteska ka Sara chéti uarhitispti, ka eskachi tsítepekua jinkuni irekaaka, putinharhikuaspit ka jurak'uaspti eskaksï nipirinka.
14Tobiasï uéraspti Raguelio k'umanchekuarhu tsípeparini uéntaspti ka ACHAni auantarhu ka echeri anapu k'éri arhiparini, enka parhakpeni anapu Irecheka, jimpoka kánekua sési jámaspka. ACHAni kurhakuspti eska úch'akurapirinka Raquelini ka Ednani, erokaparini eskani mántani jurhia miantauaka.
Currently Selected:
Tobit 10: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.