San Lucas 4
4
Nóambakiti Jesusini ts'éjkusti
1Jesusi Espiritu Sántuni iámu incharhekorhetini, Jordani iurhekuarhu uératini k'uanhatsentaspti. Ka Espiritu jimesï páspti enga nónema irekaka, 2ka tsimani ekuatse jurhiatekua jima jarhaspti, ka Nóambakiti ts'éjkuspti. Imani jurhiatekuechani Jesusi nómbema arhaspti, ka k'arhimaxaptia. 3Nóambakiti jimajkani arhispti:
–Ekari sési jimbo Diósï Uájpeka, juramuku íni tsakapuni eska kurhinda úkorhentaaka.
4Jesusi arhispti:
–Karakata arhisïndi: “No kurhinda atintku irekanhaati.”#4.4 Dt 8.3.
5Ka tátsekua nóambakiti iótakuarhu uératini, sóntku iámendu parhakpeni anapu iretechani exeraaspti, 6ka arhispti:
–Íntskuakakini iámu juramukua, ka inde k'érati iretecheri k'érikua. Jimbokani ji intsïnhaska, ka ji íntskuaka néni engani ji uékaaka. 7Ekarini tinguixurhicheska, iámu ambe chétiuati.
8Ka Jesusi arhispti:
–“Karakata jarhasti: Chéti Acha Diósïniri k'éri ambe arhiaka ka imantku marhuaku.”#4.8 Dt 6.13.
9Tátsekua Nóambakiti Jesusini Jerusaleni páspti, ka k'éri tióstarhu, sánderu iótakuarhu karhataspti ka arhini:
–Ekari sési jimbo Diósï Uájpeka, ixu uératini k'uanikurhi; 10jimboka karakata ísï arhisïnga:
Diósï juramuati eskaksïni imeri ánjelicha
kúajchakuaka ka exenksïni jarhani.
11Nómari tsakapurhu téksarhutaaka,
jimbokaksïni jupijtatini páaka.#4.10-11 Sal 91.11-12.
12Ka Jesusi arhispti:
–Ístu karakata arhisïndi: “Ásï jama chéti Acha Diósïni ts'éjkuni.”#4.12 Dt 6.16.
13Enga Nóambakiti nóteru jánhaskapka nénateru Jesusini ts'éjkuni, sóndi kéndikukuspti.
Jesusi Galilea uénasti ánchekorheni
14Jesusi Galilea k'uanhatsentaspti, Espiritu Diósïri uinhapekuani iámu incharhekorhetini, ka iápuru jimesï imeri ambe uandanhasïrempti. 15Ka ima iretecharhu k'umanchekua tángorhentskuecharhu jurhentpesïrempti, ka iámenduechaksï k'éri exesïrempti.
Jesusi Nasareti jarhasti
16Jesusi Nasareti niraspti, jima enga ima k'uiripepka. Ka eska na p'indekua jatsipka, sábadu k'umanchekua tángorhentskuarhu inchaspti, ka arhintani jauaraspti. 17Diósïri uandari Isaiasiri karakata intsïnhaspti eska arhintapiringa. Ka enga na karakatani p'irakupka, terunharhispti jima enga ísï karakata jaka:
18“Acheri Espiriturini incharhetixati,
jimbokarini míndaska eskani no
jatsikorherichani ambakiti aiangperakua pákuauaka;
axastirini ónhakatechani aianguani eskaksï sésikua
intsïnhaaka irentani, ka eskani pátenharhichani éskatarantauaka;
ka kuájpeani imechani engaksï jatajchakukorheni jaka;
19ka uandantani eska Acheri sési jásï uéxurhini janoskia.”#4.18-19 Is 61.1-2 (gr.); La última frase del v. 18 es de Is 58.6. Los pasajes citados forman parte de los poemas referentes al siervo del Señor (cf. También Is 42.7; 49.9).
20Tátsekua Jesusi karakatani irhintaspti, k'umanchekua tángorhentskuarhu anapu jarhojpirini íntskuntaspti ka uaxakantaspti. Iámendu enga xáni jima janhapka jatsikueratixaptiksï exeni. 21Ka ima ísï uénaspti uandani:
–Inde ambe, engajtsï k'amaraka kurhani iásï úkorhestia.
22Iámenduechaksï Jesusini sési uandatsesïrempti ka ískuksï pakareratixapti enga xáni sési jásï ambe uandempka. Ka kurhamarhperasïremptiksï:
–¿Andi no ísï Jose uájpe?
23Jesusi arhiaspti:
–Ísïmendujtsïni arhiakia jamberi: “Tsinajpiri, t'úchu urheta tsinakorhe.” Kájtujtsïni arhiaka: “Ambe engani jucha míteka eskari Kafarnaumi úska, ixujtu u chéti iretarhu.”
24Ka chúngutaspti uandani:
–Ísïsti eska nóma Diósïri uandari imeri iretarhu sési eronhantasïnga. 25Ísïsptimendu, Israeliksï uánekua uarhiti tsîndicha jarhaspti, imani jurhiatekuechani jimbo enga Diósïri uandari Eliasï irekani jápka, enga tanimu uéxurhini ka terujkani no janipka ka enga kánekua k'arhimakua japupka. 26K'óru, Eliasï nóma tsîndi Israeli anapu jinguni axanhaspti, ka Sarepta anapu ma jinguni axanhaspti, Sidoni no iauani jarharetini. 27Ka ístuksï Israeli uánekua xúta jukarhekorhericha irekaxapti, jimajkani isï enga Diósïri uandari Eliseo jima irekani jápka, enga úpka, Naamanijku ambakeranhastaspti, ima enga Síria anapuepka.
28Íni ambeksï kurharini, iámendu engaksï k'umanchekua tángorhentskuarhu jápka kánekuaksï ikiaspti. 29Ikiatku anhaxurhinhaspti ka Jesusinksï petaataspti, ka jimaksï páspti enga sánderu iótarhukurhapka, imani juátarhu enga imecheri ireta jaka, ka jima uératinksï uekopani uéksïrempti. 30K'óru Jesusi terujkani ísï nitamakuaspti ka jarhareantaaspti.
Acheti ma enga nósesijasï espiritu incharhetini jápka
(Mc 1.21-28)
31Jesusi Kafarnaumi kétsemaspti, imani ireta enga Galilea anapueka, ka sábaduechani jurhentpesïrempti. 32Ka ísku pakareranhasïrempti exeparini eska ima na jurhentpempka, jimboka jarhamekua jinguni uandasïrempka.
33K'umanchekua tángorhentskuarhu jarhaspti acheti ma enga nósesijasï espiritu incharhetini jápka, ka ima uinhachaspti:
34–¡Jurajkujtsïniata! ¿Amberi uéksïni juchantsïni jinguni, Jesusi Nasareti anapu? ¿Jurhaskijtsïni k'amajkuni? Jíkini míteska, ka míteska eskari Diósï Uájpa pímbinhaxetiska.
35Jesusi nóambakitini ísï arhiparini xukajchaspti:
¡Pínasku ja ka uérhentsï indeni!
Jimajkani nóambakiti achetini jima terujkani k'uanintskaspti iámenduechani japarini, uérhentaspti ka nómbema nósesi úkuspti. 36Ka iámenduechaksï chérakorhespti, ka arhijperasïremptiksï:
–¿Ambe jásï uandakueski inde? Enga juramukua ka uinhapekua jinguni nósesi járhati espirituechani juramukuajka, ¡Ka nóambakitichaksï úsïndi uérhpentani!
37Ka jimesï Jesusiri ambeterku uandanhaxaptia.
Jesusi Simoniri tarhampirini ambakerantasti.
(Mt 8.14-15; Mc 1.29-31)
38Tátsekua Jesusi k'umanchekua tángorhentskuarhu uéntatini Simonio inchaspti. Ka jima Simoniri tarhampiri kánekua tinharaxapti, ka kómarhisptiksï Jesusini eska ambakerantapiringa. 39Jesusi andarheraspti ka k'utitsetini tinharakuani xukaspti, ka tinharakua jurajkuspti. Ka sóntku jauaraspti, ka marhuakuaxaptia.
Jesusi uánekua p'amenchatichani ambakerantaasti
40Enga na jurhiata ínchajtsïkupkia, iámendu engaksï xáni mámaru járhati p'amenchati jatsiapka, Jesusinksï pákuaspti; ka mándani arhispti p'ájtsïkuani, ka ambakerantaaspti. 41Uánekua ima p'amenchatichajtuksï nóambakitichani uérhekorhentaspti, ísïksï uinhachaparini:
–¡T'úri Diósï uájpeska!
Ka Jesusi nóambakitichani xukaasïrempti, ka no jiáretaasïrempti eskaksï uandapiringa, jimbokaksï nóambakiticha mítespka eska ima Krístuespka.
Jesusi k'umanchekua tángorhekuarhuecharhu uandantasti
(Mc 1.35-39)
42Enga na erandepkia, Jesusi iretarhu uéakuspti, ka jima niraspti enga nónema jámempka. K'óru uáni k'uiripu niraspti jirinhantani. Nóksï jiánguntasïrempti, 43ka Jesusi arhiasïrempti:
–Uétarhesïndi eskani ambakiti aiangperakuani; enga Diósïri irechekueka máteru iretechantuni aianguauaka, jimbokani indeni niátanisïni axanhaka.
44Jesusi uandakuani judiouecheri k'umanchekua tángorhentskuecharhu aiangpepasïrempti.
Currently Selected:
San Lucas 4: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
