Sabiduría 6
6
P'ÍMARHPERATA ESKA JURHENKUA JIRINHANHANT'AAKA
Juramutichaksï jatsisti jurhenkuani jirinhantani
1Kurha je irechecha
ka kurhanku je
ma parhakpeni anapu juramuticha
jurhenkorhe je,
2sési kurha je cha
enkats'ï uáni k'uiripuni urherukuk'a
ka enkats'ï uantaparini jámka
eskats'ï uánekua iretechani
juramukuasïnka.
3ACHA, auantarhu anapu Diósï
imaksïnisï juramukua íntskuti
imaksïni execheati
ampe enkats'ï úparini jamani jaka
ka exechentaatiksïni
ampe enkats'ï eratseni jaka niátani,
4jimpokats'ï Diósïni marhuakuparini,
nóts'ï úska jurhimpitku jámani
ka nóts'ï janhanharhiska
imeri juramukuani
ka nóts'ï kurhantirakuska Diósïni.
5ACHAksïni mátirku janocheati
ka maiampetaraniksïnisï juuati
jimpoka ima juramutichani
sánteru uinhamu maiampetaraasïnka.
6Kaxumpitichani p'amok'uasïnti
ka púakuantaasïnti
ka uinhapitichani sánteru uinhamu
kurhamarheantauati.
7Ima iámentuecheri ACHAesti
ka nónemani sánteru xénhchasïnti
ka no chérheasïnti juramutichani,
jimpoka ima úaska k'ératichani
ka sapirhatichani,
ka iámentuechani jimpo
méntkueni uantanheani jarhasïnti,
8ka k'óru juramutichani
sánteru uinhamu exekuantaasïnti
ampeksïsï úparini jámani jaki.
9Juramuticha,
íni ampeksïni chánksïnisï arhini jaka
eskats'ï jurhenkua p'iuaka
ka ísï jámanits'ï no tsîncheaka
10Imecha
ne enkaksï kaxumpitku
kurhantirakuak'a
pímpinhasï juramukuechani,
imaksï imecha jinkuni miiunhantaati
enkaksï ireta kaxumpitika
ima enkaksï uékaka
eskaksï jurhentanhapirinka,
imaksï úati kuáp'ekorheni.
11Tsípekua jinkuni jirinhantsï je
jucheti uantakuechani
kánekua jánkorhekuntsï je
ka xéntaakats'ï jurhenkua.
12Jurhenkua t'ímarhantekuesti
ka nómeni párhusïnti,
ima enkaksï xénhchak'a jurhenkuani,
nóksï úkua jimpo xéntasïnti
ka ima enkaksï jirinhantak'a
xéntasïntiksï.
13Jurhenkua xarhakuasïnti
imechani xénhchak'a.
14Ima no kuatarasïnti
ne enka xarhentku uénak'a jirinhantani
imecho jamukutini xéntasïnti
imeri k'umanchekuarhu uaxamukusïnti.
15Ne enka imanterku míani jarhak'a
ima míakua jukakuesti,
ka ne enka
iauani chúrekua jamperi jirinhantak'a
no ióntaati
nóteru ampema uantanheani.
16Jurhenkua jini ka jini jámsïnti
imechani jirinhantaani
enkaksï nitatarheka jurhenkorheni
xanhari jimpo xarhakuasïnti
ka iámentu imecheri
eratsekuarhu xarhakuasïnti.
17Jima uénasïnti ma jurhenkorheni
enka uénak'a jurhenkorhenhchani,
ka jurhenkorhenhchani ísïstia
eska jurhenkuani xénhchasïnka,
18ka jurhenkuani xénhchani
uétarhesïnti
imeri juramukuechani kurhantirakuani,
ka kurhantirakutini
úsïnti ma antakorheni
eska nómeni uarhiaka,
19ka méntkisï Diósï jinkuni jauati.
20Ísï jimpo,
jurhenkorhenhchakuats'ïnisï
juchantsïni irecha úntat'i.
21Iretecheri juramuticha,
ekats'ï ióni jamperi juramunhchak'a
xénhcha je jurhenkorhekuani
ka úakats'ï méntkisï juramuni jarhani.
Jurhenkuani jánhaskantani ampeski
22Aiankuakaksïni ampeski jurhenkua
ka nani uératini jurhasïni,
ka nómpema jískaparini.
Jima jamperini niáraaka
nani enka uénakorhek'a úkorheni
ka iámuksïnï sési jánhastaaka
ka iámentu ampe ísïuati.
23No jiáretaaka
eskarini epuperakua antaaka
jimpoka ima jurhenkua jinkuni
nómpemeska.
24Parhakpeni jimposï p'ip'anhant'i
jimpoka uánenhaska jurhenticha
ka irecha míakua jukari ma
iretani sési jakua juákusïnti.
25Jimpo, jiáretakorhe je
eskaksïni jucheti uantakuecha jurhentaaka,
ka antanits'ï uéraaka.
Currently Selected:
Sabiduría 6: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.