Sabiduría 9
9
Jurhenkorhekua kurhak'orhetarakua
1Jucheti to anapuecheri Diósï,
ACHA p'amok'piti,
t'u enkari chéti uantakua jimpo
iámentu ampe úka,
2enkari chéti jurhenkua jimpo
parhakpeni anapuni úka
ka enkari jurhentaka
néna iámentu ampeni juramukuni,
3ka enka jiáretaka
eska kaxumpekua jinkuni
ka jurhimpitku jámparini
ma parhakpenini juramukuaka
ka eska sési jásï mintsita jinkuni
teruk'ani anhaxurhiaka arhik'utpeni:
4Íntskurini imani jurhenkua
enka t'u jinkuni juramuni jaka
ka ásïrini támu pakata
enkari miiuantak'a chéti uátsïtichani,
5jimpokani ji chéti jántspiriska
enka chéti nana jántspiri uáp'eka,
ísku parhakpeni anapu
ka enkani íni parhakpeni
ískuni terutsemaaka
ka enkani no úk'a kurhankuni
néneski teruk'ani anhaxurhini
ka ampeskiksï juramukuecha.
6Na uék'i xáni jurhentinhani,
nómpema jukaparhasti
eka no imani ampe jurhentiuaka
enka t'u jurhentpek'a.
7T'úrini erakuska
eskani chéti ireteri irecheuaka
ka eskani ji teruk'ani anhaxurhiaka
chéti uátsïtichani jinkuni,
8juramucheskarini
eskakini tiósta ma úcheaka
chéti juáta pímpinhasïrhu
ka kéts'ïtatarakua ma
imani iretarhu enkari irekaka,
ka enkari uénani jámani úskuka.
9T'u jinkuni jarhasti jurhenkua,
enka míteka t'u ampe enka úk'a
ka enka jima jápka
imani jurhia enkari parhakpenini úka,
ima mítesti ampe enkari sési xék'a
ka ampe enka márkueka
chéti juramukuechani jinkuni.
10P'impinhasï auantarhu uératinirini axache,
chéti k'érikuarhu uératinirini axache,
pámpetarini jima enkani ánchekorheni jaka
ka jurhentarini
ampe enkari t'u jaiapanhentak'a.
11Jurhenkua
enka iámu ampe míteka
ka enka iámu ampe kurhankuk'a
imarini míakua jinkuni urhechepaati
iámentu ampe enkani úaka
ka imeri k'érikua jimporini kuách'akuati.
12Jiák'ani k'óruri xénhchaaka
imani ampe enkani úaka,
chéti iretani kaxumpekua jinkuni juramukuaka
ka nitatarheaka jít'uni jima juramuni
enka jucheti táte juramuni jaka.
13Jimpoka nónema míteska
Diósï ampe enka úskuni jarhak'a
Nónema úati eranhaskani
ampe enka ACHA uék'a.
14Parhakpeni anapu mímixekua
nósani uinhapitisti,
ka ménichani jamperi no ísïsïnti
ampe enka eratsenhani jarhak'a,
15Anhanhatakua
álmani k'uetsapekusïnti,
ka kurhankukuani p'amenchatasïnti
jimpoka atsïmueri úkateska
ka jimpoka xáni uáni ampe
eratseni jarhasïnka.
16Parhakpeni anapu ampechi
ts'unhapekua jinkunichi eranhaskasïnka
ka úkua jukasïnti xéntani imani ampe
enka no iáuani jarhak'a.
Ka ¿Nésï úaia auantarhu
anapu ampe xékuntani?
17Imak'usï út'i míteni
imani ampe enkari úskuni jarhak'a
enkari t'u íntskuaka jurhenkua
ka enkari auantarhu uératini axakuk'a
chéti espiritu pímpinhasïni.
18Jurhenkua p'itini
únhasïnti sési jásï xanhari jatani
ka jurhenkorheni
ampe enkari jaiapanhentak'a:
Ka jurhenkua jimpoksï p'íp'anhantasti.
Currently Selected:
Sabiduría 9: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.