Sabiduría 11
11
1Jurhenkuasï antarati Israelini
enka Moisesini jurhentaka
imani Diósïri uantarini
enka kaxumpitika.
2Imaksï jurhenkua jinkuni márku
jimesï parhiakusti
enka nónema irekaka
ka uananharhikuniksï mintsikorhesti
jimesï enka xanhari no jaka,
3ka márkuksï anhatsekuaspti
imecheri ikiatspirichani
ka chúantastiksï
imechani enkaksï ataani uékempka.
4Imani jurhia
enkaksï k'arhichani p'ikuarherapka
uantap'akorhestiksïni
ka t'úri itsïmataaska
tsakapurhu mári itsïmataaska
na uék'i xáni chupepka ima tsakapu
ka imaksï ts'irapentaspti.
5Imani ampe jimpo
enkari imecheri ikiatspirichani maiampetaraaka
imani ampe jimpori jarhuataska
chéti iretani.
6Ikiatspirichaksï no xéntaspti itsï
imeni jásï enka no k'amakurhik'a,
ka jamperiksï
nósesi jánharhi itsï xéntaspti
enka iurhiri jánharhipka
ka enka atsïmu úkorheni jápka.
7Jimpokaksï ima sapichani uántikutarkorheaspka.
Ka chéti iretaniri
kánekua itsï íntskuska
enka no ísï erokorheni jápka.
8Ka ísïri k'arhichataarini xarhataska
néna enkari maiampetaraaka
imecheri ikiatspirichani.
9Enkaksï na p'ikuarherapka,
ka na uék'i enka
xénhperakua jimpo p'ikuarherataapka
mítesptiksï néna enkaksï p'ikuarherak'a
nósesi ampe úricha
enka t'u ikiatini maiampetaraak'a.
10Chéti iretaniri jurhimperaska
ísï eska tátjempa
sapini na jurhimperak'a,
ka ikiatspirichaniri arhinharhikuaska
eska irecha uinhamarhpiti ma
enka arhinharhikpek'a.
11Na uék'iksï imecho jápka
ka na uék'iksï uérakua jámani jápka
méntkueniksï maiampetaranhasti,
12sánteruksï kánekua p'ikuarheraspti
ka sánteruksï mískorhespti
enkaksï imani ampe míantapka
enka úkorhepka,
13jimpokaksï jánhaskaspka
eskaksï imeri ireta jimposï
ísï kánhapka
eska chéti ireteri jimpo sésispka,
ka exesptiksï eska t'úsï ACHA
ísï káani jápka.
14Moisesiniksï jurarkuspti
enka charhakuepka,
ka teresmarhusptiksï
enka na sáni k'éripkia,
ka tátsekuaksï k'éri ampe exexaptia.
Enkaksï nósesi ampe úricha k'arhichaka,
nósani méntkuenispti
enkaksï kaxumpiticha k'arhichapka.
Diósï no jukari arhip'esïnti
15Imani jimpo enkaksï nósesi ampe úk'a
ka enkaksï xáni no kurhankuk'a
ka enkaksï pát'amaaka
akuitseni k'éri ampe arhini
ka nósesi járhati
tikunichaniri axakuaska,
ka manakorheri
ikichakueni járhatichaniri axakuaska.
16Jurhentani uékani eska
imani ampe jimpo maiampenhasïnka
enka jimpo k'amanharhinhantak'a.
17Chéti ják'i kánekua uinhapiti,
enka parhakpenini úka
enka imani jimpo úka
enka nómpemeni jáxepka,
ima nósani úkua jimpo axakuapirinti
uánekua ósu ikimenharhichani
o púki ikimenharhichani,
18o úpirinti kuerauani no mítekata
ka ikimenharhi manakorherichani
enkaksï chpíri uéchapirinka
ka enkaksï sïrata uéchapirinka
mintsitani jámani,
ka enkaksï éskuarhu
misiri uénharhipirinka,
19imaksï no ísku ataapirinti
ka nóksï ískusï auantaapiriniti,
imaksï exearintku uántikuapirinti
xáni chérheani.
20Ka na uék'i no imani ampe úrani,
mák'urisï p'unitapirinka
ka ima marhuapirinti
eskaksï maimapepirinka
ka kuarhatsepirintiksï
chéti uinhapekua jimpo.
Enka úka,
t'úri ts'éretakatku kámpesïnka,
iatsitakuarhu
ka nóri jukari arhip'esïnka.
Anti jimpo Diósï no jukari arhip'esïni
21t'úri úaka na uék'i jatini
uinhapekua jinkuni úni ampe,
Ka nónema úati jakuni
chéti uinhapxurhakuani.
22Jimpoka ma parhakpeni
t'únkini jinkuni xántku ísïska
eska tsakapu sapinharhi tsénhetakueri
o eska ma itsï,
enka xúmu jimpo pínhsatserak'a
enka erantepakua
echerirhu antatserak'a.
23Enka úka,
t'úri iámentuechani p'amok'uasïnka
jimpoka t'u iámentu ampe úsïnka úni
ka nóri jamperi exemasïnka
parhakpeni anapuecheri k'amanharhintskua,
erokaparini eskaksï jantiok'u móantaaka.
24Lámentu amperi p'ámskaasïnka
ka nómpemari ikimchasïnka
enkari xáni ampe t'u úka,
ekari ampema ikimchapirinka
nóri kueraapirinka.
25Nómpema úpirinti jarhani
enka t'u no uékapirinka.
Eka no t'u juramupirinka
nómpema úpirinti jarhani.
26T'úri iámentuechani p'amok'uasïnka
jimpokaksï iámentuecha chétiska,
ka t'úri iámentu
tsípekua jatarichani xénhchaasïnka.
Currently Selected:
Sabiduría 11: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.