Sabiduría 10
10
Néna enka exenhempka jurhenkua imani jurhia uératintki enka Adanipka ka enka jamperi Josepka
1Jurhenkua kuách'akusti imani tatakani
enka urhetku kueraakateka,
imani enka ma parhakpeniri urhetika,
enka uénani jámani jantiok'uepka
ka jurhenkua k'arhantaspti
2ka imani íntskuspti
eska úpirinka iámentu ampeni juramukuni.
3Ka Kaíni xáni ikiani
jarharesti jurhenkuani
ka xáni ikiata jimpo
atasti uántikuni erachi jémpani.
Ka ísï jámani ima jamperi uarhisti.
4Parhakpeni anapueri jimpo
ma parhakpeni iurhentpespti,
ka ménteru jurhenkua p'íp'ant'aspti
jimpoka Noéni ima íntskuspka míakua
ka jánhastani néna úni teparini ma.
5Imani jurhiatekua
enkaksï iretecha tánkorhentapka
nósesi ampe uékani únhani,
Diósï kakonhastaaspti
ka míakua jukukua Abranini erakuspti
imani enka kaxumpitipka
ka Diósïni japantiru
nómpema arhikua jukaspti
na uék'i Diósï kurhakupka, ts'ék'uni,
eska atapirinka uántikuni uáp'ani.
6Imani jurhia
enka Diósï k'amak'uaka
imechani enkaksï nósesi ampe úk'a
jurhenkua Lótini p'íp'ant'asti
máteru kaxumpitini ma,
ka no jiáretasti eska kurhipirinka
enka iúmu iretecharhu
chpíri uekorhepka.
7Jimposï útasï sïraani jati
jimesï enka nónema irekaka,
amanhech'akua no úsïnti ninini
ka etukueri úkata ma jima jarhasti
enka uantantani jaka
eska jarhaspka nema
enka no jakak'upka,
8Jimpoka jurhenkuani jarharespka
imaksï nóteru ústi
sési ampe jurhenkorheni,
ka míantskua máksï jurak'umenhasti
enka míatarakua méka
eskaksï nósesi ampe úska.
9Ka jurhenkua,
jimini ménterueni arhistakuasti
imechani enkaksï marhuakuk'a.
10Jakobuni xanhari jatsirasti
imani enka kaxumpitika
imani enka erachi jémpani
sïpakorhekuni jámempka
jimpoka ima kánekua ikiakusïrempka
Diósïri juramukuani exerasti
ka mítetarasti pímpinhasï ampe
ka íntskusti
eska sési ánchekorheni japirinka
ka kánekua sési maiamuntasti
enka kuatarempkia
xáni ánchekorheni,
11jarhuatasti
enkaksï jukari ánchetani jarhempka
ka kánekua jatsikorhekua íntskusti,
12kuáp'esti
imeri ikiatspirichani jinkuni,
kuách'akusti
enkaksï ima uékempka atani
ka antaraspti jima
enka ts'unhamu jápka uarhiperata
ísï jámani xarhataspti
eska p'amok'perata
sánteru uinhapekueska.
13Jurhenkua,
Joseni nómeni jurarkuspti,
imani kaxumpitini
enkaksï atarantapka,
ka k'amanharhintskua kéntitakuspti,
14pámpetaspti enka ónhakata jápka
ka no jima jurarkuspti ónhakata
ka jamperi irechetarakua íntskusti
ka uinhapekua íntskuspti
eska antaapirinka imeri ikiatspirichani,
xarhataspti
eskaksï ima chkuántiraxapka
enkaksï arhiparhatani jápka
ka méntkisï anapu k'érikua íntskusti.
Israeli jurhenkua jimpo uéakuntaspti
15Jurhenkua jimposï
chéti ireta kaxumpiti úpti sïpakorhentani
imani k'uiripu enka no arhikua jukaka,
enka úpka sïpakorhekuni
imani iretani enka jupikatini jatsipka.
16Moisesini
álmarhu jamperi incharhespti,
imani enka chéti jántspirika,
ka milagruecha jimpo
ka sési ampe xarhataparini
úspti irecha chérhekatechani jakuani.
17Chéti ireta kaxumpitini
sési maiamuntaspti
enka xáni nósesi nitamakorhepka,
ka kánekua sési jásï
xanhari jatsiraspti,
jurhiakua k'umantskarakusïrempti
ka chúrekua
jóskueni t'íntskarakusïrempti.
18K'éri japunta charhapitini
xanharaparini parhimetarasti
ka urhekupasti jimesï nirani
enka itsï xáni nósesi nirani jápka,
19ka imeri ikiatspirichani
umirhukuasti,
ka tátsekua p'ímantaaspti
na uék'iksï antameratini jápka.
20Ka ísï jámaniksï
kaxumpiticha pakatakorhesti
ikikurhicheri jatsikorhekua,
ka k'éri ampeksï arhispti
ACHA, chéti pímpinhasï jakankurhikua
ka mátirku iámentuechaksïni
diósmaiamukua arhintasti
jimpokari t'u kuáp'easka:
21Jurhenkua kántichani uantaraasti
ka sapichani uantaraasti.
Currently Selected:
Sabiduría 10: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.